“Mehmen Me Wadek Met, En Wehwehki”
“Kumwail pahn kilang duwen ‘Sansal Kansensuwed Likemisiko,’ . . . E pahn uhda nan wasa sarawio. . . . Eri, irail kan me kin mihmi Sudia, re en tangalahng pohn nahna kan.”—MADIU 24:15, 16.
1. Soangen pweida dah me wiawiehr me pid mahsen en kaweid me Sises ketikihda nan Luk 19:43, 44?
ATAIL kin pehmitikiong kahpwal ehu me kohkohdo kak sewese kitail en pitsang met. (Lepin Padahk 22:3) Nna, song medewehla mwomwen irair en Kristian akan me mih nan Serusalem mwurin mehn Rom kan arail uhwongada wasao nan pahr 66 C.E. Sises kalekekinirailehr me kahnimwo pahn kapilkihpene sounpei oh irail pahn kauwehla. (Luk 19:43, 44) Ahpw, pali moron en mehn Suhs kan sohte men rong dahme Sises mahsanih. Ahpw sapwellime tohnpadahk kan peikiong sapwellime mahsen ako. Pwehki met, re pitsang kahpwalo nan pahr 70 C.E.
2, 3. Dahme kahrehda kitail en nsenohki sapwellimen Sises kokohpo me kileledi nan Madiu 24:15-21?
2 Nan kokohp ehu me pidada kitail nan rahnwet, Sises kasansalehda kilel ehu me ahneki irair tohto me iangahki mahwen kan, lehk en mwenge, rerrer en sahpw, soumwahu lusulus kan, oh kalokolok en Kristian kan pwehki arail kin kalohkiseli Wehin Koht. (Madiu 24:4-14; Luk 21:10-19) Sises pil ketikihda mehn sawas ehu me pahn sewese sapwellime tohnpadahk kan en esehki me imwio kerendohr—‘sansal kahnsensuwed likemisik me uhda nan wasa sarawio.’ (Madiu 24:15) Kitail en pwurehng kasawihada mahsen audapan ko pwehn kilang iaduwen re kak kamwekid atail mour ahnsouwet oh nan ahnsou kohkohdo.
3 Mwurin ah kasansalehda kilelo, Sises mahsanih: “Kumwail pahn kilang duwen ‘Sansal Kansensuwed Likemisiko,’ me soukohp Daniel kohpadahr. E pahn uhda nan wasa sarawio. (Mehmen me wadek met, en wehwehki!) Eri, irail kan me kin mihmi Sudia, re en tangalahng pohn nahna kan. A aramas me mihmi pohn pweleng en imwe, e dehpa kohdiong ale mehkot sang loale pwe solahr ahnsou; oh me mihmi nan sapwe, e dehpa pwurodo ale eh likou puhp nan imwe. Meid pahn apwal ong lih liseian akan oh me neitik pwelel kan ni ahnsowo! Kumwail peki rehn Koht pwe amwail sopohla en dehr wiawi ni ahnsoun pou de rahnen Sapad! Pwe apwal en ni ahnsowo pahn laudsang apwal me kin wiawi sang mahs kohdo lel met; pil sohte me pahn duwe sang met kohla.”—Madiu 24:15-21.
4. Dahme kasalehda me Madiu 24:15 pweida nan tepin senturi?
4 Mark oh Luk kin kapataiong ekei oaritik kan. Ni en Madiu doadoahngki “uhda nan wasa sarawio,” Mark 13:14 mahsanih “uhda nan wasa me e sohte konehng en uhda ie.” Luk 21:20 kapataiong mahsen kan en Sises: “Ni amwail pahn kilang karis en sounpei kei me kapilpenehr Serusalem, kumwail pahn esehki me ahnsoun eh ohla kerendohr.” Met sewese kitail en wehwehki me tepin pweidahn kokohp wet kin pidada en mehn Rom kan mahweniong Serusalem oh ah Tehnpas Sarawio—wasa sarawi ehu ong mehn Suhs kan ahpw e sohla sarawi ong Siohwa—me tepiada nan pahr 66 C.E. Ohla douluhl wiawi ni ahnsou me mehn Rom kan kauwehla kahnimwo oh Tehnpas Sarawio nan pahr 70 C.E. Dahkot “sansal kansensuwed likemisiko” nan ahnsowo? Oh iaduwen e ‘uhda nan wasa sarawio’? Pasapengpen peidek pwukat pahn sewese kawehwehda ah pweida nan rahnpwukat.
