Uhpah Ni Lelepek Sapwellimen Koht Kaunda

“Siohwa iei atail Sounkopwung, Siohwa iei atail Soun Kou Kosonned, Siohwa iei atail Nanmwarki.”​—AISEIA 33:⁠22, NW.

1. Ia ekei irair me kahrehda Israel en mahs tohrohr sang wehi teikan?

NAN pahr 1513 B.C.E., wehin Israel kokouda. Ni ahnsowo, sohte ah kahnimw me wia poason kaun, sohte pein sapwe, oh sohte pein eh nanmwarki. Towe kan kin wia lidu kei mahs. Ahpw, wehi kapw wet kin inenen tohrohr ni soangen ahl tohrohr ehu. Siohwa Koht me wia Sounkopwung, Soun Kou Kosonned, oh Nanmwarki. (Eksodus 19:5, 6; Aiseia 33:22) Sohte ehu wehi tohrohr kak iang ale pwung wet!

2. Peidek dahieu kin pwarada duwen ia mwomwen koasoandi en Israel, oh dahme kahrehda pasapengpen peidek wet kesempwal ong kitail?

² Pwehki Siohwa iei Koht soandi oh meleilei men, kitail pahn kasik me wehi ehu me E kin kaunda pahn inenen soandi mehlel. (1 Korint 14:33) Met pil inenen pwung ong irair en Israel. Ahpw, iaduwen pwihn sansal ehu en sampah kak en ale kaweid sang Koht soh sansal men? E kesempwal kitail en kasawih duwen mwomwen en Siohwa kin kaunda wehi en kawao wet oh tehk ni kanahieng iaduwen e kin apwalih de ehuong Israel oh kilang duwen kesempwalpen kaukaule uhpah sapwellimen Koht kaunda.

Iaduwen Kaunda en Israel en Mahs

3. Soangen koasoandi konehng dah kan me Siohwa wiahda pwe en kaweidih sapwellime aramas akan?

³ Mendahki Siohwa me wia nanmwarki soh sansal en Israel, E ketin idihada ohl lelepek kei pwe en wia weliepe sansal kei. Ekei kin wia kaun en keinek kan, ekei moangen tohnihmw kan, oh ekei ohl mah kan kin sewese aramas akan ni arail kin wia sounkaweid kei oh sounkopwung kei. (Eksodus 18:25, 26; Deuderonomi 1:15) Ahpw, kitail sohte kak nda me ohl koahiek pwukat kak pein wiahda kopwungpwung kan me sohte sapwung ma sohte kaweid sarawi kan. Irail ohl pwukat sohte unsek oh irail sohte kak wadek audepen mohngiong en iengerail tohnkaudok kan. Ahpw, irail sounkopwong kan me kin lemmwiki Koht kin kihong iengerail me pwoson akan kaweid kataman kan pwehki arail kaweid kan kin poahsoankihda kosonned en Siohwa kan.​—Deuderonomi 19:15; Melkahka 119:97-​100.

4. Soangen ineng sapwung dah kan me irail sounkopwung lelepek kan en Israel anahne liksang, oh pwekihda?

⁴ Ahpw, e sohte itar en ihte ese Kosonnedo pwe en kak wiahla sounkopwung men. Pwehki arail soh unsek, ohl mah pwukat anahne en tehk kanahieng pein arail ineng sapwung kan​—⁠me duwehte roporop ong pein irail, pou pali, oh noahrok​—pwe mehpwukat kakete kasapwungehla arail kopwung. Moses mahsanih ong irail: “Kumwail dehr kin uhpalihki emen ni amwail pahn kin koasoanehdi pwunglahn ar repenpwung kan, kumwail wia soahng koaros ni pwung pahrek. Kumwail dehr masak emen aramas, pwe amwail koasoandi kan kin sang rehn Koht.” Ei, sounkopwung en Israel kan kin wia kopwung kan ong Koht. Ia uwen kapai wet e nohn sikila oh kaselel!​—Deuderonomi 1:16, 17.

5. Likin koasoandi en koasoanehdi irail me pahn wia sounkopwung kan, soangen koasoandi dah kan me Siohwa wiahda pwehn apwalih sapwellime aramas akan?

