Ehu Paradais Kapw Sampah

KILANG tuhke reirei pwukat, rohs lingan oh nahna ileile. Kaidehn mehpwukat lingan? Kilang duen tie kin mwengmwenge sang nan pehn kisin pwutako. Oh kilang laion kan oh oahs kan kesihnen nan mohso. Ke soh mwahuki mi nan ihmw ehu nan wasa kasehlel duwehte met?

Koht ketin mwahuki ken mour kohkohlahte nan paradais sampah. Oh e sohte ketin mwahuki ken madak oh pahtou duen me aramas kin wia rahnwet. Iet me Paipel inoukihdi ong koaros me men mour nan paradais kapw: ‘Koht pahn ieiang irail. Sohlahr pahn mie mehla de sengeseng de madak. Mehn mahs kan pahn kasohrwei sang.’

Sises pahn wiaiong wekidekila kasehlel wet en pweida. Ke ese iahd? Ei, mwehrin ah kamwakelehda sampah sang me suwed oh aramas suwed. Tamataman, ni ansou me Sises ketiket sampah e kin kakehleda soahngen soumwahu koaros, oh e pil kamourada aramas sang mehla. Sises wiahdahr met pwen kasansalehda mehkan me e pahn wia nan sampah ni ansou me e pahn wia Nanmwahrki en wehin Koht.

Nna medewe duen soahngen kainsenamwahu oh kasehlel me pahn pweida nan paradais kapw sampah! Sises, iangahki irail ko me e piladahr, pahn kaunda sampah sang nanleng. Kaun pwukat pahn apwahpwali aramas koaros nan sampah oh wia soahng kan me pahn kahrehda koaros en peren. Eri kitail tehk mwahu mehkan me kitail anahne wia pwe Koht en ketikihong kitail mour soutuk nan paradais kapw.