Nan Pere Powe

RAHN riau mwuhri lelehr Ni Epeng. Sises oh sapwellime wahnpoaron 12 miehr nan pere laud powe wet pwen wia kataman en Passa. Ohl me ke kilang pidoi ni wanihmwo iei Sudas Iskariod. E pahn kohla padahkiong samworo ko duen arail pahn koledi Sises.

Rahn ehu mwowe, Sudas kohla rehrail oh idek: ‘Dahme kumwail pahn kihong ie ma I sewese kumwail saikedi Sises?’ Irail inda: ‘Mwohni silper silihsek.’ Ihme ansouwet Sudas kohieila pwen tuhong ohl oko pwen kahluwairaildohng Sises. Met kaidehn mehkot suwed douluhl?

Kataman en Passa imwisekelahr. Sises met tapiada ehu kataman kesempwal. E ketikihong sapwellime wahnpoaron ko lopwon en pilawa ehu oh mahsanih: ‘Kang met, pwehki met wehwehki paliwarei me pahn kohwong kumwail.’ Mwuhri e ketikihong irail kep en wain oh mahsanih: ‘Nim sang met, pwehki met wehwehki intai, me pahn kapwilpwildi ong kumwail.’ Paipel kahdaneki kataman wet ‘sak en soutik en Kauno,’ de ‘sak en Kauno.’

Mehn Israel kan kin wia kataman en Passa pwen katamankiong irail ansou me tohnleng en Koht ‘doulul sang’ ihmwarail nan Isip, ahpw kamehla mesenih en mehn Isip koaros. Ahpw met Sises men sapwellime ko en tamataman ih, oh duen ah matkihla irail. Ihme kahrehda e padahkiong irail en wia kataman tohrohr wet pahr koaros.

Mwehrin arail tungoale Sak en Soutik en Kauno, Sises padahkiong wahnpoaron kan en aima oh kehlail ni pwoson. Ikmwuhri, irail koulki koul en kaping ong Koht oh pidoi. Ansouwet mwein ni dauliehr luhkepen pwong. Kitail pahn kilang iawasa re kohla ie.