Keseng Me Kin Kaperenda Koht

Aramas kin kasalehda me keseng “me iei keieu werei oh inenen kaperen ong aramas.” Duwehte lokaia, e wia kisakis ehu me inenen kaselel me kahrehong aramas en weksang mahn akan. Keseng kin kamwekidada pepehm kan. E kin kaperenda wasahn rongorong oh kin mihmihte nan madamadau en aramas. Mwohn mehkoaros, keseng kin kaperenda Koht.

NIN DUWEN me Paipel kasalehda, mehn Israel kan kin wia aramas en keseng kei. Keseng kin wia “doadoahk me keieu kaselel nan ahnsoun Paipel kan,” koasoia pwuhken Unger’s Bible Dictionary. Nin duwen ah kin pid mouren en ehuehu rahn, koul oh mehn keseng kan kin wiawi nan arail kaudok. Ahpw, ngilen aramas me kin keieu kadoadoahk.

Nanmwarki Depit kin idiada wiliepen mehn Lipai kan “ong kaweidpen koul” ni impwal sarawio, mwohn Tehnpas Sarawio me Solomon, sapwellime ohl, kauwada, kasarawihla. (1 Kronikel 6:31, 32) Ni ahnsou me kohpwahn inou, me kin wilian ngehnin Siohwa, wisiklong nan Serusalem, Depit koasoanehdi ekei mehn Lipai kan en “kokoul oh kapinga Siohwa.” Re kin koul oh doadoahngki mehn keseng en “arp, simpal oh peuk sowi.” Ohl pwukat “pilipilda pwehn kapinga Siohwa, pwehki sapwellime limpoak kadek me poatopoat.”​—1 Kronikel 16:4-6, 41; 25:1.

Poloin lokaia ko “Sapwellimen [Siohwa] limpoak kadek kin poatopoat” kin pwarada pak tohto nan Melkahka, pwuhken Paipel me kin keieu pidada keseng. Karasepe ehu, e kin wiahda pali keriau en ehuehu iretikitik 26 en Melkahka 136. “Ah mwotomwot kahrehong aramas en mwadang koledi,” koasoia emen me samanih Paipel. “Aramas koaros, me rong, kak tamatamante.”

“Superscriptions” ong melkahka kan kasalehda duwen aramas tohto kin doadoahngki mehn keseng kan. Melkahka 150 kin koasoia duwen mehn peuk sowi, arp, dampwurin, pipe, oh simpal, oh iangahki mehn keseng strings. Mendahki met, me keieu kaselel iei ngilen aramas. Iretikitik 6 kangoangehki: “Kumwail me momour koaros, kumwail kapinga Kauno [“Siohwa,” New World Translation]!

Pwehki keseng kin kasalehda atail pepehm kan, madamadau kansensuwed kan nan ahnsoun Paipel kan kin kahrehda ren wiahda koul en kedepwidepw de chants. Ahpw, soangen koul pwukat kin ihte wiawi nan keseng en mehn Israel kan. “Ihte nan koul en kedepwidepw kan me re kin keieu mwahuki doadoahngki mwomwen koul en chant sang ngilen koul de modulation and oral emphasis of pure speech,” koasoia encyclopedia en Paipel Insight on the Scriptures.a

Sises oh sapwellime wahnpoaron lelepek kan kin koul kaping ong Siohwa ni pwohngo mwohn Sises pwoula, ni mehlel koulki lepin lokaia kan en Hallel Psalms. (Melkahka 113-118) Ia uwen met kin kakehle sapwellimen Sises tohnpadahk kan en kak kehlail ong mehlahn arail Soumas! Laud sang met, arail madamadau kehlail en wiahte ladu lelepek kan en Kaun Lapalahpie en lahng oh sampah, Siohwa, ele kin laudla ni arail kin koulki pahn pak limau poloio “pwehki sapwellime limpoak kadek.”​—Melkahka 118:1-4, 29.

