Sises Kehlail Sang Ngehn Suwed Akan

KE TAMATAMAN dahme kahrehda emen sapwellimen Koht tohnleng ko wiahla Sehdan me Tepil?— Pwehki e men aramas en kaudokiong ih, kahrehda e pelianda Koht. Ia duwe, mie ekei tohnleng me pil iangala Sehdan?— Ei, mie. Paipel kahdaneki irail ‘iengen Sehdan tohnleng kan’ de ngehn suwed akan.​—Kaudiahl 12:9.

Ia duwe, tohnleng suwed pwukat de ngehn suwed pwukat kin kamehlele Koht?— Paipel mahsanih: ‘Ngehn suwed kan kin kamehlele Koht.’ (Seims 2:19) Ahpw met irail masepwehkada pwehki irail ese me Koht pahn ketin kaloke irail pwehki soahng suwed kan me re wiahda. Soahng suwed dah kan me re wiahda?—

Paipel mahsanih me tohnleng pwukat kesehla dewerail nanleng oh kohdihdo nin sampah oh mour duwehte aramas. Irail wia met pwehki re men wia nsenen pwopwoud rehn lih masamwahu kan nin sampah. (Senesis 6:1, 2; Sud 6) Dahme ke ese duwen nsenen pwopwoud?—

Nsenen pwopwoud iei ahnsou me ohl emen oh lih emen kin patpene ni ahl ehu me kesempwal. Mwurin mwo, seri men kak kekeirda nan kapehden nohno men. Ahpw ong tohnleng kan, en wia nsenen pwopwoud mehkot sapwung. Koht kupwurki me aramas pwopwoudte me pahn kak wia nsenen pwopwoud. Eri ni seri men eh ipwidi, ohl pwopwoud oh lih pwopwoudo kak apwalih serio.

Ni ahnsou me tohnleng ko pwuhriong nan paliweren aramas oh wiahda nsenen pwopwoud rehn lih akan en sampah, neirail seri kan laudla oh wiahla kodon kei. Irail kin uhdahn lemei oh re kin wiakauwe aramas akan. Koht eri ketin wahdo nohlik laud ehu pwehn kasorehla kodon pwukat iangahki aramas suwed koaros. Ahpw e ketin padahkihong Noha en kauwada warihmw ehu pwehn doarehla aramas kei me kin wia dahme pwung. Sounpadahk Lapalapo mahsanih me dahme wiawi ni Nohliko kesempwal kitail en tamataman.​—Senesis 6:3, 4, 13, 14; Luk 17:26, 27.

Ke ese dahme wiawihong tohnleng suwed ko ni ahnsou me nohliko wiawi?— Irail solahr doadoahngki paliweren aramas oh re pwurehng pwurala nanleng. Ahpw irail solahr kak wia sapwellimen Koht tohnleng kahrehda irail wiahla iengen Sehdan tohnleng de ngehn suwed akan. Dahme wiawihong neirail seri kodon ko?— Re mehla nan nohliko iangahki aramas koaros me sohte peikiong Koht.

Mwurin Nohliko Koht solahr ketin mweidohng ngehn suwed ko en pwurehng pwuhriong paliweren aramas. Ngehn suwed pwukat kin song en kahrehiong aramas en wia me suwed mehnda ma kitail sohte kak kilang irail. Re kin kahrehda kahpwal laudsang mahso. Met pwehki irail lekdekdidohng sampah.

Ke ese dahme kahrehda kitail sohte kak kilang ngehn suwed akan?— Pwehki irail ngehn ekei. Ahpw kitail kak kamehlele me irail wie momour. Paipel mahsanih me Sehdan kin ‘pitipitih aramas en sampah pwon,’ oh nah ngehn suwed akan kin iang sewese.​—Kaudiahl 12:9, 12.

Ia duwe, Tepilo oh nah ngehn suwed akan kak pil pitih kitail?— Ei, irail kak ma kitail sohte pahn kanahieng. Ahpw kitail sohte anahne masak. Sounpadahk Lapalapo mahsanih: ‘Sohte en Tepilo manaman pohi.’ Ma kitail pahn karanih Koht, e pahn ketin pere kitail sang Tepilo oh nah ngehn suwed akan.​—Sohn 14:30.

