Iren Mehn Kasukuhl 9

Sapwellimen Koht Ladu kan Anahne en Mwakelekel

Dahme kahrehda kitail anahne en mwakelekel ni soahng koaros? (1)

Ia wehwehn en mwakelekel ni pali ngehn? (2)

tiahk mwakelekel? (3) madamadau ni mwakelekel? (4) mwakelekel ni paliwar? (5)

Mehnia koasoi samin kan kitail anahne liksang? (6)

1. Siohwa Koht me mwakelekel oh sarawi. E ketin kupwurki sapwellime tohnkaudok kan en mwakelekel—ni pali ngehn, tiahk, madamadau, oh paliwar. (1 Piter 1:16) Kitail anahne nantiong en kak mwakelekel mwohn silangin Koht. Kitail memour nan sampah samin ehu. Kitail pil kin pepei ong pein atail ineng kan en wia me sapwung. Ahpw kitail en dehr luwetala.

2. Mwakelekel ni Pali Ngehn: Ma kitail men papah Siohwa, kitail sohte kak kolokolte padahk kan de tiahk kan en kaudok likamw. Kitail anahne pidoi sang kaudok likamw oh dehr utungada. (2 Korint 6:14-18; Kaudiahl 18:4) Ni ahnsou kitail sukuhliki duwen padahk mehlel en Koht, kitail anahne kanahieng en dehr idawehnla aramas akan me kin wia padahk likamw.—2 Sohn 10, 11.

3. Tiahk Mwakelekel: Siohwa kupwurki sapwellime tohn kaudok kan en ahnsou koaros wia Kristian mehlel akan. (1 Piter 2:12) E masanih soahng koaros me kitail kin wia, pil mehkan kitail kin wia ni rir. (Ipru 4:13) Kitail anahne liksang nenek oh wiewia samin teikan en sampah wet.—1 Korint 6:9-11.

4. Madamadau ni Mwakelekel: Ma kitail kin audaudki atail madamadau kan ki madamadau min kan, atail tiahk pil pahn mwakelekel. (Pilipai 4:8) Ahpw ma kitail kin ihte medemedewe duwen mehkan me samin, e pahn imwikihla wiewia suwed kei. (Madiu 15:18-20) Kitail anahne liksang mehn kamweit kan koaros me kin kasaminehla atail madamadau kan. Kitail kak audehki atail madamadau kan madamadau min sang ni atail pahn ononop Mahsen en Koht.

5. Mwakelekel ni Paliwar: Pwehki re kin wiliwilian Koht, Kristian akan anahne mwakelekel ni pali war oh ahr likou kan. Kitail anahne emwiemw mwurin kotala, oh pil mwohn kitail pahn mwenge de kaunopada kenatail mwenge kan. Ma ke sohte ahneki imwen kainen mwahu, ke anahne weirada pwoahr oh kainendiong loale, oh sarepedi. (Deuderonomi 23:12, 13) Mwakelekel ahnsou koaros ni paliwar, pahn kahrehda roson mwahu. Ihmwen Kristian men anahne en soandi mwahu oh mwakelekel, nan ihmw oh pil likin ihmw-o. E pahn anahne wiahda kalemeng mwahu nan ah wasahn kosoan.

6. Lokaia Min: Sapwellimen Koht ladu kan anahne ahnsou koaros koasoi mehlel. Irail me likamw akan sohte pahn sohsohki Wehin Koht. (Episos 4:25; Kaudiahl 21:8) Kristian akan sohte kin doadoahngki lokaia suwed. Irail sohte kin rong de wia kamwan suwed akan de koasoi samin akan. Pwehki sang ni ahr lokaia min, irail kin wuksang mehteikan nan arail wasahn doadoahk kan, de nan sukuhl oh nan arail wasahn kousoan kan.—Episos 4:29, 31; 5:3.

[Kilel kan nan pali 18, 19]

Sapwellimen Koht ladu kan anahne mwakelekel ni soahng koaros