Mie Katepen Kapakap?

MIE AHNSOU KAN me kereniong aramas koaros kin pehm me re anahne kapakap. Ni mehlel, aramas sang kereniong pelien lamalam koaros kin kapakap ni ngidingid. Karasepe ehu, emen Buddhist kak pwurehng kapwukapwurehong kapakap wet: “I pwoson Amida Buddha” pahn pak kid kei nan rahn ehu.

Pwehki kahpwal akan me kin wiewia sampah pwon, e konehng en idek: “Dahme aramas kasik me re pahn alehsang arail kapakap? Kapakap pwukat mie katepe?

Dahme Kahrehda Aramas Kin Kapakap?

Aramas tohto sang sapwen Orient kan kin kapakap ong arail peneinei me melahr oh ong Koht en Shinto de Tao. Re kin wia met pwe re koapworopworki en pahs arail test kan nan sukuhl, de ren kak dolung wahn sahpw mwahu, de soumwahu en dehr lelohng irail. Sang arail nannanti kan, mehn Buddhist kan koapworopworki en alehda marain. Mehn Hindu kan kin kapakap ngidingid ong arail koht ohl de koht lih kan me re keieu pwungki me pahn kihong irail loalokong, kepwehpwe, oh pil pere irail.

Ekei mehn Kadolik kan kin koapworopworki en kapaiada tohnsampah ni arail kin mourki arail mour nin duwen “monks” de lih kadek kan nan imwen “monks” oh pil imwen lih kadek kan, ni arail kin kaukaule wie kapakap. Mehn Kadolik rar kan kin rapahki kamwahu kan sang Mery ni arail kin doadoahngki kapakap kan me re kin wadlikihla, ele ni arail kin kapakapki rosario. Nan sapwen Orient kan, aramas tohto kin doadoahngki “prayer wheels.” Mehn Pros kan kin kapakap ni arail kin kapwukapwurehong lokaia kan nan Kapakap en Kauno, oh sang ni nsenarail ele re kin pil kasalehong Koht arail pepehm akan. Mehn Suhs tohto kin seiloak sang wasa doh kohlahng dihd me adaneki “Western Wall” nan Serusalem pwehn kapakap, ni ahr kin koapworopworki me Tehnpas Sarawio en pwurehng onohnda oh en mie ahnsoun mour pweida mwahu oh popohl.

Mendahki aramas rar kan kin nannanti kapakap, koasoandi en aramas kin mihte pahn lokolok en kahpwal akan en semwehmwe, teng pahn wini suwed kan, peneinei mwerpeseng, mwersuwed, oh mahwen. E soh pwung me aramas pwukat sohte kin kapakap ni ahl me pwung? Me pid ire wet, mie me kin uhdahn karonge kapakap akan?

Mie Emen me Kin Karonge Kapakap akan?

Kapakap akan sohte pahn mie katepe lao mie emen me kin karonge. Ni ahnsou me emen kin kapakap, e sansal me e kamehlele me mie emen nan wasa soh sansal me kin karonge ah kapakap. Ahpw, kapakap kan sohte kin mwekid sang ehu wasa kohlahng ehu wasa ki “sound waves.” Aramas tohto kin kamehlele me mehmen me kin karonge arail kapakap pil kak ese dahme aramaso medemedewe ni eh wia kapakap. Ihs menet?

Sounroporop kan oh saintis kan kin wahpwonki iaduwen madamadau kan kin tepida nan sahl lik kan me wiahda atail mwahliel. Ahpw, kitail en tamataman me Ih me wiahda atail mwahliel kak ese dahme aramas akan kin medemedewe. Menet iei Sounkapikpatail, Siohwa Koht. (Melkahka 83:18; Kaudiahl 4:11) Kapakap akan anahne en kohwong Ih. Ahpw, Siohwa kin karonge kapakap akan koaros?

Koht kin Karonge Kapakap Koaros?

