Lih Kommwad Riemen

NI ANSOU me mehn Israel kan kin lelohng apwal, irail kin likwerlahng Siohwa. Siohwa kin kapwaiada arail kapakap oh ketikihong irail arail kaun aima oh kommwad akan, Paipel kin kahdaneki irail kaun pwukat sounkopwung. Sosua me keieun sounkopwung, oh ekei irail sounkopwung mwehrin ih iei Odniel, Ehud oh Samkar. Ahpw riemen me pil sewese wehin Israel iei lih riemen. Emen adaneki Deporah oh emen Sael.

Deporah lih soukohp men. Siohwa ketikihong ih en wehwehki mehkan me pahn pwarada mwowe, ah lih menet kin padahkiong aramas akan dahme Siohwa mahsanih. Deporah pil sounkopwung men. E kin mwohndi pahn tuhke apwoat me duwehte nih pohn kisin dohl, oh aramas kan kohdo reh pwen ale sawas ong arail kahpwal kan.

Ansouwet Sapin me nanmwahrki en Kenaan. E wereneki weren nan sahpw en mahwin me 900. Nah karis en sounpei me inenen kehlail oh mehn Israel tohto kin uhpaiong oh wiahlahr ladu kan en Sapin. Nain Nanmwahrki Sapin kaun en sounpei ede Sisera.

Ehu rahn Deporah ileklahng Sounkopwung Parak, oh indaiong ih: ‘Siohwa mahsaniehr: “Alehda ohl 10,000 oh kahluwa iraillahng Nahna Tapor. Wasao I pahn kihong uhk Sisera. Oh I pahn kihong uhk kana powehdi ih oh nah sounpei ko.”’

Parak ahpw indaiong Deporah: ‘I pahn kohla ma ke pahn iang ie.’ Deporah eri iang ih kohla, ahpw e indaiong Parak: ‘Ke sohte pahn ale ahdamwahu ki kana wet, pwehki Siohwa pahn kihong Sisera nan pehn lih men.’ Oh iet me wiawiehr.

Parak kohieisang pohn Nahna Tapor pwen peiong nain Sisera sounpei kan. Ansouohte Siohwa kahrehda lapake ehu en kohda, oh sounpei en imwintihti tohto mehla. Ahpw Sisera doudi sang pohn dakepe oh tangdowei.

Mwehrin ansoukis Sisera eri kohdo nan impwal ehu ihmwen Sael. Liho luhke ih en pidelong, oh kihong ih milik. Met kahreong ih en men meir, oh ansoukis mwadang mwuhri e meirla. Sael eri alehda apwoat lapalahn mete oh kihong ni mwoangen ohlo oh pasurdiong ie. Mwuhri, ni ansou me Parak kohdo, liho kasaleong ih Sisera me mehlahr! Eri met ke kak kilang me ahn Deporah koasoai pweidahr.

Mwuhri ekis Nanmwahrki Sapin pil kamakamala, oh mehn Israel kan ahniki popohl oh meleilei ong ansoukis.