5, 6. (a) Dahme kahrehda irail kan me wadek Daniel irelaud 9 anahne en ahneki wehwe mwahu? (b) Iaduwen sapwellime Sises kokohp duwen “sansal kansensuwed likemisiko” pweida?
5 Sises kangoangehki irail me kin wadek audepen kokohp pwukat en doadoahngki loalokong. Irail kan me kin wadek mehnia kokohp? Ele met pid Daniel irelaud 9. Nan irelaud 9 kitail diarada kokohp ehu me kasalehda iahd me Mesaia pahn pwarada oh e kohpada me Mesaia pahn “lopla” mwurin sounpar siluh elep. Kokohpo mahsanih: “Eri, Sansal Kansensuwed Likemisiko pahn uhda ni wasa keieun ileilehn Tehnpas Sarawio, lao lel ih me kauwadahro pahn leledohng imwilah me Koht ketin kupwurehiong.”—Daniel 9:26, 27; pil kilang Daniel 11:31; 12:11.
6 Mehn Suhs kan lemeleme me met kin kadoadoahkohng en Antiochus IV kasaminehla Tehnpas Sarawio mpen sounpar 200 mwowe. Ahpw, Sises kasalehda me met kaidehn wehwehn kokohpo, oh kangoangehki ren doadoahngki wehwe mwahu pwehki “sansal kansensuwed likemisiko” pahn pwarada mwuhr oh uhda nan “wasa sarawio.” E sansal me Sises kin koasoakoasoia sounpei en Rom kan me pahn kohdo nan pahr 66 C.E. iangahki neirail pilaik kan. Soahngen pilaik pwukat, me re kin doadoahngki sangete mahs, iei sansal en dikedik kan oh kin wia mehkot katantat ong mehn Suhs kan.a Eri, iahd, me re pahn ‘uhda nan wasa sarawio’? Met wiawi ni ahnsou me sounpei en Rom kan, iangahki nair pilaik kan, mahweniong Serusalem oh ah Tehnpas Sarawio, me kin sarawi ong mehn Suhs kan. Mehn Rom kan pil tepiada kauwehla kelen Tehnpas Sarawio. Ni mehlel, mehkot me sangete mahs kin katantat ahnsouwet uhdahr nan wasa sarawi ehu!—Aiseia 52:1; Madiu 4:5; 27:53; Wiewia 6:13.
“Sansal Kansensuwed Likemisiko” En Nan Rahnwet
7. Kokohp dahieu en Sises pweida nan atail ahnsou?
7 Sangete Mahwen Keieu en Sampah, kitail kilangehr pweida laud en sapwellimen Sises kilel me ntingdi nan Madiu irelaud 24. Ahpw, tamanda sapwellime mahsen kan: “Kumwail pahn kilang duwen ‘Sansal Kansensuwed Likemisiko,’ . . . E pahn uhda nan wasa sarawio.” . . . “Eri, irail kan me mihmi Sudia, re en tangalahng pohn nahna kan.” (Madiu 24:15, 16) Kokohp wet uhdahn pweida pil nan atail ahnsou.
8. Erein sounpar tohto, iaduwen Sounkadehdehn Siohwa kan kasalehda ihs me “sansal kansensuwed likemisiko” kin mwete nan rahnpwukat?
8 Ni ah kasansalehda me sapwellimen Siohwa ladu kan kin likih me kokohp wet pahn pweida, The Watchtower [lokaiahn wai] en January 1, 1921, kin koasoia kokohp wet me pid wiewia kan nan Middle East. Mwuri, The Watchtower [lokaiahn wai] en December 15, 1929, ni pali 374, koasoia: “Ineng unsek en League of Nations iei en kasohpeiweisang nan kapehden aramas Koht oh Krais, oh ihme kahrehda, e wiahki mehkot mehn kauwehla, me Sehdan wiahda, oh kin wia mehkot me Koht kin ketin kalahdeki.” Ihme, nan 1919 “sansal kansensuwed likemisiko” pwarada. Kedekedeo, United Nations uhd wiliandi League of Nations. Sangete mahs, Sounkadehdehn Siohwa kan kasansalehdahr me en aramas pwihn en popohl pwukat kin wia mehkot me Koht kin ketin kalahdeki.
