Ke Kin Ese Duwen Met?
Dahme kahrehda Paipel kin kapwurehiong lepin lokaia kan?
EKEI ahnsou sounnting en Paipel kan kin kapwurehiong lepin lokaia kan. Medewehla kahrepe siluh me sounnting kan wiahki met:
Ahnsou me e ntingdi. Nan Israel mahso, pali laud en aramas akan sohte naineki pein neirail copy en Kosonnedo. Irail kin kalapw rong wadawad en Kosonnedo ni ar wehio kin pokonpene nan impwal sarawio. (Deud. 31:10-12) Mwein mie soahng kan me kin kerempwa arail rongorong oh kesikesihnen erein awa kei nan pokono. (Neh. 8:2, 3, 7) Nan soangen ahnsou ko, en kapwurehiong lepin lokaia ko pahn kahrehiong en mengei ong aramas ako en tamataman iren Paipel kan oh kapwaiada. En kapwukapwurehiong ekei lepin lokaia pahn uhdahn sewese irail en tamataman ire oaritik kan duwen sapwellimen Koht kosonned kan.—Lip. 18:4-22; Deud. 5:1.
Mwomwen eh ntingdi. Ekei wasa nan Paipel ntingdi ni mwomwen koul kei. Karasepe, pwuhken Melkahka kan, Melkahkahn Melkahka kan, oh Koul Kedepwidepw kan. Ekei pak, koul ko kin kapwukapwurehiong lepin lokaia kan oh sewese me rongorong kan en wadlikihala lokaia ko. Karasepe, tehk lepin lokaia kan nan Melkahka 115:9-11: “Kumwail aramas en Israel kan, kumwail likih KAUN-O. Ih me sawasapamwail, oh silepamwail. Kumwail sapwellimen Koht samworo kan, kumwail likih KAUN-O! Ih me sawasapamwail, oh silepamwail. Kumwail koaros me kin kaudokiong KAUN-O, kumwail likih. Ih me sawasapamwail, oh silepamwail.” En kapwukapwurehiong lokaia ko ele pahn sewese sounkoul ko en tamataman.
Anahnepen en kasalehda ire kesempwal kan. Ekei pak sounnting en Paipel kan kin kapwurehiong lepin lokaia kesempwal kan. Karasepe, ni Siohwa eh ketin mahsanihong mehn Israel ko en dehr tungoale nta, e ketin doadoahngki Moses en kapwukapwurehiong kahrepe kan. Koht ketin kupwurki kasalehda ni sansal me mour mi ni nta. (Lip. 17:11, 14) Mwuhr, ni wahnpoaron ako oh me mah kan nan Serusalem ar ntingihedi dahme Kristian kan anahne soikala pwehn kaperenda Koht, irail pwurehng kasalehda ni sansal anahnepen liksang nta.—Wiewia 15:20, 29.
Mendahki Paipel kin kapwurehiong lepin lokaia kan, met sohte wehwehki me Siohwa ketin kupwurki kitail en wiakihla tiahk ehu en kapwukapwurehiong iren Paipel kan. Karasepe, Sises mahsanih: “Ni amwail pahn kin kapakap, dehr pwurupwurehng ndinda soahng tehieu.” (Mad. 6:7) Ih eri ketin padahkihong kitail soahng kan me kitail kak kapakapki. (Mad. 6:9-13) Eri mendahki kitail sohte kin pwurupwurehng ndinda soahng teieu nan atail kapakap, kitail kak pwurehng nda soangen ire kan nan atail kapakap.—Mad. 7:7-11.
Eri mie kahrepe mwahu me Mahsen en Koht kin kapwukapwurehiong lepin lokaia kan. Met iei ehu ahl me atail Sounkaweid Lapalapo kin ketin padahki kitail pwehn wia kamwahupatail.—Ais. 48:17, 18.