⁵ Siohwa pil koasoanehdi soangen koasoandi teikan pwe en kak apwalih anahn en pali ngehn en sapwellime aramas akan. Pil mwohn arail pedolong nan Sapwen Inouo, E padahkiong irail en kauwada ehu impwal me pahn wia poahson en kaudok mehlel. E pil ketin koasoanehdi samworo kan me pahn kin wia sounpadahk en Kosonnedo, wia meirong en mahn akan, oh isik warpwohmwahu akan ni menseng oh ni soutik kan. Koht ketin idihada rien Moses ohl laud, Aaron, nin duwen samworo keieu lapalap en wehin Israel oh sapwellime pwutak kan pahn kin wia sawasepe nan ah pwukoah kan.​—Eksodus 28:1; Nempe 3:10; 2 Kronikel 13:10, 11.

6, 7. (a) Ia mwomwen nanpwungen irail samworo kan oh irail mehn Lipai kan me sohte wia samworo kan? (b) Iren mehn kasukuhl dah kitail kak sukuhlikihsang ire me pid en irail mehn Lipai akan arail kin ahneki soangsoangen pwukoa kan? (Kolose 3:23)

⁶ Apwalih pali ngehn en aramas rar rar kei wia doadoahk laud ehu oh samworo kan me malaulau. Ihme kahrehda, koasoandi ehu wiawihda me irail keinek en Lipai kan en kin sewese irail samworo kan. Siohwa mahsanih ong Moses: “Ihte en mehn Lipai kan ar pwukoa, iei re en papah Aaron oh nah pwutak ko.”​—Nempe 3:9, 39.

⁷ Irail mehn Lipai kan kin inenen soandi mehlel. Irail katohrohrpeseng nin duwen peneinei siluh​—mehn Kerson, Kohad oh Merari​—ehu ehu pwihn mie ahr pwukoa. (Nempe 3:14-​17, 23-​37) Ekei pwukoa kan mwomwen me re kesempwal sang meteikan, ahpw koaros kesempwal. Ahn mehn Kohad ko pwukoa iei en mihmi karanih kohpwahn inou sarawio oh apwalih impwalo. Ahpw, mehn Lipai koaros, ma mehn Kohad de soh, kin ahneki kapai kaselel kan. (Nempe 1:51, 53) Ahpw, e inenen kansensuwed pwe ekei irail sohte kin kalahnganki arail pwukoa kan. Irail sohte kin kaukaule uhpah kaunda en Koht oh irail sohte kin ahneki lamalam en itarki, ahpw irail kin ahneki lamalam en aklapalap, men lapalapala, oh pepehm en luwangki meteikan. Emen irail mehn Lipai pwukat iei Kora.

“Iaduwen​—⁠Kumwail Pil Men Wiahla Samworo?”

8. (a) Ihs Kora? (b) Dahme ele kahrehong Kora en tepiada kasawih irail samworo ko ni elen lamalam en aramas?

⁸ Kaidehn Kora me wia kaunen mehn Lipai kan oh kaidehn pil ih me wia kaunen peneinei en mehn Kohad kan. (Nempe 3:30, 32) Ahpw, e wia kaun wahun men nan Israel. Pwukoa kan me Kora ahneki ele kin kahrehong en karanihala Aaron oh sapwellime pwutak kan. (Nempe 4:18, 19) Sang ni ah kin kilangki mese duwen soh unsek en ohl pwukat, Kora ele kin medewe: ‘Irail samworo pwukat uhdahn soh unsek ahpw I anahne uhpah irail! Ni ahnsou keren ieu samwalahro, Aaron wiahda kou kohl emen. Sang ni arail kaudokiong kou menet, met kahrehong irail en pwupwudiong nan dipen kaudokiong dikedik kan. Ahnsou wet, rien Moses ohl, Aaron, wia samworo lapalap! Ia uwen ah poupali! Oh iaduwen sapwellimen Aaron pwutak riemen, Nadap oh Apihu? Ni mehlel, ira kasalehda ni sansal me ira sohte wauneki ara pwukoa kan​—⁠ihme kahrehda Siohwa anahne kemeirahla!’a (Eksodus 32:1-5; Lipai 10:1, 2) Sohte lipilipil dahme Kora medemedewe, ni ahnsowo e sansal me e tepida kasawih samworo kan ni elen madamadau en aramas. Met kahrehiong en pelianda Moses oh Aaron, ahpw laudsang met: pelianda Siohwa.​—1 Samuel 15:23; Seims 1:14, 15.