9, 10. Iaduwen kawehwehn mahso me pid kahn kamakam kowahlap kin kamwekid atail lamalam ong ahnsowo me pid iaduwen “sansal kansensuwed likemisiko” pahn uhda nan wasa sarawio?
9 Artikel en mwowe oaralapiehdahr kawehwehn pali laud en Madiu irelaud 24 oh 25. Miehte anahnepen en kawehwehda ‘sansal kansensuwed likemisiko me uhda nan wasa sarawio’? E sansal me iei. Sapwellimen Sises kokohp kin kadokepene “uhda nan wasa sarawio” ong kokohp en tepiadahn “kahn kamakam kowahlap.” Ihme kahrehda, mendahki ma “sansal kansensuwed likemisiko” mihmihkiehr ahnsou werei, atail kadokepene madamadau en ah “uhda nan wasa sarawio” oh pweidahn kahn kamakam kowahlapo anahne en ahnsou koaros mihmi nan atail madamadau. Iaduwen?
10 Mahso sapwellimen Koht aramas akan kin kawehwe me kahn kamakam kowahlap tepiada nan 1914 oh e pahn imwisekla nan mahwen en Armakedon. (Kaudiahl 16:14, 16; pil tehk The Watchtower [lokaiahn wai] en April 1, 1939, pali 110.) Ihme kitail kak wehwehki kahrepen mahso re kin lemeleme me “sansal kansensuwed likemisiko” en nan rahnpwukat kin uhdaiehr nan wasa sarawi ehu mwurinte Mahwen Keieu en Sampah.
11, 12. Nan 1969, kawehwe kapw dahieu me pid kahn kamakam kowahlap wiawihda?
11 Ahpw, nan pahr kan mwuri, atail wehwehki met wekila. Ni Epeng, July 10, 1969, ni Kapokon en International nan New York, me oarelap koasoia “Popohl Nan Sampah,” F. W. Franz, me wia vice president en Watch Tower Bible oh Tract Society ahnsowo, wiahda Kapahrek ehu. Ni ah kousapahlih kawehwe kan me re ahneki mahso me pid sapwellimen Sises kokohp, Brother Franz koasoia: “Kawehweho me kohda iei me ‘kahn kamakam kowahlap’ tepiada nan pahr 1914 C.E. oh me e sohte mweimweiong en kaneknekla ahnsowo ahpw Koht ketin kauhdi Mahwen Keieu en Sampah ni November en 1918. Sang ahnsowo kohdo Koht ketin mweidohng ahnsou ehu nanpwungen wiewiahn sapwellime Kristian luhwen me keidi pilipil kan oh mwohn ah mweidohng kaimwiseklahn ‘kahn kamakam kowahlap’ en pwurehng tepiada ni mahwen en Armakedon.”
12 Eri ehu kawehwe kapw kohda: “Pwehn pahrekiong wiewia kan en tepin pahr kan en Kristian, . . . dahme mwete ‘kahn kamakam kowahlap’ sohte tepiada nan 1914 C.E. Ahpw, dahme wia mwetehn Serusalem en rahnwet me pweida nan 1914-1918 kin wiahte pweidahn ‘tepin kahpwal akan’ . . . ‘Kahn kamakam kowahlap’ me sohte pahn pwurehng wiawi kin mihmihte mwowe, pwe e kin wehwehki kasohralahn minimin en kaudok likamw koaros en sampah (iangahki Kristendom) oh mwuri ‘mahwen en rahn lapalap en Koht Lapalahpie’ pahn wiawi ni Armakedon.” Met kin wehwehki me kahn kamakam kowahlap pwon kin mihmihte mwowe.
