Irelaud 19
Ahnsou Me Loalokong Me Pid Duwen Koht Pahn Kadirehla Sampah
1, 2. Iaduwen sapwellimen Siohwa kapikipikda a ohla?
IADUWEN ma soun mahlen ndand men ahpwtehn kanekehla mahlen kaselel ieu. Ih eri koasoia me e inenen mwahu oh kaselel! Ahpw, ni pwongo, aramas peirin men kohdo kauwehla mahleno. Met pahn kamedek laud ong soun mahleno. Ia uwen e pahn ngoangkihla aramas me kauwehla ah doadoahko en selidi! Oh ke kak kilang nan ahmw madamadau uwen soun mahleno ah pahn mentehno me mahlen me e wiahda en pwurehng mwahula duwehte nin tepio.
2 Me rasehng soun mahlen menet, Siohwa ketin kapikada doadoahk kaselel ieu ni ah ketin wiahda sampah oh kihdiong aramas loale. Mwurin E ketin kapikada tepin ohl oh lih, E mahsanih me sapwellime doadoahk me E ketin wiahiong sampah “inenen mwahu.” (Senesis 1:31) Adam oh Ihp wia pein sapwellimen Koht seri kan, oh E kin ketin poakohng ira. E ketin kupwukupwure ong ira mour peren oh lingan ni ahnsou kan en mwuhr. Mehlel, Sehdan kaweidiralahng nan irair en uhwong oh sapeik, ahpw sapwellimen Koht kapikipikida kaselelo sohte ohla oh dene e solahr kak pwurehng wiawihda.—Senesis 3:23, 24; 6:11, 12.
3. Ia wehwehn “uhdahn mour mehlel”?
3 Koht ketin kupwurki en kapwungala mehpwukat. Pwehki sapwellime limpoak, E ketin kupwurki en mahsanih kitail en pwurehng mourki soangen mour me E ketin koasoanehdi ong aramas nin tepio. Atail mour mwotomwot oh diren kahpwal ahnsou wet sohte wia “uhdahn mour mehlel” pwehki e suwed sang dahme Siohwa ketin kupwurki. “Uhdahn mour mehlel” me Koht ketin kupwurki ohng kitail kin wehwehki “mour soutuk” nan irair unsek kan.—1 Timoty 6:12, 19.
4, 5. (a) Dahme kitail anahne wia ma kitail men alehdi mour soutuk nan Paradais? (b) Dahme kahrehda kitail en medemedewe duwen koapworopwor en mour soutuk ni ahnsou kohkohdo?
4 Loalokongkihla Koht kin wehwehki me mie atail pwukoa mwohn Siohwa. (Seims 4:17) Ahpw, medewehla kapai kan me ke pahn nsenamwahuki ma ke doadoahngki loalokong wet oh eri akadei ohng ken alehdi mour soutuk. Nan sapwellime Mahsen, Paipel, Siohwa Koht ketin “mahlenihada kilel lingan ieu” en ia mwomwen mour nan paradais nin sampah me pahn lelodo ni ahnsou keren. Ahpw, e pil mehlel, ni atail wia sapwellimen Siohwa aramas akan, kitail sohte kin papah Koht pwehki ihte me kitail noahroke kating ieu sang reh. Kitail papah Koht pwehki kitail poakohng Ih. (Mark 12:29, 30) Oh pil, kitail sohte kak pwainda mour sang ni atail papah Siohwa. Mour soutuk kin wia kisakis ieu sang rehn Koht. (Rom 6:23) E pahn mwahu ohng kitail ma kitail pahn doudouloale duwen irair en mour soutuk pwehki koapworopwor en Paradais kin kataman ohng kitail soangen Koht dah men Siohwa—E kin, ni limpoak, ketin “katingih irail kan me kin raparapahki.” (Ipru 11:6) Ma kitail ahneki koapworopwor me uhdahn mehlel nan atail madamadau oh mohngiong, e pahn sewese kitail en kak kanengamah ohng kahpwal akan nan ahn Sehdan sampah.—Seremaia 23:20.
5 Kitail eri kihong atail madamadau unsek ohng koapworopwor en mour soutuk me mih nan Paipel nan Paradais nin sampah ni ahnsou kohkohdo. Ia pahn mwomwen mour ni ahnsou me loalokong me pid duwen Koht pahn kadirehla sampah?