9, 10. Dahme Kora oh ienge tohn uhwong ko karaunehki Moses, oh dahme kahrehda e konehng irail en ese me e sapwung en uhwong kaunda en Moses?

⁹ Pwehki Kora ah wia ohl emen me ahneki manaman kehlail en kamwekid lamalam en meteikan, e sohte apwal ong ih en kihpene irail akan me ahneki soangen ah lamalamohte oh iangala ih. Ih, iangahki Dadan oh Apiram, diarada irail meh 250 me ahneki soangen lamalamohte​—irail pwukat koaros wia kaun ekei en pokono. Irail koaros wiahkintehieu ketila oh tuhwong Moses oh Aaron oh mahsanih: “Kumwa nohn daulihla! Kauno [“Siohwa,” NW] ketin sapwellimaniki mehn Israel koaros oh Kauno [“Siohwa,” NW] kin ketiket rehtail koaruhsie. Eri, a dahme komwi, Moses kin pein kasapwilkomwihda pohn sapwellimen Kauno [“Siohwa,” NW] aramas akan?”​—Nempe 16:1-3.

¹⁰ Konehng irail tohn uhwong pwukat en ese me e sapwung en uhwong kaunda en Moses. Ahnsou keren mwowe, Aaron oh Miriam pil wia soangen mwekidohte oh uhwongada kaunda en Moses. Ni mehlel, ira pil ahneki soangen lamalamohte me Kora ahneki! Nan pwuhken Nempe 12:1, 2, ira kalelepak: “Pwe dah? Moses kelepw me Kauno [“Siohwa,” NW] mahseniong? E soh pil mahseniong kita?” Eri, Siohwa ketin karongehda ara lipahnedo. Siohwa kehkehlikiong irail​—⁠Moses, Aaron, oh Miriam​—⁠en pokonpene ni ewen impwalo pwe en kasalehiong irail ihs me E kupwurki en wia kaun. Eri, ni ahl me inenen sansal, Siohwa mahsanih: “Ma mie soukohp kei rehmwail, I pahn kasalehiong irail pein Ngehi nan kaudiahl, I pahn mahseniong irail nan ouraman. E pahn weksang duwen ei kin mahseniong nei laduwen Moses, pwe I ketikihongehr en pwukoahki epwelpen nei aramas en Israel koaros.” Mwurin met, Siohwa eri ketikihong Miriam soumwahu en tokutok ahnsou kis.​—Nempe 12:4-7, 10.

11. Iaduwen Moses mwekidki irairo me pid Kora?

¹¹ Ele Kora oh ienge ko wehwehki duwen mwekido. Sohte kahrepe mwahu de pwung ehu ong arail wiewia en uhwong. Mendahki met, Moses kin song ni kanengamah en kasalehda kahrepe mwahu oh pwung kan pwe en kapwungala arail lamalam. E kangoange irail en kalahnganki arail pwukoa kan oh mahsaniong irail: “Kumwail wiahki mehkot mwahl en Koht en Israel eh katohreikumwailsang rehn mehn Israel teikan, pwe kumwail en kak keieng mpe?” Soh, met kaidehn “mehkot mwahl ehu”! Irail mehn Lipai kan ahnekier soahng tohto. Dahme irail pil noahroke? Sapwellimen Moses mahsen pil kasalehda dahme mih nan mohngiongarail: “Kumwail pil men wiahla samworo?”b (Nempe 12:3; 16:9, 10) Iaduwen Siohwa mwekidki arail song en uhwongada kaunda en Koht?

Sounkopwung en Israel Iangehr Pidada

12. Dahme mehn Israel akan anahne wia ma irail men ahneki nanpwung mwahu rehn Koht?

¹² Ni ahnsou me Siohwa ketikihong mehn Israel oko kosonnedo, E mahsanih ong irail aramas ako me ma irail pahn peik, irail pahn wiahla “wehi sarawi ehu” oh arail wehi pahn sarawihte erein arail pahn kin pwungki kapwaiada sapwellime koasoandi kan. (Eksodus 19:5, 6) Met, pwehki arail uhwongada ah sansalehr me e wie lalaudla, ahnsou konehng Sounkopwung oh Soun Kou Kosonned en Israel en wia mehkot pwehn kapwungala kahpwalo! Moses mahsanih ong Kora: “Kowe oh iengomw me 250 koaros pahn patohdo ni Impwal me Kauno [“Siohwa,” NW] kin ketiket loale; Aaron pahn pil iang mi wasao lakapw. Emen emen kumwail pahn wa kohdo nah pan en kisiniei, oh audehkihda mwoalus ngkengken oh warpwohmwahu loale, oh meirongki ong Kauno [“Siohwa,” NW] ni pei sarawio.”​—Nempe 16:16, 17.

