Kidion oh Nah Ohl 300

KE KILANG dahme wiawi wasaht? Ohl pwukat sounpei kei en Israel. Irail kin dairukedi pwen nim pihl. Sounkopwung Kidion iei ohl me kesihnen limwarail. E kin kilikilang duen arail kin nim pihl.

Kilang mwahu duen wekpesang en ahn ohl akan nim pihl. Ekei kin dairukedihla nan pihlo pwen nim pihl. Ahpw emen me kesihnenda oh pwekada pihl ong auwe, eri ansouohte e kak mwasamwasahn dahme wiawi limwah. Met inenen kesempwal, pwe Siohwa mahsanih ong Kidion en pilada irail kan te me kesihnenda oh nim pihl. Luwe kan, Koht mahsanih, en kapwurpwurala ni ihmwarail. Kitail pahn kilang dahme kahrehda.

Mehn Israel kan mi nan ansoun apwal. Kahrepe, pwehki irail sohte peikiong Siohwa. Mehn Midian kan uhd poweiraildi oh kin wia mehkan me suwed ong irail. Ihme kahrehda mehn Israel kan likwerlahng Siohwa pwen sewese irail, oh Siohwa rong arail sengeseng oh pekipek kan.

Siohwa padahkiong Kidion en kihpene ehu karis en sounpei, Kidion eri kihpene ohl en mahwin 32,000. Ahpw mie ohl 135,000 sang nan karis en imwintihti me kin pelian Israel. Siohwa pil padahkiong Kidion: ‘Tohtohla aramas kan me ke kihpene.’ Dahme Siohwa mahsanihki met?

Pwehki ma mehn Israel kan pahn kana ni mahwin, irail kak lemelemekiong me pein irail me kahrehda kana. Ele re kak lemehda me re sohte anahne sawas sang rehn Siohwa pwen kak kana. Ihme kahrehda Siohwa mahsanih ong Kidion: ‘Padahkiong ohl koaros me masapwehk en pwurala ni ihmwarail.’ Ni en Kidion wia met, ohl 22,000 kohdohn mahwin pwurala ni ihmwarail. Met wehwehki me ohl 10,000 te luluwe me pahn peiong karis en imwintihti 135,000.

Ahpw, rong! Siohwa mahsanih: ‘Ohl kan me ke naineki nohn tohtohla.’ Ih eri padahkiong Kidion en kahrehla ohl kan limwahn kisin pihl oh kapwurehla koaros me dairukedi ni pihlo oh nim pihl. ‘I pahn kihong uhk kana ki ohl 300 te me nim pihl oh ansouohte kak mwasamwasahn,’ Siohwa inoukihdi.

Ansou lelehr pwe ren pei. Kidion eri nehkpesang nah ohl 300 ko ong pwihn siluh. Ih eri kihong emenemen ohl ehu sawih, ehu dahl iangahki ehu mehn ser. Ni luhkepen pwong, irail ahpw kapilpene wasa kan me sounpei imwintihti kan mi ie. Eri, wiahkitehieu, irail peuk neirail sawih kan oh pwalpesang dahl akan me mi rehrail, oh weriwer: ‘Sapwellimen Siohwa kedlas oh ahn Kidion!’ Ni en sounpei imwintihti kan pwourda, irail pingadahr oh masapwehkada. Irail eri tapiada tang, oh mehn Israel kan kana ni mahwino.