Kamadipw Sarawi Kesemwpwal kan nan Poadoapoad en Israel
“Ohl koaros en amwail wehi pahn kin pokonpene oh kaudokiong Kauno [Siohwa], pak siluh nan sounpar ehu ni wasahn kaudokteieu. . . . Emenemente ohl pahn wa kohdo eh meirong.”—DEUDERONOMI 16:16.
1. Dahme kitail kak ndahki ahnsoun kamadipw sarawi kan nan ahnsoun Paipel kan?
DAHME ke kin tamanda ni ahnsou me ke kin medemedewe duwen kamadipw ehu? Ekei kamadipw kan en mahs kin sansalkihda mwenge oh nim daulihla oh nenek. Met pil duwehte ekei kamadipw kan en nan rahnpwukat. Ahpw kamadipw kan me kileledi nan Kosonned en Koht ong Israel kin weksang met. Nin doken re wia ahnsoun kaperen, re pil kin adaneki “kapokon sarawi.”—Lipai 23:2.
2. (a) Dahme ohl en Israel kan anahne wia pak siluh nan pahr ehu? (b) Nin duwen lepin lokaia me Deuderonomi 16:16 kin doadoahngki, dahkot “kamadipw sarawi”?
2 Ohl en Israel lelepek kan—me kin kalap karehda arail peneinei—kin diarada duwen kansenamwahu en seiloklahng Serusalem, ‘wasa Siohwa ketin pilada,’ oh re kin kihda arail sawas laud ong kamadipw sarawi lapalap siluwo. (Deuderonomi 16:16) Pwuhko Old Testament Word Studies kin kawehwe lepin lokaiahn Ipru me kin kawehwe “kamadipw sarawi” nan Deuderonomi 16:16 me iei “ahnsoun peren laud . . . me ekei karasepen sapwellimen Koht kupwurmwahu kin kasarawihkihla meirong kan oh kamadipw kan.”a
Kesempwalpen Kamadipw Sarawi Lapalap ko
3. Kapai dahkei kamadipw sarawi siluwo me kin wiawi nan pahr koaros kin katamando?
3 Pwehki koasoandi en mour en mehn Israel kan kin pid wahn sahpw, re kin likih sapwellimen Koht kapai en kamwerehdi keteu. Kamadipw sarawi lapalap siluwo nan Kosonned en Moses kin wiawi ahnsouwohte en rikrikpenehn rahk en parli ni imwin March de tepin April, oh rahk en wihd ni imwin May, oh luhwen rahko ni tepin October. Ahnsou pwukat kin wia ansoun pereperen oh kapingkalahngan ong Sounkomour en keteu oh Sounwiahda sahpw wokien kan. Ahpw kamadipw pwukat kin pidada laud sang met.—Deuderonomi 11:11-14.
4. Wiewia dahieu nan poadoapoad me keioun kamadipw sarawio kin kasarawihla?
4 Keieun kamadipw sarawio kin wiawi ni tepin sounpwong en kalender en Paipel en mahs, sang Nisan 15 lel 21, me kin parekiong atail sounpwong en ni imwin March de tepin April. E kin adaneki Kamadipw Sarawien Pilawa sohte Doal Ihs, oh pwehki e kin wiawi mwurinte Pahsohpa en Nisan 14, e kin pil adaneki “sarawien pahsohpa.” (Luk 2:41; Lipai 23:5, 6) Kamadipw sarawi wet kin katamankihong mehn Israel kan arail pitsang kalokolok nan Isip, pilawa sohte doal ihs kin adaneki “pilawa en lokolok.” (Deuderonomi 16:3) E kin katamankihong irail me arail tangasang Isip me inenen karuwaru me karehda sohte arail ansoun doaloahkihda kenarail pilawa ihs oh awih pwehn umwpwospeseng. (Eksodus 12:34) Erein kamadipw sarawi wet sohte pilawa me doalki ihs kin dierekda nan imwen Mehn Israel men. Mehmen me iang kasarawio, iangahki mehn keiru men, me pahn kang pilawa doal ihs pahn ale kalokpen kamakamla.—Eksodus 12:19.
