Ken Dehr Mweidohng Peikasal kan en Kauwehla Ahmw Pwoson
Ehu rahn, ke pahn leme me ke sohte soumwahu. Rahn en mwurio, ke pehm me ke soumwahu. Kahpw wiahkintehieu sohla angimw oh luwetala. Nan moangemwen oh nan paliweremw kan medek. Dahme wiawi? Mwahs keper men kasoumwahuwihiukadahr oh kauwehla wasahn pere soumwahu nan paliweremwen oh pil kauwehla kepwehn nan paliweremwen. Ma sohte wini pahn kohieng uhk, mwahso pahn kauwehla douluhl paliweremwen oh sohla mwahula—de pil kemeiukala.
NI MEHLEL, ma paliweremwen luwet ahnsou me paiking lelohng uhk, ke pahn kehiong soumwahuda. Karasape ieu, ma paliweremwen luwet pwehki sohte itar pilen mwenge nan paliweremwen, eri, perepen paliweremwen “pahn tikitikla oh paiking pahn kehlail ma e lel uhk,” soun nting en pwuhken soumwahu Peter Wingate koasoia.
Pwehki met, ihs me pahn men mih nan irair en duhpek? Mwein pein kowe kin nantihong ken mwenge mwahu pwe ken kak sohte kehiong soumwahu. Mwein ke pil kin nantihong ken dehr keiong mpen aramas soumwahu kan. Ahpw, ke pil kin wia soangen kanahieng paliweremwen duwehte met ong kolokol “roson en pali ngehn”? (Taitus 2:2) Karasepe ieu, ke kin kanahieng ke dehr lelohng keper en ahnekihda peikasal? Met kak inenen mengei en pedolong nan mohngiongomw oh nan ahmw lamalam, oh kauwehla ahmw pwoson oh kauwehla ahmw ehuiong Siohwa. Ekei aramas sohte kin ese soangen keper pwukat. Irail kin mengeiong ahnekihda peikasal pwehki irail kin duhpekla ni pali ngehn. E pahn kakete me ke pil kin wiahiong ahmw pali ngehn met?
Ahnekihda Peikasal—E Kin Suwed Ahnsou Koaros?
Mehlel, kaidehn peikasal koaros me suwed. Ekei ahnsou, ke anahne awih mahs pwungkihla mehkot lao ke uhdahn wehwehkihla mwahu. Kaweid en pelien lamalam me nda me ken kamehlelehte oh dehr peikasaliki mehkot oh met madamadau likamw oh keper. Mehlel, Paipel nda me limpoak “kin kamehlele soahng koaros.” (1 Korint 13:7, New World Translation) Kristian limpoak emen kin kamehlele irair oko me kin wia aramas likilik kei sangete mahs. Ahpw, Mahsen en Koht pil kalekehkin kitail en dehr ‘kamehlele mehkoaros.’ (Lepin Padahk 14:15) Ekei pak, dahme aramas emen wiahda mahs kin kihong kitail kahrepe mwahu kitail en peikasaliki dahme e nda.
Wahnpoaron Sohn pil kalekehki Kristian akan en dehr ahneki pwoson maskun. E ntingihdi: “Dehr kamehlele mehkan koaros me ntingdi. Kasawih kanahieng mehkan me ntingdi pwehn kilang ma iei irail tepisang rehn Koht.” (1 Sohn 4:1, NW) “Mehkan koaros me ntingdi” kin wehwehki padahk kan de madamadau kan me likamwete pwilsang rehn Koht. Ahpw, ni mehlel, e kohsang rehn Koht? Ahneki ekis peikasal kak wia mehn perepe mwahu pwehki, nin duwen me wahnpoaron Sohn mahsanih: “aramas likamw tohto kin mihlahr wasa kan nan sampah.”—2 Sohn 7.
