Ke Tamataman?

Ke wadekala mwahu Kahn Iroir pwukat? Kitail kilang ma ke kak sapengala peidek kan me kileldi pah:

Ia pahn atail wiewia ong me keidi kan?

Kitail kalahnganki arail pwoson, ahpw, kitail sohte kin kapinga irail daulihala. Kitail kin soikala nohn “kapinga meteikan.” (Sud 16) Kitail sohte kin idek rehrail peidek kan me pid duwen arail koapworopwor.​—w20.01, pali 29.

Dahme pahn kamehlelehiong uhk me Siohwa kin ketin mwahngih iuk?

Paipel kasalehda me e kin ketin mwahngih duwen kowe mwohn omw ipwidi. Oh e kin ketin karonge omw kapakap akan. E ketin mwahngih omw madamadau oh dahme mi nan omw mohngiong, oh omw wiewia kan kin kaparanda de kansensuwedihala ih. (1 Kron. 28:9; Lep. Pad. 27:11) E ketin kakerenihiukala reh.​—w20.02, pali 12.

Karasepe dah kan ong iahd ahnsoun koasoi oh dehr koasoi?

Kitail kin perenki koasoia duwen Siohwa. Kitail kin koasoi ma kitail kilang emen tepida wia mehkot me sapwung. Elder kan kin koasoi pwehn kihda kaweid me anahn. Kitail sohte kin koasoi pwehn (ndahda mehkot) duwen oaritik kan ong doadoahk en kalohk me keinapwidi nan sapwatailo. Kitail sohte kin koasoia soahng rir kan.​—w20.03, pali 20-21.

Ia duwen loukust kan nan Soel irelaud 2 eh weksang me mi nan Kaudiahl irelaud 9?

Soel 2:20-29 mahsanih me Koht pahn ketin kapwurehsang loukust kan oh ketin inoukihda en kapwungohng irail mehkan me sohrala. Mwurin mwo, Koht pahn ketin kamwerehdi sapwellime manaman. Mwuhr mepwukat pweida ni ahnsou me Papilon kalowehdi Israel. Kaudiahl 9:1-11 kawehwehda irail me keidi kan me karasaraskihong loukust kei nan atail ahnsou ni ar kin kalohki sapwellimen Koht kadeik ong koasoandi suwed wet, kahrehiong irail kan me kin utung koasoandi wet en uhdahn soansuwedkihda.​—w20.04, pali 3-6.

Ihs me nanmwarki en paliepeng rahnwet?

Russia oh wehi kan me kin utung ih. Re uhwongada sapwellimen Koht aramas akan, keinapwihdi atail doadoahk en kalohk, oh kin kailongki Sounkadehde kan. Nanmwarki en paliepeng kin siaiong nanmwarki en palieir.​—w20.05, pali 13.

Ia duwe, “wahn sapwellimen Koht manaman” kin pidadahte irair kaselel kan me kileldi nan Kalesia 5:22, 23?

Soh. Sapwellimen Koht manaman kin sewese kitail en kakairada irair mwahu teikan, me duwehte pwung. (Ep. 5:8, 9)—w20.06, pali 17.

Ia ehu keperpen kihda nan internet me pid kowe oh kepwe kan?

Dahme ke kihda ele pahn kasalehda me ke kin suhsuweiki pein kowe, kaidehn me ke aktikitik.​—w20.07, pali 6-7.

Dahme sounkalohk Kristian kan kak sukuhlkihsang sounlaid koahiek kan?

Irail kin doadoahk ahnsou oh wasa me re kak koledi mwahmw. Re kin kaiahnda pwehn doadoahngki kepwehn doadoahk me mwahu ong laid. Oh re kin eimah doadoahk ni irair kan ar kin wekila. Kitail pil kak wia duwehte met nan atail doadoahk en kalohk.​—w20.09, pali 5.

Ia ekei ahl kan me kitail kak sewese neitail tohnsukuhl en Paipel kan en kalaudehla arail limpoak ong Siohwa?

Kitail kak kangoangehkin irail en wadek Paipel rahn koaros oh doudouloale dahme re wadek. Oh kitail kak padahkihong irail en kapakap.​—w20.11, pali 4.

Ihs me iang pidada nan koasoio: “Ih pil duwen koaros ar pahn iasada pwehki Krais.” —1 Kor. 15:22.

Wahnpoaron Pohl sohte ndinda me aramas koaros pahn iasada. E koasoakoasoia Kristian keidi kan, irail me ‘sarawihkilahr arail miniminiong Krais.’ (1 Kor. 1:2; 15:18)​—w20.12, pali 5-6.

Dahme me keidi kan pahn wia mwurin arail ‘wekidekla ni marep tehieu, erein ngilen kaimwiseklahn sowi’?​—1 Kor. 15:51-53.

Irail pahn iangih Krais apwaliheki aramas akan sokon mete. (Kaud. 2:26, 27)​—w20.12, pali 12-13.