MWURIN ARMAKEDON—PARADAIS NAN SAMPAH
6. Dahkot Armakedon, oh dahme e pahn wiaiong tohnsampah?
6 Duwen ah sansalehr mwowe, ni ahnsou keren, Siohwa pahn kauwehla koasoandi suwed en ahnsou wet. Ni ahnsou wet, sampah wie mwekimwekidlahng mwadang irair ehu me Paipel kahdaneki Armakedon. Ni ahnsou me ekei aramas kin rong lepin lokaia wet, re kin lemeleme me e wehwehki mahwen ehu me pahn doadoahngki pakudang kehlail kan, ahpw Armakedon kaidehn mahwenki pakudang. Kaudiahl 16:14-16 kin kasalehda me Armakedon iei “mahwen me pahn wiawi ni Rahn Lapalap en Koht, Wasa Lapalahpie.” Met mahwen ieu me pahn pidada “nanmwarki kan en sampah pwon,” de wehi kan. Sapwellimen Siohwa Koht Ohlo, me wia Nanmwarki idihdda men, pahn dake dakepe oh kohwong nan mahwen en Armakedon. E inenen sansal dahme pahn wiawi. Irail koaros me pahn pelianda Wehin Koht oh wia kisehn ahn Sehdan koasoandi suwed wet pahn kamwakelsang sampah. Irail kante me lelepek ohng Siohwa pahn mourla.—Kaudiahl 7:9, 14; 19:11-21.
7. Iawasa Sehdan oh nah ngehn saut akan pahn mihmi ie ni erein Pahr Kid me Krais pahn wia kakaun, oh iaduwen met a pahn wia kamwahupen tohnsampah?
7 Medewehla ma ke pahn pitsang Armakedon oh mourla. Ia pahn mwomwen mour nan sapwellimen Koht sampah kapw me E ketin inoukihda? (2 Piter 3:13) Kitail sohte anahne kasakasawih ia pahn duwen mwomwen mour nan koasoandi kapw pwe Paipel padahkiong kitailehr oh dahme e padahkiong kitail wia mehkot kaperen. Kitail sukuhlikihier me Sehdan oh nah ngehn saut akan pahn selidi nan pwoar loal oh irail solahr kak wia mehkot erein Pahr Kid me Sises Krais pahn wia kakaun. Irail ngehn suwed pwukat solahr pahn pitih kitail ohng nan kahpwal oh kainengihada kitail en salelepek oh pelianda Koht. Ia uwen kansenamwahu!—Kaudiahl 20:1-3.
8, 9. Nan sampah kapw, dahme pahn wiawiong kahpwal akan, soumwahu kan, oh mahla?
8 Ehu rahn, soangen soumwahu koaros pahn solahr wiawi. (Aiseia 33:24) Me mwoator pahn kesihnenda, alu, tang, oh kahkahlek ki nehrail kan me mwahu oh kehlail. Mwurin sounpar tohto en arail mour me re sohte kin kak rong mehkot, irail me salengopon kan pahn rongada ngilen pereperen me pahn kapilirailpene. Me maskun kan pahn sengelkihda arail pahn pwuriamweikihla duwen lingan en soangsoangen poh kan oh soangsoangen mwohmw akan me pahn pwarada mwohn masarail akan. (Aiseia 35:5, 6) Irail eri pahn kilangada mesen kompoakeparail akan! Ih ahnsou me mwein ele masarail kan pahn ediedkihla pilen masarail ahnsou kis pwehki ahr peren kowahlap.
9 Nna, song medewehla! Solahr mas kilahs, solahr sokon, solahr wini, solahr wasahn wie ngih oh imwen wini! Solahr soumwahu en pwunod oh pahtou me pahn kihsang kitail atail peren. Sohte seri kan me pahn lelohng soumwahu. Suwed akan me kin kohsang mahlahr paliwar pahn pwuralahng irair en pwulopwul. (Sohp 33:25) Paliwaratail pahn roson oh kehlail. Ehuehu menseng, kitail pahn pirida sang atail meir mwahu ni pwongo oh dipmara, dirki angiangin oh ngoangki kitail en kilang mour en rahn kapw oh doadoahk kaperen akan.
