Kitail En Koledi Teng Atail Pwoson Kesempwal!
“Ong irail ko me aleier pwoson duwehte kiht.”—2 PITER 1:1.
1. Dahme Sises mahsanih ni ah panawih sapwellime wahnpoaron kan, ahpw dahme Piter suweiki?
NI soutiko mwohn kamatalahn Sises, e mahsanih me sapwellime wahnpoaron kan koaros pahn kesehla ih. Emen irail, Piter, suweiki: “Mehnda ma meteikan koaruhsie pahn tangasang komwi, a ngehi I soh mwahn pahn keseikomwihla!” (Madiu 26:33) Ahpw Sises ese me e sohte pahn wia met. Ihme karehda e padahkiong Piter ahnsouwohte: “Ahpw I kapakapkin uhk, Saimon, pwe omw pwoson en dehr luwetala. Oh ni omw pahn sapahldohng rehi, ke pahn kakehlahda pwoson en riomw kan.”—Luk 22:32.
2. Mendahki Piter aklapalapkihla me dene ah pwoson itarehr, dahme e wiahda me kasalehda me ah pwoson me luwet?
2 Piter, me lemeleme me ah pwoson itarehr, kesehla Sises pwohngohte. Pak silu e kahmahmki me dene e sehse Krais! (Madiu 26:69-75) Ni ahnsou me e “sapahldo,” en ah Soumaso mahsan kan, “en kakehlada riomw kan,” ele e wie rongorongete. Luhwen ah Piter mour koaros kin mwekidki laud kaweid wet, duwen me sansalda nan nah kisinlikou riau me e ntingihdi, me nekinekla nan Paipel.
Karepen Piter Ntingihdi Nah Kisinlikou kan
3. Ia karepen Piter ntingihdi nah kisinlikou keieuwo?
3 Mpen sounpar 30 mwurin matalahn Sises, Piter ntingihdi nah kisinlikou keiou, oh kadarwohng rehn rie Kristian kan nan Pondus, Kalesia, Kapadosia, Eisia, oh Pidinia, wasa ko me ahnsou wet wiahda nan werenge, oh ni paliepeng, oh ni palikapi en Turkey. (1 Piter 1:1) Mehn Suhs kan, ekei me wiahla Kristian ni Pentecost 33 C.E., ni mehlel iang kisehn irail kan me Piter ntingwohng. (Wiewia 2:1, 7-9) Mehn Liki tohto mihla pahn kasongosong sang rehn irail sounuhwong kan. (1 Piter 1:6, 7; 2:12, 19, 20; 3:13-17; 4:12-14) Ihme Piter ntingwohng Kristian pwukat pwehn kangoange irail. Ah mehn akadei iei en sewese irail en alehda “wahn [arail] pwoson, iei komourpen [ngehnerail].” Ihme karehda, nan ah peneu en kamwurumwur, e kangoangehki: “Kumwail tengeteng ni amwail pwoson oh kehlail ong ih [Tepilo].”—1 Piter 1:9; 5:8-10.
4. Ia karepen Piter ntingihdi nah kisinlikou keriauwo?
4 Mwuri, Piter ntingihdi kisinlikou keriau ong Kristian pwukat. (2 Piter 3:1) Dahme karehda? Pwehki mie keper laud ehu me pwarada. Irail tiahk samin kan pahn songosong en kekeirada arail wiewia samin nanpwungen me pwoson kan oh pahn kak pitih ekei! (2 Piter 2:1-3) Pil ehu, Piter panawihki irail ren kaleke sounkauwe kan. E ntingihdi nan nah kisinlikou keiou me “imwin mehkoaros kerendohr,” oh ahnsouwet e sansal me ekei kin kouruhrki soahngen lamalam wet. (1 Piter 4:7; 2 Piter 3:3, 4) Kitail en kasawih nein Piter kisinlikou keriau oh kilang iaduwen e kakehlailda Kristian kan pwe ren kolokolte arail pwoson. Nan keioun artikel wet, kitail pahn kasawih 2 Piter irelaud 1.
