Kamweit ong me Pahtou
“Pwe audepen lahng oh sampah koaros kin weiweirek lao lel ahnsowet.” (Rom 8:22) Lokolok en aramas meid mwuledek ahnsou me irewet ntingdier mpen sounpar 1,900 samwalahr ako. Me tohto kin pahtou. Kahrehda Kristian akan ale kangoang en: “Kamweit me nan kapehd tikitik.”—1 Deselonika 5:14.
Nan rahnpwukat aramas kin pwunod laudsang mahso, oh pil wie tohtohla aramas me pahtou. Ahpw met pahn kapwuriamwei ong kitail? Soh, pwe Paipel kasansalehda me ahnsou pwukat iei “imwin rahn akan” oh pil kahdanekin met “ahnsou apwal akan.” (2 Timoty 3:1-5) Sises Krais kohpada me nin dokon imwin rahn akan “wehi kan pahn salohda” oh “aramas akan pahn lipwongmaski ahr masak ni ahr awiawih mehkan me pahn wiawiong sampah pokon.”—Luk 21:7-11, 25-27; Madiu 24:3-14.
Ni en aramas kin pwunod, masak, pahtou de nsensuwed ni ahnsou werei, re kin kalapw alehda soumwahu en pahtou laud. Me kin kahrehda pahtou de nsensuwed laud ele mwein kak kohsang ni mehlahn emen koampoak, mweipeseng ehu, sohla doadoahk, de soumwahu ehu me sohte kak mwahuala. Aramas akan kin pil pahtoula ni ahr pehm me sohte kateparail me re sohte kak pweida oh re sohte kakong kaitarahla irair kapwunod ehu, ahpw ni ahn emen kin kakeirada pepehm me sohlahr eh koapwoaroapwoar oh e sohte kak rapahkihda elen maioudasang nan irair suwed ehu, met pahn kakkete imwikihla soumwahu en pwunod laud.
Aramas akan en mahsie pil kin ahneki pepehmohte. Sohp soumwahu laud oh e pil pein lelong nan apwal laud. E pehm me Koht likidmeliehla ih kahrehda e tateki mour. (Sohp 10:1; 29:2, 4, 5) Seikop pahtoukihla nah pwutak me sansal me mehlahr, oh eri sohte men ale kamweit ahpw men mehla. (Senesis 37:33-35) Kupwurtoutoukihla sapwung laud me e wiahdar, Nanmwarki Depit mwahieiki: “I kin nsensuwed ahnsou koaros. I luwetlahr mehlel.”—Melkahka 38:6, 8; 2 Korint 7:5, 6.
Nan rahnpwukat, me tohto kin pwunod pwehki ahr katoutouehkin irail pwukoa tohto, nannantiong ideidawen koasondi en ehu ehu rahn me daulih kehl en arail lamalam, pepehm oh paliwar. Eri sansal me pwunod, pateng lamalam oh pepehm sapwung kan kin kak kamwekidih nan mahliel me kin kak imwikihla soumwahu en pwunod laud.—Kapahrekiong Lepin Padahk 14:30.
Sawas Me Re Anahne
Epaprodaitus, Kristian emen nan century keieu sang Pilipai “inenen pahtoukihla pwehki [koampoakpe kan] rong duwen eh soumwahu.” Epaprodaitus, me soumwahudahr mwurin koampoakpe kan kadarala ih Rom iangahki dipwsou kan ong wahnpoaron Pohl, mweinte e pehm me e sohte kapwaiahda me koampoakpe kan men en wia oh mwein re pahn nda me e sohte pweidamwahu. (Pilipai 2:25-27; 4:18) Iaduwen wahnpoaron Pohl sewese?
E kapwurehla Epaprodaitus ni imwe iangahki kisin likou ehu ong koampoakpe mehn Pilipai kan me mahsanih: “Kumwail kasamwo ih [Epaprodaitus] ni peren nin duwen riamwail emen rehn Kauno; kumwail en pil wauneki aramas koaros me duwehte ih.” (Pilipai 2:28-30) Ire mehlel me Pohl kin kapinga ih oh me mehn Pilipai kan kin kasamwo ih ni kadek oh limpoak, met uhdahn kamweitala Epaprodaitus oh sewese en katikitikiahla eh pahtou.
