IRELAUD 4
Ia Duwen Amwa Kak Apwalih Noumwa Mwohni
“Ale kaweid mwahu, ke ahpw pahn pweida.”—Lepin padahk 20:18
Kitail koaros kin anahne mwohni en apwalih anahn en atail peneinei. (Lepin Padahk 30:8) Ni mehlel, mwohni pahn kak “doareiuk.” (Eklesiasdes 7:12) Nin duwen pwopwoud ehu, mwein e pahn apwal en koasoia duwen mwohni, ahpw dehr mweidohng mwohni en kahrehda kahpwal nan amwa pwopwoud. (Episos 4:32) Pwopwoud ehu anahne likih emenemen oh doadoahkpene ni ahnsou me ira pahn pilada ia mwomwen ara pahn doadoahngki neira mwohni.
1 WIAHDA KOASOANDI NI KENEINEI
DAHME PAIPEL MAHSANIH: “Pwe ihs rehmwail, nan eh koasoakoasoane en kauwada eh imwen doulik ehu, e soh pahn mwohndi mahs oh medemedewe uwen pweine, pwe en kilang ma mie reh mwohni me itar kanekehla ihmwo.” (Luk 14:28) E kesempwal kumwa en ehupene wiahda koasoandi en ia mwomwen amwa pahn doadoahngki noumwa mwohni. (Eimwos 3:3) Pilada dahme kumwa anahne pwainda oh ia uwen mwohni me kumwa kak doadoahngkihla. (Lepin Padahk 31:16) Ma mie noumwa mwohni en pwainda mehkot, e sohte wehwehki me kumwa anahne doadoahngkihla. Song en dehr pweipwand. Doadoahngkihte mwohni me mi rehmwa.—Lepin Padahk 21:5; 22:7.
DAHME KE KAK WIA:
Ma mie luhwen noumwa mwohni ni imwin sounpwongo, pwungkipene dahme kumwa pahn wiahiong mwohnio
Ma sohte itar noumwa mwohni, wiahda koasoandi ni keneinei pwehn katikala dahme kumwa kin pwain. Karasepe, kumwa kak pein wiahda konomwa mwenge ahpw kaidehn kohla ni wasahn mwenge kan
2 KIN MEHLEL OH WEHWEHKI IRE MEHLEL KAN
DAHME PAIPEL MAHSANIH: “Emenemen kumwail en kin lokaia mehlel.” (Episos 4:25) Kin mehleliong omw pwoud duwen ia uwen mwohni me ke kin alehdi oh doadoahngkihla.
Ahnsou koaros koasoiaiong omw pwoud ni ahnsou me ke pahn wiahda pilipil laud kan me pid duwen noumwa mwohni. (Lepin Padahk 13:10) Amwa kin koasoiapene duwen noumwa mwohni pahn sewese kumwa en kolokol popohl nan amwa pwopwoud. Kilangwohng mwohni me ke kin wiahda, kaidehn nin duwen pein noumw mwohni, ahpw nin duwen mwohni ong amwa peneinei tikitik.—1 Timoty 5:8.
DAHME KE KAK WIA:
Pwungkipene mahs uwen mwohni me emenemen kumwa pahn kak doadoahngki ni amwa sohte anahne koasoiapene
Dehr awih pwe kahpwal ehu en pwarada mwohn amwa pahn koasoiapene duwen noumwa mwohni