IREN MEHN KASUKUHL 44
Kasarawi Koaros Kin Kaperenda Kupwuren Koht?
Siohwa ketin kupwurki kitail en perenki mour oh pil ekei pak wia kasarawi kan. Ahpw kasarawi oh holiday koaros kin kaperenda kupwure? Ia duwen atail kak kasalehda me kitail poakohng Siohwa nan soangen irair wet?
1. Dahme kahrehda Siohwa sohte ketin kupwurki kasarawi tohto?
Mwein ke pahn pwuriamweikihla ni omw esehda me kasarawi tohto kin poahsoankihda madamadau kan me sohte pwungiong Paipel de kohsang pelien lamalam likamw. Kasarawi pwukat ele kin pidada wunahni de poahsoankihda madamadau kan me dene mie mehkot soh sansal me kin wie momourte mwurin aramas emen kin mehla. Ekei kasarawi kan kin tepisang madamadau sapwung kan me dene mie mehkot suwed pahn lelohng aramas emen ma e sohte idawehn tiahk ehu. (Aiseia 65:11) Siohwa ketin kehkehlingkihong sapwellime tohnkaudok kan: “Katohreikumwailla oh dehr doahke mehkot samin.”—2 Korint 6:17.a
2. Ia sapwellimen Siohwa pepehm duwen kasarawi kan me kin kawauwih aramas?
Siohwa ketin kehkehlingkihong kitail en dehr “koapworopworki aramas.” (Wadek Seremaia 17:5.) Ekei kasarawi kan kin kawauwih kaun de sounpei kan. Ekei kin kasarawih rahn me wehi uhtohrada de kilel en wehi me duwehte pilaik. (1 Sohn 5:21) Ekei pil kin kasarawih mwekid en politik de pwihn kan. Ia sapwellimen Siohwa pepehm ni atail kin kawauwih aramas de pwihn ehu, ahpw mehlel ma irail kin utung madamadau kan me uhwong kupwure?
3. Wiewia dah kan me kak kahrehiong kasarawi kan en suwed?
Paipel kin keinapwihdi “sakau daulihala, wia kamadipw mwoarongorong kan, [oh] siai en kang sakau.” (1 Piter 4:3) Nan ekei kasarawi kan, aramas akan sohte kin kaunda pein irail oh kin wia tiahk samin kan. Pwe kitail en wiewiahte kompoakepahn Siohwa, kitail anahne kadohwankitailsang douluhl soangen wiewia pwukat.
KALAUDEHLA OMW ESE MET
Diarada ia duwen omw kak kaperenda kupwuren Siohwa sang ni omw wiahda pilipil mwahu kan duwen holiday kan oh kasarawi kan.
4. Soikala kasarawi kan me kin kasohwauwih Siohwa
Wadek Episos 5:10, oh mwuri koasoiapene peidek pwukat:
Dahme kitail anahne wehwehki mahs mwohn atail pilada ma kitail pahn wia kasarawi en holiday ehu?
Holiday dah kan me aramas kin kalapw kasarawih nan omw wasa?
Ke medewe holiday pwukat kin kaperenda kupwuren Siohwa?
Karasepe, mie pak ke medewe dahme Koht kin ketin medewehki duwen wia ipwidi? Paipel sohte kasalehda me tohnkaudok en Siohwa kan kin wia ipwidi, ahpw e koasoia duwen ipwidi riau me aramas akan me sohte kin papah Ih kin wia. Wadek Senesis 40:20-22 oh Madiu 14:6-10. Mwuri koasoiapene peidek pwukat:
Dahme wiawi ni ipwidi riau pwukat?
Sang nan koasoipen Paipel pwukat, ia omw madamadau ong sapwellimen Koht pepehm duwen ipwidi?
Ahpw, ele ke kin medewe, ‘Siohwa uhdahn ketin nsenohki ma I iang wia ipwidi de iang wia kasarawi teikan me sohte pwungiong dahme Paipel padahngki?’ Wadek Eksodus 32:1-8. Mwuri, kilang KISIN KASDO oh koasoiapene peidek pwukat.
Dahme kahrehda kitail anahne wehwehki mahs dahme Siohwa kin ketin kupwurki?
