MOMOUR NIN DUWEN KRISTIAN KEI

Wiepe Kapw en Mihting en nan Wihk

Tepida nan January 2018, e pahn mie mehn onop kan ong mihting oh kilel oh kisin kasdo kan ong onopki study edition en New World Translation of the Holy Scriptures (nwtsty) sang nan online, mehnda ma study edition saikinte kohda ni amwail lokaia. Se uhdahn koapworopworki me met pahn kamwahwihala amwail kin kaunopada ong mihting kan. Kesempwal sang met, wiepe wet pahn kakerenihiukalahng Samatail limpoak, Siohwa!

MEHN ONOP KAN

Mehn onop kan kin kasalehda tiahk, eden sahpw, oh lokaia kan me pahn sewese kitail en wehwehkihla ni pwung iren Paipel tohto.

Madiu 12:20, NW

Wihk ehu me pahn kereniong kunla: Lamp me aramas kin kalapw doadoahngki mahso iei kisin sah kan me kin audaudki lehn olip. Wihk me wiawihkihda plaks, e kin ihkada leho pwe kisinieio en wie lullul. Lepin lokaiahn Krihk “wihk ehu me pahn kereniong kunla” ele kak wehwehki wihk ehu me ediniei kin kohkohda pwehki mihete ekis wihk luhwe ahpw kisinieio luhluwetla de kunlahr. Kokohp en Aiseia 42:3 kohpada duwen sapwellimen Sises pepehm en poakehla aramas; e sohte pahn ketikihsang kisin koapworopwor kis me luhwehdi ong aramas karakarahk akan oh me meteikan kin mwamwahliki.

Madiu 26:13, NW

Mehlel: Lokaiahn Krihk, a·menʹ, kin kohsang ʼa·menʹ ni lokaiahn Ipru, me wehwehki “en wiawi,” de “e mehlel.” Sises kin ketin kalapw doadoahngki lepin lokaia wet pwehn tepikihda koasoi pwoat, inou ehu, de kokohp ehu, pwehn kasansalehda me ire ko uhdahn mehlel oh likilik. Mie me kin nda me Sises kelehpw me kin ketin doadoahngki “mehlel” de amen ni ahl wet nan pwuhk sarawi kan. Ni eh kin ketin kapwukapwurehiong (a·menʹ a·menʹ), nin duwen me pwuhken Rongamwahu en Sohn kasalehda, sapwellimen Sises mahseno kawehwehdi “ni mehlel.”—Soh 1:51.

KILEL OH KISIN KASDO KAN

Kilel, mahlen, kisin kasdo kan me sohte ngile oh kasdo en mahlen kan kin kasalehda ekei oaritik kan me kileldi nan Paipel.

Bethphage, the Mount of Olives, and Jerusalem

Kisin kasdo mwotomwot wet kin kasalehda ahl ehu sang palimese kolahng Serusalem, sang ni kisin kahnimw me rahnwet kin adaneki et-Tur, re medewe me wasao Pedpeiti me mi nan Paipel, e wia kisehn wasa ileile ko pohn Nahna Olip. Pedani kin mi palimesehn Pedpeiti ni keilen palimesehn Nahna Olip. Nan Serusalem, Sises oh sapwellime tohnpadahk ko kin kalapw pweidi nan Pedani, rahnwet e kin adaneki kahnimw en el-ʽAzariyeh (El ʽEizariya ), ni lokaiahn Arepia e wehwehki “En Lasarus Wasahn Kousoan.” E sansal me Sises kin ketiket ni imwen Marda, Mery, oh Lasarus. (Md 21:17; Mr 11:11; Lu 21:37; Soh 11:1) Ni ar kin seiloak sang imwarailo kolahng Serusalem, ele Sises kin ketin idawehn ahlohte me sansalda nan kisin kasdo wet. Nan Nisan 9, pahr 33, ni ahnsou me Sises ketin dakedake kisin dongki men kohdalahng pohn Nahna Olip kohkolahng Serusalem, ele e ketisang Pedpeiti, ideidawehn ahlo me kohla Serusalem.

Ahl sang Pedani kolahng Pedpeiti
Pedpeiti
Nahna Olip
Wahu en Kidron
Tehnpaso Pohn Nahna

Mete ni Tihn Keimwen Neh

Met iei kilel en tihn keimwen nehn aramas men me mete ehu posdiong ie oh uwen reirei en meteo 11.5 cm (4.5 in.). Tihn keimwen neh wet dierekda nan pahr 1968, ni ahnsou me sounroporop kei weweir pwoar ehu ni paliepeng en Serusalem. Tihn keimwen neh wet mihmihte sang ni mwehin mehn Rom kan. Roporop wet kadehdehda me ele mete me re kin doadoahngki pwehn pasurdiong aramas pohn tuhke pwoat pwehn kemehla. Mete wet ele duwehte mete kan me sounpein Rom kan doadoahngki pwehn pasurdiong Sises Krais pohn tuhkeo. Tihn keimwen neh wet dierek nan kisin koakon takai ehu me adaneki ossuary, wasa me tihn aramas mehla men kin nekinekdi mwurin paliwaro eh mwerpeseng. Met kasalehda me emen me kamakamala pohn tuhke pwoat kak seridi mwurin mwo.—Md 27:35.