Soangen Koht Dahmen Siohwa?

Dahme ke kin medewehki duwen Siohwa Koht? Ke kin medewe me e nohn lapalap, dohsang uhk duwehte mwutumwut en usu kan me doh? De ke kin medewe me e roson lapalap rasehng nansapwe oh e sohte sapwellimanki pepehm de madamadau? Soangen Koht dahmen ih? Siohwa ketin kasalehda ekei sapwellime irair kan nan sapwellime Mahsen, Paipel, oh pil me e ketin nsenohkin uhk.

1. Dahme kahrehda kitail sohte kak kilang Koht?

“Ngehn ehu Koht.” (Sohn 4:24) Siohwa sohte ketin sapwellimanki paliwar uduk. Ih Ngehn emen me kin ketiket nanleng, wasa ieu me kitail sohte kak kilang.

2. Ia ekei sapwellimen Siohwa irair kan?

Kitail sohte kak kilang Siohwa, ahpw ni atail kin esehla ih kitail kin poakohngala pwehki sapwellime irair kaselel kan. Paipel mahsanih me Siohwa “kin kupwurperenki dahme pwung oh sohte kin likidmeliehla sapwellime aramas loalopwoat akan.” (Melkahka 37:28) E pil me “diren limpoak oh kadek kalahngan,” ahpw mehlel ong irail akan me kin wie lokolok. (Seims 5:11) Siohwa “kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.” (Melkahka 34:18) Oh ke ese me kitail kak kaperenda de kansensuwedihada kupwuren Siohwa? Aramas emen me kin pilada en wia dahme suwed kin kansensuwedihala oh katoutouwihala kupwure. (Melkahka 78:40, 41) Ahpw aramas emen me kin pilada en wia dahme pwung kin kaperenda kupwure.​—Wadek Lepin Padahk 27:11.

3. Ia duwen Siohwa eh kin ketin kasalehda me e poakohng kitail?

Sapwellimen Siohwa irair keieu kaselel iei limpoak. Ni mehlel, “Koht iei limpoak.” (1 Sohn 4:8) Siohwa kin ketin kasalehda sapwellime limpoak, kaidehn sangete nan Paipel ahpw pil sang ni soahng kan me e ketin kapikada. (Wadek Wiewia 14:17.) Karasepe, medewe duwen eh ketin wiaikitailda. E ketikihong kitail koahiek en kilang poh kaselel kan, rong koul kaselel kan oh neme mwenge iou. E ketin kupwurki kitail en perenki mour.

KALAUDEHLA OMW ESE MET

4. Ngehn sarawi​—Sapwellimen Koht manaman

Duwehte atail kin doadoahngki pehtail kan, Siohwa kin ketin doadoahngki sapwellime manaman de ngehn sarawi. Paipel kin kasalehda me ngehn sarawi kaidehn koht emen, ahpw met iei manaman me Koht kin ketin doadoahngki pwehn wiahda mehkot. Wadek Luk 11:13 oh Wiewia 2:17, oh mwuri koasoiapene peidek pwukat:

• Koht pahn ketin “kamwarehdi” sapwellime manaman de ngehn sarawi pohn irail akan me kin peki. Eri ke medewe me ngehn sarawi wia koht emen, de sapwellimen Koht manaman? Dahme ke ndahki met?

Siohwa kin ketin doadoahngki sapwellime manaman de ngehn sarawi pwehn kapwaiada soahng kapwuriamwei kan. Wadek Melkahka 104:30a oh 2 Piter 1:20, 21, oh mwuri koasoiapene peidek wet:

• Ni soangen ahl dah kan me Siohwa ketin doadoahngkihier sapwellime manaman de ngehn sarawi?

5. Siohwa ketin sapwellimanki irair kaselel kan

Moses wia sapwellimen Koht ladu lelepek men, ahpw e men esehla mwahu duwen Sounkapikpeo. Moses eri patohwanohng ih: “Komwi en ketin kasalehiong ie kupwuromwien.” (Eksodus 33:13) Siohwa ketin padahkihong Moses soangen Koht dahmen ih. Wadek Eksodus 34:4-6, oh mwuri koasoiapene peidek pwukat:

• Soangen irair dah kan me Siohwa ketin kasalehiong Moses?

• Mehnia sapwellimen Siohwa irair me ke keieu mwahuki?

6. Siohwa kin ketin nsenohki aramas

Mehn Ipru kan me wia sapwellimen Koht aramas wia lidu kei nan Isip. Ia sapwellimen Siohwa pepehm ni ar kin wie lokolok? Rong NGILEN SIPAI oh idawehn, de wadek Eksodus 3:1-10. Mwuri koasoiapene peidek pwukat.

NGILEN SIPAI: Siohwa Ketin Nsenohki Ar Lokolok (2:45)

• Dahme ire wet padahkihong uhk duwen sapwellimen Siohwa pepehm ong en aramas akan lokolok?​—Kilang iretkitik 7 oh 8.

• Ke medewe me Siohwa uhdahn ketin kupwurki sewese aramas akan oh me e kak ketin wia met? Dahme kahrehda, de dahme sohki?

7. Kitail kak sukuhlki sapwellimen Siohwa irair kan sang ni kepikipik

Siohwa ketin kasalehda sapwellime irair kan sang ni soahng kan me e ketin kapikada. Kilang KISIN KASDO. Mwuri wadek Rom 1:20, oh koasoiapene peidek wet.

KISIN KASDO: Creation Reveals Jehovah’s Love​—The Human Body (1:57)

• Sapwellimen Siohwa irair dah me ke kin kilang nan soahng kan me e ketin wiahda?

DAHME KE SUKUHLKIER

Siohwa wia Ngehn soh sansal men me sapwellimanki irair kaselel kan, ahpw me keieu laud iei limpoak.

Kousapahl

• Dahme kahrehda kitail sohte kak kilang Koht?

• Dahkot ngehn sarawi?

• Ia ekei sapwellimen Siohwa irair kan?

PIL TEHK

Kalaudehla omw esehla duwen Siohwa ni omw sukuhlki sapwellime irair kesempwal pahieu kan.

“Soangen Koht Dahmen Ih?” (Kahn Iroir No. 1 2019)

Tehk mehn kadehde kan me Siohwa sohte kin ketiket wasa koaros.

“Is God Everywhere, Omnipresent?” (Web article)

Kilang dahme kahrehda Paipel karasahkihong sapwellimen Koht manaman de ngehn sarawi nin limen Koht.

“What Is the Holy Spirit?” (Web article)

Ohl maskun men apwalki kamehlele me Koht ketin nsenohki ih. Kilang dahme wekidala eh madamadau.

“I Now Feel That I Can Help Others” (The Watchtower, October 1, 2015)