Karepen Irelaud 1
5. Iaduwen Piter kin kaunopada irail kan me kin wadek nah kisinlikou pwehn koasoia kahpwal akan?
5 Piter sohte mwadangete kosoia duwen kahpwal toutou kan. Ahpw, e kaunopada elen kosoia kahpwal pwukat ni ah kekeirada rehn irail kan me kin wadek nah kisinlikou arail kalahnganki dahme re alehda ni ahnsou me re wiahla Kristian. E katamankin irail inou kaselel kan en Koht oh duwen likilik en kokohp kan en Paipel. E wia met ni ah koasoiahda duwen en Sises wekila oh linganla, nan sansalo me e pein kilangada duwen Krais nan manaman en Wehi.—Madiu 17:1-8; 2 Piter 1:3, 4, 11, 16-21.
6, 7. (a) Mehn kasukuhl dah me kitail kak sukuhlkihsang tepin mahsan kan en nein Piter kisinlikouwo? (b) Ma kitail kihda kaweid kan, atail wehkada dah me ekei pak pahn wia sawas laud?
6 Mie mehn kasukuhl me kitail sukuhlkihsang tepin koasoi kan en Piter? Kitail soh pahn pwungki ale kaweid kan ma kitail pahn mahs kousapahlih rehn irail kan me kin rong iren koapwoaroapwoar kaselel en Wehio me kitail koaros kin kesempwalki? Oh iaduwen doadoahngki dahme pein wiawihong uhk? Ele, mwurin ahn Sises mehla, Piter kalap koasoia duwen ah kilangada kasansal en Sises nan lingan en Wehi.—Madiu 17:9.
7 Tamataman, me e pil kak wiawi, me ni ahnsou me Piter ntingihdi nah kisinlikou keriau, Rongamwahu en Madiu oh nein wahnpoaron Pohl kisinlikou ong mehn Kalesia kan kohpesengehr wasa tohto. Ihme ahn Piter diho wehwehki ah luwet kan iangahki ah pwoson. (Madiu 16:21-23; Kalesia 2:11-14) Ahpw, met sohte kauhdi ah saledek en koasoi. Ni mehlel, met karehong nah kisinlikouwo en kaperen ong irail ko me kin pil pohnese pein arail luwet kan. Ihme karehda, ni ahnsou me kitail kin sewese irail ko me ahneki kahpwal akan, e soh pahn lipwalipw en wehkada me kitail pil kin sapwungala?—Rom 3:23; Kalesia 6:1.
Rahnmwahu En Kakehl
8. Ni irair dahieu Piter ele doadoahngki lepin lokaiao “pwoson”?
8 Tehk ahnsou wet ahn Piter rahnmwahu. E mwadangete koasoia ireo pwoson, oh ekerki irail kan me kin wadek ire wet nin duwen “irail ko me aleier pwoson duwehte kiht.” (2 Piter 1:1) Wasaht lepin lokaiao “pwoson” ele kin wehwehki “idihd tengeteng” oh kin wehwehkiong poahson en kamehlel kan de padahk kan en Kristian, me nan Pwuhk Sarwi kin ekei pak adaneki “padahk mehlel.” (Kalesia 5:7; 2 Piter 2:2; 2 Sohn 1) Lepin lokaiao “pwoson” kin kalap kadoadoahk nan irair wet ahpw kaidehn ni kadoadoahkpen ni oarelap duwehte likih de koapwoaroapwoarki aramas de mehkot.—Wiewia 6:7; 2 Korint 13:5; Kalesia 6:10; Episos 4:5; Sud 3.
9. Dahme karehda ong Mehn Liki kan ahn Piter rahnmwahuwo me limpoak?
9 Ong Mehn Liki kan me wadek ire wet, en Piter rahnmwahu ele kin keiou audaudki limpoak. Mehn Suhs kan sohte kin patohng Mehn Liki kan, irail kin kailongkin irail, oh mehn Suhs kan me wiahla Kristian kin kalap lipilipilki Mehn Liki kan. (Luk 10:29-37; Sohn 4:9; Wiewia 10:28) Mendahki met, Piter, me wia pwilidak en mehn Suhs emen oh wia wahnpoaron en Sises Krais, koasoia me irail kan me kin wadek nah kisinlikou—Mehn Suhs oh Mehn Liki—kin ahnekipene pwosonohte oh kin paiekihda soahngen kapaiohte reh.