13. (a) Dahme kahrehda e kasalehda aklapalap ni ahnsou ma irail me kin uhwong akan pahn wia meirong en warpwohmwahu kan ong Siohwa? (b) Ia mwomwen en Siohwa mwekid ong irail me uhwong kan?

¹³ Nan Kosonned en Koht, irail samworo kante me pahn kihda warpwohmwahu kan. Ma emen me sohte wia samworo ahpw iang isik warpwohmwahu, soangen mwekidete kak pil kamwekid lamalam en irail soun uhwong kan. (Eksodus 30:7; Nempe 4:16) Ahpw, met sohte kamwekid de kapwungala lamalam en Kora oh ienge kan! Rahn mwurio, e “kapokonepene pokono, irail ahpw uh sohpeiong Moses oh Aaron ni wenihmwen Impwalo.” E ntingihdi wasaht: “Kauno [“Siohwa,” NW] eri mahsanih ong Moses oh Aaron: ‘Kumwa keiweisang rehn aramas pwukat, pwe I pahn mwadang kamwomwirailla.’ ” Ahpw, Moses oh Aaron peki rehn Koht en dehr kihsang mour en aramas ako. Siohwa karonge ara pekipek. Ahpw, me pid Kora oh ienge ko, “Kauno [“Siohwa,” NW] ahpw ketin kadaridi kisiniei me kamwasikahla aramas 250 me meirongki warpwohmwahu.”​—Nempe 16:19-​22, 35.c

14. Dahme kahrehda Siohwa wiahda mwekid me inenen kehlail oh teng oh uhwongada irail pokon en Israel?

¹⁴ E inenen kapwuriamwei pwe irail mehn Israel ko me kilangehr duwen en Siohwa mwekid ong irail me uhwong pwukat sohte kak sukuhliki sang dahme wiawi. “Mandahsang rahno aramas koaros ahpw lipahnedihada Moses oh Aaron ketihtihki: ‘Kumwa kemelahr ekei sapwellimen Kauno [“Siohwa,” NW] aramas akan.’ ” Irail mehn Israel ko kin uhki irail pwukat me uhwongadahr kaunda en Siohwa! Eri, ahnsou lelehr me Siohwa solahr kak kanengamahiong irail. Sohte emen​—kaidehn Moses de pil Aaron​—kak en peki rehn Koht pwe Ih en kapitala aramas ako met. Siohwa kaloke irail me sapeik ko, oh “wadepen aramas me mehla mihmi ni 14,700, me mehla ni moromor en Kora sohte wadawadohng.”​—Nempe 16:41-49.

15. (a) Dahme kahrehda e konehng irail mehn Israel kan en, ni soh peikasal, utungada kaunda en Moses oh Aaron? (b) Dahme poadoapoad wet padahkiong kitail duwen Siohwa?

¹⁵ Sohte anahnepen irail aramas pwukat en mehla ma irail medewehte ni pwung duwen mehpwukat. Ma irail medemedewe ni pwung duwen met, irail pahn ese dahme pwung oh dahme sapwung oh wia pilipil mwahu. Irail kakete pein idek rehrail peidek pwukat: ‘Ihs ira me mendahkihla ara mour en mih nan keper pwehn tuhwong Parao? Ihs ira me ngidingidki irail mehn Israel ako en pitila? Ihs kelepw me ale luhk en kohla pohn Nahna Sainai (Nahna Orep) mwurin mehn Israel ako pitila pwe en tuhwong sapwellimen Koht tohnlengo?’ Dahme Moses oh Aaron wia nan ara mour kin kasalehda ni sansal me ira kin uhdahn lelepek ong Siohwa oh ira uhdahn poakohng aramas akan. (Eksodus 10:28; 19:24; 24:12-​15) Siohwa sohte kupwurperenki kemehla irail me kin uhwong ko. Ahpw, ni ah sansaldahr me irail sohte pahn uhdi sang arail wiewia en uhwong, E wia dahme konehng. (Esekiel 33:11) Mehpwukat koaros uhdahn kesempwal ong kitail rahnwet. Pwekihda?

