Koapworopwor Mehlel ong me Melahr akan

EMEN lih me sounpar 25 ntingihedi: “Nan 1981 ei nohno me pwekiehdao mehkihla kanser. Eh mehlao uhdahn apwal ong ie oh nah pwutako. Ahnsowo I sounpar 17, oh nah pwutako sounpar 11. I uhdahn loaleidki ih. Pwehki aramas padahkihong ie me e mi nanleng, I mentehno kemeiehla pwe ien kak kohla reh. E wia kompoakepahi me I keieu koapworopworki.”

E mwomwen sapwung me mehla ahneki manaman en kihsang emen me ke kin poakohng. Oh ni ahnsou me met wiawi, e kin uhdahn apwal ni omw kin medewehla omw sohla pahn kin lokaiahiong, kouruhrong, de pil pwoalehdi. Ahn aramas pahn ndaiong uhk me aramas me ke poakohngo miher nanleng sohte uhdahn pahn kihsang omw medek.

Ahpw, Paipel kin kihda koapworopwor ehu me uhdahn weksang. Nin duwen me kitail kilangehr mwowe, iren Paipel kan kasalehda me ke kak pwurehng tuhwong irail kan me ke kin poakohng ni ahnsou kohkohdo, kaidehn nanleng ehu me sohte me ese duwe, ahpw pohn sampah wet nan irair meleilei oh pwung. Oh ni ahnsowo, aramas kan pahn ahneki koapworopwor en mour me roson oh unsek, oh irail sohla pahn anahne pwurehng mehla. Ekei pahn kakete nda ‘Ihme ke mwahuki, ahpw e sohte pahn kak wiawi!’

Dahme pahn kak kahrehiong uhk en kak kamehlele me met iei koapworopwor mehlel ieu? Pwehn kamehlele inou ehu, ke pahn anahne kamehlele me aramas me wiahda inowo pahn men oh pil kak kapwaiada inowo. Eri, ihs me inoukihda me me melahr akan pahn pwurehng mourda?

Nan pahr 31, Sises Krais ni eimah ketin inoukihda: “Duwen Sahmo eh kin ketin kapirada me melahr akan, oh komourirailla, ih duwen Sapwellimeo pil kin ketikihong mour irail kan me e ketin kupwurki. Kumwail dehr pwuriamweiki mepwukat, pwehki ahnsou ehu pahn kohdo me irail koaros me mihmi nan sousou kan pahn rong kapitie, oh re pahn pedoisang nan arail sousou kan.” (Sohn 5:21, 28, 29) Ei, Sises Krais ketin inoukihda me irail aramas rar kei me melahr pahn pwurehng mourda nin sampah oh pahn ahneki koapworopwor en mihmi nan paradais meleilei ehu nin sampah. (Luk 23:43; Sohn 3:16; 17:3; Pil kilang Melkahka 37:29; Madiu 5:5.) Pwehki Sises me ketin wiahda inou wet, kitail kak ahneki koapworopwor me e kupwurki kapwaiada. Ahpw ia duwe, e pahn kak ketin wia met?

Sohte lel sounpar riau mwurin eh ketin wiahda inou wet, Sises ketin kasalehda ni ahl kapwuriamwei me e kupwurki oh pil kak ketin kaiasada me melahr akan.

“Lasarus, pedoido!”

Koasoipen mehlahn Lasarus wia mehkot me uhdahn kamwakid aramas akan. Lasarus uhdahn soumwahu laud. Rie serepein riemeno, Mery oh Marda, kairehki Sises, me mihmi palio Pillap Sordan: “Maing at Kaun, kompoakepahmwo soumwahudahr.” (Sohn 11:3) Ira ese me Sises ketin poakohng Lasarus. Sises sou pahn kupwurki kilang kompoakepah me soumwahwo? E kapwuriamwei Sises eh sohte ketila Pedani ahnsowohte, ahpw e ketikette wasa me e ketiket ieo erein rahn riau.​—Sohn 11:5, 6.

Lasarus mehla mwurinte rohng me pid duwen eh soumwahwo. Sises mwahngih ahnsou me Lasarus mehlao, oh e ketin koasoanehdi en ketin wia mehkot me pid duwen met. Ni ahnsou me Sises ketin lella Pedani, kompoakepaho melahr rahn pahieu. (Sohn 11:17, 39) Ia duwe, Sises kak ketin kamourada emen me melahr soangen wereio?

