Ke Kin Tamataman En Nda “Kalahngan”?

KE MWENGE rahnwet?— Ke ese ihs me kaunopada mwengeo?— Mwein ahmw nohno de emen me wiahda, ahpw dahme kahrehda kitail kin kalahngan ong Koht?— Pwehki Koht me kin ketin kahrehiong wahnsahpw akan en wosada. Ahpw kitail pil anahne kalahngan ong aramas me kaunopada mwenge ko de aramas me kihong kitail.

Kitail sou kin ekei pak manokehla en nda “kalahngan” ong meteikan ni arail kin kadek ong kitail? Ni ahnsou me Sounpadahk Lapalapo ketiket nin sampah, mie aramas tokutok kei me manokehla kasalehda kalahngan.

Ke ese dahkot tokutok?— Met soumwahu ehu me kak kahrehiong uduk en paliweren aramas en pwupwusang. Ni ahnsou me Sises ketiket pohn sampah, aramas tokutok kan anahne mi dohsang meteikan. Oh ma aramas emen kohkohdo, aramas tokutoko anahne ngihl laud ndahng en dehr kohdo karanih ih. Met kin wiawi pwe meteikan en dehr iangada soumwahwo.

Sises kin ketin uhdahn kadek ong me tokutok kan. Ehu rahno ni eh ketiket kohla Serusalem, Sises anahne kotehla kisin kahnimw ehu. Ni eh ketin karanihala kahnimwo, ohl tokutok ehk kohdo pwehn tuhwong ih. Re rong me Sises sapwellimanki manaman sang Koht pwehn kamwahwihala soangen soumwahu koaros.

Ohl tokutok ko sohte kohdo karanih Sises. Re kesihnen dohsang ih. Ahpw re kamehlele me Sises kak ketikihsang arail soumwahu en tokutok. Eri ni ohl tokutok ko arail kilangada Sounpadahk Lapalapo, re likwerlahng ih: ‘Maing Sises, at Sounpadahk, komw ketin sewese kiht!’

Ke kin poakehla aramas akan me soumwahu?— Sises kin ketin wia met. E mwahngih ia uwen kansensuwed en wia emen me tokutok. Ih eri ketin sapeng irail oh mahsanih: “Kumwail kohwei rehn samworo ko oh ale keseu rehrail.”​—Luk 17:11-14.

Dahme kahrehda Sises mahsanih ren wia met? Met pwehki ih kosonned me Siohwa ketikihong sapwellime aramas akan duwen irail me tokutok kan. Kosonnedo mahsanih me sapwellimen Koht samworowo pahn kilang paliweren me tokutoko. Samworowo pahn padahkihong me tokutoko ma eh soumwahwo uhdahn mwahula. Ma e mwahula, e kakehr pwurehng mi nanpwungen aramas akan.​—Lipai 13:16, 17.

Irail ohl tokutok pwukat ahnekihte arail soumwahwo. Ia duwe, irail kohla rehn samworowo duwehte me Sises mahsanihong irail?— Ei, irail wia met ni ahnsowohte. Ohl pwukat uhdahn kamehlele me Sises pahn kak ketikihsang arail soumwahwo. Eri dahme wiawi?

Ni arail kohkohlahng tuhwong samworowo, arail soumwahwo mwahula. Paliwararail ko mwahula oh re solahr soumwahu! Arail kin kamehlele sapwellimen Sises manaman wia kamwahu ehu ong irail. Ia uwen arail peren! Ahpw dahme re anahne wia pwehn kasalehda arail kalahngan? Dahme ke pahn wia?—

Emen rehn ohl ehk ko me mwahula pwurodo rehn Sises. E tepida kapinga Siohwa oh ndinda soahng mwahu kan duwen Koht. E pwung en wia met pwehki manaman me kamwahwihala ih kohsang rehn Koht. Ohlo pil poaridi mwohn Sounpadahk Lapalapo oh kalahngan ong ih. E uhdahn kalahnganki dahme Sises ketin wiahiong ih.

Ahpw ia duwen ohl duwemeno? Sises ketin idek: ‘Kaidehk me ehk me mwakelekellahro? A ia me duwemeno? Emente me pwurodo pwehn kapinga Koht?’

Ei e pwung. Emente rehn me ehk ko me kihong Koht kaping oh pwurala rehn Sises pwehn kasalehda eh kalahngan ong ih. Oh ohl menet mehn Sameria men me kohsang ehu sahpw tohrohr. Ohl duwemeno sohte kasalehda arail kalahngan ong Koht oh Sises.​—Luk 17:15-19.

Ihs rehn ohl pwukat me ke duwehte? Kitail sou men duwehte ohlen Sameriao?— Eri ma emen kadek ong kitail, dahme kitail anahne tamataman en wia?— Kitail anahne kasalehda atail kalahngan. Aramas kin kalapw manokehla en nda “kalahngan.” Ahpw e mwahu en nda met. Atail kin wia met kin kaperenda Siohwa oh sapwellime Ohl Sises.

Ma ke song medewe, ke pahn tamanda me aramas kin wiahiong uhk soahng mwahu tohto. Karasepe, mie pak me ke soumwahuda?— Mwein ke sohte soumwahu duwehte ohl tokutok ehk ko ahpw mwein ke iangada soumwahu en wai de ke kapehd medek. Mie me apwalih iuk?— Mwein re kihong uhk wini oh wia soahng teikan. Ke sou perenki arail sewese iuk ken mwahula?—

Ohlen Sameriao kalahngankihong Sises eh ketin kamwahwihala oh met kaperenda Sises. Ke lemeleme ahmw pahpa de nohno pahn perenda ma ke nda “kalahngan” ni ara kin wia soahng kan ong uhk?— Ei, ira pahn.

Ekei aramas kin wiahiong uhk soahng kan rahn koaros de wihk koaros. Mwein ih arail doadoahk en met. Mwein re pil kin perenki wia mepwukat. Ahpw mwein ke kin manokehla en nda “kalahngan.” Ahmw sounpadahko kin doadoahk laud pwehn kasukuhlih iuk. Ih eh doadoahk en met. Ahpw e pahn perenki ma ke kasalehda kalahngan ong ih ni eh kin kasukuhlih iuk.

Ekei pak aramas kin wia mehkot tikitik ong uhk. Mie pak me emen sewese iuk en wa mehkot toutou? De mie me kin kihong uhk delen mwenge ni ahnsoun mwenge? E mwahu en nda “kalahngan” mendahki kisin mehkot tikitik me re wia.

Ma kitail tamataman en nda “kalahngan” ong aramas nin sampah, eri kitail pahn taman en nda “kalahngan” ong Samatail me ketiket nanleng. Oh mie soahng tohto me kitail kak kalahngankihong Siohwa! E ketikihong kitail mour oh soahng mwahu koaros me kin kahrehiong mour en kaperen. Eri mie kahrepe mwahu tohto kitail en kapinga Koht ni atail kin koasoia soahng mwahu kan duwen ih rahn koaros.