5. Kapai dahkei kamadipw sarawi keriauwo kin katamando, oh ihs me pahn iang pereperen?
5 Keriaun kamadipw sarawio kin wiawi wihk isuh (rahn 49) mwurin Nisan 16 ni rahn kaiesek weneu en sounpwong kesilu, me iei Sivan, me kin parekiong atail sounpwong en ni imwin May. (Lipai 23:15, 16) E kin adaneki Kamadipw Sarawien Wihk kan (ni mwein Sises, e kin pil adaneki Pendekos, me wehwehki “Kalimeisek” ni lokaiahn Krihk), oh e kin wiawi kerenlahng ahnsouwohte nan pahro me mehn Israel kan pedolong nan inoun Kosonned ni Nahnahn Sainai. (Eksodus 19:1, 2) Erein kamadipw sarawi wet mehn Israel lelepek kan kin doudouloale arail kapai en katohrohrla nin duwen sapwellimen Koht wehi sarawi. Pwehki re wia sapwellimen Koht aramas tohrohr kei re anahne peikiong Kosonned en Koht, duwehte kehkehliko en kasalehda nseno limpoak ong me paisuwed kan pwe irail pwukat en pil kak paiekihda kamadipwo.—Lipai 23:22; Deuderonomi 16:10-12.
6. Wiewia dahieu kamadipw sarawi kesiluwo katamanda ong sapwellimen Koht aramas kan?
6 Kaimwseklahn kamadipw sarawi kasiluwo me kin wiawi pak ehu nan pahr koaros kin adaneki Kamadipw Sarawien Rahk, de Kamadipw Sarawien Impwal. E kin wiawi ni keisuh en sounpwong, Tishri, de Ethanim, sang rahn kaiesek limau lao lel rahn karieisek ehu, me parekiong tepin atail sounpwong en October. (Lipai 23:34) Erein ahnsou wet, sapwellimen Koht aramas kan kin kousoan likin imwarail de pohn kadoken imwarail me wiawihkihda rahn tuhke oh tehn tuhke me re pahn kousoan loale erein ahnsou mwotomwot kis. Met kin katamankin irail arail seilok en sounpar 40 me re wia sang Isip kohlang Sapwen Inou, ni ahnsou me wehi anahne sukuhlki en likih Siohwa pwehn ketikihda arail anahn en ehu ehu rahn.—Lipai 23:42, 43; Deuderonomi 8:15, 16.
7. Iaduwen atail paikihda kousapahlpen kasarawi en kamadipw sarawi kan nan Israel en mahso?
7 Kitail en kousapahli ekei kamadipw sarawi kan me uhdahn kesempwal nan poadoapoad en sapwellimen Koht aramas kan en mahs. Met anahne en wia mehn kangoang ong kitail nan rahnwet, pwehki kitail pil ale luk en pokonpene kaukaule ehu ehu wihk oh pak silu nan pahr ehu nan kapokon laud oh tikitik kan.—Ipru 10:24, 25.
Nan Ansoun Nanmwarki kan en ni mwein Depit
8. (a) Kasarawi dahieu me wiawi ni mwein Nanmwarki Solomon? (b) Kaimwseklahn pweida kaselel dahieu en mweten Kamadipw Sarawien Impwal me kitail kak kilikilangwohng?