10. Mehn kasukuhl dah kan kitail kak sukuhlkihsang en Piter rahnmwahuwo?
10 Medewehda mehn kasukuhl mwahu kan me ahn Piter rahnmwahu kin padahkiong kitail rahnwet. Koht sohte kin lipilipilki aramas; e sohte kin kupwurki ehu keinek de ehu wehi ah suwedki meteio. (Wiewia 10:34, 35; 11:1, 17; 15:3-9) Nin duwen me pein Sises padahngki, Kristian koaros wia pirien ehu, oh kitail endehr ahneki pepehm me kitail mwahu sang meteikan. Pil ehu, en Piter rahnmwahu kasalehda me kitail uhdahn wia pirien ehu sampah pwon, me “ahneki soahngen kapai” en pwosonohte me Piter oh ienge wahnpoaron kan ahneki.—Madiu 23:8; 1 Piter 5:9.
Loaloakong oh Inou kan en Koht
11. Mwurin ah wia rahnmwahu, soahng kesempwal dah kei Piter kasalehda?
11 Mwurin e wia ah rahnmwahu, Piter ntingihdi: “Kalahngan oh popohl unsek en ieiang kumwail.” Iaduwen kalahngan oh popohl pahn ieiang kitail? Piter sapengki: “Amwail en marainkihla atail Koht oh atail Kaun Sises.” Ih eri mahsanih: “Sapwellimen Koht manaman me ketikihongkitailehr mehkoaros me kitail anahne pwe kitail en kin mour lelepek.” Ahpw iaduwen atail pahn alehdi soahng kesempwal pwukat? “Met wiawiher pwehki atail marainkihla ih me ketin malipeikitaildo pwe kitail en iang paieki sapwellime lingan oh kalahngan.” Ihme Piter kin kasalehda pak riau me loaloakongkihla pwung Koht oh sapwellime Ohlo me kesempwal.—2 Piter 1:2, 3; Sohn 17:3.
12. (a) Dahme karehda Piter kasalehda kesempwalpen en ahneki loaloakong pwung? (b) Pwehn paikihda inou kan en Koht, dahme kitail en wia mahs?
12 “Sounpadahk likamw kan” me Piter panawihki en liksang nan irelaud 2 kin doadoahngki “lokaia likamw” pwehn pitihki Kristian kan. Ni ahl wet re kin song en pitih irail en pwurelahng tiahk samin kan me re pidoisangehr loale. Imwilao ong irail kan me komourla pwehki “loaloakong pwung en Kauno oh Sounkomour Sises Krais” oh mwuhr lohdiong pahn soahngen likamw wet me inenen suwed. (2 Piter 2:1-3, 20) E sansal me ni ah kasikasik pwehn koasoia kahpwal wet mwuhr, Piter kasalehda ni sansal nin tepin nah kisinlikou anahnepen en ahneki loaloakong pwung pwehn kak kolokol nanpwung mwakelekel rehn Koht. Piter kasalehda me Koht “ketikihong kitail pwais lapalap oh kesempwal kan me e ketin inoukidahr, pwe ni inoun pwais pwukat eh pahn pweida rehmwail.” Piter mahsanih, me pwehn kak paikihda inou pwukat, me wia kisehn atail pwoson, kitail en mahs “pitsang meninkau kan en sampah me ineng suwed kin karehda.”—2 Piter 1:4.
13. Dahme Kristian keidi kan oh “sihpw teikan” en nantiong koledi teng?
13 Iaduwen komw kin kilangwohng inou kan en Koht? Ni ahlohte me Kristian luhwen me keidi kan kin wia? Nan 1991, Frederick Franz, me wia president en Watch Tower Bible and Tract Society nan ahnsouwo, wiaehr doadoahk en kalohk kaukaule pohnangin sounpar 75, oarelapiada pepehm en irail ko me koapwoaroapwoarki en iang Krais kaunda: “Se kin koledi teng at pwoson lau lel awa wet, oh se pahn koledihte teng at pwoson lau Koht ni mehlel kadehdehda me e mehleliong sapwellime ‘inou kesemwpwal oh kaselel kan.’” Brother Franz kin kolokolte ah koapwoaroapwoarki sapwellimen Koht inou en iasadahng nanleng, oh e kolokolte ah pwoson lau e mehla ni ah mahki sounpar 99. (1 Korint 15:42-44; Pilipai 3:13, 14; 2 Timoty 2:10-12) Me rasehng met, aramas rar kan kin kolokolte arail pwoson, kilikilangwohng sapwellimen Koht inou en paradais pohn sampah me aramas pahn mour nsenamwahu kohkohlahte. Komw iang kisehn emen irail pwukat?—Luk 23:43; 2 Piter 3:13; Kaudial 21:3, 4.
