‘Ladu Lelepeko’ Pweida Nan Mehn Kasohng!

“E leledohr ahnsoun kadeik, oh e pahn tepida sang rehn sapwellimen Koht tehnpaso.”—1 Piter 4:17.

1. Dahme Sises diarada ni ahnsou me e kasawih “laduo”?

NAN Pendekos 33 C.E., Sises ketin idihada “laduo” en kihda mwenge ni ahnsou me konehng ong sapwellime “aramas akan.” Nan pahr 1914, Sises nanmwarkihla, oh ni ahnsou keren en pahn tehk “laduo.” Ahpw, e diarada me pali laud en pwihn en “ladu” menet me kasalehda me irail kin “lelepek oh loalokong.” Ihme kahrehda, e idihada pwihn menet en apwaliahda sapwellime “dipwisou kan koaros.” (Madiu 24:45-​47) Ahpw, pil mie ladu suwed emen, oh e sohte lelepek oh loalokong.

“Ladu Suwedo”

2, 3. Iawasa “ladu suwedo” kohsang ia, oh iaduwen e tepida?

² Sises mahsanih duwen ladu suwedo mwurinte e mahsanih duwen “ladu lelepek oh loalokong.” E mahsanih: “A ma [ladu] suwed emen men ih, e pahn mengimengloalki, ‘Ei kaun pahn pwand en pwurodo,’ e ahpw pahn tapihada keme ienge papah teikan, oh patehng me kapehd en mwenge kan oh me kamam sakau kan. Kauno ahpw pahn pwurodo ehu rahn me [laduo] sohte lemeleme oh ahnsou me e sehse; e ahpw pahn pelepeseng oh katohrelahng rehn me mwalaun kan; wasa e pahn sengiseng ie oh ngih kan tehtehrek.” (Madiu 24:48-​51) Lepin loakaia pwukat “ladu suwed emen” kin kahrehong kitail en medemedewe duwen mahsen en Sises ko me kin pid ladu lelepek oh loalokong. Ei, “ladu suwedo” kin kohsang pwihn en ladu lelepeko.a Iaduwen met wiawi?

³ Mwohnte 1914, towe tohto en pwihn ladu lelepek kin ahneki koapworopwor me irail pahn tuhwong Ohl kamwohdo nanleng nan pahro, ahpw dahme irail kin kasikasik sohte pweida. Tohto kin nsensuwedkihla met oh ekei kin tepida ahneki lamalam en kailok. Ekei sang rehrail tepida ‘keme’ ienge papah teikan ki arail lokaia kan oh irail kin iang “aramas sakaulahr kan,” iei pwihn en pelien lamalam kan en Kristendom.​—Aiseia 28:1-3; 32:6.

4. Dahme Sises wia ong pwihn en “ladu suwedo” oh irail kan koaros me kin kasansalehda soangen ngehnohte?

⁴ Aramas pwukat me solahr wiahla Kristian kin adanekihla “ladu suwedo,” oh Sises ketin “kaloke irail.” Iaduwen e wia met? E ketin soikala irail, oh irail sohlahr ahneki koapworopwor en kohdahla nanleng. Ahpw, irail sohte mwadangete kamakamala. Irail anahne en lelong ahnsoun sengiseng oh ngihrail kan tehtehrek “likin” mwomwohdisohn Kristian, “nan rotorot.” (Madiu 8:12) Mahs, mie pil ekei me kin iang me keidi kan me kin pil ahneki ngehn suwed wet, kadanekihla pein irail “ladu suwedo.” Ekei me kin iang pwihn en “sihpw teikan” kin pil alasang aramas salelepek pwukat. (Sohn 10:16) Imwintihti en Krais koaros pahn imwikihla mih nan soangen “rotorot likin” mwomwohdiso ni pali ngehn.

5. Dahme pwihn en ladu lelepek oh loalokong wia, me kin weksang dahme pwihn en “ladu suwedo” wia?

⁵ Ahpw, pwihn en ladu oh loalokong pil lelongehr soangen kasongosongohte me “ladu suwedo” lelohng. Irail sohte kin ahneki lamalam en kailok, ahpw re kin kapwungala arail madamadau kan. (2 Korint 13:11) Arail limpoak ong Siohwa oh iengerail brother oh sister kan kin kehlailda. Kahrehda, irail kin wia “uhr oh poahsoanpen me mehlelo” nan “imwin rahn akan.”​—1 Timoty 3:15; 2 Timoty 3:1.

Meipwon Loalokong oh Loalopwon

6. (a) Ia karasaras me Sises wiahda pwen kawehwehda duwen loalokong me sapwellime pwihn en ladu lelepek kin kasalehda? (b) Mwohn pahr 1914, rohng dahieu me irail Kristian me keidi kan kin kalohkiseli?