8 Ehu kasarawih ndand ni ansoun Kamadipw Sarawien Impwal kin wiawi erein kaunda kepwehwe en nein Depit pwutako, Nanmwarki Solomon. “Pokon en aramas kalaimwunie,” pokonpene me kohsang sahpw kan en ni irepen Sapwen Inou kohdohng Kamadipw Sarawien Impwal oh isimwas en tehnpas sarawio. (2 Kronikel 7:8) Ni ahnsou me e nek, Nanmwarki Solomon padahkihong aramas kan me iang kasarawio en kohkohpeseng, irail pwukat eri “tepiada kapingahla Solomon, oh pwurpeseng ni imwarail kan pereperenki soahng koaros me Kauno [Siohwa] ketikihong sapwellime ladu Depit oh pil ong sapwellime aramas en Israel.” (1 Nanmwarki 8:66) Met inenen wia kamadipw sarawi ehu me ndandla. Rahnwet, sapwellimen Koht ladu kan kin kilikilangwohng kaimwsekpen pweidahn mweten Kamadipw Sarawien Impwal ni imwin Pahr Kid en Kaundahn Solomon Lapalap, Sises Krais. (Kaudial 20:3, 7-10, 14, 15) Ni ahnsouwo, aramas kan me momour nan wasa koaros nan sampah, iangahki irail kan me kaiasada oh irail kan me pitsang Armakedon, pahn miniminpene nan arail kaudok kaperen ong Siohwa Koht.—Sekaraia 14:16.
9-11. (a) Dahme kahwalahng kamadipw sarawi ndand ehu ni mwein Nanmwarki Esekaia? (b) Mehn kalimeng dahieu irail me tohto kan sang keinek eisek en wehio paliepeng wiahda, oh dahme e kin katamankihong kitail rahnwet?
9 Kamadipw sarawi ndand mwuri me Paipel ripohtki wiawi mwurin kaundahn Nanmwarki suwed Ahas, me ritingidi tehnpas sarawio oh kahwalahng wehin Suda en salelepek. Me wiliandi Ahas iei Nanmwarki mwahu Esekaia. Ni keieun pahr en ah kaunda, ni ah mahki sounpar 25, Esekaia tepiada koasoandi lap ehu en kapwurehdo oh onehda kapw kaudok. E mwadangete ritingada tehnpas sarawio oh koasoanehdi en onohn sapahlda. Mwuri nanmwarkio kadarpeseng kisinlikoun luk ong mehn Israel kan me koukousoan nan wehi lemei en keinek eisek en Israel ni paliepeng, oh luke irail en kohdo oh kasarawihla Pahsohpa oh Kamadipw Sarawien Pilawa Sohte Doal Ihs. Me tohto kohdo, mendahkihla kapailok kan sang rehn iengerail kan.—2 Kronikel 30:1, 10, 11, 18.
10 Kamadipw sarawio pweida? Paipel ripohtki: “Erein rahn isuh aramas ako me pokonpene nan Serusalem wiewia Sarawien Pilawa Sohte Doal Ihs ni peren lapalap, oh rahn koaros mehn Lipai ko oh samworo ko kin kapikapinga Kauno [Siohwa] uwen ar kak.” (2 Kronikel 30:21) Ia uwen mehn Israel ko kin wiahda mehn kalimeng mwahu ong sapwellimen Koht aramas kan nan rahnwet, me tohto rehrail kin dadaurete pahn uhwong kan oh kin seiloksang wasa doh pwehn towehda kapokon kan!
11 Karasepe ehu, tehk duwen Kapokon en District siluh me oaralap koasoia, “Godly Devotion” me wiawi nan Poland nan 1989. Nanpwungen irail meh 166,518 me iang towehda iei pokon lap ehu sang wehio me mahs wia Soviet Union oh sahpw en Palimesehn Iurop kan, wasa me doadoahk en Sounkadehde kan en Siohwa kin keinapw ie ahnsouwo. Pwuhko Jehovah’s Witnesses—Proclaimers of God’s Kingdomb ripohtki, “Ong ekei me iang towehda kapokon pwukat, met iei ehdin arail pahn iang towehda kapokon laud en sapwellimen Siohwa aramas kan me tohtohkihsang aramas 15 de 20. Mohngiongarail kin dirkihla kalahngan ni arail kin kilangwohng aramas nen kei nan wasahn kapokon, me kin iang irail kapakap, oh kin kapataiong ngilerail ni koul en kaping ong Siohwa.”—Pali 279.