13. Dahme kahrehda e konehng en nda me ‘sansal kansensuwed likemisiko pahn uhda nan wasa sarawio’ nan ahnsou kohkohdo?
13 Met kin sewese kitail en wehwehkihla iahd “sansal kansensuwed likemisiko” uhda nan wasa sarawio. Tamanda dahme wiawi nan tepin pahr kan en Kristian. Mehn Rom kan mahweniong Serusalem nan pahr 66 C.E., ahpw mwadangete re pwurala, me mweidohng “mouren” Kristian kan en pitla. (Madiu 24:22) Nin duwen met, kitail kin kasik me kahn kamakam kowahlap pahn tepida ahnsou keren, ahpw e pahn kamwotomwotala pwehki sapwellimen Koht me pilipil kan. Tehk ire kesempwal wet: Mahso, ‘sansal kansensuwed likemisiko me uhda nan wasa sarawio’ kin dokedokei en mehn Rom kan mahweniong Serusalem oh Tehnpas Sarawio pahn ruwes en General Gallus nan pahr 66 C.E. Me pahrekiong uhwongo nan rahnwet—me iei tepidahn kahn kamakam kowahlap—kin mihmihte mwowe. Eri, “sansal kansensuwed likemisiko me kin kauwehla,” me mieiehr sangete nan 1919, saikinte uhda nan wasa sarawio.b Iaduwen met pahn wiawi? Oh iaduwen met kin dokedokei kitail?
Uhwong Ehu Nan Ahnsou Kohkohdo
14, 15. Iaduwen Kaudiahl irelaud 17 sewese kitail en wehwehkihla wiewia kan me pweida lao lel Armakedon?
14 Pwuhken Kaudiahl kin kasansalehda duwen uhwong ehu me pahn wiawihong kaudok likamw nan ahnsou kohkohdo. Kaudiahl irelaud 17 kin oaralapiehda sapwellimen Koht kadeik pohn “Papilon Lapalap, inen netiki paliwere”—minimin en kaudok likamw koaros en sampah. Kristendom me keieu iang kisehn met oh kin kose me dene e ahneki inou ehu rehn Koht. (Pil kilang Seremaia :4.) Kaudok likamw kan, iangahki Kristendom, kin sangete mahs ahneki nanpwung samin ehu rehn “nanmwarki kan en sampah,” ahpw met pahn imwisekla ni kasohralahn kaudok likamw ko. (Kaudiahl 17:2, 5) Ihs me pahn kasohrala irail?
15 Kaudiahl kasalehda duwen “mahn weitahta kamasepwehk men” me momour ahnsou kis, oh sohla, oh pwurehng pwurodo. (Kaudiahl 17:3, 8) Mahn menet kin ale utuht sang rehn kaun akan en sampah. Oaritik kan me kohda nan kokohpo kin sewese kitail en wehwehkihla me mahn lawalo menet ni karasaras iei pwihn en wia meleilei me miehla nan 1919 nin duwen League of Nations (“sansal kansensuwed likemisiko”) oh ahnsouwet iei United Nations. Kaudiahl 17:16, 17 kasalehda me Koht pahn mwuri ketikihong nan mohngiong en ekei kaun aramas akan me lapalap nan “mahn lawalo menet” en kauwehla minimin en kaudok likamw koaros en sampah. Uhwong wet iei kilelepen tepiadahn kahn kamakam kowahlap.
