Dahme Pahn Wiawi Ma Kitail Mehla?

KE ESEHIER me aramas kin mahla, soumwahuda oh mehla. Pil ekei seri kan kin mehla. Ke anahne masak mehla de me melahr kan?— Ke ese dahme kin wiawi ma kitail mehla?—

Sohte emen me momour rahnwet me melahr oh pwurehng mourda oh kak padahkihong kitail dahme kin wiawi ni emen eh kin mehla. Ahpw ni ahnsou me Sounpadahk Lapalap Sises ketiket pohn sampah, mie ohl emen me mourda. Kitail kak sukuhlki dahme kin wiawi ong irail kan me melahr ni atail pahn wadek duwen ohl menet. Ohl menet iei kompoakepahn Sises oh e mi nan kisin kahnimw ehu me adaneki Pedani me karanih Serusalem. Ede Lasarus oh mie rie serepein riemen me adaneki Marda oh Mery. Kita pahn kilang dahme Paipel mahsanih.

Ehu rahno, Lasarus soumwahuda laud. Ni ahnsowo, Sises ketiket dohsang wasao. Kahrehda Marda oh Mery kadarala emen en padahkihong Sises me riara pwutako, Lasarus soumwahuda. Ira wia met pwehki ira ese me Sises kak ketido oh kamwahwihala riara pwutako. Sises kaidehn toahkte men ahpw e sapwellimanki manaman sang rehn Koht kahrehda e kak ketin kamwahwihala soangen soumwahu koaruhsie.​—Madiu 15:30, 31.

Ahpw mwohnte Sises eh ketila pwehn kilang Lasarus, eh soumwahwo doarala oh e mehla. Ahpw Sises mahsanihong sapwellime tohnpadahk ko me Lasarus wie memeir oh e pahn ketila pwehn pangenda. Tohnpadahk ko sohte wehwehki dahme Sises mahsanih. Kahrehda Sises mahsanih: “Lasarus melahr.” Dahme met kin kasalehda duwen mehla?— Ei, mehla duwehte en emen eh kin meir kelik oh e pil sohte kak ouraman.

Sises wie ketiket kohdo pwehn tuhwong Marda oh Mery. Kompoakepahn peneinei en Lasarus tohto kohpenehr rehrail. Irail kohdohn kamweit Marda oh Mery pwehki riara pwutako eh melahr. Ni Marda eh rongada me Sises wie ketiket kohdo, e kohlahn tuhwong ih. Mwuri, Mery pil kohlahng tuhwong Sises. Mery uhdahn nsensuwedla oh wie sengiseng, ih eri poaridi mwohn Sises. Kompoakepah teikan me idawehnla Mery pil wie sengiseng.

Sounpadahk Lapalapo ketin idek ia wasa me re kihdi paliweren Lasarus. Aramas ako eri kahrehla Sises ni pwoaren paip me Lasarus seridi ie. Ni Sises eh ketin kilang aramas akan koaros arail wie sengiseng, e pil ketin sengiseng. E mwahngih ia uwen kansensuwed ni emen kompoakparail eh kin mehla.

Takai ehu perehla pwoahro kahrehda Sises mahsanih: “Kumwail pwekasang takaien.” Ia duwe, e mwahu ren wia met?— Marda sohte leme me e mwahu. Ih eri patohwan: “Maing, e pwohsuwedlahr, pwe rahn pahieu douwer pohn eh seridi.”

Ahpw Sises mahsanihong ih: “I soh ndaionguhkehr me ke pahn kilang lingan en Koht ma ke pahn pwoson?” Sises mahsanih me Marda pahn kilang mehkot me pahn wahdo kaping ong Koht. Dahme Sises pahn ketin wia? Ni takaio eh kohsang, Sises kapakap ngihl laudida ong Siohwa. Ih eri mahsanih: “Lasarus, pedoido!” Ia duwe, Lasarus pahn kohieido? E kak wia met?—

Ke kak pangenda emen me wie memeir?— Ei, ma ke likwer ni ngihl laud, e pahn pwourda. Ahpw ke kak pangenda emen me melahr?— Soh. Mehnda ma ke ngihl laud oh likwer, me melahro sohte pahn kak rong. Sohte mehkot me kowe de ngehi de emen nin sampah kak wia pwehn pangenda me melahro.