12. Dahme kahwalahng kamadipw sarawi kesempwal me wiawi ni mwein Nanmwarki Sosaia?
12 Mwurin mehlahn Esekaia, mehn Suda kan pil pwurehng lohdiong kaudok likamw pahn Nanmwarki Manasa oh Amon. Mwuri iei kaundahn emen nanmwarki mwahu, Sosaia, me ni eimah kapwurehdo kaudok mehlel. Ni ah mahki sounpar 25, Sosaia ruwesehki me tehnpas sarawio en onohnda sapahl. (2 Kronikel 34:8) Nin doken ahr wie onohne sapahl, re diarada nan tehnpas sarawio Kosonned me Moses ntingihda. Nanmwarki Sosaia inenen mwekidki dahme e wadek nan Kosonned en Koht oh eri koasoanehdi pwe kosonnedo en wadawadohng aramas kan koaros. (2 Kronikel 34:14, 30) Eri, pwehki dahme ntingdi nan Kosonnedo, e koasoanehdi karasawi en Pahsohpa. Nanmwarkio pil wiahda mehn kalimeng mwahu ni ah kihda sawas laud ong ahnsouwo. Pwehki met, Paipel ripohtki: “Sang ni mwein soukohp Samuel, saikinte sarawien Pahsohpa ehu wiawi duwehte met.”—2 Kronikel 35:7, 17, 18.
13. Dahme kasarawi en kamadipw sarawi kan ni mwein Esekaia oh Sosaia kin katamandohng kitail rahnwet?
13 Wekidekla kapw kan me Esekaia oh Sosaia wiahda kin parekiong kapwurpwurdo kaselel en kaudok mehlel me wiawi nanpwungen Kristian mehlel kan sangete nanmwarkilahn Sises Krais nan pahr 1914. Me keieu pwungiong weliakapw me Sosaia wiahda, kapwurpwurdo wet en ahnsou pwukat kin poahsoanda pohn dahme ntingdi nan Mahsen en Koht. Oh, me parekiong ni mwein Esekaia oh Sosaia, kapwurpwurdo en ahnsouwet kin sansalkihda kapokon kan, wasa me kawehwe kaselel kan en kokohp en Paipel oh kadoadoahkpen mouren kosonned en Paipel kin kohda ni ahnsou me konehng. Kapataiong peren en ahnsoun kasukuhl pwukat iei tohtohn irail kan me papidaisla. Duwehte mehn Israel kan me koluhla ni mwein Esekaia oh Sosaia, irail kapw kan me ahpwten papidaisla kin wiliakapwsang wiewia suwed en Kristendom oh en Sehdan sampah. Nan 1997 pohnangin aramas 375,000 papidaisla pwehn wia kadehdepen arail inou ong Koht sarawio, Siohwa—average en pohnangin aramas 1,000 ehu ehu rahn.
Mwurin Kalipiliplao
14. Dahme kahlwalahng ehu kamadipw sarawi kesempwal nan pahr 537 B.C.E.?
14 Mwurin mehlahn Sosaia, wehio pil pwurehng sohpeilahng kaudok likamw. Kedekedeo, nan pahr 607 B.C.E., Siohwa kaloke sapwellime aramas kan ni ah ketin mweidohng sounpei en Papilon en uhwongada Serusalem. Kahnimwo oh ah tehnpas sarawio eri ohla, oh sahpwo tehnla. Mwurin met mehn Suhs kan seldi nan Papilon erein sounpar 70. Koht eri ketin kakehlailda luhwen mehn Suhs kei me koluhla, en pwurelahng Sapwen Inou pwehn kapwurehdo kaudok mehlel. Re lellahng kahnimw ohla en Serusalem nan sounpwong keisuh en pahr 537 B.C.E. Dahme re tepin wia iei en kauwada pei sarawi ehu pwehn kihda meirong kaukaule ehu ehu rahn nin duwen me kileledi nan inoun Kosonnedo. Arail wia met kin kasaingedi pil ehu kasarawi kesempwal nan poadoapoad. “Irail eri wia Sarawien Impwal, nin duwen me koasoandier.—Esra 3:1-4.