16. Wiewia dah kei me wie pweipweida me pid pelien lamalam?
16 Pwehki tepiadahn kahn kamakam kowahlap pahn wiawi nan ahnsou kohkohdo, “uhda nan wasa sarawio” pahn pil wiawi nan ahnsou kohkohdo? E sansal me iei. Edetehn “sansal kansensuwed likemisiko” pwaradahr nan tepin senturi wet oh mihmihkier sounpar kei, e pahn uhd alehda irair tohrohr ehu “nan wasa sarawi ehu” ni ahnsou keren. Duwehte werek kan en Krais nan tepin senturi me kin tehk mwahu pwehn kilang iaduwen “uhda nan wasa sarawio” pahn wiawi, ih pil duwen Kristian kan nan rahnwet. Ahpw, kitail pahn anahne awih pweidao me uhdahn pahn wiawi pwehn wehwehkihla duwen oaritik kan koaros. Ahpw, kitail en tehk me nan ekei sahpw mieiehr oh e wie kekeirada kailongki pelien lamalam. Ekei pelien politik, ni arail miniminiong ekei me wia Kristian mahso ahpw sohpeisang pwoson mehlel, kin kamwekidada kailok ong pelien lamalam koaros oh keieu ong Kristian mehlel kan. (Melkahka 94:20, 21; 1 Timoty 6:20, 21) Ihme kahrehda, manaman kan en pelien politik kin ahnsouwet “mahweniong Sihmpwulo,” oh nin duwen me Kaudiahl 17:14 kasalehda, mahwen wet pahn kehlailla. Nindoken re sohte kak uhdahn koledi Sihmpwul en Koht—Sises Krais nan sapwellime irair lingan wahu—re pahn uhd kalaudehla arail uhwong sapwellimen Koht tohnkaudok mehlel kan, keieu sapwellime “me sarawi kan.” (Daniel 7:25; pil tehk Rom 8:27; Kolose 1:12; Kaudiahl 12:17.) Kitail ahneki mehn kamehlel sang rehn Koht me Sihmpwulo oh irail ko me iang ih pahn kana.—Kaudiahl 19:11-21.
17. Kaidehn pwehki pein kiht me lemehda, ahpw dahme kitail kak ndahki duwen iaduwen “sansal kansensuwed likemisiko” pahn uhda nan wasa sarawi ehu?
17 Kitail ese me kaudok likamw pahn sohrala. Papilon Lapalap kin “sakaukihla ntahn me sarawi kan” oh e kin mwomwmwomwe me ih lih nanmwarki men, ahpw eh uhdahn pahn sohrala. Manaman samin me e ahneki pohn nanmwarki kan en sampah pahn uhd wekila oh kahrehong ‘kod eisek ko oh mahn lawalo’ pahn kailongkihla. (Kaudiahl 17:6, 16; 18:7, 8) Ni ahnsou me “mahn weitahta kamasepwehk” peiong lihen netiki paliwere en kaudok, “sansal kansensuwed likemisiko” pahn uhda ni ahl keper ehu nan wasa ehu me ong Kristendom sarawi.c Eri, kasohralahn kaudok likamw akan pahn tepida wiawihong Kristendom me seupwoson, me kin kose me dene e sarawi.
“Tangasang”—Iaduwen?
18, 19. Kahrepe dah kei me kohda me kasalehda me “tenge nahna kan” sohte kin wehwehki wekidala en emen pelien kaudok?
18 Mwurin ah kohpada duwen ‘sansal kansensuwed likemisiko me uhda nan wasa sarawio,’ Sises kehkehlingkihong irail kan me wehwehki met en mwekidiki met. Mahsen en Sises kin wehwehki me ni keieu imwio—ni ahnsou me “sansal kansensuwed likemisiko uhda nan wasa sarawio”—aramas tohto pahn tangasang kaudok likamw oh uhd iangala kaudok mehlel? Soh. Tehk duwen keieun pweidao. Sises mahsanih: “Eri, irail kan me kin mihmi Sudia, re en tenge pohn nahna kan. Aramas emen me mihmi pohn imwe, e sohte pahn kohdihsang pwe en ale mehkot sang loale. Me mihmi nansapw sohte pahn pwurodohng ale eh likou. Meid kansensuwed pahn lih liseian akan oh me neitik pwelel kan ni rahn ako eh pahn leledo! Kumwail kapakap pwe soahng pwukat dehr wiawihong kumwail ni ahnsoun pou!”—Mark 13:14-18.
