Ke Kin Ese Duwen Met?

Dahme samworo kan ni tehnpas sarawio nan Serusalem kin wiahiong ntahn mahn akan me re kemehla pohn pei sarawio?

SOUNPAR koaros, samworo kan nan Israel mahso kin meirongkihla mahn kid kid kei pohn pei sarawio nan tehnpas sarawio. Soupoad en mehn Suhs kan me adaneki Josephus ntingihedi me sihmpwul daulih 250,000 kin kamakamala ni rahnen Pahsohpao. Eri nta laud kin keredi ni pei sarawio. (Lip. 1:​10, 11; Nemp. 28:​16, 19) Dahme kin wiawihong nta ko?

Saintis kan me kin kasawih dipwisou en mahs kan weirada wasa kan me kapil tehnpas sarawio me Erod wiahda. Irail diarada wasa me nta ko kin kohieila sang tehnpas sarawio.

Tehk soahng riau me kin sewese kamwakele pei sarawio:

• Pwoahr kan ni pei sarawio: Pwuhken mahs ehu duwen kosonned oh tiahk kan en mehn Suhs kan me ntingdi mwurin pahr 200 kawehwehda ia duwen arail kakusala pihl samin sang ni pei sarawio. Pwuhko koasoia me mie pwoahr riau ni keimwen pei sarawio. Ntahn mahn ko me meirongala oh pihl me re kin doadoahngki pwehn kamwakelehkihda pei sarawio kin kohdihla nan pwoahr ko oh pei kohdihla nan warawar kan me kohieilahng Wahun Kidron.

  Sounkasawih dipwisoun mahs kan pwungki dahme ntingdi nan pwuhko. Pwuhken The Cambridge History of Judaism kadehdehda me mie warawar kan me karanih tehnpas sarawio me ntahn meirong kan oh pihl kin kusieisang ni tehnpas sarawio.

• Diren pihl: Samworo kan anahne pihl laud pwehn kamwakelada taht en pei sarawio oh pil sewese nta ko en kohdihla nan pwoahr ko me kohieila nan warawar kan. Pwehn wia met, irail kin alehsang nan kahnimwo pihl me re anahne. Pihl me kohdo nan tehnpas sarawio kin kohsang nan paip kan, dahu kan, dengk en pihl kan, de lepin leh kan en kahnimwo. Saintis me adaneki Joseph Patrich koasoia me e mwomwen me sohte pil ehu tehnpas sarawi ni ahnsowo me ahneki soangen koasoandi mwahu wet en kakusolong pihl mwakelekel oh pil kakusiei pihl samin sang tehnpas sarawio.