Mwekidki Inou kan en Koht
14. Dahme karehda Piter ntingihdi wiewia mwahu me iei irair keieu me pahn kapatapatohng pwoson?
14 Kitail kin kalahngankiohng Koht dahme e inoukihda? Ma ehi, Pohl akpwungki, kitail en kasalehda met. “Ehi, pwehki karepe wet” (pwehki Koht ketikihong kitail inou kesempwal kan), kitail en nantiong mwekidki met. Kitail sohte kak ihte nsenamwahuki pwe kitail miher nan pwoson de ihte pwehki atail ese padahk mehlel. Met sohte itar! Ele ni mwein Piter ekei nan mwomwohdiso kin kalap kosoia duwen pwoson ahpw kin pidada tiahk samin kan. Arail wiewia anahne en mwahu, ihme Piter kangoangehki: “Kumwail en kapatahiong amwail pwoson wiewia mwahu.”—2 Piter 1:5; Seims 2:14-17.
15. (a) Dahme karehda irairo loaloakong kin ntingdi mwurinte irairen wiewia mwahu me iei irair me pahn kapatapatohng pwoson? (b) Irair dah teikan me pahn kaunopada kitail pwehn kak koledi teng pwoson?
15 Mwurin e koasoia duwen wiewia mwahu, Piter pil kapatahiong irair weneu likin met me pil anahne kapatapatohng atail pwoson. Ehu ehu irair pwukat me anahn ma kitail pahn “kesihnenda teng nan pwoson.” (1 Korint 16:13) Pwehki irail kan me kin uhwong padahk mehlel kin ‘kawehwe sapwung iren Pwuhk Sarawi’ oh kin kaneitikihda “padahk likamw kan,” Piter mwuri kasalehda me loaloakong me kesempwal, oh mahsanih: “Ong amwail wiewia mwahu, kumwail en kapatahiong dehdehki (loaloakongki) Koht.” Ih eri pousehla mahsanih: “Oh ong amwail dehdehki (loaloakongki) Koht, ese kaunda paliwaramwail, oh ong ese kaunda paliwaramwail, kumwail en kapatahiong kanengamah ni ahnsou apwal, oh ong kanengamah ni ahnsou apwal, kumwail kapatahiong lelepek; oh ong amwail lelepek, limpoak ong riamwail Kristian kan; oh ong amwail limpoak ong riamwail Kristian kan, kumwail kapatahiong amwail limpoak ong aramas koaros.”—2 Piter 1:5-7; 2:12, 13; 3:16.
16. Dahme pahn wiawi ma irair kan me Piter ntingihdi kin kapatapatohng pwoson, ahpw dahme pahn wiawi ma re sohte kapatapatohng pwoson?
16 Dahme pahn wiawi ma soahng isuh pwukat pahn kapatapatohng atail pwoson? Piter sapeng: “Pwe ma wiewia mwahu pwukat pahn wiahla amwail oh kekeirada nanpwungamwail, kumwail pahn loaloakongkihla (pwung) atail Kaun Sises Krais, pwe loaloakong wet pahn karehda amwail mour eh pahn wah mwahu oh pweida.” (2 Piter 1:8) Ni pali teio, Piter mahsanih: “Ahpw mehmen me sohte pahn ahneki mepwukat, eri, maskun men ih oh e manokelahr me dipe mehn mahs ako kamwakelsangehr.” (2 Piter 1:9) Tehk pwe Piter wekidala ah doadoahngki “kumwail” oh “atail” ong “mehmen,” “ih,” oh “ah.” E inenen kansensuwed, pwe mendahki, ekei me maskun, manuknuk, oh samin, Piter ni kadek sohte kin koasoia me aramaso me wadek kisinlikou wet kin iang wia soahngen aramas pwukat.—2 Piter 2:2.
