Ruhd oh Naomi

NAN Paipel ke pahn diar ehu kisin likou kisehn Paipel me adaneki Ruhd. Met iei poadoapoad en peneinei ehu me memour ni ansou me mehn Israel kan kin mi pahn epwelipen sounkopwung ko. Ruhd peinakapw me kohsang sahpwen Moap; lih menet kaidehn kisehn sapwellimen Koht wehin Israel. Ahpw ni ansou me Ruhd sukuhliki duen Koht mehlel Siohwa, e tapiada poakong ih laud. Naomi iei lih mah me sewese Ruhd en sukuhliki duen Siohwa.

Naomi lih en Israel men. Ih oh ah pwoud iangahki neira pwutak riemen kohla sahpwen Moap ansou ehu me isihsol nan sahpwen Israel. Kadekadeo rahn ehu ahn Naomi pwoud mehla. Mwuhri nain Naomi pwutak riemen ko pwoudkihda Ruhd oh Orpah. Ahpw mwehrin sounpahr 10, ohl ko mehla. Met kainsensuwed laud ong Naomi oh serepein riemen ko! Dahme Naomi pahn wia met?

Ehu rahn Naomi kosonnediehr me e pahn pwuralahng sahpwe oh kiseh aramas kan. Ruhd oh Orpah men mihmi rehn Naomi, ira eri iang ih kohla. Ahpw mwehrin ansoukis arail kekeid pohn ahlo, Naomi sohpeilahng serepein ko oh inda: ‘Kumwa pwuralahng nan amwa wasa oh mi rehn amwa nohno ko.’

Naomi eri metik oh kamwurala serepein ko. Ansouohte ira tapiada sengeseng, pwehki ira limpoak ong Naomi laud. Ira inda: ‘Soh! Se pahn iang uhk kohla rehn omwi aramas ko.’ Ahpw Naomi sapeng: ‘Kumwa uhdahn pahn pwurala, nai serepein kan. E pahn mwahu ong kumwa en pwuralahng pein amwa wasa.’ Orpah eri tapiada pwuralahng ah wasa. Ahpw Ruhd sohte men kohla.

Naomi eri sohpeilahng Ruhd oh inda: ‘Orpah pwuralahr. Pil kowe pwurala nan ahmw wasa.’ Ruhd ahpw sapeng: ‘Ieremen wiaiong ie I en kohkohla! Mweidong ie en iang uhk. Wasa ke kohla ie I pahn kohla, oh wasa ke mi ie I pahn pil mi ie. Omwi aramas pahn ai aramas, oh omwi Koht pahn ai Koht. Wasa ke mehla ie I pahn mehla, oh iei wasa me I pahn seridi.’ Ni en Ruhd inda met, Naomi sohlahr song en kapwureihlahng pein ah wasa.

Kadekadeo lih riemenet lelahng Israel. Wasao re kousoandi. Ruhd ansouohte tapiada doadoahk nan mwetuwel ehu, pwehki ansoun rahk en wahn parlih. Ohl emen adaneki Poas mweidong serepeino en doadoahk nan ah mwet. Ke ese ihs ahn Poas nohno? Ah nohno iei Rehap sang kahnihmwen Seriko.

Rahn ehu Poas padahkiong Ruhd: ‘I rong duen ahmw kadek oh wiewia mwahu ong Naomi. I ese me kowe kasehla ahmw pahpa oh nohno oh pein ahmw wehi oh duen ahmw kohdo oh mi nanpwungen aramas kei me ke sehse mahs. Siohwa en kapaiuhkada!’

Ruhd eri sapeng: ‘Kowe meid kadek ong ie, maing. Ke wiaiong ie I en insenamwahu sang ni me mwahu kan me ke indaiong ie.’ Poas uhdahn mwahuki Ruhd, oh sohte pwand mwuhri ira pwopwoudla. Met kahreong Naomi en peren kowahlap! Ahpw Naomi pil peren laudla ni ansou me Ruhd oh Poas kaipwidi keieun neira pwutak, me adaneki Oped. Mwuhri Oped wiahla pahpa kalap en Depit, me kitail pahn pil sukuhliki ekis mwuhr.