Peikasal Ni Soh Kahrepe
Ei, keseu mehlel oh keneinei ong ire kan pwehn kilang ma re me mehlel mehkot me kalap anahn. Met sohte duwehte ma kitail mweidohng peikasal me sohte poahsoanpe oh pahn kauweikitailla en mihla nan atail lamalam oh mohngiong—soangen peikasal me kak kauwehla atail pwoson kehlail oh atail ehupene. Soangen peikasal wet kin kawehwehdi duwe met: “sawehwe en pwoson de madamadau me kin kalap karotongala atail pilipil akan.” Ke tamataman iaduwen Sehdan a kasaminehla ahn Ihp eh madamadau pwehn peikasalada ong kaweid en Siohwa? Sehdan idekda rehn liho: “Mehlel apwoat me Koht ketin keinepwihsang kumwail en dehr tungoale wahntuhke kan en nan mwetuwelet?” (Senesis 3:1) Madamadau en peikasal me kohsang ni peidek me likamwete peidek en sawehwe ieu liderehla ah pilipil. Met wia mehkot me Sehdan kin kalap wia. E kin koahiek en doadoahngki mehkot me elep mehlel oh elep likamw. Sehdan kauwehla diren ehupene mwahu kan en aramas ni ah kin kihdi peikasal nan arail madamadau.—Kalesia 5:7-9.
Seims inenen wehwehki suwed me kin kohsang madamadau en peikasal. Seims kalekehkin kitail en peikasal nan atail ehuiong Koht wiahiong kitail en “rasehng iloak en nan madau kan me kin pwungupwungudengkiseli kisinieng.” Ma mie peikasal nan atail ehuiong Koht, kitail kin duwehte aramas emen me “sohte kak koasoanehdi eh lamalam, oh pil aramas kohweikohdo ni eh mwekid koaros.”—Seims 1:6, 8.
Kitail en Kehlail ni Pali Ngehn
Iaduwen atail kak pere kitail sang peikasal suwed? Pasapeng ong peidek wet kin inenen mengei: sang ni atail pahn kehlailieng oh soikala ahn Sehdan widin kan oh alehiong kitail ni mwuledek sapwellimen Koht kisakis sapan akan mehn wiahiong kitail en “tengediong nan pwoson.”—1 Piter 5:8-10, NW.
Me keieu kesempwal iei atail mwenge mwahu ni pali ngehn. Ma sohte met, atail pwoson pahn duwehte paliwar me liksang mwenge, e pahn suwedla oh mehla. Sises Krais kadehdehda mwahu met ni e mahsanih: “Kaidehkin pilawahte me aramas kak mourki, pwe mahsen koaros me kin pwilipwilsang nan doauesen Koht.”—Madiu 4:4.
Medewehla met. Iaduwen atail kin tepiada kakairada pwoson kehlail? E wehwehki me kitail kin keieu kakairada atail pwoson oh likih Siohwa, oh sapwellime inou kan, oh pil sapwellime pwihn ni atail kin tungoale mwengehn ngehn sang nan Mahsen en Koht. E mehlel me kitail sohte kin kamehlele soahng koaros me kitail rong ni atail sohte wehwehki. Kitail kin ‘kasawih kanahieng iren Pwuhk Sarawi kan rahn koaros pwehn diarada ma iei mehpwukat mehlel de soh.’ (Wiewia 17:11, NW) Kitail kin ‘kamehlelehiong pein kitail me kupwuren Koht me mwahu’ oh kitail kamehlelehiong pein kitail me dahme kitail rong iei me mehlel.—Rom 12:2; 1 Deselonika 5:21.
Ieremen Duhpek ni Pali Ngehn
Ni ahnsou wet, atail mehn akadei iei en kolokol atail pwoson oh kalekehkin kitail peikasal nan pwoson me kak kahrehiong kitail en luwetala nan atail likih Siohwa oh sapwellime pwihn. Pwe kitail en wia met, kitail en kaukaule kasakasawih iren Pwuhk Sarawi kan rahn koaros. Wahnpoaron Pohl kalekehkin kitail me “ni ehu ahnsou kohkohdo, ekei [me mahs likamwete arail pwoson kehlail] pahn pwupwusang pwoson, oh idawehnla kaweid oh padahk en ngehn saut kan.” (1 Timoty 4:1, NW) Kaweid sapwung pwukat oh padahk likamw akan kin kahrehiong atail madamadau en peikasalada oh katohrohr kitail sang Koht. Dahme pahn pere kitail? Kitail en kaukaule “ale mwenge sang mahsen en pwoson oh sang padahk mwahu kan me [kitail] kin idawehn kanahieng.”—1 Timoty 4:6, NW.
