Dahme Kahrehda Kitail Koaros en Kapinga Koht?

ALELUHIA! Pali moron en irail kan nan Kristendom kin ese lepin lokaia wet. Ekei irail kin koulki nan arail sarawi kan Rahn Sarawi. Ahpw, ihs rehrail me uhdahn ese ia wehwehn lepin lokaiao? Ni mehlel, lepin lokaian Ipru ehu me kin wehwehki “Kapinga Jah!” Met iei ngihlen ngisingis peren en kapinga Sounkapikapadao, me mwareneki Siohwa.a

Lepin lokaia “Aleluhia” kin pwarada pak tohto nan Paipel. Dahme kahrehda? Pwehki mie kahrepe tohto sen kapingahki Koht. Jah (Siohwa) iei Sounkapikada oh Sounkomourpen lahng oh sampah. (Melkahka 147:​4, 5; 148:​3-6) Ih me tepiada koasoandi en mouren tuhke oh mahn me kahrehda mour en kak mie pohn sampah. (Melkahka 147:​8, 9; 148:​7-​10) Oh e kin nsenohki tohnsampah. Ma kitail pahn wia kupwure, e pahn kapai oh utung kitail nan mouret oh ketikihong kitail koapwoaroapwoar mehlel en mour mwahu ahnsou kohkohdo. (Melkahka 148:11-​14) Jah (Siohwa) me kamwekidih mahsen pwukat: “Me pwung kan pahn koukousoan nan sahpwo oh re pahn sapwenikihla kohkohlahte.”​—⁠Melkahka 37:29.

Ehi, kaweido kin kohwong koaros: “Aleluhia!” “Kapinga Jah, kumwail aramas akan!” (Melkahka 104:35; footnote) Ahpw, e inenen kainsensuwed, pwe kaidehn koaros men peikiong met. Rahnwet, aramas kin lokolok. Aramas tohto kin lelong nsensuwed pwehki arail kin doadoahngki wini suwed de kamomsakau de pwehki arail mour samin de uhwong koasoandi kan. Mie kahrepe soangen aramas pwukat en kapinga Koht?

‘Siohwa Kelepw me kin Ketikihong ie Koapwoaroapwoar’

Ehi, mie. Siohwa kin luhke koaros sohte lipilipil en esehla ih, en sukuhliki en wia kupwure, oh paiekihda kapai kan me kin kahreong aramas kan en men papah ih. Oh me tohto wia met. Karasepe ehu, Adriana nan Guatemala. Ni ahnsou me Adriana sounpahr isuh, ah nohno mehla. Mwurinte mwo, ah pahpa kohkohsang imwara. Ni ahnsou me e sounpahr eisek, e tepiada doadoahk en mwohni pwehn apwali pein ah mour. Pwehki ah nohno padahkiong ih en papah Koht oh iang sarawi ahnsou koaros, Adriana kin iang pwihn en Kadolik tohto, ahpw ahnsou me e sounpahr 12, e sohla kamehlele Kadolik oh e iangala pwihn akan me kin mihmihseli pohn ahl akan. E tepiada smok, doadoahngki wini suwed oh pirap. Ia kahrepen serepein menet pahn men kapinga Koht?

Rien Adriana serepeino tepiada onop Paipel rehn Sounkadehde kan en Siohwa, ahpw Adriana kouruhrki. Eri, rien ara pahpa de nohno lih mehla. Ni serdi en liho, Adriana tepiada pwonopwonki peidek kei. Iawasa liho kohla ie? E mihmi nanleng? E kohla wasa ieu me karakar? Met uhdahn kapwonopwon, oh Adriana kohla nan wasahn kapakap en sousou kan pwehn kapakap pek sawas, doadoahngki mwaren Siohwa, duwen me rie serepeino padahkiong ih en wia.

Mwurinte met e tepiada onop Paipel rehn Sounkadehde kan en Siohwa oh kin iang towehda arail mihding en Kristian. Met kihong ih lamalam kapw ong duwen mour, oh ni eimah e uhdisang werekiong pwihn akan pohn ahl akan. Adriana, me ahnsouwet sounpahr 20 samwa, koasoia: “Ihte ahi limpoak ong Siohwa me karehong ie en mweisang mour suwedo. Siohwa kelepw nan sapwellime mahk kalangan me kak kihong ie koapwoaroapwoar en mour soutuk.” Adriana, mendahki apwal en mour nin tepio, anehki kahrepe kaselel kan en kapinga Koht.

