Kompoakepahn Koht akan pahn Mour nan Paradais

Paradais sohte pahn duwehte sampah wet me kitail kin kousoan loale ahnsou wet. Koht sohte kupwurki sampah wet en dirkihla kahpwal akan, nsensuwed, medek oh kalokolok. Ni ahnsou kohkohdo, Koht pahn ketin kaparadaisiehla sampah wet. Ia mwomwen Paradais ni ahnsou kohkohdo? Kitail kak tehk dahme Paipel mahsanih:

Aramas mwahu. Paradais pahn wiahla wasahn kousoan ong kompoakepahn Koht akan. Re pahn wia mwahu ong emen emen. Re pahn memourki sapwellimen Koht ahl pwung kan.​—Lepin Padahk 2:21.

Reken mwenge. Nan Paradais, solahr pahn mie aramas duhpekla kan. Paipel mahsanih: “Reken wahn pilawa [de, mwenge] pahn wiewiawihte nin sampah.”​—Melkahka 72:16.

Ihmw kaselel kan oh doadoahk kansenamwahu. Nan Paradais sampah, peneinei koaros pahn imwanekihla pein imwarail kan. Koaros pahn wia doadoahk kan me pahn kihong irail peren mehlel.​—Aiseia 65:21-23.

Wasa koaros nan sampah pahn mie meleilei. Aramas akan solahr pahn peipene oh mehla nan mahwen kan. Mahsen en Koht mahsanih: “[Koht] pahn katokehdi mahwen wasa koaros nin sampah.”​—Melkahka 46:8, 9.

Roson mwahu. Paipel inoukihda met: “Sohte emen me kin kousoan nan [Paradais] pahn kaulimkihla eh soumwahu.” (Aiseia 33:24) Oh pil, sohte emen pahn nehtuk de maskun de salengepon de lohteng.​—Aiseia 35:5, 6.

Solahr medek, nsensuwed, oh mehla. Mahsen en Koht mahsanih: “Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”​—Kaudiahl 21:4.

Aramas suwed akan solahr pahn mie. Siohwa ketin inoukihda met: “Koht pahn ketin koakoahksang sampah aramas suwed akan oh irail me widing kan pahn sohrala.”​—Lepin Padahk 2:22, New World Translation.

Aramas pahn kasalehda limpoak oh wahu nanpwungarail. Solahr kopwung sapwung, tiahk lemei, noahrok, oh kailok nanpwungen aramas. Aramas akan pahn miniminpene oh mourki sapwellimen Koht ahl pwung kan.​—Aiseia 26:9.