Kasawihada Aramas akan me Siohwa Doadoahngki Rahnwet

16. (a) Mehn kadehde dah kan me kak kamehlelehong irail mehn Suhs en keieun senturi me Sises me wia weliepen Siohwa? (b) Dahme kahrehda Siohwa weliankihda pwihn en samworo en mehn Lipai kan, oh dahme e weliankihdi?

¹⁶ Rahnwet, mie pil ehu “wehi” kapw me Siohwa kin wia Sounkopwung, Soun Kou Kosonned, oh Nanmwarki soh sansal. (Madiu 21:43) “Wehi” wet tepidahr nan keieun senturi C.E. Ni ahnsowo, impwal me wiawihdahr ni mwehin Moses welianlihdahr oh uhd wiahla Tehnpas Sarawi kaselel ehu nan Serusalem, wasa me irail mehn Lipai kan kin wiewiahte arail pwukoa. (Luk 1:5, 8, 9) Ahpw, nan pahr 29 C.E., pil ehu Tehnpas Sarawi, ni pali ngehn, pil kokouda oh Sises me wia Samworo Lapalap. (Ipru 9:9, 11) Peidek me pid ma e konehng Koht en kaunda aramas pil ehu pwarada. Ihs me Siohwa pahn doadoahngki pwe en kahluwa “wehi” kapw wet? Sises kasalehda me e kin lelepek ong Koht ni ahnsou koaros oh pahn irair koaros. E kin poakohng aramas akan. E pil wiahda manaman kaselel tohto. Ahpw, mehn Lipai tohto, duwehte samarail mehn mahs ako, me kahngohdi oh sohte pwungki Sises. (Madiu 26:63-​68; Acts 4:5, 6, 18; 5:17) Siohwa eri welianda samworo en Lipai oh weliankihdi ehu me inenen tohrohr mehlel​—⁠pwihn en samworo ehu. Pwihn en samworo wet pil mihmi lel rahnwet.

17. (a) Ihs me wia pwihn en samworo rahnwet? (b) Iaduwen Siohwa doadoahngki pwihn en samworo?

¹⁷ Ihs me iang wia kisehn pwihn en samworo rahnwet? Wahnpoaron Piter sapengla peidek wet nan sapwellime tepin kisinlikou. Piter ntingihdiong irail me keidi kan me iang wia kisehn weren Krais, oh mahsanih: “A kumwail, kumwail wia keinek pilipil ehu, pwihn en samworo ehu, kumwail wia wehi sarawi ehu, sapwellimen Koht aramas kei, me pilipildahng kalohkiseli wiewia kapwuriamwei kan en nin limen Koht, me ketin malipeikumwaildo sang nan rotorot ong nan sapwellime marain lingaling.” (1 Piter 2:9) E sansal sang ni mahsen pwukat me irail me keidi pwukat me kin kahlemengih Sises me wiahda “pwihn en samworo” oh Piter pil kin kahdankin irail “wehi sarawi ehu.” Siohwa kin doadoahngki irail pwe en kak kihong sapwellime aramas akan kaweid en pali ngehn.​—Madiu 24:45-​47.

18. Dahme kadokepene irail elder idihdda kan oh pwihn en samworo?

¹⁸ Irail elder idihdda kan me kin weliandi pwihn en samworo oh apwalih sapwellimen Siohwa aramas akan nan arail mwomwohdiso nan sampah pwon. E konehng kitail en wauneki oh kihong atail utuht unsek ong ohl pwukat, mehnda ma irail keidi de soh. Pwekihda? Pwehki Siohwa doadoahngki sapwellime ngehn sarawi pwehn piladahr ohl mah pwukat en wia pwukoah wet. (Ipru 13:7, 17) Iaduwen met kin wiawi?