Kitail en tehk dahme wiawiong pil emen. Nan Ukraine, emen ohl mwohmwohd nan imweteng awiawih ah pahn kamala. E kin poakehla pein ih? De nsensuwed? Soh, e sohte kin nsensuwed. Pwehki Sounkadehde kan tuhwongehr oh e eseiehr ekis duwen Siohwa, e peki ren tuhwong ah nohno. Ahnsouwet e wie ntingting oh irail pwehki e rong me re kapwaiada ah pekipek ko. E koasoia: “Kalanganki amwail pwarek ahi nohno. Met iei rong me keieu kaperen me ih alehdi nan sounpahr me ahpwtehn nek.”

Ni ah koasoia duwen ih oh ienge tohn imweteng kan me e kalohk ong, e ntingihdi: “Met se pwoson Koht oh nantiong mwekidki aht pwoson.” E kaimwsekihla nah kisin likou oh koasoia: “Kalanganki amwail sewese kiht en sukuhliki dahkot limpoak oh en pwosonla. Ma I memourte, I pahn pil sewese kumwail [nan doadoahk en kalohk]. Kalangan en Koht pwehki kumwail mie oh me kumwail kin sewese mehteikan en poakohng Koht oh kamehlele ih.” Ohl menet pek sapahlih kalokpe. Ahpw mendahki ma e kamakamla de selidi nan imweteng sounpahr tohto, sansal me e anehki kahrepe en kapinga Koht.

‘Mendahki I Maskun, I Kak Kilang’

Ahnsouwet, tehk duwen peinakapw men me mwadangete maskunla. Ih met me wiawiong Gloria, me kin koukousoan Argentina. Gloria maskunla ni ah mahki sounpahr 19, oh e sohlahr kak pwurehng kilang wasa. Ni ah mahki sounpahr 29, e iangada ohl emen oh mwuri liseianda. Met e lemeleme me ah mour miheier katepe. Ahpw ni ahnsou me nah serio mehla, e tepiada peidek. E wahponki, ‘Dahme kahrehda met wiawihong ie? Dahme I wiahda? Mie Koht?’

Nan soangen ahnsouwet, Sounkadehdehn Siohwa riemen pwarek reh. E tepiada onop Paipel oh sukuhliki duwen inou en Paipel me nan sampah kapwo me maskun kan pahn pwurehng kilangada wasa. (Aiseia 35:⁠5) Ia uwen koapwoaroapwoar wet kin mwahuwong Gloria! E inenen peren, keieu ni ahnsou me ohl me e kin mihmi reho men kapwungala ara pwopwoud. Eri ah pwoudo lelong ehu aksiden oh wiahla aramas soumwahu men me anahne mihmi nan wihlsehr. Rahnwet lih maskun menet anahne doadoahk laud pwehn kadoahkehda ah mour. Patohng met, ih me kin wia doadoahk kan koaros nan ihmw, iangahki apwalih anahn en eh pwoudo. Mendahki met, Gloria kin kapinga Koht! Ki sawas en rie Kristian brother oh sister kan, e onopki Paipel en Braille (ong me maskun), oh e kin ale mehn kangoang sang mihding en Kristian kan nan Kingdom Hall. E koasoia: “E apwal en kawehwe, ahpw mendahki I maskun, likamwete I kak kilang.”

Ekei pak aramas kin ale kalokolok ni arail kin kapinga Koht. Emen lih nan Croatia kin inenen peren ni ahnsou me e sukuhliki duwen Koht, ahpw eh pwoudo uhwong eh pwoson oh kesehla, wahsang neira kisin serepeino me sounpahr ehu. Nin tepio, e nsensuwedla, pwehki ah pwoudo oh ah peneinei kesehla, sohte imwe, sohla ah doadoahk oh pil sohla nah seri. Ahpw, eh limpoak ong Koht me kakehle ih, mendahki e sohte kalap tuhwong nah serepeino lau serepein laudla. Lih menet diaradaiehr “takai kesempwalo” oh sohte men kesehla. (Madiu 13:45, 46) Iaduwen e kak kolokol ah peren mendahki ahnsou apwal akan? E koasoia: “Peren iei ehu wahn ngehnin Koht. E kak kekeirada ni soh sawas sang irair kan liki, duwehte tuhke kan me kak kekeirada nan imwen kawos tuhke, mendahki irair en mesenlahng liki.”