Nanmwarki Depit en Israel en mahsie kin kalap kapakap. Nin duwen emen soun nting Melkahka kan, e koulki: “Pwehki omwi kin sapeng pekipek kan, aramas koaros pahn pwarewei rehmwi.” (Melkahka 65:2) Siohwa kak wehwehki kapakap kan me kin wiawi ni lokaia kid kan me tohnsampah kin lokaiahki. Pwehki aramas sohte kak wia met, e sohte wehwehki me Koht sohte kak karonge kapakap en irail ko koaros me kin kapakap ong Ih ni ahl me pwung.

Ahpw, Sises Krais​—me pil wia emen ohl me kin kalap kapakap—​kasalehda me kaidehn kapakap koaros me kin kaperenda Koht. Tehk dahme Sises mahsanih me pid dahme re kin kalap wia ahnsowo: wie kapakap akan me re kin wadliki oh kapwukapwurehong. Nin duwen dahme Kadolik Jerusalem Bible kin kasalehda, e mahsanih: “Nan ahmw kapakap akan, ke dehr wia duwehte irail mehn liki kan kin wia: re kin kapwukapwurehong arail kapakap akan oh re kin lemeleme me Koht pahn kupwure irail pwehki ar kapakap reirei.” (Madiu 6:7) Kitail sohte kak kasik me Siohwa pahn karonge atail kapakap ma kitail sohte kasalehda atail pepehm mehlel kan.

Ni ah kasalehda dahme kahrehda Koht sohte kin kupwurperenki ekei kapakap, ehu lepin padahk en Paipel mahsanih: “Ma ke sohte kin peikiong kosonned​—Koht pahn ketin kalahdeki karonge ahmw kapakap akan.” (Lepin Padahk 28:9) Pil ehu lepin padahk mahsanih: “Ni aramas mwahu eh kin kapakap, Kauno [“Siohwa,” New World Translation] kin ketin karonge, ahpw e sohte kin ketin tehk irail kan me kin wia me suwed.” (Lepin Padahk 15:29) Ni ahnsou me kaun akan en Suda en mahsie kin pwukoahki laud dihp, Siohwa mahsanih: “Ni amwail pahn kapahwei pehmwail pwe kumwail en kapakap, I sohte pahn tehk kumwail. Mehnda ma amwail kapakap me tohto oh reirei, ahpw I sohte pahn karongei kumwail, pwe nta milahr ni pehmwail kan.”​—Aiseia 1:1, 15.

Wahnpoaron Piter mahsanih duwen pil mehkot me pahn kahrehda Koht en kupwursapwungki kapakap kan. Piter ntingihdi: “Kumwail ohl pwopwoud kan pil duwehte, ni amwail pahn kin werekiong amwail pwoud kan, kumwail uhdahn pahn kin pohnese me iei irail me luwet, oh kumwail uhdahn pahn waunekin irail; pwe irail pil pahn ale kapaien mour sang rehn Koht duwehte kumwail. Kumwail pahn wia met pwe en dehr mie mehkot me pahn kerempwa amwail kapakap akan.” (1 Piter 3:7) Kapakap en ohl emen me kin pohnsehsehla soangen kaweid wet sohte pahn lellahng rehn Koht!

E sansal me mie soangen irail kan me emen anahne kapwaiada ma Koht pahn karonge eh kapakap. Ahpw, me tohto me kin kapakap sohte kin nsenohki dahme Koht ketin kupwurki kitail en wia. Ihme kahrehda, mendahki aramas tohto kin wia arail kapakap ngidingid kan, kahpwal en sampah wet sohte kin mwahula.

Eri, dahme Koht kupwurki pwe atail kapakap kan en karonge? Pasapengpen peidek wet kin pidada ia kahrepe kitail kin kapakap. Ni mehlel, ma kitail men ese ma atail kapakap akan mie katepe, kitail anahne wehwehki kahrepen kapakap akan. Dahme kahrehda Siohwa kin mweidada pwe kitail en kak patohwong Ih?

[Kilel Credit Line nan Pali 3]

G.P.O., Jerusalem