Marda, emen lih me kin mwadang en mwekid, tangala pwe en tuhwong Sises ni eh rongada me Sises ketiket kohdo. (Pil kilang Luk 10:38-42.) Sises ketin mwekidki en Marda pahtou. Ih eri ketin inoukihong: “Riomw ohlo pahn pwurehng mourda.” Ni Marda eh kasalehda me e pwoson duwen kaiasada me pahn wiawi ni ahnsou kohkohdo, Sises ahpw ketin mahsanihong: “Ngehi me mour sapahl oh Sounkomour. Mehmen me pwoson ie, mehnda ma e pahn mehla, ahpw e pahn mour.”​—Sohn 11:20-25.

Ni Sises eh ketilahng ni sousowo, e mahsanihong irail en pwekasang takai me perehla pwoaren paipo. Eri, mwurinte Sises eh ketin kapakap laud, e mahsanih: “Lasarus, pedoido!”​—Sohn 11:38-43.

Koaros me mi mwo kilikilang sousowo. Eri mwomwen paliwar ehu kohkohdohsang nan pwoaren paip rotoroto. Peh oh neh kan kidikidkihpene likoun nan sousou oh likou ehu pidpene meseo. Sises ahpw mahsanihong irail, “kumwail sapwadada ohlen oh kasaladakala.” Likou me luwehdi reho ahpw pwupwudiong nan pwehlo. Ei, Lasarus mwo, ohl me mehkilahr rahn pahieuo!​—Sohn 11:44.

Ia Duwe, Met Mehlel Uhdahn Wiawi?

Koasoipen kaiasadahn Lasarus ntingdier nan pwuhken rongamwahu en Sohn nin duwen mehkot me uhdahn wiawi. Oaritik kan me uhdahn sansal kahrehda met sohte kak wiahte soai pwoat. En peikasalki ma met uhdahn wiawi kin duwehte en peikasalki manaman koaros me kileldi nan Paipel iangahki kaiasadahn Sises Krais. Oh en kahng kamehlele kaiasadahn Sises kin wehwehki kahng kamehlele poahsoanpen dahme Kristian kan kin kamehlele.​—1 Korint 15:13-15.

Ni mehlel, ma ke kamehlele me Koht ketin mie, ke sohte pahn ahneki kahpwal en kamehlele kaiasada. Pwehn karasahda: Ma emen pahn kak deipihdi nan kasdo ehu eh koasoandi en dahme e men ren wia ahnsou me e mehla oh koasoandi en eh sohso, eh peneinei oh kompoakepah kan pahn kak kilang oh rohng ih, ni eh pahn kawehwehda dahme e mwahuki en wiawihong eh kepwe kan de eh sohso kan. Sounpar epwiki kei samwalahro, sohte me kin medewe me soahng wet kak wiawi. Pil nan rahnwet, ong aramas kan me kin mi nan wasa kan me dohsang soangen dipwisou wet, met wia mehkot me re uhdahn kin pwuriamweiki me kahrehda ong irail e duwehte manaman ehu. Mie koasoandi kan me Sounkapikada ketin koasoanehdier nan sapwellime kepikipik kan. Ma aramas kak doadoahngki koasoandi pwukat pwehn wiahda kilel mwekid kan oh deipihdi ngihl kan, Sounkapikada sou pahn kak ketin wia laudsang met? Ia duwe, e sou konehng en medewe me Sounkapikada mour pahn kak ketin pwurehng kapikada aramas me mehlao?

En Lasarus pwurehng mourda sang ni manaman kapwuriamweio kin kalaudehla atail pwoson Sises oh padahk en kaiasada. (Sohn 11:41, 42; 12:9-11, 17-19) Met pil kasalehda ni ahl me kin kamwakid kitail me Siohwa oh sapwellime Ohl ketin kupwurki kaiasada aramas akan.

‘Koht Pahn Kupwurperenkihda’

En Sises ketin mwekidki en Lasarus mehlao kasalehda sapwellimen Koht Ohlo eh kin ketin kadek oh nsenohki aramas. Sapwellime pepehm loal kan ni ahnsowo kasalehda me e uhdahn kupwurki kaiasada me melahr akan. Kitail wadek: “Ni Mery eh lellahng wasa me Sises ketiket ie, e ahpw poaridi mwohn aluweluwe kan oh patohwanohng, ‘Maing ei Kaun, ma komw ketikette met, riei ohlo sohte pahn mehla.’ Sises mahsanihada eh sengiseng, oh mehn Suhs ako me iang ih pil sengiseng, e ahpw kupwurohla oh pahtoula. E ahpw ketin kalelapak rehrail, ‘Ia wasa me kumwail sarepediong ie?’ Irail ahpw sapeng, patohwan, ‘Maing at Kaun, komw ketido oh mahsanih.’ Sises ahpw ketin tentenihr. Mehn Suhs ako eri nda, ‘Ia uwen eh poakohng ohlo!’”​—Sohn 11:32-36.

