Ia Duwen ma Mie me Kin Kamasak Ie nan Sukuhl?

DAHME KE PAHN WIA?

Medewehla me met wiawi: Thomas sohte men kohla sukuhl rahnwet. De lakapw. De sohla douluhl kohla sukuhl. Met tepida wiawi sounpwong siluh samwalahro ni ahnsou me ienge tohnsukuhl kan ni lemei lipahnedih. Irail eri wiahda ehu ahd kamwan ong ih. Ekei pak mie me kin poakihsang nah pwuhken sukuhlo ni peho oh mwomwehda me re sapwungala, de emen sang nanpwungen pwihn ehu me mi mwurin Thomas siken ih oh ni ahnsou me e sohpeila mwuri e sehse ihs me siken ih. Oh aio, irairo suwedla ni emen eh kamasak Thomas nan online . . .

Ma kowe Thomas, ia duwen ahmw pahn mwekidki met?

UHDI OH MEDEWE!

Uhdahn mie ahmw kehl! Ni mehlel, ke kak keme emen me kin kamasak uhk ni ahmw sohte doadoahngki pehmw kan. Ia duwen?

• DEHR MWADANGETE SAPENG. Paipel mahsanih: “Aramas pweipwei kin kasalehda ar lingeringer, ahpw me mie eh lamalam kin kanengamah oh kolokol eh lingeringer.” (Lepin Padahk 29:11) Ma ke wia uwen ahmw kak koaros pwe ken kak meleilei sang ni ahmw mwekid kan, irail kan me kin kamasak uhk ele pahn sohla men tehk uhk.

• DEHR DUPUK. Paipel mahsanih: “Dehr dupungkihong me suwed.” (Rom 12:17) En rapahki elen dupuk pahn ihte kahrehda irairo en suwedla.

• DEHR ALULAHNG KAHPWAL. Paipel mahsanih: “Aramas me eh lamalam mie kak kilangada kahpwal me kohkohdo oh wetsang.” (Lepin Padahk 22:3) Wia uwen ahmw kak en soikala soangen aramas me kak kahrehda kahpwal, oh soangen wasa kan me kamasak emen kakete wiawi ie.

• SONG SAPENG NI AHL ME E SOHTE PAHN KASIK. Paipel mahsanih: “Sapengki ngihl tikitik kin kameleilei lingeringer.” (Lepin Padahk 15:1) Ke pil kak song en nda mehkot me kemenkouruhr. Karasepe, ma me kin kamasak uhko nda me ke mworourou, ke kak ndahte, “I leme I kak ekis tihtihla!”

• ALULAHSANG. Nora me sounpar 19 koasoia, “Sohte sapeng kin kasalehda me ke koahiek oh me ke kehlailasang aramaso me lidlidereiuk. Met kin kasalehda me ke kak kaunda pein kowe, ih soahng wet me aramaso sohte ahneki.”—2 Timoty 2:24.

• NANTIHONG MEDEWE ME MIE KATEPOMW. Irail me kin kamasak meteikan kak kalapw esehda soangen aramas me kin medewe me sohte kateparail oh sohte pahn pelian irail ma mie me kin lidere irail. Weksang met, tohto irail sohla pahn tehk uhk ma re kilang me ke sohte kin mweidohng irail en kaunuhkada.

• PADAHKIHONG EMEN. Emen me wia sounpadahk en sukuhl mahs koasoia: “I kin kangoange koaros me kin lelohng soangen irair wet en kin koasoiahda. Ih met me pwung oh kak pere emen sang irail me kin kamasak meteikan.”