Dahkot Rahnen Kadeik?

DAHME ke kin medemedewehki Rahnen Kadeik? Aramas tohto kin lemeleme me pahn mie aramas lik (billion) kei oh emenemen irail pahn kin wisikdohng mwohn mwoalen Koht. Iei wasao me kadeik ahpw pahn kohieng emenemen irail. Ekei irail pahn ale pweinerail oh kohla nanleng, ah ekei pahn ale kadeikparail en lokolok soutuk. Ahpw Paipel kin kawehwehda me ahnsoun kadeiko kin weksang met. Mahsen en Koht kin kawehwehda me Rahnen Kadeiko kaidehn ahnsou kamasepwehk ahpw ahnsoun koapworopwor oh onohn sapahl.

Nan Kaudiahl 20:11, 12, wahnpoaron Sohn kawehwehda duwen Rahnen Kadeiko: “I ahpw kilangada lapalahn mwoahl pwetepwet ehu oh ih me kin ketiket powe. Sampah oh nanleng tangasang oh sohla mie mwohn silangi. I ahpw pil kilangada me melahr akan, me lapalap oh me tikitik kan, duwen ar uh mwohn mwoahlo. Pwuhk kan eri papahkpeseng, oh pil ehu pwuhk papahkpeseng, iei pwuhken me momour kan. Me melahr akan eri pakadeingkihda mehkan me ntinting nan pwuhk ko duwen ar wiewia kan.” Ihs Sounkopwungo me sansalda wasaht?

Siohwa Koht me ketin wia Sounkopwung me keieu lapalap ong tohnsampah. Ahpw, mie emen tohrohr me e ketikihong pwukoa doadoahk wet. Nan Wiewia 17:31, wahnpoaron Pohl mahsanih me Koht “ketin koasoanedier rahn ehu me e pahn ketin kadeingkihda sampah pwon pwuhng, sang rehn ohl emen me e ketin pilada.” Sounkopwung menet me Koht ketin piladahr iei Sises Krais me ketin iasadahro. (Sohn 5:22) Iahd me Rahnen kadeiko pahn tepida? Ia pahn werei en rahno?

Pwuhken Kaudiahl kasalehda me Rahnen Kadeiko pahn tepida mwurin mahwen en Armakedon, ni ahnsou me ahn Sehdan koasoandi suwed wet pohn sampah pahn sohrala.a (Kaudiahl 16:14, 16; 19:19–20:3) Mwurin Armakedon, Sehdan oh nah ngehn saut akan pahn selidi nan pwoahr loalo me soh kapi erein pahr kid. Erein ahnsowo, irail meh 144,000 me pahn sohsohki nanleng pahn iang wia sounkopwung kan oh pahn iang Krais “kakaun duwen nanmwarki kei erein pahr kid.” (Kaudiahl 14:1-3; 20:1-4; Rom 8:17) Rahnen Kadeik kaidehn rahn mwotomwot ehu me reireiki awahte 24. E pahn reireiki sounpar kid.

Nan erein pahr kido, Sises Krais pahn ketin kadeik “me momour oh me melahr akan.” (2 Timoty 4:1) “Me momour” iei irail “pokon kalaimwun” me pahn pitsang Armakedon. (Kaudiahl 7:9-17, NW) Wahnpoaron Sohn pil kilangada ‘me melahr akan . . . ar uh mwohn mwoahl’ en kadeiko. Nin duwen me Sises ketin inoukihda, “irail koaros me mihmi nan sousou kan pahn rong [kapitien Krais], oh re pahn pedoisang nan arail sousou kan” ni arail pahn iasada. (Sohn 5:28, 29; Wiewia 24:15) Ahpw dahme irail pahn pakadeingkihda?

Wahnpoaron Sohn kilangada nan kasansalo me “pwuhk kan eri papahkpeseng” oh “me melahr akan eri pakadeingkihda mehkan me ntinting nan pwuhk ko duwen ar wiewia kan.” (Kaudiahl 20:12) Ia duwe, pwuhk pwukat kin audaudki wiewia kan me aramas wiahdahr mahso mwohn ar mehla? Soh, kadeiko sohte pahn poahsoankihda dahme aramas akan wiahdahr mwohn ar mehla. Ia duwen atail ese met? Paipel mahsanih: “Pweinen dihp, iei mehla.” (Rom 6:23) Ihme kahrehda ni ahnsou me re pahn iasada, diparail kan koaros me re wiahdahr mahso pahn manokonoklahr. Kahrehda pwuhk pwukat kin wehwehkiong pil ekei sapwellimen Koht koasoandi kan me e kupwurki aramas en pil kapwaiada ni ahnsowo. Pwe ren kak mour soutuk, koaros me pahn pitsang Armakedon oh pil me pahn iasada pahn anahne peikiong sapwellimen Koht kehkehlik kan, pil iangahki koasoandi kapw kan me Siohwa ele pahn ketikihda nan erein pahr kido. Kahrehda, emenemen aramas pahn pakadeingkihda dahme re pahn wia nan erein Rahnen Kadeiko.

Nan erein Rahnen Kadeiko, aramas lik (billion) kei me ehdin ar pahn iang sukuhlki duwen kupwuren Koht oh nantihong kapwaiada kupwure. Met wehwehki me kasukuhl laud pahn wiawi. Paipel mahsanih: “Ni omwi kin ketin kadeik sampah oh towe kan, irail koaros pahn esehla dahkot pwung.” (Aiseia 26:9) Ahpw kaidehn aramas koaros pahn men peikiong kupwuren Koht. Aiseia 26:10 mahsanih: “Mehnda ma komwi kin ketin kupwur kadekohng aramas suwed kan, re sohte mwahn kin esehla wia dahme pwung. Pil met nan sapwen aramas pwung kan re kin wiewiahte me sapwung, re sohte kin men pohnese sapwellimomwi roson lapalap.” Soangen aramas suwed pwukat pahn kasohrala soutuk nan erein Rahnen Kadeiko.​—Aiseia 65:20.

Ni kaimwiseklahn Rahnen Kadeiko, aramas akan me wie momourte pahn uhdahn “mourda” nin duwen aramas unsek kei. (Kaudiahl 20:5) Eri, erein Rahnen Kadeiko, aramas akan pahn pwurehng unsekla duwehte tepin aramas. (1 Korint 15:24-28) Mwuri, kaimwiseklahn songosong pahn wiawi. Sehdan pahn sapwedeksang nan eh wasahn selidi. E pahn mweimweiong ih en pwurehng pitih tohnsampah pahn meh pak. Met iei kaimwiseklahn eh pahn kasonge aramas. (Kaudiahl 20:3, 7-10) Irail akan me pahn pelianda ih pahn iang paiekihda pweidahn inou en Paipel me mahsanih: “Me pwung kan pahn koukousoan nan sahpwo oh re pahn sapwenikihla kohkohlahte.” (Melkahka 37:29) Ei, Rahnen Kadeiko pahn wia rahn kapai ehu ong aramas lelepek koaros!