Mordekai oh Esder

KITAIL pahn pwuralahng sounpahr kei mwohn Esra kohlahng Serusalem. Mordekai oh Esder mehn Israel riemen me keieu kesempwal nan wehin Persia. Esder lih nanmwahrki, oh nain rien ah pahpa Mordekai me kariaun lapalap nan wehio. Kitail pahn kilang duen pweidahn ire wet.

Ahn Esder pahpa oh nohno mehla ni ansou me e tikitik, oh Mordekai eri apwaliada serepeino. Ahasuerus, nanmwahrki en Persia, ihmwaneki ihmw ehu nan kahnihmwen Susan, oh Mordekai iei emen papah en nanmwahrkio. Eri, rahn ehu ahn nanmwahrkio pwoud Pasdi sohte men peikiong ih, ihme nanmwahrkio piladahr emen ah pwoud kapw pwen wia lih nanmwahrki. Ke ese ihs me e pilada? Ei, serepein kasehlel Esder.

Kilang ohl kalao me aramas kan kin poaridi mwowe? Eden ohl menet Aman. Ih emen lapalap nan Persia. Aman mwahuki Mordekai, me ke kilang mwomwohd wasao, en pil poaridi mwohn ih. Ahpw Mordekai sohte men wia met. E sohte lemeleme me pwung emen en poaridi mwohn aramas suwed menet. Met kahreong Aman en lingeringer. Oh iet me e wia.

Aman padahkiong nanmwahrki likamw kei duen mehn Israel kan. ‘Irail aramas suwed kei oh sohte men peikiong ahmw kosonned,’ e inda. ‘Irail en kamakamala.’ Ahasuerus sohte ese me ah pwoud Esder lih en Israel men. Ih eri rong me Aman inda, oh e wiahda ehu kosonned kamanala me ni rahn ehu mehn Israel kan koaros en kamakamala.

Ni ansou me Mordekai rong duen kosonnedo, e uhdahn pahtoukihla. E ilekila rehn Esder: ‘Ke uhdahn pahn indaiong nanmwahrkio, oh peki reh en doarehla kitail.’ E uhweng kosonned en Persia emen en kohla oh tuhong nanmwahrkio ni soh ale luhk. Ahpw Esder kohieila ni sohte ale luhk. Nanmwahrkio kaula nah sokon kohl ong ih, me wehwehki e sohte pahn kamakamala. Esder luhke nanmwahrkio oh Aman ong ehu sak me e pahn kauonopada. Wasao nanmwahrkio idek rehn Esder dahme e anahne sang reh. Esder eri koasoaia me e pahn kasalehda ma ih oh Aman pahn pwurohdohng pil ehu sak ni rahn en mwuhri.

Ni ansou me re pwurohdohng kamadihpwo Esder eri padahkiong nanmwahrkio: ‘Kisehi aramas kan oh Ngehi pahn kamakamala.’ Met kahreong nanmwahrkio en mwakarada. ‘Ihs me lemehda en wia soahng suwed duwehte met?’ e idek.

‘Ohlo, imwintihtio, iei ohl suwed Aman!’ Esder inda.

Met kahrehda nanmwahrkio uhdahn mwakarada. Ih eri padahkiong irail ren kamehla Aman. Mwuhri ekis, nanmwahrkio kasapwilada Mordekai en kariaun lapalap pahnangin ih. Mordekai pil wiahda kosonned kapw ehu me nanmwahrkio kamanala pwe mehn Israel kan en kak peiki arail mour ni rahn me kilel ong ren kamakamala. Pwehki Mordekai wiahlahr emen lapalap en wehio, aramas tohto eri sewese mehn Israel kan, oh irail kamourala sang arail imwintihti kan.