Impwal Ehu Mehn Kaudok

KE ESE soahngen ihmw da ehu met? Met impwal tohrohr ehu ihmwen kaudok ong Siohwa. Ihmwet adaneki tapernakel, de impwal ihmwen kaudok. Aramas kan kaimwisekela ihmw wet sounpahr ehu mwehrin arail pidoi sang Isip. Ke ese ihs me pilahniehda mwomwen ihmw wet?

Siohwa me pilahniehda ihmw wet. Ni ansou me Moses kohdahla pohn Dohl en Sainai, Siohwa padahkiong Moses duen mwomwen ihmw wet me pahn kaukauwda. E padahkiong Moses me ihmw wet en wiawihda ni mwohmw ehu me pahn mengei en kamwermweridi. Ni mwohmw wet irail kak kamwerehdi ihmwo oh wahla ekis wasa, oh pil pwurehng kauwada. Eri ni ansou me mehn Israel pahn mwekid sang ehu wasa oh kohla ehu wasa nan sahpwtehn, irail kak weuwah ihmwen kaudok wet.

Ma ke pahn kilangwong nan ihmw wet ke kak kilang ehu pere me tikitik, oh mie ehu kohpwa loale. Kohpwa wet adaneki kohpwa en inou. Pohn kohpwa wet mie tohnleng riemen wiawikihda kohl, pali riau. Koht pil pwurehng intingihda Kosonned Eisek ko pohn takai patapat riau, pwehki Moses pwalangpesang keieu me e intingihdao. Oh takai patapat riau wet kin mihmi nan kohpwa en inou. Pil dahl ehu me audaudki manna pil mi nan kohpwao. Ke tamataman dahkot manna?

Rien Moses ohl, Aaron, iei me Siohwa pilada pwen wia samworo lapalap. Ih me kin kahluwa aramas kan kaudokiong Siohwa. Oh nah pwutak kan kin sewespen samworo.

Eri kilang pere laud nan impwalo. E laudkisang me tikitiko pak riau. Ke kilang kohpwa me mi loale, wasa me idiniei kohsang ie? Met iei pehi sarawi ehu wasa me samworo kan kin isik me pwoh mwahu me adaneki mehn kapwohtik. Oh ke pil kilang deupen lamp en lamp isuh. Oh kasiluh en dipwisou me mi nan pere wet iei tehpel ehu. Pohn tehpel wet mie lopwon en pilawa 12.

Likin ihmwen kaudoko ke pahn kilang lapalahn deupen pihl ehu, me diren pihl. Samworo ko kin doadoahngki met pwen widen mehkan oh pil duhduhki. Pil mie ehu pehi sarawi laud likin ihmwen kaudoko. Pohn pehi wet mahn akan me kamakamala kin isihs meirong ong Siohwa. Impwal wet kin mi nan warengen ihmwen aramas teikan koaros, oh mehn Israel kan kin wiahda ihmwarail impwal ko kapilpene.