Nan Finland, toahkte kan diarada me Markus me sounpahr weneu anehki soumwahu en mwasel me sohte kak mwahula. Mwuri e mihla nan wihlsehr. Sounpahr kei mwuri, eh nohno wahla ih rehn emen ohl me iang pelien lamalam Pentecostal oh ohlo ndandkihla me dene e kak kamwahuwiala Markus. Eri, Markus sohla nsenohki Koht oh eri kin onopki palien sains oh ire teikan. Eri, mpen sounpahr limau samwalahro lih emen me mih nan wihlsehr oh iangahki pwutak emen kohdohng ihmw me Markus mih loale. Irail Sounkadehdehn Siohwa kei. Markus ahnsouwet wia emen me sohte kin kamehlele Koht, ahpw e sohte uhwong koasoia kaudok oh eri luhke ira en pidelong nan imweo.

Mwuri, pwopwoud ehu pil pwarek reh, oh e tepiada onop Paipel. Kedekedeo, manaman en padahk mehlel en Paipel wekidala lamalam en Markus, oh e wehwehkihda me mendahki eh soumwahuwo irehdih, mie karepe kan en kapinga Koht. E koasoia: “I inenen peren pwe I diarada padahk mehlel oh pwihno me Siohwa kin doadoahngki. Ahnsouwet, ahi mour mie katepe oh wehwehpe. Emen sihpw me salongala diarekdahr oh e sohte men mweisang pelin sihpw en Siohwa!”​—⁠Pil kilang Madiu 10:⁠6.

Koaros en “Kapinga Siohwa”

Mehpwukat iei eksperiens malaulau kei me kasalehda me aramas rahnwet, mendahki ia arail irair, kak anehki karepe en kapinga Koht. Wahnpoaron Pohl kawehwehda ni ahl wet: “Kaiahn en pali ngehn me inenen katapan mehlel ni soahng koaros, pwe e inoukihong kitail mour ahnsouwet, oh pil ahnsou kohkohdo.” (1 Timoty 4:⁠8) Ma kitail wia kupwuren Koht, E pahn kapwaiada dahme e “inoukihong kitail mour ahnsouwet.” Ni mehlel, nan koasoandi wet e sohte pahn kahreong me semwehmwe kan en kepwehpwehla de kamwahuiala me soumwahu kan. Ahpw e kin ketikihong irail ko me papah ih sapwellime ngehn sarawi pwe ren diar peren oh nsenamwahu mendahki arail irair. Ehi, pil nan “mour ahnsouwet,” me soumwahu kan, me lokolok kan, oh me semwehmwe kan kak anehki karepe en kapinga Koht.

Ahpw, iaduwen “mour ahnsou kohkohdo”? Atail medemedewe met en karehong kitail en kapinga Koht ni ngoang! Kitail perenki medewehla ahnsouwo me semwehmwe sohla pahn mie; ni ahnsou me “sohla emen pahn nda: ‘I soumwahu’”; oh ahnsouwo me Siohwa Koht “pahn limwiasang pilen masarail koaros; oh mehla pahn sohla, sohla mwahiei, sohlahr nsensuwed, sohlar medek. Soahng mering kan sohlahr pahn mie.” (Aiseia 33:24; Kaudiahl 21:​3, 4; Melkahka 72:⁠16) Iaduwen ke kin kilangwong inou pwukat sang rehn Koht?

Emen ohl pwulopwul nan El Salvador ale ehu kisin doaropwehn Paipel (tract) me kin kawehwehda ekei soahng pwukat. E ndahiong Sounkadehdeo me kihong ih doaropweo, “Lih, dahme doaropwe wet koasoia sohte kak mehlel.” Me tohto kin anehki soangen lamalam wet. Ahpw, inou pwukat iei inou en Meno me kapikada lahng oh sampah, me koasoanehdi mwekid en sampah, oh kin sewese me semwehmwe kan oh me soumwahu kan en diar peren. Kitail kak kamehlele dahme e mahsanih. Ohl pwulopwulo onopki Paipel rehn Sounkadehde kan en Siohwa oh diarada me met mehlel. Ma ke saikinte onopki Paipel, se kangoangekin uhk en wia met. Eri, ele ke pahn iang mihmi nan sampah kapwo ni en koasoandi wet koakoahkasang, oh kapikipik koaros pahn iang werki: “Aleluhia!” “Kapinga Jah [Siohwa], kumwail aramas akan!”​—⁠Melkahka 112:1; 135:1.

[Nting tikitik me mi pah]

[Kilel nan pali 5]

E pahn mwahu ma ke mihmi nan sampah kapwo ahnsou me kapikipik koaros pahn iang weriki: “Aleluhia!”