Sises Ketin Kamwahwihala Aramas ni Rahnen Sapad

Parisi kan kin kailongki Sises oh kin men diarada kahrepe ieu me re kak salihekihdi. Irail nda me e sohte konehng Sises en kamwahwihala aramas soumwahu ni rahnen Sapad. Ehu rahnen Sapado, Sises ketin tehkada ohl maskun men me wie pekipekseli rehn aramas pohn ahlo. Ih eri mahsanihong sapwellime tohnpadahk ko: ‘Kilang duwen sapwellimen Koht manaman eh pahn sewese ohl menet.’ Sises eri ketin doaloahkihda pilen ewe ong ni pwehl ehu pwehn wiahda pwelmatak. Ih eri ketin iriski pwelmatako pwoaren mesen ohlo. Sises eri mahsanihong: ‘Kohla oh epwinek nan pihlen Siloahm.’ Ohlo eri kohla mwo oh epwinek, oh ehdin nan eh mour me e kakehr kilangada wasa.

Aramas ako ahpw pwuriamweikihla. Irail nda: ‘Kaidehn ih ohlo met me kin wie mwomwohd oh pekipekseli rehn aramas, de emen aramas tohrohr me duwehte ih?’ Ohlo eri nda: ‘Ngehi me ipwidihte maskuno!’ Aramas ako eri idek reh: ‘Dahme kahrehda ke solahr maskun?’ Ni ahnsou me e ndaiong irail dahme wiawihong ih, irail kahrelahng rehn Parisi ko.

Ohlo eri ndaiong Parisi ko: ‘Sises kihong pwelmatak pohn mesei kat oh mahsanihong ie ien kohla widensang. Ngehi eri wia, oh met I kakehr kilang wasa.’ Parisi ko eri nda: ‘Ma Sises kin kamwahwihala aramas ni rahnen Sapad, eri eh manaman sohte kohsang rehn Koht.’ Ahpw aramas teiko nda: ‘Ma eh manaman sohte kohsang rehn Koht, e sohte douluhl pahn kak kamwahwihala emente.’

Parisi ko eri ekerodo en ohlo pahpa nohno oh idek rehra: ‘Ia duwen noumwa pwutaket eh kak kilangada wasa ahnsou wet?’ Eh pahpa nohno masak pwehki Parisi ko nda me mehmen me pahn pwosonla Sises pahn lekdeksang nan sinakokeo. Ira eri nda: ‘Se sehse. Kumwail pein idek reh.’ Parisi ko eri idihdek peidek tohto rehn ohlo lao e nda: ‘I ndaiong kumwailehr soahng koaros me I ese. Dahme kahrehda kumwail peipeidengki?’ Parisi ko eri lingeringerda oh kesehieila ohlo likio.

Sises eri ketila pwehn rapahkihda ohlo, oh mahsanihong: ‘Ke pwoson Mesaiao?’ Ohlo eri nda: ‘I pahn ma I ese ihs ih.’ Sises eri mahsanihong: ‘Ngehi me Mesaiao.’ Ia duwe, met sou kasalehda uwen kadek en Sises? E sohte ketin kamwahwihalahte ohlo ahpw e pil ketin sewese ih en ahneki pwoson.