10. Doadoahk dah me irail me pitsang Armakedon pahn wia?
10 Doadoahk kaperen tohto pahn mie ong irail me pahn pitsang Armakedon. Irail pahn wekidohng sampah en wiahla paradais. Kisin mweimwei en samin me luwehdi sang koasoandi meringo pahn kamwakelsang. Mwetin tuhke laud akan oh mwetuwel akan pahn pwarada nan wasa me mahs kin pwelmatak oh soan suwed akan. Koaros pahn perenki imwarail ihmw kaselel oh kansenamwahu kan. (Aiseia 65:21) Ekis ekis, wasa kan me irair en paradais pahn mie pahn tehlapala oh mwamwahula lao lel wasa koaros nan sampah pahn duwehla soangen lingan me Sounkapikadao ketikihdiong nan mwetuwel en Ihden. Ia uwen kansenamwahu en iang kisehn doadoahk en kamwahuwihala sampah!
11. Ni ahnsou kohkohdo, soangen ehupene dah me pahn mie nanpwungen aramas akan, irair en sampah oh mahn akan?
11 Soahng pwukat koaros pahn wiawi pahn kaweid en Koht kahrehda irair en sampah sohte pahn pwurehng ohla. Aramas akan pahn ahneki popohl rehn mahn akan. Aramas akan solahr pahn kemehla mwahl mahn akan, ahpw irail pahn ahnekihla pwukoahn kaunda sampah, oh apwapwalih irail. Medewehla ma kidi en wel oh sihmpwul akan, laion oh koupwul akan mwengemwengepene—oh mahn mand akan sohte mih nan keper. Oh pil, seri tikitik kan sohte anahne masak mahn lawalo kan, oh meleilei en sampah kapwo sohte pahn ohkihla aramas lemei oh loallap akan. (Aiseia 11:6-8) Ia uwen meleilei en sampah kapw wet!
ARAMAS AKAN WEKILA
12. Iaduwen kokohp en Aiseia 11:9 wie pweipweida nan atail ahnsou, oh iaduwen e pahn pweida nan Paradais?
12 Aiseia 11:9 kin kasalehong kitail dahme kahrehda sohte apwal pahn wiawi nan sampah. E mahsanih: “Sampah pahn uhdahn direkihla loalokong me pid duwen Siohwa duwehte madau eh kin direkihla pihl.” (NW) E sansal me ire wet kin koasoia duwen aramas pwehki mahn akan sohte kak sukuhliki “loalokong me pid duwen Siohwa” oh re sohte kak pein pilada de koasoanehdi dahme re pahn wia. Ahpw, ma aramas kin loalokongkihla Sounkapikpatail, loalokong wet kin kak kawekidala arail mour. Mwein ele ke wiadahr wekidekila kan pwehki ahmw doadoahngkiher loalokong me pid duwen Koht nan ahmw mour. Aramas rar rar kei (millions) wiahier met. Kahrehda, kokohp wet tepidahr pweida nan mour en irail oko me kin papah Siohwa. Ahpw, met pil kin koasokoasoia ahnsou ehu me aramas koaros nan sampah pwon pahn kesehla wiewiahn lemei oh wiewia kan me duwehte wiewiahn mahn oh irail pahn ahneki meleilei kohkohlahte.
13. Soangen koasoandi en kasukuhl dah pahn wiawi nan sampah?
13 Ia uwen kaselel ni ahnsou me loalokong me pid duwen Koht pahn kadirehla sampah! Pahn pil mie koasoandi en kasukuhl me pahn wiawi pahn kaweid en Nanmwarki Sises Krais oh irail sawasepe 144,000 oko. “Doaropwe limilim” kapw oko eri pahn uhd doadoahk. E sansal me “doaropwe limilim” pwukat iei sapwellimen Koht kaweid ntingdi kan me pahn wia poasoanpen mehn kasukuhlih tohnsampah kan. (Kaudiahl 20:12) Aramas solahr pahn sukuhliki mahwen, ahpw re pahn uhd sukuhliki meleilei. Dipwisou en mahwen kehlail kan koaros pahn sohrala kohkohlahte. (Melkahka 46:9) Towe kan en sampah kapwo pahn sukuhliki en kasalehong meteikan limpoak oh wahu.