19 Sises sohte mahsanih me irail kohte nan Serusalem me anahne tang, mwomwen me dene re anahne kohsang nan kaudok en mehn Suhs; ah kehkehlik pil sohte koasoia me ren wekidala arail pelien lamalam—tangasang kaudok likamw oh alehda kaudok mehlel. Sapwellimen Sises tohnpadahk kan uhdahn sohte anahne kehkehlik me ren tangasang ehu pelien kaudok tangalahng ni ehu; pwe re miehr nan kaudok en Kristian mehlel. Oh mahweno nan pahr 66 C.E. sohte kamwekidada irail kan me kin iang pelien lamalam en Suhs nan Serusalem oh nan Sudia en kesehla pelien lamalam wet oh iangala pelien lamalam en Kristian. Professor Heinrich Graetz koasoia me irail ko me pwakih mehn Rom kan me tangdowi pwuredohng kahnimwo: “Irail Zealot kan, weriwerki arail koul en kana nan mahwen, pwurelahng Serusalem (October 8), mohngiongarail dirkihla koapworopwor en maiauda oh uhtohrda. . . . Koht soh sewesedahr irail duwehte ah ketin sewese samarail mehn kawa ko? Mehn Zealot ko sohte masak dahme pahn wiawi nan ahnsou kohkohdo.”
20. Iaduwen tohnpadahk kan en mahso peikiong sapwellimen Sises kehkehlik en tangalahng pohn nahna kan?
20 Eri, iaduwen kisin pwihn en Kristian pilipilo nan ahnsowo mwekidki kehkehlik en Sises? Sang ni arail tangasang Sudia oh tangalahng nin nahna kan apali Sordan, re kasalehda me re sohte iang kisehn koasoandi en mehn Suhs kan, ni pelien politik de ni pelien kaudok. Re pwilikihdi arail mwaht akan, imwarail akan, re pil sohte rikada arail kepwe kan sang nan imwarail kan. Pwehki re likih me Siohwa pahn ketin pere oh utung irail, re mwohnekihla arail kaudok ong Siohwa sang mehkoaros me mwomwen kesempwal.—Mark 10:29, 30; Luk 9:57-62.
21. Dahme kitail en dehr kasik me pahn wiawi ni ahnsou me “sansal kansensuwed likemisiko” uhwongada?
21 Tehk, ahnsouwet, pweida me keieu laud en kokohp wet. Mpen sounpar 90 kitail kin kangoangehki aramas akan en pidoi sang nan kaudok likamw oh alehda kaudok mehlel. (Kaudiahl 18:4, 5) Aramas rar kan wiadahr met. Sapwellimen Sises kokohp sohte kin kosoia me ni ahnsou me kahn kamakam kowahlap pahn tepiada, pokon en aramas pahn iangala kaudok mehlel; ni mehlel, nan pahr 66 C.E. sohte pokon en aramas me iangala kaudok mehlel. Ahpw, Kristian mehlel kan pahn ahneki kahrepe laud kan en kapwaiada sapwellimen Sises kehkehliko oh tang.
22. Atail kapwaiada kaweid en Sises en tangalahng pohn nahna kan kin pidada dah?
22 Kitail sohte kak ahnsouwet ese oaritik kan koaros duwen kahn kamakam kowahlapo, ahpw kitail kak ese ni pwung me ong kitail tang me Sises mahsanih sohte kin wehwehki me kitail en tangasang uhdahn wasa ehu nan sampah. Sapwellimen Koht aramas akan mielahr wasa koaros nan sampah. Ahpw, kitail kak ese ni mehlel me, ma re anahne tang, Kristian kan pahn anahne en kaukaule kolokolte arail wehwehki wekpeseng en pein irail oh pwihn en kaudok likamw kan. E pil kesempwal en Sises kehkehlingkin duwen emen en dehr pwurala ni imwe pwehn ale ah likou kan de kepwe teikan. (Madiu 24:17, 18) Ihme pahn mie kasongosong kan mwowe ong iaduwen atail kin kilangwohng kepwe kan; soahng mepwukat me keieu kesempwal, de komouro me pahn kohwong koaros me mih ni pali en Koht me kesempwal sang soahng pwukat? Ehi, atail tang kak wehwehki me kitail pahn lelohng ekei kahpwal akan oh kitail sohla pahn ahneki de naineki soahng koaros me kitail men ahneki de naineki de kitail sohla pahn kak wia soahng kan me kitail men wia. Kitail pahn anahne en onopada en wia dahme konehng, duwehte Kristian kan nan tepin senturi me tangasang Sudia oh tangalahng Perea, palio Sordan.