Sohte peikidpe, kaweid en Paipel me mahsanih en “kamweit me nan kapehd tikitik” ihme keieu mwahu. Lih emen me pahtou laud koasoia, “Ke anahne ese me mehteikan nsenokin komwi nin duwen aramas emen. Ke inangih rong emen kosoia, ‘I wehwehki; ke pahn mwahula.’”
Me pahtou men anahne tihengala mwowe oh rapahkida aramas kadek men pwehn kak koasoiong. Menet anahne wia soangen aramas me kin rongorong mwahu oh ahneki kanengamah laud. En dehr kin mwomwen wia padahk ong aramas me pahtou de wia koasoi me pahn mwomwen kadeik aramaso, me duwehte ‘Kedehr ahneki soahngen pepehm duwehte men’ de ‘Lamalam sapwung ehu men.’ Ahn me pahtou men eh pepehm me luwet, oh soangen koasoi duwehte met ihte pahn kalaudehla eh nsensuwed.
Emen me pahtou ele pahn pehm me e sohte katepe. (Sona 4:3) Ahpw, aramaso anahne tamataman dahme uhdahn kesempwal iei duwen ahn Koht kesempwalkin ih. Aramas akan “mwamwahlekin” Sises Krais, ahpw met sohte kawikala eh kesempwal rehn Koht. (Aiseia 53:3) En koapworoapwoarki me nin duwen ahn Koht ketin poakohng sapwellime Ohl koampoak, ih pil duwen eh poakong komwi.—Sohn 3:16.
Sises kin poakehla irail akan me pwunod oh kin nantiong sewese ren kilang me irail kesempwal. (Madiu 9:36; 11:28-30; 14:14) E ketin kawehwehda me Koht kin ketin kesempwalkin mahnpir sparrow inenen tikitik. E mahsanih: “Sohte emen rehrail me Koht kin ketin meliehla.” Ia uwen eh uhdahn pahn kesempwalkin aramas akan me kin nannantiong wia kupwure! Sises mahsanihkin irail pwukat: “Pil pitenmoangomwail kan koaros wadawadediher.”—Luk 12:6, 7.
Mehlel, ele mwein apwal ong aramas emen me uhdahn pahtou laud, me eh luwet oh sapwung kan kin kipehdi, en kak kamehlele me Koht uhdahn kesempwalkin ih. Ele mwein e uhdahn kamehlele me e sohte warong ahn Koht limpoak oh epwel. Mahsen en Koht pohnese me “mohngiongatail kadeingkitailda.” Ahpw ire wet me poahsoanpen kadeik? Soh, kaidehn. Koht pohnese me aramas dipan akan ele pahn ahneki lamalam sapwung oh pil kak pein kadeikirailda. Ihme sapwellime mahsen kin kamweitirailla: “Koht me lapasang mohngiongatail oh pein ih kin ketin mwahngih mehkoaros.”—1 Sohn 3:19, 20.
Ei, Samatail limpoak nanlahng kilang kaidehn ihte atail dihp oh sapwung kan. E ketin mwahngih duwen irair sapwung kan me kitail kin song en kapwungala, atail elen mour, kahrepen atail wiewia kan, oh me kitail kin nannantiong wia. E ketin mwahngih me kitail sohsohki dihp, soumwahu oh mehla kahrehda mie sohitar kan. Ire mehlel me kitail kin pahtoula oh pwunodkihda pein kitail wia kadehde me kitail sohte men wia dihp oh me atail sapwung kan sohte daulihla. Paipel mahsanih me kitail “pengpenglahr pwe en mwamwahlla” ahpw kaidehn ni pein nsenatail. Kahrehda Koht ketin poakehla atail irair apwal wet, oh ni limpoak-kadek e kin ketin medemedewe atail luwet kan.—Rom 5:12; 8:20.