Kristian kan en Episos oh Kolose en mahsie kin koulki “melkahka kan oh kaping ong Koht (uhdahno, “hymns”). Iangehte koul pwukat re kin kapataiong “koul ngehnin kan” me re kin koulki nan mohngiongarail. (Episos 5:19; Kolose 3:16) Sang ni koul oh lokaia, ni konehng re doadoahngki awarail pwehn kasalehda kaping. Sises soh kasalehda me “sang nan audepen mohngiong awe kin lokaia”?​—Madiu 12:34.

Keseng Me Koht Kupwursuwedki

Kaidehn keseng koaros nan Paipel kin kaperenda Koht. Tehk duwen wiewia me pwarada ni Nahna Sainai, wasa me Moses ale Kosonnedo, iangahki Kosonned Eisek ko. Ni ahnsou me Moses kohkohdi sang pohn nahnao, dahme e rongada? “Kaidehk ngilen mwoarong kaperen en powehdi, de ngilen mwoarong kansensuwed en lohdi; mwoarong en aramas me kokoul me I rongorong.” Keseng wet kin pidada kaudok ong koht likamw, wiewia ehu me kahrehda engieng en Koht oh imwikihla mehlahn mpen aramas 3,000 me wiahda kesengo.​—Eksodus 32:18, 25-28.

Mendahki aramas kak wiahda, kesengki, oh perenki soahngen keseng koaros, kaidehn keseng koaros kin kaperenda Koht. Pwehkida? Kristian wahnpoaron Pohl kawehwehda: “Aramas koaros wiadahr dihp, oh irail koaros dohsangehr sapwellimen Koht lingan me e kin ketikihong aramas.” (Rom 3:23) Sarawi en kaparapar en peiken kan, padahk me dene soul en aramas sohte kak mehla, oh kasarawih Meri me dene “inen Koht” kin kalap wia oaralap en koul kan. Ahpw, padahk oh tiahk pwukat kin sohte kin kawauwih Koht en mehlel, pwe re kin uhwong dahme kin sansalda nan sapwellime Mahsan sarawi, Paipel.​—Deuderonomi 18:10-12; Esekiel 18:4; Luk 1:35, 38.

Wiahda Pilipil Pwung en Keseng

Wia pilipil en keseng kan me kapwonopwon. Mahlen en pohn kilin compact discs kan kin wiawihda pwehn kamwekid aramas en pwainda soahngen rekord en keseng koaros. Ahpw ma emen tohnkaudok en Koht men kaperenda Ih, e pahn kanaieng oh wiahda pilipil pwung pwehn liksang soangen koul oh keseng kan me kin poahsonda pohn padahk likamw de kin pidada tiahk en nenek de ngehn saut kan.

Albert, me mahso kin papah nin duwen emen misineri Kristian nan Aperika, wehkada me sohte ah ahnsou en kesengki piano ahnsou me e mih Aperika. Ahpw, e kin kapwukapwurehiong rongorong ekei long-playing recordings me e wahda. Nan pein sepwe, Albert kin ahnsou wet mwemweitla rehn mwomwohdisohn Kristian kan nin duwen emen sounapwali en doulik. Ahnsoun ah rongorong keseng me tikitik. E kosoia: “Sounkeseng me I keieu perenki iei Beethoven. Erein sounpar tohto, I kin kihpene nein ohl menet rekord en ah symphonies, concertos, sonatas, oh quartets.” Rongorong rekord pwukat kin uhdahn kaperenda ih. Ni mehlel, emenemen aramas kin mie pein keseng kan me re perenki, ahpw nin duwen Kristian kan kitail en tamataman kaweid en Pohl: “Eri, mehkoaros me kumwail kin wia, sohte lipilipil, de mehkot me kumwail kin tungoale de nim, kumwail wia ong ni kalinganpen Koht.”​—1 Korint 10:31.

