Koht Ketin Luhkeiuk en Kompoakepahnki Ih

Koht ketin kupwurki ken wiahla kompoakepah. Mie pak me ke medewehda me ke kak kompoakepahnki Meno me keieu lapalap nan audepen lahng oh sampah? Eipraam, me memour mahs mahsie, kin mwareneki Kompoakepahn Koht. (Seims 2:23) Paipel kin mahsanih duwen aramas teikan me pil kompoakepahnki Koht oh alehdi kapai laud kan. Rahnwet, aramas akan me kin mihmi wasa koaros nan sampah wialahr kompoakepahn Koht. Ke pil kak kompoakepahnki Koht.

En kompoakepahnki Koht kin wia mehkot mwahu sang kompoakepahnki aramas akan soh lipilipil. Koht sohte kak kansensuwedihala sapwellime kompoakepah lelepek kan. (Melkahka 18:25) En kompoakepahnki Koht kin wia mehkot mwahu sang naineki mwohni tohto. Ni ahnsou me aramas kepwehpwe men kin mehla, nah mwohni kin kohlahng ekei aramas tohrohr. Ahpw, irail akan me kin kompoakepahnki Koht kin ale kapai kan me sohte emen pahn kak kihsang.​—Madiu 6:19.

Mwein ekei aramas pahn song en kauhdi uhk sang ahmw sukuhliki duwen Koht. Mwein kompoakepahmw kan oh ahmw peneinei pahn song en wia met. (Madiu 10:36, 37) Ahpw, ma meteikan kin kouruhrkin iuk de uhwong uhk, idek pein rehmw peidek wet, ‘Ihs me I men kaperenda—aramas akan de Koht?’ Medewehla met: Ma emen ndaiong uhk en dehr mwenge, ke pahn peikiong ih? Uhdahn soh! Ke anahne mwenge pwehn mour. Ahpw, Koht kak kihong uhk mour soutuk! Eri, dehr mweidong emen en kauhdi uhk sang ahmw sukuhliki iaduwen ke kak kompoakepahnki Koht.​—Sohn 17:3.