Ripoht En Sounkalohk Kan En Wehio

“I Men Papah Koht”

“PEDOI sang loale, nei aramas akan.” Met iei kehkehlik ieu me tohnleng wia pwe wahnpoaron Sohn en rong ni tepin senturi C.E. Nan atail ahnsou, aramas mohngiong mwahu million mwekidki met oh tangasangehr “Papilon Lapalap,” me iei minimin en kaudok likamw koaros. (Kaudiahl 18:1-4) Emen nanpwungarail iei Wilner sang Haiti me koasoiaiong kitail ah ekspiriens.

“I ipwidi nan pahr 1956 nan peneinei ieu me kin kehlail nan mwomwohdiso en Kadolik oh se kin mihmi nan kisin kahnimw ehu me ede St. Marc, Haiti. Medewehla uwen peren me ahi peneinei ahneki ahnsou me ngehi pilipilda, iangahki pil ira meh riemen sang aht kisin kousoano, en iang sukuhl en padre nan St. Michel de l’Atalaye, Haiti. Mwuri, nan pahr 1980, se pekederla Stavelot, Belgium, pwehn kalaude aht sukuhl. Se pil iang sukuhl laud (Kadolik university) wasao.

“Nin tepio, I inenen perenki iang kasukuhl en padire wet. Rahn ehu, nan wasahn mwenge ieu, padre men me kin apwalih aht pwihn idek rehi ma I kak awih mahs minit kei pwe mie mehkot me e men ndaiong ie. Medewehla uwen pwuriamwei me I ahneki ni a koasoi sansal oh padahkiong ie me e men wia dipen nenek ong ie! I kasalehiong ih me I sohte pwungki ah mwekido, ahpw I uhdahn nsensuwedla. I eri ntinglahng ahi peneinei oh padahkiong irail dahme wiawi oh ngehi eri kohkohsang sukuhlo sounpwong kei mwuri, mendahki re sohte men ien kohkohsang. Ngehi diar wasa me I kak kousoan ie rehn tohn kahnimwo oh ngehi eri ale sukuhl en ehu soahng tohrohr.

“Ni ahi pwuralahng St. Marc, sohla ahi kamehlel mwomwohdiso en Kadolik. Ahpw, I ahnekihte pepehm en men papah Koht, ahpw I sehse dahme ien wia. I kohla ni mwomwohdiso en Adventist, oh pil Ebenezer Haitian Baptist Church, oh pil Mormon. I wie peipeiseli ni pali ngehn.

“Ngehi eri tamanda me ni ahi wie sukusukuhl en padrete nan Belgium, I kin wadek Crampon Bible. Nan Paipelo, I diarada me mie mwaren Koht. Ngehi eri doadoahngki mwaren Koht oh ngidingid kapakap ong Ih oh peki en ketin sewese ie en diar pelien sarawi me mehlel.

“Mwurinte mwo, Sounkadehdehn Siohwa riemen kosoudo nan aht kousoano. Re kin kasalehda wahu ong aramas teikan. I inenen kapingakin ira duwen ara mour mwahu. Rahn ehu, emen ira luhke ie en iang towehda Katamanpen Kamatalahn Krais me re kin wia nan pahr koaros. I inenen perenki ahi iang towehda mihding oh ngehi eri pwungki en onop Paipel rehn Sounkadehde kan. Mpen erein sounpwong weneu, I kamehlelehier me I diarehr ahl me pwung en papah Koht. I inoukihong Siohwa ahi mour oh papidaisla nan November 20, 1988.”

Mwuri, Wilner tepida doadoahk en Regular Pioneer. Rahnwet, e wiahlahr elder men nan ehu mwomwohdiso. Ih oh eh pwoud, oh pil neira seri riemen, papah Siohwa ni peren nan arail mwomwohdiso.

[Kilel nan Pali 19]

Sang ni e kin wadek Paipel, Wilner diarada me mwaren Koht iei Siohwa