PALI LIMAU

Pwurodo Rehn “Silepamwail oh Sounepwelpen” Amwail Mour kan

Ia duwe, ke kakehr wehwehki ekei kahpwal kan me kitail koasoiahier nan pwuhk wet? Ma iei, eri ke kin lelohng soangen kahpwalkohte me aramas tohto pil kin lelohng. Me tohto sapwellimen Koht ladu lelepek kan, ni mwehin Paipel oh atail ahnsou, pil kin lelohng soangen kahpwal kohte. Ke pil kak duwe irail, ni ar kin alehdi sawas sang rehn Siohwa pwehn powehdi ar kahpwal kan.

Siohwa pahn ketin ieiang uhk ni omw pahn pwurodo reh

KEN kamehlele me Siohwa pahn ketin ieiang uhk ni omw pahn pwurodo reh. E pahn ketin seweseiuk ken kak powehdi omw pwunod, ken kamwahwihala omw pepehm en nsensuwed kan, oh ken diar popohl nan omw madamadau oh mohngiong me kohsang omw ahneki nsenmwakelekel. Eri ele ke pahn pwurehng men iang iengomw tohnkaudok kan papah Siohwa. Omw irair pahn duwehte tepin Kristian akan, me wahnpoaron Piter ntingihedi: “Pwe mahs kumwail rasehng sihpw me salongalahr, a met kumwail sapahldohngehr rehn ih me Silepamwail oh Sounepwelpen [“amwail mour,” NW].”—1 Piter 2:25.

En pwurodo rehn Siohwa uhdahn mehkot me keieu mwahu me ke kak wia. Dahme kahrehda? Pwehki ke pahn kaperenihada Siohwa. (Lepin Padahk 27:11) Nin duwen omw ese, Siohwa sapwellimanki pepehm kan, eri atail wiewia kan kak kamwakid ih. Ni mehlel, Siohwa sohte kin ketin idingkihong kitail en poakohng oh papah ih. (Deuderonomi 30:19, 20) Emen me samanih Paipel nda nin duwe met: “Sohte me kak ritingadahng uhk omw mohngiong. Kowe me anahne pein wia met.” Kitail pahn kak pein pilada en ritingada, sang ni atail kin kaudokiong Siohwa ni limpoak mehlel en atail mohngiong. Ni atail pahn wia met, kitail kin patohwanohng ih kisakis kesempwal ehu, iei atail lelepek, oh kitail kin kaperenda laud kupwure. Mehlel, sohte me kak kapahrekihong nsenamwahu me kitail kin ahneki sang atail kin patohwanohng Siohwa kaudok me e ketin warohng sapwellimanki.—Wiewia 20:35; Kaudiahl 4:11.

Tohnmwomwohdiso kasamwolong sister men me sohla iang towehda mihting en Kristian akan

Laudsang met, ahnsou me ke pahn kin pwurehng wia omw kaudok en Kristian, met pahn kaitarala omw anahn en ahneki nanpwungmwahu rehn Siohwa. (Madiu 5:3) Ni ahl dah? Aramas akan nan sampah kin medewe, ‘Dahme kahrehda kitail mihmihki met?’ Re uhdahn men diarada pasapeng kan ong peidek kan me pid duwen ia kahrepen mour. Aramas akan kin ahneki soangen anahn wet pwehki Siohwa ketin kapikirailkihda soangen anahn wet. E ketin wiahda kitail en diar nsenamwahu ni atail kin papah ih. Kitail sohte kak ahneki ehu nsenamwahu me laudsang soangen nsenamwahu me kohsang atail ese me kitail kin kaudokiong Siohwa pwehki limpoak.—Melkahka 63:1-5.