⁶ Mwurin Sises mahsanih duwen “ladu suwedo,” e kihda karasaras riau pwen kasalehda kahrepen ekei Kristian me keidi kan pahn lelepek oh loalokong oh meteikan soh.b E kawehwehda duwen loalokong ki karasaras wet: “Ni ahnsowo Wehin Koht pahn rasehng serepein meipwon ehk me ale neirail lamp akan oh kohieila pwe re en kasamwo ohl kamwohd emen. Limmen rehrail loalopwon, a limmen me loalokong. Me loalopwon ko eri tilehda neirail lamp ako, re ahpw sohte iangahki pile me itar. A me loalokong ko re wahda kisin pwoatol kei diren leh, iangahki nair lamp ako. Eri, ni ohl kamwohdo eh pwapwand en pwarodo, serepein ko koaros lusulusoite, meirla.” (Madiu 25:1-4) Serepin meipwon ehk kin katamankinkitail duwen irail Kristian me keidi kan mwohn pahr 1914. Irail lemeleme me ohl kamwohdo, Sises Krais, pahn kereniong pwarada. Ih kahrepe irail “kohieila” pwe re en kasamwo ih, ni eimah re kin kalakalohkiseli me “ahnsoun wehi kan” pahn imwisekla nan pahr 1914.​—Luk 21:24.

7. Iahd oh dahme kahrehda irail Kristian me keidi kan ‘meirla’ ni pali ngehn?

⁷ Irail me pwung. Pwe ahnsou wehi kan imwisekla nan pahr 1914, oh Wehin Koht pahnangin kaundahn Sises Krais tepidaher. Ahpw met pweidaher nanleng. Nin sampah, kokohp en Pwuhk Sarawi me kin pid “meid suwediong” tohnsampah pweidaher, pwe irail tepida lelong kalokolok. (Kaudiahl 12:10, 12) Kasongosong kan uhd wiawiong irail. Pwehki irail Kristian me keidi kan sohte kin nohn wehwehki dahme kin wiawi, irail lemeleme me “ohl kamwohdo eh pwapwand en pwarodo.” Irail pingkihda oh sampah wet kin uhwong irail, oh irail sohlahr nohn kehlail wia doadoahk en kalohk ong wehi pokon nin duwen pwihn ehu. Duwehte lih meipwon kan nan karasaras, ni pali ngehn re kin “lusulusoite, meirla,” duwehte Kristian salelepek kan kin wia mwurin sapwellimen Sises wahnpoaron kan mehlahr.​—Madiu 25:5; Kaudiahl 11:7, 8; 12:17.

8. Dahme wiawi mwohn likwer wet wiawi: “Iet ohl kamwohdo!” oh dahme irail Kristian me keidi kan anahne wia ni ahnsowo?

⁸ Nan pahr 1919, mie mehkot me wiawi me irail sohte kasik. Kitail wadek: “Nin lukepen pwohngo, ngihl ehu pa likwer, patohwan, ‘Iet ohl kamwohdo, e samwodohr! Kumwail kohieido oh kasamwo!’ Serepein ko koaros ahpw pirida oh pwourda oh onopada neirail lamp ako.” (Madiu 25:6, 7) Ni ahnsou me mwomwen sohte koapworopwor, iei ahnsou me kangoang ieu kohda en pwurehng doadoahk! Nan pahr 1918, Sises, “meninkeder en inou,” pwarado ni sapwellimen Siohwa Tehnpas ni pali ngehn pwen wia keseu oh kamwakelehda sapwellimen Koht mwomwohdiso. (Malakai 3:1) Ni ahnsouwet, Kristian me keidi kan anahne kohieila oh tuhwong Ih nan kehlen Tehnpaso nin sampah. Iei ahnsou ong irail en “lingalingki marain.”​—Aiseia 60:1; Pilipai 2:14, 15.

9, 10. Nan pahr 1919, dahme kahrehda ekei Kristian akan “loalokong” oh ekei “loalopwon”?

⁹ Ahpw, awih! Nan karasaraso, ekei lih pwulopwul akan ahneki kahpwal ieu. Sises pousehlahte: “Serepein loalopwon ko eri ndahng me loalokong ko, ‘Kumwail kidohng kiht mahs ekis pilen noumwail lamp akan, pwe nait kat pahn kunlahr.’ ” (Madiu 25:8) Ma sohte pilen lamp kan, lamp kan sohte kak sereki marain. Pilen lamp kin katamankin kitail duwen sapwellimen Koht Mahsen en mehlel oh sapwellime ngehn sarawi, me kin kakehlailda tohnkaudok mehlel akan en wia sounwa marain akan. (Melkahka 119:130; Daniel 5:14) Mwohn pahr 1919, Kristian me keidi loalokong kan kin nantiong en dehdehkihla sapwellimen Koht kupwur kan ong irail, mendahki irail luwet ni pali ngehn. Kahrehda, ni ahnsou likwer kohda ong irail en wia sounwa marain akan, irail kaunopadaher en wia doadoahk wet.​—2 Timoty 4:2; Ipru 10:24, 25.