Keseng oh Inou

Ahn Susie tepin limpoak iei keseng. E kawehwehda: “I tepiada kesengki piano ni ahnsou me I mahki sounpar 6, oh violin ni ahi sounpar 10, oh mwuhr, I kesengki arp ni ahi sounpar 12.” Susie mwuri iang towehda sukuhl en Royal College of Music nan London, England, pwehn sukuhlki keseng en arp. E sukuhlki sounpar pahieu rehn emen sounkesengki arp ndand en Spain oh pil ehu sounpar ni Paris Conservatoire, ni ah alehdi honors degree nan keseng iangahki diplomas ong ah kesengki arp oh kasukuhlki piano.

Susie tepiada werekiong mwomwohdisohn Sounkadehdehn Siohwa kan nan London. Wasao e diarada nsenoh mehlel oh limpoak mehlel nan pwungen Sounkadehde kan. Kedekedeo, ah limpoak ong Siohwa kekeirada, oh ah ngoangki sapwellimen doadoahk kamwekid ih en rapahki ahl akan en papah ih. Met kahlwalahng en inoukihda ah mour ong Siohwa oh papidaisla. Susie kosoia: “Doadoahk en keseng kin wia mour ehu me ke anahne inoukihong omw mour, ihme inoukihda ah mour ong Siohwa kaidehn mehkot kapw ong ie.” Ah ahnsoun keseng nan concert kan kin tikitikla ni ah kin iang wia doadoahk en kalohkiseli rongamwahu en Wehin Koht pwehn peikiong kaweid en Sises.​—Madiu 24:14; Mark 13:10.

Met pwehki e kin doadoahngkihte ahnsou tikitik en keseng, ia ah pepehm? E wehkada: “Ekei pak I kin nsensuwedla pwehki solahr ahi ahnsou en praktis, ahpw I kin kesengkihte nei mehn keseng oh I kin perenki keseng. Keseng iei kisakis ehu sang rehn Siohwa. I kin perenki laud met pwehki ahi kin mwohneki mahs sapwellime doadoahk nan ahi mour.”​—Madiu 6:33.

Keseng Me Kin Kapinga Koht

Albert oh Susie iangahki Sounkadehdehn Siohwa kereniong meh wenerar kin kaukaule kapingahki Siohwa Koht keseng kan. Ni mihding en Kristian kan me kin wiawi nan Kingdom Hall nan sahpw 234, re kin tepkihda oh kaimwsekihla, ma kak, ni ahr kin koulki koul kan ong Siohwa. In major and minor key, ngilen koul kaselel kan kin audaudki lokaia kan me kohsang nan Pwuhk Sarawi pwehn kapinga Siohwa Koht.

Koaros me kin iang mihding kin koul laud pwehn koulki me Siohwa kin wia Koht limpoak men (Song 44). Re kin koulki koul en kaping ong Siohwa (Song 190). Arail koul kan kin kasalehda kaperen oh pwukoahn perienpene en Kristian kan, mouren Kristian, oh irair en Kristian kan. Kapataiongete arail peren iei soangsoangen style en keseng kan me Sounkadehde kan sang Asia, Australia, Europe, oh North oh South America doadoahngki pwehn wiahda ngilen koul kan.b

“Kumwail koulkihong Kauno [“Siohwa,” NWT] apwoat koul kapwen! Kumwail, tohn sampah pokon, kumwail kouliong Kauno! Kumwail kouliong Kauno, oh kapinga mware!,” met iei tepin lokaia kan en koul sarawi me kileledi ni mwein sounmelkahkao. “Kumwail lohkiseli rongamwahun sapwellime komour rahn koaros. Kumwail kalohki duwen sapwellime lingan ong tohn wehi kan, oh wiepen nin lime manaman akan en lohkohng aramas koaros.” (Melkahka 96:1-3) Met iei dahme Sounkadehdehn Siohwa kan kin wiewia nan amw wasa, oh re luke uhk en iang koulki kaping wet. Re pahn kasamwo uhk nan arail Kingdom Hall kan, wasa komw kak sukuhlkihdi iaduwen komw pahn kapingahki Siohwa keseng kan me kin kaperenda ih.

[Nting tikitik kan me mi pah]

[Kilel nan Pali 20]

Koulki kaping kan ong Siohwa