15. Doadoahk dahieu mihmi mwohn irail me kapwurpwurdo kan nan pahr 537 B.C.E., oh iaduwen irair ehu me duwehte met kin pwarada nan 1919?
15 Doadoahk lap ehu mihmi mwohn irail me kalipilipla pwukat me kapwurpwurdo—met iei en onehda sapahl sapwellimen Koht tehnpas sarawio oh iangahki Serusalem oh ah kehl akan. Mie uhwong tohto kan sang mehn mperail peirin kan. Ni ahnsou me tehnpaso kokouda, e wia “rahn en kisin doadoahk tikitik.” (Sekaraia 4:10) Irairo kin parekiong irair en Kristian keidi lelepek kan nan pahr 1919. Nan pahro, re saledeksang sensel ni pali ngehn pahn Papilon Lapalap, minimin en kaudek likamw en sampah. Irail tohtohkihte meh kid kei oh kin mihla pahn sampah kailok ehu. Imwintihti kan en Koht pahn kak kauhdi kekeiradahn kaudok mehlel? Pasapeng ong peideko kin katamando kaimwseklahn kasarawi en kamadipw sarawi riauwo me kileledi nan Pali Nting Sarawi en Ipru.
16. Ia kesempwalpen kamadipw sarawi ehu nan 515 B.C.E.?
16 Kedekedeo tehnpas sarawio pwurehng kokouda nan sounpwong en Adar 515 B.C.E., me kasaingedi kamadipw sarawien Nisan nan (spring). Paipel ripohtki: “Re ahpw pil wiahda Sarawien Pilawa Sohte Doal Ihs ni pereperen erein rahn isuh. Re kin pereperen laud pwehki Kauno (Siohwa) e ketin kawekala kupwur en nanmwarki lapalap en Asiria pwe en seweseirailda ni kokoupen Tehnpas en Koht en Israel.”—Esra 6:22.
17, 18. (a) Kamadipw sarawi kesempwal dahieu wiawi nan 455 B.C.E.? (b) Iaduwen atail mih nan soahngen irairohte rahnwet?
17 Sounpar weneisek mwuri, nan pahr 455 B.C.E., pil ehu kamadipw sarawi kesempwal wiawihda. Kamadipw Sarawien Impwal nan pahro kin wia kilelepen kanekneklahn onohn sapahl en kelen Serusalem. Paipel ripohtki: “Eri, aramas koaros me pwurodohng ar selidi ahpw kauwada imwarail impwal kan oh kousoan loale. Eri, iei ahnsouwo me irail pwurehng wia soahng wet mwurin mwein Sosua, nein Nun. Nan kapehd en aramas koaros ahpw mwekidida oh pereperen.”—Nehmaia 8:17.
18 Ia uwen e kin wia kapwurpwurdo kaselel ehu en sapwellimen Koht kaudok mehlel mendahki kasongosong laud kan! Irairo rahnwet pil duwehte. Mendahki kalokolok kan oh uhwong kan, doadoahk lap en kalohkiseli rongamwahu en Wehin Koht lelohngehr ni irepen sampah, oh rongen sapwellimen Siohwa kadeik lellohngehr wasa koaros. (Madiu 24:14) Kaimwseklahn kileledi en luhwen 144,000 me keidi kan kerekerendohr. Pohnangin iengerail lime rar samwa en “sihpw teikan” kohpeneiehr sang nan wehi koaros ong nan “pwihn teheiu” rehn luhwen me keidi kan. (Sohn 10:16; Kaudial 7:3, 9, 10) Ia uwen met wia pweida kaselel ehu en karaspen Kamadipw Sarawien Impwal! Oh doadoahk lap wet en dondol pahn pousweite wiawi lao lel nan sampah kapwo ni ahnsou me irail me lik me iasada kan pahn ale luk en iang kasarawih mweten Kamadipw Sarawien Impwal.—Sekaraia 14:16-19.