Kakehlehda Rie Kristian kan
17. Dahme ele kamwekidada pekipek limpoak en Piter en wiewiahte “soahng pwukat”?
17 Ele pwehki ah wehwehki me me kapw kan pahn keiou mengeiong lohdi pahn widingek, Piter ni limpoak kangoangehkin irail: “Eri, riei ko, kumwail nantihong laudsang mahs pwe sapwellimen Koht luhk oh pilipil ong kumwail en wiahla momour poatopoat ehu; pwe ma kumwail pahn wia met, kumwail sohte pahn kesehla amwail pwoson.” (2 Piter 1:10; 2:18) Kristian keidi kan me kin kapatahiong arail pwoson soahng isuh pwukat pahn paikihda kating kaselel ehu, nin duwen me Piter mahsanih: “Pwe ih duwen met amwail pahn ahnekihla pwung unsek en pedolong nan wehi soutuk en atail Kaun oh Sounkomour Sises Krais.” (2 Piter 1:11) “Sihpw teikan” pahn ale sohso soutuk nan sampah pahnangin Wehin Koht.—Sohn 10:16; Madiu 25:33, 34.
18. Dahme karehda Piter kin pehm me “ahnsou koaros en kataman” rie Kristian kan?
18 Piter ni mehlel mwahuki rie Kristian kan en ale soahngen kating kaselel wet. E ntingihdi: “Karehda I pahn kin katamankin kumwail duwen mepwukat ahnsou koaros, menda ma kumwail eseier, oh poadidier teng nan padahk mehlel me kumwail aleier.” (2 Piter 1:12) Piter doadoahngki lepin lokaiahn Krihko sterizo, me kin wehwehki “koasoanehdi teng” ahpw kin kawehwehki “kakehle” nan ahn Sises peneu mwowe ong Piter: “Kakehlahda pwoson en riomw kan.” (Luk 22:32) Kadoadoahkpen lepin lokaia wet kin kasalehda me Piter kin tamanda peneu kehlail me e alehsang ah Kauno. Piter ahnsouwet mahsanih: “Pwe I kin lemeleme me mehkot pwung ehu rehi ehi pahn kin pangenkin kumwail oh katamankin kumwail mepwukat, erein ei pahn momour. Pwe I ese me I pahn mwadang kumwurala paliwereiet.”—2 Piter 1:13, 14.
19. Sawas dah kan kitail anahne rahnwet?
19 Mendahki Piter ni kadek mahsanih me irail kan me kin wadek kisinlikou wet kin “tengediohng nan padahk mehlel,” e pohnese me arail pwoson kak luwetla. (1 Timoty 1:19) Pwehki e ese me ahnsou keren e pahn mehla, e kin kakehle rie kan ni ah kin koasoia mehkan me irail kak mwuhr tamanda pwehn kolokol arail kehl en pali ngehn. (2 Piter 1:15; 3:12, 13) Me rasehng met, kitail rahnwet anahne mehn kataman ahnsou koaros pwehn kolokol teng pwoson. Mendahki ihs kitail de ia uwen werei atail mih nan padahk mehlel, kitail sohte kak pohnsowehla atail wadek Paipel kaukaule, pein onop, oh iang towehda mihding kan. Ekei kin wiahda kahrepe kan me re sohte kak iangki mihding, ni arail kin koasoia me re pwang de dene audepen mihding kan kin pwurpwurehng ahnsou koaros de dene me wia mihding kan sehse padahk, ahpw Piter ese ia uwen mwadang emen emen kitail kak katiasang atail pwoson ma kitail nohn itarkihla atail pwoson.—Mark 14:66-72; 1 Korint 10:12; Ipru 10:25.
Poahsoan Teng ong Atail Pwoson
20, 21. Iaduwen kasansal en wekila oh linganla kin kakehle pwoson en Piter oh irail kan me kin wadek nah kisinlikou, iangahki kitail rahnwet?
