Apikeil oh Depit

KE ESE lih masamwahu me kohdohng tuhong Depit? Ede Apikeil. Lih lolalokong men oh e pere sang Depit wia mehkot suwed. Ahpw mwohn atail pahn padahkki met, kitail pahn kilang dahme wiawiong Depit.

Mwehrin Depit tang sang Saul, e rukala nan ehu pwoahr. Rie ohl kan oh ekei kisehn ah peneineio iangala ih wasao. Impan ohl 400 me kohdo iangala ih, oh Depit wiahla arail kaun. Depit eri kohieila rehn nanmwahrki en Moap, oh indahda: ‘Menlau mweidong semei oh inei en mihmi rehmwail lao I pahn ese dahme pahn wiawiong ie.’ Mwuhri Depit oh nah ohl ko tapiada rukuruk nan nahna.

Mwehrin met Depit tuhong Apikeil. Ahn Apikeil pwoud Napal ohl kapwehpwe men. Mie nah sihpw 3,000 oh nah kuht 1,000. Napal pil ohl soh kadek oh lemei men. Ah pwoud Apikeil me inenen masamwahu. Lih menet pil ese dahme pwung en wia. Mie pak ehu me e doarehla ah peneinei sang mehla. Kitail pahn kilang iaduen met.

Depit oh nah ohl akan kin kadek ong Napal. Re kin sewese ih pwe sounpirap kan en dehr pirapehla nah sihpw kan. Eri rahn ehu Depit kadarala ekei nah ohl ko pwen peki rehn Napal en sewese irail. Nain Depit ohl ko kohdo rehn Napal ni ansou me ih oh sewespe kan kin sehk wunen sihpw. Met ehu rahn en kamadihpw, oh Napal kauonopadahr soahngen mwenge mwahu tohto. Eri iet me nain Depit ohl kan indaiong Napal: ‘Se kin kadek ong uhk. Se sohte mwahn pirapehla emen noumw sihpw ko, ahpw se sewese iuk apwali irail. Met, menlau kihong kiht ekis mwenge.’

‘I sohte pahn kihong mwenge soahngen aramas duwehte kumwail,’ Napal inda. Ohl menet inenen lemei, oh e koasoaia soahng suwed kan duen Depit. Ni en ohl ko pwurohdo oh padahkiong Depit duen met, Depit mwakarada. ‘Alehda noumwail kedlas kan!’ e indaiong nah ohl ko. Oh irail tapiada kohla pwen kamehla Napal oh nah kan koaros.

Emen nain Napal ohl ko, me rong dahme Napal inda, kohieila oh padahkiong Apikeil dahme wiawi. Ansouohte Apikeil ale mwenge kei oh kauonopada. Ih eri kihong pohn donkih kei oh tapiada kohla rehn Depit. Ni ansou me e tuhong Depit, e doudi sang pohn dakepe, dairukedi, oh indahda: ‘Menlau, maing, dehr rong me ai pwoud inda. Uhdahn ih pweipwei men, oh e wia soahng kan me pweipwei. Iet kisakis ehu. Menlau ale, oh mahkong kiht pwehki me wiawiehr.’

‘Kowe lih loalokong men,’ Depit sapeng. ‘Ki ahmw wiewia ke ireiehdi sang kamehla Napal pwen pwainkiong ih ah suwed. Kohieila nan ahmw wasa ni popohl.’ Mwuhri, ni en Napal mehla, Apikeil wiahla emen ahn Depit pwoud ko.