E kin kansensuwed pwe ekei nan rahn pwukat piladahr irail en dehr “ale ketihnain sang mahsen kan en pwoson”—edetehn mehn ketihnain pwukat kin mengei aramas en alehdi. Duwehte emen soun nting en Lepin Padahk a kasalehda me e kak wiawi me mwengehn ngehn mwahu kan kak kapilkitailpene (kamadipw en pali ngehn), ahpw ekei sohte pahn kang oh ale ketihnain en mwenge pwukat.—Lepin Padahk 19:24; 26:15.
Iei me wiawihiong ekei nan mwomwohdiso en Kristian en mahso kan. Ele irail kin mwamwahlekihla arail kin pein onop, oh irail luwetala ni pali ngehn. (Ipru 5:12) Wahnpoaron Pohl kawehwehda keper en wia met ni a ntingwohng Kristian en Ipru kan: “E kesempwal kitail en kalaudehla atail tetehk kanahieng mehkan me kitail rongadahr, pwe kitail dehpa salongala.” E ese uwen mengei en kitail en salongala nan wiewia suwed akan me kitail “soukautihiongala elen komour lapo.”—Ipru 2:1, 3.
Aramas emen me sohte itar pilen mwenge nan paliwere sohte kin ahnsou koaros mwomwen soumwahu de tihti. Ni soangen ahlohte, mehmen me kin duhpek ni pali ngehn kakete sohte mwadangete sansal. Ke kak mwomwen me ke kehlail ni pali ngehn mendahte ma ke sohte tungoale mwengehn ngehn ahnsou koaros—ahpw met ongete lepin ahnsou! Ke pahn ahpw luwetala ni pali ngehn, kowe eri mengeiong ahnekihda madamadau en peikasal, oh kowe eri sohla kak peiki kehlail omw pwoson. (Sud 3) Ke ese—mehnda ma kowe kelepw te—ma ke kin tungoale mwengehn ngehn ahnsou koaros oh ma ahmw pali ngehn me kehlail de soh.
Kahrehda, nantihong wia pein ahmw onop. Peiong madamadau en peikasal. Dehr mweidohng madamadau en peikasal en kaluwetala ahmw pali ngehn. (2 Korint 11:3) ‘Kitail uhdahn mihmi ni imwin rahn akan? Ke kak kamehlele soahng koaros me mih nan Paipel? Mehlel me met iei sapwellimen Siohwa pwihn?’ Sehdan kin perenki kihong soangen lamalam en peikasal duwehte met nan ahmw madamadau. Ke dehpa mweidohng soangen madamadau en soukautih ong mwengehn ngehn en kahrehiong uhk ken pwupwudiong nan padahk likamw akan. (Kolose 2:4-7) Idawehn kaweid me kohwong Timoty. Ken wia tohnsukuhl emen en “nting sarawi kan” pwe ken kak “kolokolete soahng kan me ke sukuhlikier oh kamehlelehier.”—2 Timoty 3:13-15.
Kolokol “Pwoson Kehlail”
Mehmen me dehde mwahu me e soukautihongala a pein onop Paipel, mwein pahn anahne sawas laud en kangoang pwehn kak kamwahuwihala ah iouki mwengehn ngehn. Ma met iei duwen ahmw irairen, eri rapahki sawas oh kalahnganki alehda soangen sawas sohte lipilipil me pahn kohwong uhk me pahn kapwurehiong uhk roson en pali ngehn oh kehlail.—Seims 5:14, 15.
Ken kesempwaliki kaweid me pid keper en ahnekihda peikasal. Ma ke soukautihiong alehiong uhk mwenge mwahu en ngehn me ke kak alehsang pein onop Paipel oh iang towehda mihding en Kristian akan, eri ke kihong uhkehr nan keper en songosong en Sehdan. Doadoahngki mwahu kisakis en mwengehn ngehn sapan me kin kohsang “ladu lelepek oh loalokong.” (Madiu 24:45) Ahnsou koaros “pwungki mahsen roson akan” oh kolokol “pwoson kehlail.” (1 Timoty 6:3; Taitus 2:2) Ke dehr mweidohng peikasal en kauwehla ahmw pwoson.
[Kilel nan pali 20]
Ke kin mwenge mwahu ni pali ngehn?