E kesempwal kitail en ese soahng suwed dah kan me ngehn suwed akan pahn kahrehiong kitail en wia. Eri medewe duwen met. Soahng suwed dah kan me ngehn suwed akan kin wia ni arail kohdihdo sampah?— Mwohn Nohliko, irail kin wia nsenen pwopwoud rehn lih akan, mehkot me sohte pwung tohnleng kan en wia. Pil nan rahnpwukat, ngehn suwed akan kin perenki aramas ar kin sapeikiong sapwellimen Koht kosonned me pid wia nsenen pwopwoud. I pahn idek rehmw, Ihs me kak wia nsenen pwopwoud?— Ke pwung, aramas pwopwoudte me kak wia met.

Rahnwet, pwutak oh serepein pwulopwul tohto kin wia nsenen pwopwoud ahpw met me sapwung. Paipel kasalehda me Koht me ketin wiahda dipwisoun kaparapar en ohl oh lih. Siohwa ketin wiahda dipwisou pwukat me wia kisehn paliwar ong kahrepe kesempwal ehu ongete irail me pwopwoud kan. Ngehn suwed akan kin peren ma aramas akan kin wia mehkot me Koht ketin keinapwih. Karasepe, ngehn suwed akan kin perenki ma pwutak emen oh serepein emen kin mwadongkihpene neira dipwisoun kaparapar kan. Kitail sohte men kaperenih ngehn suwed akan, ah ia duwen kowe?—

Pil mie mehkot me ngehn suwed akan kin mwahuki me Siohwa ketin kailongki. Ke ese dahkot mwo?— Tiahk lemei. (Lepin Padahk 6:16-19) Tiahk lemei iei wiakauwe meteikan. Tamataman me ih met me nein ngehn suwed kan, neirail kodon ko kin wia.

Ngehn suwed akan pil kin perenki kamasepwehkih aramas akan. Ekei pak irail kin mwomwehda aramas me melahr akan. Re pil kin wiahda ngilen irail akan me melahr. Ni ahl wet ngehn suwed ko kin pitiehdi aramas tohto ren kin kamehlele me me melahr akan kin wie momourte oh kak lokaiahiong irail. Ngehn suwed akan kin kahrehda me tohto en kamehlele me mie eni.

Ihme kahrehda kitail anahne kanahieng pwe Sehdan oh nah ngehn suwed akan ren dehr pitih kitail. Paipel mahsanih: ‘Sehdan kin kawekila pein ih oh mwomwehda tohnleng mwahu men, oh nah kan pil kin wia met.’ (2 Korint 11:14, 15) Ahpw irail uhdahn suwed. Kita pahn kilang ia duwen arail kin song wia kitail en duwehla irail.

Ia wasa me aramas kin sukuhlki duwen tiahk lemei, wia nsenen pwopwoud ni ahl sapwung, ngehn suwed akan oh eni?— Met sou kohsang kasdo kan, video game kan oh werek suwed nan sukuhl? Ihs me kitail kin karanih ni atail kin wia soahng pwukat, Koht de Tepilo oh nah ngehn suwed akan? Dahme ke leme?—

Ihs me ke leme kin men kitail en rong oh kilang soahng suwed kan?—Iei Sehdan oh nah ngehn suwed akan. Eri dahme kowe oh ngehi anahne wia?— Kita anahne wadek, rong oh kilang soahng kan me mwahu ong kita oh me pahn sewese kita en papah Siohwa. Ia ekei soahng mwahu kan me ke medewe me kita kak wia?—

Ma kitail kin wia me mwahu, eri kitail sohte anahne masak ngehn suwed akan. Sises kehlail sang irail, oh irail kin masak ih. Ehu rahno, ngehn suwed akan idek rehn Sises: ‘Komw ketidohng kauweikitala?’ (Mark 1:24) Kitail sou pahn peren ahnsou me Sises pahn ketin kauwehla Sehdan oh nah ngehn suwed akan?— Ahpw ni ahnsou wet kitail kak kamehlele me Sises pahn ketin pere kitailsang ngehn suwed akan ma kitail kin karanih ih oh Seme nanleng.