Ahpw Sises weksang kitail. E sapwellimanki manaman sang rehn Koht. Kahrehda ni Sises eh ketin likwerih Lasarus, mehkot kapwuriamwei wiawi. Ohl me melahr erein rahn pahieuo, pedoisang nan pwoahro! E pwurehng mourda! E kak pwurehng esingek, alu oh lokaia! Ei, Sises ketin kamourada Lasarus sang mehla.​—Sohn 11:1-44.

Eri medewe duwen met: Dahme wiawihong Lasarus ni eh mehlao? Mie mehkot nan paliwere me pedoi oh kohla wasakis? E kohdahla nanleng? E wie momour nanleng rahn pahieu rehn Koht oh tohnleng kan?—

Soh, e sohte wia mepwukat. Taman me Sises mahsanih me Lasarus wie memeir. Dahme kin wiawi ni ahmw kin meir? Ni ahmw kin meir kelik, ke kin sehse dahme wiawi, kaidehn?— Oh ni ahmw kin pwourda, ke kin sehse ia uwen werei me ke memeirki lao ke kilang kuloak.

Met pil duwehte aramas melahr akan. Irail kin sehse mehkot. Irail sohte kin pehm mehkot. Oh irail sohte kak wia mehkot. Ih met me wiawihong Lasarus ni eh mehla. Mehla kin duwehte ni emen eh kin meir kelik oh sohte taman mehkot. Paipel mahsanih: “Me melahr akan sohte ese mehkot.”​—Eklesiasdes 9:5, 10.

Pil medewe duwen met: Ma Lasarus mi nanleng erein rahn pahieu, e sou pahn koasoia duwen met?— Oh ma e mi nanleng, Sises pahn ketin kahrehiong en pwurodo sampah sang wasa mwahwo?— Uhdahn soh!

Ahpw aramas tohto kin nda me mie mehkot nan paliwaratail me kin momour mwurin atail mehla. Irail nda me Lasarus wie momour wasakis mwurin eh mehla. Ahpw Paipel sohte mahsanih duwen met. E mahsanih me Koht ketin wiahda tepin aramaso oh e wiahla “aramas mour men.” Paipel pil mahsanih me ni Adam eh wiahda dihp, e mehla. E melahr oh solahr ese mehkot. E pwuralahng pwehl me e wiawihdahsang ie. Paipel pil mahsanih me nein Adam seri kan koaros sohsohkihla dihp oh mehla.​—1 Korint 15:45; Senesis 3:17-19; Rom 5:12.

Ekei aramas kin masak me melahr akan. Irail sohte kin kohla karanih sousou kan pwehki re leme me me melahro kak lidere irail. Ahpw aramas melahr men kak lidere aramas momour kan?— Soh, e sohte kak.

Ekei aramas kin kamehlele me me melahr akan kak pwurodo nin duwen ngehn akan pwehn tuhwong me momour kan. Kahrehda irail kin kaunopada mwenge ong me melahr akan. Aramas me kin wia met sohte kin kamehlele dahme Koht mahsanih duwen me melahr akan. Ma kitail kin kamehlele dahme Koht kin mahsanih duwen me melahr akan, kitail sohte pahn masak irail. Oh ma kitail uhdahn kalahngankihong Koht atail mour, kitail pahn kasalehda met sang ni atail kin wia dahme e kupwurki.

Ahpw mwein ke pahn medewe: ‘Koht pahn ketin kamourada seri kan me melahr? E uhdahn kupwurki wia met?’ Kita pahn koasoia duwen met mwuhr.