Ripoht En Sounkalohk Kan En Wehio

Kesinenda Teng nan Sukuhl kin Wahdo Kating

PAIPEL kohpadahr: “Siohwa pahn padahkiong noumw pwutak kan koaros, oh ketikihong irail paiamwahu oh popohl.” (Aiseia 54:13) Ni wehwe laudsang met, “noumw pwutak kan koaros” pil kak kadoadoahkong sapwellimen Koht ladu kan koaros nin sampah pwon, iangahki me pwulopwul kan. Nan rahnpwukat, Pahpa oh nohno Kristian kan kin tehk kanahieng ma neirail seri kan kin ale “kasukuhl sang Siohwa” nan imwarail kan oh nan mihding en Kristian akan.

Ahpw ni ahnsou me Kristian pwulopwul kan kin iang sukuhl, re kin lelong kahpwal tohto. Pak tohto re anahne kolokol teng dahme re sukuhliki sang Paipel. Ni ahnsou re kin wia met, e kin imwila mwahu, oh tohnsukuhl akan oh sounpadahk kan pil kak paiekihda, nin duwen ekspiriens wet sang Micronesia kasalehda.

Ni pali kapi en dekehn Pacific, ehu dekehn Chuuk me adaneki Tol, sounpadahk kan nan sukuhlo padahkiong seri kan koaros en kaunopada kamadipw en Halloween me pahn wiawi nan sukuhl. Tohnsukuhl akan en Sounkadehde kan ese me kamadipw wet pahn pidada wiahda kapwat kan oh likou kan me mwomwen eni pwehn kamasak aramas—met kenen koaros kin pidada wunani. Seri pwukat sohte kak ni nsen mwakelekel iang kamwadipw wet.a

Sang ni ahr kaiahn me poahsonda pohn Paipel me kohsang rehn pahpa oh nohno kan iangahki mwomwohdiso en Kristian, irail ese me wiewia pwukat me kin kainsensuwedih Koht, mehndahki ong mehn kamweit te. Pwen sewese irail en kalaudehla ahr kawehwehda ni sansal ahr lamalam ong sounpadahk kan en sukuhl, seri kan luke Barak, emen misineri en Sounkadehde nan deke​-wet en kawehwehong sounpadahk kan.

Mwurin sounpadahk kan rong e kawehweh, irail koasonehdi en pil pwurehng tuhpene kariapak, oh Barak pahn kak koasoiong sounpadahk kan koaros nan sukuhlo. Nan mihding wet, Barak kasansalehda ire mehlel kan duwen ia uhdahn Halloween. E ale sawas sang ekei pwuhk kan en Watch Tower oh iangahki pwuhk teikan. Sounpadahk kan oh kaun en sukuhl akan me inenen pwuriamweikihla dahme re sukuhliki duwen poadopoad en halloween. Irail kosonehdi en mihding pene rehn sounpadahk kan oh kaun en sukuhl akan pwen kak kamwahuiala irairo.

Rahn kei mwurin met, pakair en ahr pilipil kapwuriamwei wiawi. Kaunopada kan koaros ong Halloween pahn sohlahr wiawi nan sukuhl. Sukuhlo sohte pahn wia Halloween pahro. Imwila mwahu ehu wiawi pwehki Sounkadehde pwulopwul pwukat nantiong en kolokolte wia me pwung nan sukuhl! Pwulopwul kan en dehr masak de nanmanengki kesenenda teng ong padahk mehlel en Paipel.

Nin sampah pwon, Sounkadehde Siohwa kan kin padahkiong neirail seri kan en nantiong wia ahr onop nan sukuhl. Sounkadehde pwulopwul kan kin ale kaiahn en kapwaiada kaweid kan en Paipel, oh padahkiong tohnsukuhl teikan ahr koapworoapwoar ni ahnsou me konehng. Edetehn e sohte pahn imwila mwahu oh pweida mwadang duwehte ekspiriens wet, pwulopwul kan kin nsenamwahukihla ese me re kin wia dahme pwung. Oh keieu kesempwal, irail kak liki me Sahmwarail nanleng kin kupwureki irail oh pahn kapaiada irail pwehki ahr kin pekiong ih ni lelepek.

[Nting tikitik me mi pah]