Ia duwen atail kak wia met?
Ia duwen atail kak ese ma Koht sohte ketin kupwurki kasarawi ehu
Kasarawi wet kin pwungiong dahme Paipel kin padahngki? Pwe ken ese, diarada ia wasa e tepisang ie.
E kin kawauwih aramas, pwihn kan de kilel en wehi kan? Kitail kin wauneki Siohwa mwohn mehkoaros oh likih me e pahn ketin kamwahwihala kahpwal en sampah kan.
Tiahk oh wiewiahn kasarawi ko kin uhwong kaweid en Paipel kan? Kitail anahne kolokolete atail tiahk mwakelekel.
5. Sewese meteikan ren wauneki dahme ke kamehlele
E kak apwal en nda soh ni meteikan ar idingkihong uhk ken iang wia kasarawi kan me Siohwa sohte ketin kupwurki. Kawehwehda omw pilipil kan ni kanengamah oh kadek. Pwe ken kilang ia duwen omw kak wia met, kilang KISIN KASDO.
Wadek Madiu 7:12, oh mwuri koasoiapene peidek pwukat:
Sang nan ire wet, ke anahne padahkihong omw peneinei kan me sohte iang kisehn omw pwoson ren dehr kasarawih holiday ehu?
Dahme ke kak wia pwe ken kasalehiong omw peneinei me ke poakepoake oh kesempwalkin irail, mendahki ke sohte pahn iang irail wia kasarawio?
6. Siohwa ketin kupwurki kitail en peren
Siohwa ketin kupwurki kitail en iang atail peneinei oh kompoakepatail kan pereperen. Wadek Eklesiasdes 3:12, 13, oh mwuri koasoiapene peidek wet:
Ia duwen ire wet eh kasalehda me Siohwa ketin kupwurki kitail en kin peren?
Siohwa ketin kupwurki sapwellime aramas akan ren ehupene pereperen. Kilang KISIN KASDO pwe ken kilang ia duwen met eh kin uhdahn sansalda nan atail kapokon kan.
Wadek Kalesia 6:10, oh mwuri koasoiapene peidek pwukat:
Kitail anahne iang kasarawih holiday kan pwe kitail en “wia me mwahu” ong meteikan?
Mehnia me ke pahn perenki: Ni omw anahne kisakis pwehki holiday ehu, de ni omw kisakis pwehki ke men?
Ekei pak Sounkadehdehn Siohwa tohto kin koasoanehdi mehkot tohrohr ong neirail seri kan oh pil kihong irail kisakis ni ar sohte kasik. Ma mie noumw seri, soahng dah kan me ke kak wiahiong irail?
EKEI ARAMAS KIN NDA: “E sohte kesempwal ia wasa holiday tepisang ie. Dahme kesempwal iei iang peneinei oh kompoakepahmw kan pereperen.”
Dahme ke pahn nda?
DAHME KE SUKUHLKIER
Siohwa ketin kupwurki kitail en iang peneinei oh kompoakepatail kan pereperen. Ahpw e pil ketin kupwurki kitail en soikala kasarawi kan me e sohte ketin kupwurki.
Kousapahl
Peidek dah kan me kitail kak idek pwehn ese ma kasarawi ehu kin kansensuwedih Siohwa?
Ia duwen atail kak sewese atail peneinei oh kompoakepatail kan ren wehwehki atail pilipil me pid holiday kan?
Dahme kasalehiong uhk me Siohwa ketin kupwurki kitail en kin nsenamwahu oh pereperen?
PIL TEHK
Kilang ekei holiday kan me Kristian kan sohte kin kasarawih.
“Why Don’t Jehovah’s Witnesses Celebrate Certain Holidays?” (Web article)
Kilang kahrepe pahieu me kitail kamehlele, me wia ipwidi sohte kin kaperenda Koht.
“Why Don’t Jehovah’s Witnesses Celebrate Birthdays?” (Web article)
Kilang ia duwen kisin seri kan me poakohng Siohwa ar kak kaperenda Ih ni rahnen holiday kan.
Kristian rar kei piladahr ren sohte kin iang Krismas. Ia arail pepehm ong pilipil wet?
“They Found Something Better” (The Watchtower, December 1, 2012)