14. Soangen wekidekla dah kan me pahn mie nan sampah ahnsou me tohnsampah pahn wiahla peneinei minimin ehu?
14 Tohnsampah pahn wiahla peneinei minimin ehu. Sohte mehkot pahn irehdi miniminpene oh pirienpene nanpwungen aramas akan. (Melkahka 133:1-3) Sohte imwen aramas pahn anahne en loahkdi pwehn irehdi sang lipirap akan. Popohl oh meleilei pahn miehla nan mohngiong koaros, nan ihmw koaros, oh pil wasa koaros nan sampah.—Maika 4:4.
IASADA ME PAHN KAPEREN
15. Mehnia soangen pwihn riau me pahn iasada nan sampah?
15 Nan erein Pahr Kido, iasada pahn wiawi. Aramas akan me wehwehki ahpw inengkihda pelianki Koht arail wia dihp, pelian sapwellime ngehn sarawi, sohte men koluhla mehlel oh kin pelian sapwellime koasoandi kan sohte pahn iang kaiasada. (Madiu 23:15, 33; Ipru 6:4-6) Ni mehlel, Koht kelepw me mwahngih ihs me wia dipen pelian sapwellime ngehn sarawi. Ahpw, soangen pwihn riau me pahn kaiasada—“me pwung oh me sapwung.” (Wiewia 24:15) Ahpw, pwehki e pahn mie wiepe soandi mwahu ieu me pahn wiawi, kitail ele kak medewehiong me irail me kitail pahn tepin kasamwohdohng pwurehng mourda ohng sampah iei irail oko me pwung, irail oko me kin lelepek papah Siohwa.—Ipru 11:35-39.
16. (a) Ihs irail me pahn wia kisehn “irail me pwung kan” me pahn iasada nan sampah? (b) Ihs nanpwungen irail me lelepek ko en kawao me ke uhdahn men tuhwong, oh pwekihda?
16 Kitail sohlahr pahn rong nuhs en mahwen kan, ohlahn wasa kan, oh mehla, ahpw sapwellimen Siohwa ladu kan pahn rong pakair mwahu kan me pid kaiasada. E pahn kaperen en rong duwen iasadahn ohl oh lih lelepek kan me duwehte Eipel, Enok, Noha, Eipraam, Sara, Sohp, Moses, Reap, Rud, Depit, Elaisa, Ester. Ia uwen ah pahn kaperen rong poadoapoad mehlel akan ni arail pahn oaritikihada mehkan me pid koasoi kan nan Paipel! Ni mehlel, irail oh iangahki irail me pwung kan me ahpwtehn mehla nan atail ahnsou pahn inenen nsenohki men ese duwen mehkan me wiawi nan imwin koasoandi en Sehdan oh iaduwen Siohwa ah kasarawihala mware oh kandandihala sapwellime pwung en kaunda lahng oh sampah.
17. Soangen sawas dah irail me lelepek kan pahn kihong aramas akan me pahn iasada?
17 Ia uwen irail me lelepek pwukat ar pahn wia mehn sawas laud ni ahnsou me kaiasadahn irail me lik lik kei (billions) me iang kisehn “aramas sapwung kan” pahn wiawi me wehwehki me re pedoisang pahn kanaudok en mehla! Pali moron en aramas akan saikinte ahneki ahnsou mwahu en esehla Siohwa. Sehdan kin ‘karotongehla arail madamadau kan.’ (2 Korint 4:4, NW) Ahpw, Siohwa pahn kamwahuwihala dahme Sehdan me Tepil kauwehlahr. Irail me sapwung kan pahn pwurodo nan sampah ieu me lingan oh meleilei. Irail pahn ale kasamw sang rehn aramas akan me ahneki koasoandi mwahu en padahkihong irail duwen Siohwa oh sapwellime Ohl, Sises Krais. Nin doken aramas lik lik kei (billions) me iasadahr pahn esehla oh poakohngala Sounkapikparail, eri loalokongkihla Siohwa pahn kadirehla sampah pwon ni uwe ehu me saikinte wiawi sangete mahs lel met.
