Iang Lih Ni Pwarer

SISES uhdi pwen kommoal limwahn pwarer ehu nan Samaria. Sapwellime tohnpadahk kan kohieila nan kahnihmwo pwen pwain kisin mwenge. Liho me Sises mahmahsan ong kohdo pwen idip pihl. Ih eri indaiong liho: ‘Kihdo nimei pihl.’

Met kahrehda liho en pwuriamwei kowahlap. Ke ese dahme kahrehda? Pwehki Sises mehn Suhs men, oh liho mehn Samaria. Kereniong mehn Suhs koaros sohte mwahuki mehn Samaria. Re pil sohte kin koasoai ong irail! Ahpw Sises poakong soahngen aramas koaros. E pil inda: ‘Ma ke ese ihs me peki rehmw pihl pwen nim, ke pahn peki reh oh e pahn kihong uhk pilen kamour.’

‘Maing,’ liho inda, ‘pwarero me loal, oh sohte ahmw pekid. Iawasa ke pahn kihsang pilen kamour wet?’

‘Ma ke pahn nim sang pilen pwarer wet ke pahn pwurehng men nim pihl,’ Sises padahkiong. ‘Ahpw pihl me I pahn kihong uhk kak kahreong emen en mour kohkohlahte.’

‘Maing,’ liho indaiong, ‘kihong ie pihl wet! Eri I sohla pahn pil pwurehng men nim pihl. Oh I sohlahr pahn pwurehng pwurohdo wasaht idip pihl.’

Liho lemelemekiong me Sises koasokoasoaia duen uhdahn pihl. Ahpw e kin koasokoasoaia duen padahk mehlel duen Koht oh sapwellime wehi. Padahk wet pahrekiong pilen kamour. E kak kihong emen mour soutuk.

Sises eri padahkiong liho: ‘Kohla oh likweri ahmw pwoud oh pwurohdo.’

‘Sohte ai pwoud,’ liho sapeng.

‘Ke sapeng pwung,’ Sises inda. ‘Ahpw mie ahmw pwoud me limen, oh ohlo me kin mihmi rehmw ansouwet kaidehn ahmw pwoud.’

Liho pwuriamweikihla, pwehki met me uhdahn mehlel. Iaduen Sises ese mehpwukat? Ei, e kak ese pwehki Sises iei ih me Koht ketin Inoukihdi oh poronehdo, oh Koht ketikihong ih mehpwukat pwen wehwehki. Ansouohte sapwellimen Sises tohnpadahk kan pwurohdo, oh irail inenen pwuriamweikihla pwehki e koasokoasoai ong lih en Samaria men.

Eri dahme kitail sukuhliki sang ire pwukat koaros? E kasansalehda me Sises kin kadek ong soahngen aramas kan koaros. Oh kitail en pil duwehte. Kitail en dehr lemeleme me ekei aramas me suwed pwehki re kohsang ekei kainok tohrohr. Sises mwahuki aramas koaros en ese padahk mehlel me kahluwalahng mour soutuk. Oh kitail en pil men sewese aramas kan sukuhliki padahk mehlel.