Nan Keieun Senturi C.E.
19. Dahme karehda Kamadipw Sarawien Impwal nan 32 C.E. kin siklasang koaros?
19 Nanpwungen kasarawi en kamadipw sarawi kan me keieu siklasang koaros me kileledi nan Paipel iei kamadipw ko me sapwellimen Koht Ohl, Sises Krais, kin iang towehda. Karasepe ehu, tehk en Sises towehda Kamadipw Sarawien Impwal nan pahr 32 C.E. E doadoahngki ahnsouwo pwehn padahngki padahk mehlel kesempwal kan oh e kin utungada ah padahk kan sang ni ah kin wadek ire kan nan Pali Nting Sarawi en Ipru. (Sohn 7:2, 14, 37-39) Ehu wiewiahn kamadipw wet me re kin wia ahnsou koaros iei tiahk en isikda lamp laud pahieu nan masloalen kelen tehnpas sarawio. Met kin wahdo peren en wiewiahn kamadipwo me kin wiawi lao lel ni lukepen pwong. E sansal me, Sises kin kosoia duwen lamp laud pwukat ni ah mahsanih: “Ngehi me marain en sampah. Mehmen me pahn idawehniehdo pahn ahneki marain en mour, oh sohte pahn weweid nan rotorot.”—Sohn 8:12.
20. Dahme karehda Pahsohpa nan pahr 33 C.E. kin sikla?
20 Mwurin met iei Pahsohpa oh Kamadipw Sarawien en Pilawa Sohte Doal Ihs en pahr kesempwalo 33 C.E. Ni Rahn en Pahsohpao, imwintihti kan en Sises kemehla ih oh e wiahla mweten Sihmpwul en Pahsohpa, me matala pwehn wahweisang “dipen sampah.” (Sohn 1:29; 1 Korint 5:7) Rahn siluh mwuri, ni Nisan 16, Koht kaiaskihda Sises paliwar ngehn ehu me sohte kak pwurehng mehla. Met kin wiawi ahnsouwohte me meirong en tepin wahn rahk en pilawa parli kin wiawi me kileledi nan Kosonnedo. Ihme karehda, Kaun Sises Krais me iasadahro wiahla “tepin wahn irail ko me meirla ni mehla.”—1 Korint 15:20.
21. Dahme wiawi ni Pendekos en pahr 33 C.E.?
21 Ehu kamadipw me inenen sikla iei Pendekos en pahr 33 C.E. Ni rahno mehn Suhs tohto iangahki mehn liki kan me wekiong lamalam en mehn Suhs kin pokonpene nan Serusalem, iangahki tohnpadahk en Sises meh 120. Nin doken kamadipw sarawio kin wiawi, Kaun Sises Krais me iasadahro wudekihdi ngehn sarawi en Koht pohn tohnpadahk 120. (Wiewia 1:15; 2:1-4, 33) Irail eri keiedi oh wiahla sapwellimen Koht wehi kapw pilipilda sang ni inou kapwo me Sises Krais wiahda. Erein kamadipw sarawio samworo lapalap en Suhs kin meirongkihong Koht lopwon en pilawa doal ihs riau me wiawihdahsang tepin wahn rahk en wihd. (Lipai 23:15-17) Lopwon en pilawa pwukat kin mwete aramas 144,000 soh unsek kan me Sises ‘pwainda ong Koht’ pwehn papah nin duwen “wehi ehu oh samworo kan. . .pwehn kaunda nin duwen nanmwarki kan pohnangin sampah.” (Kaudial 5:9, 10; 14:1, 3) Ire mehlelo me kaun en nanleng pwukat kohsang ni rahn tohnsampah dipan riau, mehn Suhs oh Mehn Liki, kin pil mwete lopwon en pilawa doal ihs ko.
22. (a) Dahme karehda Kristian kan sohte kin kasarawih kamadipw sarawi kan en inoun Kosonnedo? (b) Dahme kitail pahn tehkpene nan artikel en mwuri?