18. Ia pahn ahmw pepehm ahnsou me ke pahn kasamwohdo irail akan me ke kin poakohng ni ahnsoun kaiasada?
18 Ia uwen peren me kaiasada pahn wahdohng mohngiongatail akan! Ihs rehtail me sohte kin medekila pwehki atail imwintihti me iei mehla? Ni mehlel, ihs rehtail me saikinte pehm kapwunod laud me kin mihla rehtail ni ahnsou me selin limpoak de poakpene kin mweipeseng ni ahnsou me soumwahu, mahla, aksident de wiewia lemei kan kin kihsang mour en irail me kitail kin poakohng kan? Medewehla uwen peren me pahn wiawi ni pwurpenehn aramas akan ah pahn wiawi nan Paradais. Pahpa oh nohno kan, neitail pwutak oh serepein akan, kompoakepatail akan oh kisehtail kan pahn tangpene en pwoalehdi emenemen, kokouruhr oh wie sengisengki peren.
SOAHNG KOAROS PAHN UNSEKLA!
19. Soangen manaman dahieu pahn wiawi erein Pahr Kido?
19 Nan erein Pahr Kido, manaman kaselel ieu pahn wiawi. Ohng aramas, mwein ele iei ahnsowo me pahn wia ahnsou keieu kaperen erein Pahr Kid me Krais pahn wia kakaun. Siohwa pahn ketin kaweidki sapwellime Ohl en doadoahngki kapai kan en sapwellime meirong en tomw ohng ohl oh lih lelepek oh peik kan koaros. Ki wiepe wet, dihp koaros pahn kamwakelesang oh aramas pahn unsekla.—1 Sohn 2:2; Kaudiahl 21:1-4.
20. (a) Ia wehwe en unsekla? (b) Ahnsou dah me irail me pahn pitsang Armakedon oh pil irail akan me iasada pahn tepiada mour unsek?
20 Unsekla! Ia pahn wehwehn met? E wehwehki me kitail pahn pwuralahng nan irair en mour ehu me Adam oh Ihp paiekihdahr mwohn ara pelianda Siohwa Koht oh wiahdahr dihp. Ni irair en paliwar, madamadau, pepehm, tiahk, pali ngehn—ni ahl koaros me kitail kak medewehda—aramas unsek kan pahn pahrekiong sapwellimen Koht koasoandi kan. Ahpw, iaduwen—aramas koaros pahn soangen mwohmw tehieu ahnsowo? Uhdahn soh! Sapwellimen Siohwa kapikipik kan—tuhke kan, wahn rohs akan, mahn akan—irail koaros kin kasalehong kitail me Siohwa kin ketin kupwurki soahng wekpeseng kan. Aramas unsek kan pahn ahneki soangsoangen mwekid wekpeseng kan oh soangsoangen koahiek kan. Emenemen pahn perenki eh mour nin duwen me Koht kupwurki ohng ih. Kaudiahl 20:5 (NW) mahsanih: “Luhwen me mehla kan sohte pwurehng mourda lao lel pahr kido imwisekla.” Duwehte irail pokon kalaimwun me pitsang Armakedon, irail oko me kaiasada kan pahn tepida mour unsek ni ahnsou me re pahn lel irair en unsek oh sohla diparail.
21. (a) Dahme pahn wiawi ni imwin Pahr Kido me Krais pahn wia kakaun? (b) Ni imwila, dahme pahn wiawi ong Sehdan oh koaros me kin uhki ih?
21 Aramas unsek kan pahn lelohng kaimwiseklahn kasongparail. Ni imwin pahr kido, Sehdan oh nah ngehn saut akan pahn sapwedekla sang nan pwoahr sohte kapio ohngete lepin ahnsou kis oh pahn mweimweiong irail en song en wekidewei aramas akan sang papah Siohwa. Ekei aramas pahn mwohneki arail ineng laud sang arail limpoak ohng Koht, ahpw soangen uhwong Koht wet pahn wiawi ahnsou mwotomwot te. Siohwa pahn kamwomwala irail aramas roporop pwukat oh iangahki Sehdan oh nah ngehn saut koaros. Irail me wia sapwung kan koaros eri pahn kasohrala kohkohlahte.—Kaudiahl 20:7-10.
DAHME KE PAHN WIA?