20 Atail pwoson kin ihte poahsoanda pohn soai kan me aramas wiahda? Piter sapengki: “Soh, se sohte poahsoankihda soai likamw at padahk kan ong kumwail duwen roson en ketidohn atail Kaun Sises Krais. Pein kiht se kilangki masat akan sapwellime roson lapalahpie.” Piter, Seims, oh Sohn mih rehn Sises ni ahnsou me re kilangada kasansal en ih nan manaman en Wehi. Piter kawehwe: “Se iang mi wasa me Koht Sahm ketin kawauwihala oh kalinganahla, ni kapitien Sahm e peidohng pohn Sises sang Wasa Lingalihngie, mahsanih, ‘Ih nei kompoakeo met, me I kin kupwurperenki.’ Pein kiht iang rong ngihl wet me peidihdo sang nanleng, ni at iang ketiket pohn nahna sarawio.”—2 Piter 1:16-18.
21 Ni ahnsou me Piter, Seims, oh Sohn kilangada kasansalo, ni mehlel Wehio wia mehlella ong irail! Piter kasalehda: “Eri, se kin koapwoaroapwoar laudki kokohp me soukohp ako lohkidohr. Me konehng mehlel kumwail en tehk oh kesempwalki.” Ehi, irail kan me kin wadek nein Piter kisinlikou, iangahki kitail rahnwet, ahneki kahrepe kehlail en tehk kokohp kan me pid Wehin Koht. Ni ahl dah me kitail en tehk duwen met? Piter sapeng: “Rasehng marain ehu me kin dakedaker wasa rotorot, wasa lao rahnpeseng oh marain en usuhn rahn ahpw pahn kamarainihada kapehdamwail kan.”—2 Piter 1:19; Daniel 7:13, 14; Aiseia 9:6, 7.
22. (a) Ong dah me mongiongatail anahne pepehd ong? (b) Iaduwen atail pahn tetehk mahsan en kokohp kan?
22 Mongiongatail pahn rotorot ma sohte marain en mahsan en kokohp. Ahpw ni atail kin tehk duwen met, mongiong en Kristian kan kin wie pepehd ong dakadahn rahn ni ahnsou me “usuhn rahn,” Sises Krais, pahn pwarada nan lingan en Wehi. (Kaudial 22:16) Iaduwen kitail rahnwet kak tehkada mahsan en kokohp? Met sang ni onop Paipel, kaunopadahng oh iang wiewiahn mihding kan, oh ‘doudouloale mepwukat, oh audaudkihda.’ (1 Timoty 4:15) Ma mahsan en kokohp pahn wia lamp ehu me dakadakar nan “wasa rotorot” (mongiongatail), kitail anahne mweidong en kaweidih kitail—atail ineng kan, atail pepehm kan, karepe kan me kitail ahneki, oh atail mehn akedei kan. Kitail anahne wia tohnsukuhl en Paipel, pwehki Piter kaimwsekihla irelaud 1: “Sohte emen kak kawehweda kokohp ehu en nan Pwuhk Sarawi sang ni pein nsene. Pwe sohte mwahn kokohp ehu kin pwilisang ni nsenen aramas emen, ahpw Ngehn Sarawi me kin ti pohn aramas ni ar kin lohkihda mahsan en Koht.”—2 Piter 1:20, 21.
23. Dahme irelaud 1 en 2 Piter kin kaunopadahng irail kan me kin wadek kisinlikou wet?
23 Nan tepin irelaud en nah kisinlikou keriau, Piter kin kihda mehkan me pahn kamwekid kehlail kitail en koledi teng atal pwoson. Kitail ahnsou wet onopadahngehr en tehkpene ire kesempwal kan me pahn pwarada mwurin met. Artikel en mwuhr pahn kosoia irelaud 2 en 2 Piter, wasa me wahnpoarono pahn apwaliala kahpwal en tiahk samin me pedolongongehr nan mwomwohdiso kan.
Komw Tamataman?
◻ Dahme karehda Piter kasalehda kesempwalpen en ahneki loaloakong pwung?
◻ Ia karepen irair en wiewia pwung kin ntingdi me iei keieun irair me pahn kapatapatohng pwoson?
◻ Dahme Piter pehmki me e anahne ahnsou koaros kataman rie Kristian kan?
◻ Poahsoan teng dahieu Piter kihda ong atail pwoson?
[Kilel nan pali 16]
Soh itar en Piter sohte karehong en kesehla ah pwoson