23, 24. (a) Wasa dahieu kelehpw me kitail kak diar perepatail? (b) Ia wehwe ong kitail nan ahnsouwet me pid sapwellimen Sises mahsen ako me kalekekin irail duwen ‘sansal kansensuwed likemisiko me uhda nan wasa sarawio’?
23 Kitail en uhdahn kamehlele me atail wasahn ruk iei rehn Siohwa oh sapwellime pwihn me rasehng nahna ehu. (2 Samuel 22:2, 3; Melkahka 18:2; Daniel 2:35, 44) Iei wasao me kitail pahn diar perepatail! Kitail sohte pahn alasang pokon en tohnsampah me kin tangalahng “nan poar en paip akan” oh rukla “nan nahna kan”—pwihn oh koasoandi en aramas kan me pahn mihmi ahnsou mwotomwot kiste mwurin ohlahn Papilon Lapalap. (Kaudiahl 6:15; 18:9-11) Mehlel, ahnsou pahn apwalla—duwehte nan pahr 66 C.E. ong lih liseian kan me tangasang Sudia de ong irail kan me kin seiloak nan ahnsoun pou oh keteu. Ahpw kitail kak kamehlele me Koht pahn ketikihda komour. Kitail en ahnsouwet kakehlailla atail likih Siohwa oh sapwellime Ohlo, me ahnsouwet kakaun nin duwen Nanmwarki en Wehio.
24 Sohte kahrepen kitail en masak dahme pahn wiawi. Sises sohte men sapwellime tohnpadahk kan en mahso en masepwehk, oh e sohte men kitail en masepwehk, ahnsouwet de nan rahn akan me kohkohdo. E kehsehkin kitail met pwe kitail en kaunopada mohngiongatail kan oh atail lamalam. Pwe, Kristian peik kan sohte pahn ale kalokolok ni ahnsou me kaudok likamw oh koasoandi suwed wet koaros pahn kasohrala. Re pahn wehwehki oh peikiong kehkehlik duwen ‘sansal kansensuwed likemisiko me uhda nan wasa sarawio.’ Oh re pahn kapwaiada ni unsek arail pwoson tengeteng. Kitail en dehpa manokehla dahme Sises inoukihda: “A me pahn dadaurete lel ni imwi, ih me pahn mourla.”—Mark 13:13.
[Nting tikitik kan me mi pah]
a “Pilaik kan en Rom kin silasilkihdi ahr kin pwongih nan tehnpas sarawi kan nan Rom; oh en mehn Rom kan kin wauneki neirail pilaik kan me kahrehda ni ahnsou kan me re kin kana nan mahwen kan, arail lelepek ong neirail pilaik kan kin laudla . . . [En peiki nan mahwen pilaik kan] kin ele wia mehkot me keieu sarawi nan sampah. Sounpei en Rom kin kaukihla nah pilaik.”—The Encyclopædia Britannica, 11th Edition.
b Kitail en tehk me nindoken mahsen kan en Sises ahr pweida nan pahr 66-70 C.E. kin kak sewese kitail en wehwehkihla iaduwen re pahn pweida ni kahn kamakam kowahlap, pweida riau pwukat koaros sohte kak uhdahn pahrekpene ara pweida pwehki ahnsou kan me re pweida me wekpeseng.
c Kilang The Watchtower [lokaiahn wai] en December 15, 1975, pali 741-744.
Komw Tamanda?
◻ Iaduwen “sansal kansensuwed likemisiko me kin kauwehla” sansalda nan tepin senturi?
◻ Dahme kahrehda e konehng en medemedewe me “sansal kansensuwed likemisiko” en nan rahnwet pahn uhda nan wasa sarawi ehu nan ahnsou kohkohdo?
◻ Dahme “sansal kansensuwed likemisiko” pahn uhwong me Kaudial kohpada?
◻ Soahngen “tang” dahieu me kitail anahne wia nan ahnsou kohkohdo?
[Kilel nan pali 22]
Papilon Lapalap kin adaneki “inen lih en netiki paliwere”
[Kilel nan pali 24]
Mahn weitahta kamasepwek pahn uhwongada pelien lamalam kan