22 Ni ahnsou me inou kapw tepiada doadoahk ni Pendekos 33 C.E., e kin wehwehki me inoun Kosonned mering sohla kin kesempwal mwohn silangen Koht. (2 Korint 3:14; Ipru 9:15; 10:16) Met sohte kin wehwehki me sohla en Kristian keidi kan arail kosonned. Re mihla pahn kosonned sarawi me Sises Krais kin padahngki oh me ntingdi nan mohngiongarail kan. (Kalesia 6:2) Ihme karehda, Kristian kan sohte kin kasarawih kamadipw sarawi siluwo me kin wiawi nan pahr koaros, me wia kisehn inoun Kosonned mering. (Kolose 2:16, 17) Mendahki met, kitail kak sukuhlkihdi soahng tohto sang lamalam en sapwellimen Koht ladu kan mwohn nin mwein Kristian kan ong arail kamadipw sarawi kan oh mihding teikan me re kin wia ong kaudok. Nan atail artikel en mwuri, kitail pahn tehkpene karasepe kan me pahn ni mehlel kamwekiddada koaros en kalahnganki anahnepen en kaukaule towehda mihding kan en Kristian.
[Nting tikitik kan me mi pah]
a Pil kilang Insight on the Scriptures, ntingda sang rehn Watchtower Bible oh Tract Society en New York, Inc., Volume 1, pali 820, column 1, parakrap 1 oh 3, pahn oarelap “Festival.”
b Ntingda sang rehn Watchtower Bible oh Tract Society en New York, Inc.
Peidek Kan En Kousapahl
◻ Ire dahieu kamadipw sarawi lapalap siluwo en Israel kin kapwaiada?
◻ Dahme kamadipw sarawi kan en ni mwein Esekaia oh Sosaia kin kasalehda?
◻ Kamadipw sarawi dahieu kasarawihla nan pahr 455 B.C.E., oh dahme karehda e kin wia mehn kangoang ong kitail?
◻ Ia kesempwalpen Pahsohpa oh Pendekos nan pahr 33 C.E.?
[Koakon nan pali 12]
Kasukuhl en Kamadipw Sarawi ehu ong Kitail Rahnwet
Koaros me pahn paiekihda soutuk sapwellimen Sises meirong en tomwpen dihp anahne mour parekiong dahme Kamadipw Sarawien en Pilawa Sohte Doal Ihs kin mwete. Mweten kamadipw sarawi wet iei kasarawi kaperen me Kristian keidi kan kin wia pwehki arail pitsang sampah suwed wet oh arail saledeksang kadeikpen dihp pwehki tomw en Sises. (Kalesia 1:4; Kolose 1:13, 14) Kamadipw sarawi en ahnsouwo kin wiawihki rahn isuh—nempe ehu me kin kadoadoahk nan Paipel me kin karasaraskihong unsek ni pali ngehn. Mwetehn kamadipw sarawio kin reireiki erein ahnsou unsek me mwomwohdisohn Kristian keidi kin mihmihki pohn sampah oh anahne kasarawihki “mwakelekel oh mehlel.” Met kin wehwehki en ahnsou koaros mwasamwasahn ihs ni karasaras. Paipel kin karasahki ihs padahk likamw, oh mwalaun, oh suwed. Sounkaudek mehlel kan en Siohwa anahne kasalehda arail tateki soahngen ihs wet, oh re sohte pahn mweidohng en kasaminehla pein arail mour oh pil sohte pahn mweidohng en kasaminehla mwakelekel en mwomwohdisohn Kristian.—1 Korint 5:6-8; Madiu 16:6, 12.
[Kilel nan pali 9]
Kapakap en rahk en parli kapw kin meirongla nan pahr koaros ni Nisan 16, rahno me Sises kaiasada
[Kilel nan pali 10]
Sises ele kin koasoakoasoia marain en kamadipw sarawi ni ahnsou me e ekerki pein ih “marain en sampah”