Ohl Kei Idawehn Ehu Usu

KE KAK kilang usu lingalingo me emen ohl pwukat idihdlahng? Ni arail mweselsang Serusalem usuo pil pwarada. Ohl pwukat sang pali Mese, oh re kin kasawih usu kan. Re kamehlele me usu kapw wet pahn kahluwairaillahng aramas kesempwal men.

Ni en ohl ko leldohng Serusalem, irail idek: ‘Iawasa serio me pahn nanmwahrki en mehn Suhs?’ “Suhs” iei ehu eden mehn Israel kan. ‘Se kilang usu en serio ni aht mihmi pali Mese,’ ohl oko inda, ‘oh se kohdohng pwongiong ih.’

Ni ansou me Erod, nanmwahrki en Serusalem, rongada met e pahtoukihla. E sohte mwahuki emen en wiliandi ih nanmwahrki. Erod eri likweri samworo lapalap ko oh idek: ‘Iawasa nanmwahrki me inoupe wiawiehr pahn ipwidi?’ Irail sapeng: ‘Paipel kasalehda me nan Pedlehem.’

Erod eri pil ilekilahng ohl oko sang pali Mese, oh indaiong irail: ‘Kumwail kohwei oh rapahki serio. Ma kumwail diarada ih, kaesehkin ie. I men pil kohwei oh pwongih ong ih.’ Ahpw, ni mehlel, Erod mwahuki rapahkihda serio oh kamehla!

Usuo eri tiehngala mwohn ohl ko ong Pedlehem, oh e uhdi wasa me serio mi ie. Ni ansou me ohl ko pidelong nan ihmwo, irail diarada Meri oh kisin Sises. Irail kihong Sises kisakis kan. Ahpw mwuhri Siohwa panawihki ohl pwukat nan ehu auramen ren dehr pwuralahng Erod. Irail eri pwuralahng sahpwarail nan apwoat ahl tohrohr.

Ni ansou me Erod rongada me ohl ko sang pali Mese pwuralahngehr arail wasa, e mwakarada kowahlap. Ih eri padahkiong nah papah kan en kamehla pwutak kan koaros nan Pedlehem me sounpahr riau kohdi. Ahpw Siohwa nan auramen panawih Sosep duen me pahn wiawi, oh Sosep iangahki ah peneinei kohieila Isip. Mwuhri, ni ansou me Sosep eseiehr me Erod mehlahr, ih eri ale Meri oh Sises pwuralahng Nasared. Wasaht iei wasa me Sises laudla.

Ihs me ke lemeleme kahrehda usu kapwo en lingaling? Tamataman, pwe ohl ko kohla mahs Serusalem mwehrin arail kilangada usuo. Sehdan me Tewil mwahuki kamehla sapwellimen Koht Ohlo, oh e ese me Nanmwahrki Erod en Serusalem pahn song en kamehla ih. Sohte emen pwe Sehdan te me wiaiong usuo en lingaling.