En Sises ketin uhdahn poakehla sang nan eh mohngiong sansalkihda soahng siluh: “kupwurohla,” “pahtoula,” oh “tentenihr.” Lepin lokaia kan me kadoadoahk wasaht ni lokaiahn Krihk kin kasalehda me Sises uhdahn ketin mwekidki mehlahn kompoakepah Lasarus, oh eh mahsanihada rien Lasarus liho wie sengiseng me kahrehiong Ih en pil tehntenihr.a

Dahme keieu kapwuriamwei iei Sises ketin kaiasadahr aramas riemen mwoweo. Oh e pil kupwurki wia met ong Lasarus. (Sohn 11:11, 23, 25) Ahpw, e ketin “tentenihr.” Eri eh kaiasada aramas ahnsowo, kaidehn ihte pwukoa ehu ong ih. Sapwellime pepehm loal kan me sansalda ahnsowo kasalehda me e pil inenen kupwurki ketikihsang kahpwal me kohsang mehla.

Pwehki Sises “duwehte Koht,” e konehng kitail en pil kin kasik me Samatail nanleng pahn pil kupwurki wia met. (Ipru 1:3) Me pid duwen en Siohwa ketin kupwurki kaiasada aramas, ohl lelepek Sohp koasoia: “Ma aramas emen pahn mehla, e kak pwurehng mourda? . . . Eri, ahnsowo, komw pahn ketin malipe ie, I ahpw pahn patohwan sapeng, komw ahpw pahn kupwurperenkiniehda, wiepen nin limomwiet.” (Sohp 14:14, 15) Ni ahnsou me Paipel tepin ntingdi, lepin lokaia me kawehwehdi “komw ahpw pahn kupwurperenkiniehda” kin kasalehda uwen Koht eh kupwurki wia met. (Senesis 31:30; Melkahka 84:2) E sansal uwen Siohwa eh kin ketin kasikasik ahnsoun kaiasada.

Ia duwe, kitail kak uhdahn kamehlele inou en kaiasada? Ei, kitail uhdahn kak koapworopworki me Siohwa oh Sapwellimeo kupwurki wia met oh kak ketin kapwaiada. Ia wehwehn met ong uhk? Met wehwehki me ke pahn kak pwurehng tuhwong me melahr me ke poakohng pohn sampah wet ahpw nan irair kan me uhdahn weksang ahnsou wet!

Nin tapio Siohwa Koht ketikihong tepin aramas nan mwetuwel lingan ehu. E ketin inoukidahr en kapwurehdo Paradais nin sampah pahn kaundahn Sapwellime Wehin nanleng me mihier pahn manaman en Sises Krais me ketin kesepwildahr ahnsou wet. (Senesis 2:7-9; Madiu 6:10; Luk 23:42, 43) Ni ahnsou me paradais pahn kapwurpwurdo, aramas pahn kak ahneki koapworopwor en mour kohkohlahte, saledeksang soangen soumwahu koaros. (Kaudiahl 21:1-4; Pil kilang Sohp 33:25; Aiseia 35:5-7.) Soangen kailok koaros, lipilipilki aramas, tiahk lemei ong keinek teikan, oh kahpwal en mwohni koaros pahn pil solahr. Ih soangen sampah mwakelekel me Siohwa oh Sises pahn ketin kaiasada me melahr akan loale.

Ih soangen koapworopwor wet me lih Kristian me kitail koasoia ni tepin irelaud wet kin ahneki. Sounpar kei mwurin eh nohno mehla, Sounkadehdehn Siohwa kan sewese ih en onop Paipel ni keneinei. E koasoia: “Mwurin ei sukuhlki duwen koapworopwor en kaiasada, I sengiseng. E uhdahn kaperen en ese me I pahn pwurehng tuhwong ei nohno.”

Ma ke kin tihwohkihla omw men pwurehng tuhwong emen me ke poakohng me melahr, Sounkadehdehn Siohwa kan pahn perenki sewese iuk en esehla mwomwen omw pahn wiahkihla met mehkot me ke pahn koapworopworki.