19. Ni ahl dahieu elder kan idihddahki ngehn sarawi?

¹⁹ Ohl mah pwukat kapwaiadahr koasoandi en Koht akan me sansalda nan sapwellimen Koht Mahsen, me wia wahn sapwellimen Koht ngehn sarawi. (1 Timoty 3:1-7; Taitus 1:5-9) Ihme kahrehda, kitail kak nda me elder kan idihddahki ngehn sarawi. (Wiewia 20:28) Irail elder kan anahne re en uhdahn wehwehkihla mwahu Mahsen en Koht. Duwehte Sounkopwung Lapalap me idihada elder kan, irail anahne tateki mehkoaros me pidada kopwung sapwung.​—Deuderonomi 10:17, 18.

20. Dahme ke kin keieu kalahnganki sang rehn elder doadoahk laud kan?

²⁰ Kitail dehr pelianda arail kaunda, ahpw kitail en uhdahn kalahnganki elder kan oh arail doadoahk laud! Arail lelepek ni arail doadoahk sounpahr tohtohie kak kahrehong kitail en koapworopworki oh likih irail. Irail kin, ni lelepek, kaunopada oh katanga mihding en mwomwohdiso kan oh iang kitail wia doadoahk en kalohki “Rongamwahu en Wehio” oh kihda mehn kaweid en pali ngehn ni ahnsou me kitail kin anahne. (Madiu 24:14; Ipru 10:23, 25; 1 Piter 5:2) Irail kin mwemweitdo rehtail ni atail kin soumwahu oh kamweitala kitail ni ahnsou me kitail kin nsensuwed de pahtou. Irail kin, ni lelepek oh soh roporop, rapahki mahs Wehin Koht. Sapwellimen Siohwa ngehn sarawi kin ieiang irail; Siohwa kin kupwurperenkin irail.​—Kalesia 5:22, 23.

21. Dahme elder kan kin wehwehki, oh pwekihda?

²¹ Mehlel, irail elder kan sohte unsek. Irail kin pohnese duwen arail sohte itar kan, kahrehda irail sohte kin song en kaunda tohnmwomwohdiso kan, me iei “sapwellimen Koht sohso.” Weksang met, irail kin kilangwong pein irail nin duwen ‘tohndoadoahk kei me kin ieiang riarail kan doadoahk ni peren.’ (1 Piter 5:3; 2 Korint 1:24) Irail elder kan kin ahneki lamalam aktikitik oh irail kin doadoahk laud pwehki irail poakohng Siohwa oh irail wehwehki me ma irail pahn kin kalaudehla arail kahlemengih Koht, kapai me irail pahn wahdohng mwomwohdiso pahn pil laudla. Ni arail kin wehwehki met, irail kin wia uwen arail kak en kahlemengih Koht ni arail pahn kakairada irair kan duwehte limpoak, poakehla meteikan oh kanengamah.

22. Iaduwen ahmw kousapahlih oh pwurehng kasawi poadoapoad duwen Kora kin kakehlailihala ahmw pwoson sapwellimen Siohwa pwihn sansal?

²² Ia uwen atail peren ni en Siohwa eh ketin wia atail Kaun, oh Sises Krais atail Samworo Lapalap, oh irail me kisehn pwihn me keidi kan oh samworo kan kin wia atail sounpadahk kan oh pil Kristian ohl mah lelepek kan kin wia atail sounkaweid kan! Mendahki sohte pwihn ehu me aramas kin kaweid kak en unsek, kitail kin perenki atail pil kak iang iengetail me pwoson teikan ni atail papah Koht oh uhpah sapwellime kaunda!

[Nting tikitik me mi pahs]

Dahme Ke Ahpwtehn Sukuhliki?

• Soangen koasoandi limpoak dah kan me Siohwa ketin wiahda pwehn apwalih irail mehn Israel kan?

• Dahme kahrehda sohte kahrepe mwahu Kora en pelianda Moses oh Aaron?

• Soangen mehn kasukuhl dah kitail kak sukuhlikihsang sapwellimen Siohwa elen mwekid ong irail akan me uhwongada Ih?

• Iaduwen kitail kak kasalehda me kitail kalahnganki sapwellimen Siohwa koasoandi kan rahnwet?

[Kilel nan Pali 19]

Ke kin kilangwong ahmw pwukoa kan nan sapwellimen Siohwa nin duwen kapai ehu?

[Kilel nan Pali 20]

“Eri, dahme kahrehda ke kin pein kasapwilkomwihda pohn sapwellimen Siohwa aramas akan?”

[Kilel nan Pali 23]

Irail elder idihdda kan kin weliwelian pwihn en samworo