Kaiasada​—E Kak Wiawi Pwehki Pweinen Pweipwei Sapahlo

Rahnen Katamano kihong kitail ahnsou mwahu ehu en medemedewe duwen kapai kan ni ahnsou kohkohdo me kak pweida pwehki pweinen pweipwei sapahlo, me duwehte kaiasadahn me melahr akan. Siohwa sohte ketin kupwurehda me aramas en mehla. Ihme kahrehda ehu pepehm me keieu kamedek ong kitail iei pahtouki mehlahn emen re poakohng. (1Kor 15:26) Sises ketin medengkihla ni eh mahsanihada sapwellime tohnpadahk ko ar sengisengki mehlahn Lasarus. (Sohn 11:33-35) Pwehki Sises eh kin ketin wia kasalepen Semeo ni unsek, kitail kak kamehlele me Siohwa pil kin ketin medengki mahsanih atail kin pahtoukihla mehlahn emen me kitail poakohng. (Sohn 14:7) Siohwa uhdahn ketin kasikasik ahnsou me e pahn ketin kapwurehdo sapwellime ladu kan sang mehla, oh kitail en pil iang kasikasik met.​—Sohp 14:14, 15.

Pwehki Siohwa iei Koht men me kin soandi mwahu, e pwung en kamehlele me kaiasada pahn wiawi ni ahl ehu me soandi mwahu. (1Kor 14:33, 40) Kohla ni mehla kan sohla pahn wiawi, ele e pahn mie koasoandi en kohla kasamwo me iasada kan. Ke kin doudouloale duwen kaiasadahn me melahr akan, keieu ni ahnsou kapahtou kan? (2Kor 4:17, 18) Ke kin kalahngankihong Siohwa eh ketikihda pweinen pweipwei sapahlo oh kasalehda nan Paipel me me melahr akan pahn pwurehng mourda?​—Kol 3:15.

• Ihs rehn kompoakepahmw kan oh kisehmw kan me ke keieu kasikasik en pwurehng kilang?

• Ihs rehn irail kan nan Paipel me ke keieu men tuhwong oh koasoiong?