22. Dahme ke kasikasik ken wia nan Paradais?
22 Irail oko me kin poakohng Siohwa Koht oh kousoan nan Paradais sampah pahn kilangwong mour poatopoat me mih mwohrail. Kitail sohte kak wehwehkihla douluhl uwen peren me re pahn ahneki, oh ke kak pil iang ahneki peren wet. Palien keseng, mahlen, soangen koahiek teikan—soahng kan me irail aramas unsek pwukat pahn wia pahn daulih doadoahk me keieu mwahu me kitail kin wia nan koasoandi mering wet! Soahng koaros me re pahn wia pahn pweida pwehki aramas pahn unsek oh re pahn ahneki ahnsou laud kohkohlahte ohng wia dahme re men wia. Medewehla soahng kan me ke pahn kak wia ni ahmw pahn wialahr aramas unsek men. Pil medewehla, dahme komwi oh aramas teikan pahn kak sukuhliki me pid duwen sapwellimen Siohwa kepikipik kan—sukuhliki duwen mwutumwut en usu lik lik kan (billions) me kipe nan wehwe, lelahng kisin mehkan me kitail sohte kak kilangki masatail kan nan rahnwet. Soahng kan koaros me kitail pahn wiahda pahn pil kalaudehla peren en kupwuren Samatail limpoak me ketiket nanleng, Siohwa.—Melkahka 150:1-6.
23. Dahme kahrehda ke sohte pahn pwangahkihda mour nan Paradais?
23 Ke sohte pahn pwangahkihda mour nan paradais. E pahn wie kaperenla ahnsou koaros nin doken ahnsou ah pahn wie reireila. Ke pahn kilang me sohte pahn imwin loalokongkihla Koht. (Rom 11:33) Erein ahnsou soh imwi wet, e pahn mihmihete soahng kan me kitail kak sukuhliki oh katehlapala wehwe kapw akan ohng soahng kan me kitail anahne wehwehkihla. (Eklesiasdes 3:11) Oh ni ahmw pahn kalaudehla ahmw sukuhliki duwen Siohwa Koht, ke pahn wie momourte kohkohla—kaidehn ohngete sounpar ekei ahpw ahnsou soutuk!—Melkahka 22:26.
24, 25. Dahme kahrehda ken mour pahrekiong loalokong me pid duwen Koht?
24 E soh mie katepen ahmw tohnmetei oh nanti pwehn kak ahneki mour peren nan paradais sampah ni ahnsou kohkohdo? Uhdahn mie! Siohwa kin ketikihong uhk kih en alehda mour kaselel nan ahnsou kohkohdo. Kih wet iei loalokong me pid duwen Koht. Ke pahn doadoahngki kih wet?
25 Ma ke kin poakohng Siohwa, ke pahn diar peren nan ahmw kin wiewia kupwure. (1 Sohn 5:3) Ni ahmw pahn kapwaiada elen mour wet, ke pahn ale kapai tohto! Ma ke pahn doadoahngki loalokong me pid duwen Koht nan ahmw mour, e pahn kak wahdohng uhk mour peren mendahte ma ke mihmi nan sampah liseliping wet. Oh kapai en ahnsou kohkohdo kan me inenen mwuledek, pwehki met iei loalokong me pahn kahluwaiukalahng mour soutuk! Met iei ahnsou mwahu ohng uhk ken mwekidiki. Koasoanehdi nan ahmw lamalam me ke pahn doadoahngki loalokong me pid duwen Koht me ke sukuhliki nan ahmw mour. Kasalehda duwen ahmw limpoak ohng Siohwa. Wauneki mwaren Koht oh kadehdehda me Sehdan likamw men. Ma ke pahn wia mehpwukat, Siohwa Koht, me wia utupen erpit mehlel oh loalokong pwung, pahn kupwurkin uhk nan sapwellime kupwur lap oh limpoak. (Seremaia 31:3; Sepanaia 3:17) Siohwa ahpw pahn poakohng uhk kohkohlahte!
SONG UWEN ME KE KOLEDI
Ia wehwehn “uhdahn mour mehlel”?
Mwurin Armakedon, dahme pahn wiawi pohn sampah?
Ihs me pahn iasada pohn sampah?
Iaduwen aramas akan pahn unsekla oh pwurehng ale kasongparail?
Ia ahmw koapworopwor me pid duwen Paradais?
[Kilel nan pali 188, 189]
Ke koapworopworki me ke pahn kousoan nan Paradais—ahnsou me loalokong me pid duwen Koht pahn kadirehla sampah?