Menlau tamataman me Siohwa ketin kupwurki ken pwurodo reh. Ia duwen omw kak ese me met mehlel? Nna tehk met: Kisin pwuhk wet wiawihda ni keneinei, mwurin at kapakapki pak tohto. Ele Kristian elder men de iengomw Kristian men me wadohng uhk pwuhk wet. Eri ke wadek oh mwekidkihda audepen pwuhk wet. Mepwukat koaros kasalehda me Siohwa sohte ketin manokeiukala. Weksang met, e kin ni kadek ketin seweseiuk pwe ken pwurehng karanihala ih.—Sohn 6:44.

Kitail kak alehdi nsenamwahu sang ni atail ese me Siohwa sohte kin ketin manokehla sapwellime ladu kan me salongalahr. Ih met me emen sister me ede Donna tepida wehwehki. E koasoia: “I ekisekis kohkohsang padahk mehlel, ahpw I kin kalapw diarada me ei kin medemedewe duwen Melkahka 139:23, 24, me mahsanih: ‘Maing Koht, komw ketin kasawih ie, pwe komwi en mwahngih mohngiongiet; komw ketin song ie, pwe komwi en mwahngih ei lamalam akan. Komw ketin rapahki ma mie suwed ehu rehi oh ketin kahluwa ie nan ahl en mour soutuk.’ I ese me I sohte kisehn sampah, ei mour sohte pwungohng nan mour en sampah wet, oh I ese me I anahne mi rehn sapwellimen Siohwa pwihn. I tepidahr kilang me Siohwa sohte uhdahn ketin keseiehla; ihte me I anahne wia iei en diarada elen ei pahn pwurehng pwurala reh. Oh I inenen perenki ei wia met!”

“I tepidahr kilang me Siohwa sohte uhdahn ketin keseiehla; ihte me I anahne wia iei en diarada elen ei pahn pwurehng pwurala reh”

Se pahn kapakapki me ke pahn pil pwurehng alehdi peren me kohsang rehn Siohwa. (Nehmaia 8:10) Ke sohte pahn koluhkihla omw pwurodohng rehn Siohwa.

Pasapeng ong Peidek kan Duwen Pwurodohng Rehn Siohwa

IA DUWEN EI PAHN TEPIDA WIA MET?

Aramas emen me soumwahuda ele pahn ekisekis pwurehng wia dahme e kin kalapw wia rahn koaros. Ni mwohmwohte, ke kak kakehleiukada nin duwen Kristian men ni omw pahn ekisekis ale padahk en Paipel kan ehuehu rahn. Dehr pehm me ke anahne wia soahng koaros ni ahnsoutehkis. Ele ke pahn kak kihla minit kei ong wadawad de rong wadawad en Paipel, onopki ehu sawaspen Paipel, de kilang jw.org Web site de ehu prokram nan tv.jw.org. Pil nantihong iang towehda mihting en mwomwohdiso kan ni ahnsou mwadang. Me keieu kesempwal, kapakapohng Siohwa oh peki sapwellime sawas. “Mweidohng ih amwail pwunod koaros, pwehki eh kin ketin apwahpwalih kumwail.”—1 Piter 5:7.

“Mwurin ei uhdahn luwetala nan ei kaudok, I pil uhdahn namenengki en kin kapakap. Ahnsou me I kakehlailiada ei eimah en kapakap, emen elder nan ei mwomwohdiso mwemweitdo rehi. E sewese ie I en kin wehwehki me Siohwa sohte ketin likidmelieiehla. Eldero kangoange ie I en tepida wadek Paipel rahn koaros. Ahnsou me I wia met, I alehdi kehl en pwurehng iang towehda mihting kan, I lao pwurehng tepida iang doadoahk en kalohk. I uhdahn perenki me Siohwa sohte ketin likidmelieiehla.”—Eeva.

IA DUWEN TOHNMWOMWOHDISO KAN ARAIL PAHN KILANGWOHNG IE?

Ke kak kamehlele me tohnmwomwohdiso kan pahn uhdahn kasamwo iuk ni kadek. Re sohte pahn kauwe de kadeik uhk, ahpw irail pahn kamehlelehiong uhk me re poakohng uhk oh wia uwen arail kak en kangoange iuk.—Ipru 10:24, 25.