Mahsen en likilik ong kitail: “Siohwa me diren kalahngan oh mahk. Duwen mesen lahng oh kapin lahng ara dohpeseng, ihduwen e ketin kadohwenweisang kitail dihpatail. Pwe e ketin mwahngih dahme kitail wiawihdahsang, e ketin mwahngih me kitail me pwelpar.” (Melkahka103:8, 12, 14) Ei, mehlel Siohwa iei “Koht en kamweit pokon, me kin kamwakamweit kiht ni aht kamakam kan koaros.”—2 Korint 1:3, 4.
Sawas me pahtou kan keieu anahne iei en kakerenala ong arail Koht me diren mahk-kalahngan oh ale eh luhk en ‘mweidong ih amwail katoutou kan.’ E uhdahn kak “kakehlada mohngiong en me luwet akan.” (Melkahka 55:22; Aiseia 57:15) Eri mahsan en Koht kin kangoange kitail en kapakap, mahsanih: “Kumwail mweidong ih [Siohwa] amwail pwunod koaros, pwehki e kin ketin apwahlih kumwail.” (1 Piter 5:7) Ei, sang kapakap oh pekipek aramas kan kak kakerenlahng Koht oh paieki “popohl en Koht me lapasang loaloakong koaros.”—Pilipai 4:6, 7; Melkahka 16:8, 9.
Pwen wia mwomwen kawukala elen mour ni ahl pwung pil kak sewese emen powehdi eh pwunod. Kaiahn en paliwar, kang mwenge me mwahu ong paliwar, kohla likin ihmwo oh koamoal ni uwe ehu me konehng, oh liksang kilikilang TV daulihla pil uhdahn kesempwal. Emen lih sewesedahr me pwunod akan ni eh kin kahrehong ren alialu seimek. Ahnsou me emen lih me pwunod koasoia: “I sohte men alu,” liho ni ngihl kadek sapeng: “Ei, ke pahn alu.” Liho ripohtki: ‘Se aluhki mwail pahiou. Ni aht pwurodo, e pwangada, ahpw e nsenamwahuala. Ke sohte kak kamehlele ia uwen alialu seimek wia sawas laud ehu lao ke pahn song met.’
Ahpw, ekei pak e apwal en powehdi douluhl pahtou laud, pil ni ahnsou me ke songer soahng koaros pil iangahki wini ape. Emen lih mehlel kosoia, “I songer soahng koaros, ahpw ai pahtou mihmihte.” Duwehte, ahnsou pwukat me apwal en kamwahuiahla me maskun, me salongpon, de me mwoator. Ahpw, me pahtou kan kak diar kamweit oh koapwoaroapwoar ni arail pahn kau kaule wadewadek Mahsen en Koht, me kin ketikihda koapwoaroapwoar mehlel ong kamwahuiahla douluhl apwal kan koaros en aramas.—Rom 12:12; 15:4.
Ni Ahnsowo Me Sohte Emen Pahn Pwurehng Pahtou
Ni en Sises kawehwehda soahng suwed akan me kohkohdong nin sampah ni imwin rahn akan, e kapatahiong: “Mepwukat lao pahn tepiada wiawi, kumwail uhda oh sarada, pwe komourpamwail kerendor.” (Luk 21:28) Sises kin koskosoia duwen komourala ong nan sapwellimen Koht sampah kapw wasa me “audepen lahng oh sampah uhdahn pahn maiaudahsang mouren liduih mehla, oh pahn iang sapwellimen Koht seri kan nan arail saledek lingan.”—Rom 8:21.
Ia uwen saledek met ong tohnsampah en maiaudasang katoutou kan koaros en mahso oh en kin pirada ehu ehu rahn ki mwahliel me saledek sang kapwunod kan oh onopadanger powehdi wiewia en ehu ehu rahn! Pahtou de pwunod sohlar pahn irehdi aramas akan pwe ren sohte kak pweidamwahu. Inou mehlel ong tohnsampah iei me Koht pahn “kin ketin limwihasang pilen masarail koaros, mehla sohlar pahn wiawi, sohlar mwahiei, sohlar nsensuwed, sohlar medek. Soahng mering kan sohlar pahn mie.”—Kaudiahl 21:3, 4.
Likin me kileldi kan, koaros iren Paipel kan kohsang kawehwehn New World Translation of the Holy Scriptures.