“I namenengki pwuralahng Wasahn Kaudoko. I kin medemedewe ia duwen tohnmwomwohdiso arail pahn kilangwohng ie. Emen sister mah me mi mwo sounpar 30 samwalahro ndaiong ie, ‘I perenki kilang omw pwurodo, Samwa!’ Met uhdahn sair ei mohngiong. I uhdahn pehm me I pwurodoier.”—Javier.

“I kohla nan Wasahn Kaudoko oh mwohd mwurio pwe sohte me pahn kak kilang ie. Ahpw, me tohto kin pwurehng pohnese ie sangete ahnsou me I kin iang towehda mihting kan ni ei kisin seri. Irail kin kasamwo ie oh pwoaleiiehdi me kahrehiong ie en ahneki pepehm en meleilei. E mwomwen duwehte me I pwurodo ni uhdahn imwei.”—Marco.

IA DUWEN ELDER KAN AR PAHN SEWESE IE?

Elder kan pahn seweseiuk ni kadek. Re pahn kapingahkin uhk omw inengieng en pwurehng kapwurehdo “omw limpoak en mahso.” (Kaudiahl 2:4) Re pahn seweseiuk ni kadek en kapwungala sapwung kan me ke wiahdahr, oh irail pahn wia met ni “kamantik.” (Kalesia 6:1; Lepin Padahk 28:13) Ele elder kan pahn koasoanehdi emen en onop rehmw, mwein e pahn doadoahngki pwuhk me duwehte “Dadaurete ni Limpoak en Koht.” Ken kamehlele me elder kan pahn kansenamwahwihiuk oh seweseiuk ni soahng koaros me ke pahn wia.—Aiseia 32:1, 2.

“Nan erein sounpar waluh me I sohla patehng mwomwohdiso, elder kan kin pwurepwurehng song sewese ie. Ehu rahno, elder men kasalehiong ie ekei kilel en ih oh ngehi me e kilelehdi. Re pwurehng kapwurehdo mehn kataman kaselel tohto me kahrehiong ie en men pwurehng ahneki peren me I kin ahneki ni ahnsou me I kin papah Siohwa mahs. Elder kan kin sewese ie ni elen limpoak en pwurehng koasoanehdi ei koasoandi kan ong kaudok.”—Victor.

‘E Pahn Ketin Kakehlaiukada’

Neitail pwuhken koul, Koul ong Siohwa, audaudki koul tohto kan me kin kak kamwakid uhk en nsenamwahula oh kangoange iuk ni omw pwurehng wia omw doadoahk en papah Siohwa. Karasepe, tehk nting en koul nempe 60. Koul wet poahsoankihda 1 Piter 5:10, me oaralap koasoia ‘E Pahn Ketin Kakehlaiukada.’

Mie kahrepen Koht kihong uhk padahk mehlel

Kahreiuk sang rotorot ong marain.

Nan omw mohngiong, e mwahngih omw ineng mwahu

En rapahki oh wiahda me mwahu.

Ke kap’kap inouki wia kupwure;

E seweseiuk, oh doudoulahte.
Koht ket’kihda sapwellime Ohlo ong uhk;

Ong kahrepe wet, E men ken pweida.

Ma E sohte koledihsang kisakis wet,

Dehr peikasalki, E pahn kihwei kehl.

E tamataman omw pwoson, limpoak;

E sohte pahn kesehla nah ar’mas.

(CHORUS)

Ntahn Sises me E ketin pwainkinuhkada.

E pahn katengehdi oh kakehlaka iuk.

E pahn pousehla kahluweiuk oh pere iuk.

E pahn katengehdi oh kakehlaka iuk.

En rong koul wet me ngilen aramas iang oh koul en Wehio teikan, kilang pahnangin PUBLICATIONS > MUSIC.