¹⁰ Ahpw, ekei me keidi kan sohte kaunopada en ahneki madamadau en tohnmetei oh nantiong wia doadoahko​—edetehn irail men mih rehn Ohl Kamwohdo. Eri, ni ahnsou leledo ong irail en pwerisekiong wia doadoahk en kalohki Rongamwahuo, irail sohte kak, pwe re sohte onopada. (Madiu 24:14) Irail pil song en kaluwetala iengerail me ngoang ako, ni ahr kin peki rehrail pilen lamp akan. Nan karasaras me Sises kihda, dahme serepein meipwon me loalokong wia? Irail nda: “E de sohte pahn itarohng kiht oh kumwail, me mwahu kumwail pein kohwei pwain pilen noumwail lamp akan nan sidohwa kan.” (Madiu 25:9) Duwehte irail Kristian mekeidi loaloapwoat akan, pwe nan pahr 1919, irail kin kahng wia mehkot me pahn kaluwetala arail kehl en serehki maraino. Eri, irail pweida nan mehn kasohng.

11. Dahme wiawiong irail serepein meipwon loaloapwon kan?

¹¹ Kaimweseklahn mahsen en Sises: “Serepein loalopwon ko eri kohieila pwain pilen neirail lamp ako. Nindokon ar mihmiseli nan sidohwa ko, ohl kamwohdo pa leledo. Serepein limmeno me onopadahr, ahpw iang ketilong nan kamadipw en kapwopwoudo; wenihmwen ihmwo ahpw ritidi. Kedekedeo, serepein teiko pwarodo. Re ahpw likilikwer sang liki, ndinda, ‘Maing, maing! Komw ketin ritingadahng kiht wenihmwen!’ A ohl kamwohdo sapeng irail, mahsanih, ‘Soh! I sehse ihs kumwail.’ ” (Madiu 25:10-​12) Ei, ekei rehrail sohte kaunopada ong Ohl kamwohdo ah kin leledo rehrail. Ihme, irail sohte pweida nan mehn kasohng oh sohte ale mweimwei en iang kamadipw en kapwopwoud nanleng. Inenen paisuwed!

Karasaras en Mwohni (Talent)

12. (a) Iaduwen Sises doadoahngki ong eh karasaras en lelepek? (b) Ihs ohlo me “seiloak reirei”?

¹² Mwurin Sises kihda karasaras duwen loalokong, e uhd karasaraski lelepek. E mahsanih: “Pwe Wehin Koht pahn rasehng aramas emen me pahn wia seiloak reirei ehu. E ahpw kapokonepene eh papah kan oh nehkohng ihr eh dipwisou ko; ong emenemente nin duwen eh koahiek: e kihong emen talent limau, a emen talent riau, a emen talent ehu. E ahpw mwesel kohkohla.” (Madiu 25:14, 15) Ohlo nan karasaras wet iei Sises, pwe ih me “seiloak reirei” ni ahnsou me e ketidala nanleng nan pahr 33 C.E. Ahpw mwohn e kohdala nanleng, Sises ketkihong sapwellime tohnpadahk lelepek kan en apwaliahda “sapwellime dipwisou kan.” Iaduwen e wia met?

13. Iaduwen Sises kaunopada wasahn kalohk laud ieu oh kamanahla sapwellime “ladu kan” en wia pisnes?

¹³ Ni erein ahnsou me Sises wia e doadoahk nin sampah, e tepida kaunopada wasahn kalohk laud ieu ni ah kin kalohkiseli Rongamwahu en Wehio wasa koaros nan sapwen Israel. (Madiu 9:35-​38) Mwohn e “wia seiloak reirei ehu,” e likilikiong sapwellime tohnpadahk lelepek kan wasahn kalohk wet, ndinda: “Kumwail eri kohwei wasa koaros oh padahkiong tohn wehi kan koaros; pwe re en wiahla nei tohnpadahk; papidaisihirailla ni mwaren Sahm oh Sapwellime oh Ngehn Sarawi, oh kehkehlingkihong irail re en peikiong mehkoaros me I koasoanediong kumwail.” (Madiu 28:18-​20) Ki mahsen pwukat, Sises kamanahla sapwellime “ladu kan” en wia pisnes lao lel e pahn pwurala rehrail, “ong emenemente nin duwen eh koahiek.”

14. Dahme kahrehda kaidehn aramas koaros anahne en duwehpenehte ni uwen me irail wia doadoahk en pisnes?

¹⁴ Mahsen pwukat kin wehwehki me kaidehn Kristian akan koaros nan keieun senturi kin ahneki irair tehieu. Ekei duwehte Pohl oh Timoty, kin mihla nan irair ehu me kin mweidong ira ahnsou laud en iang wia doadoahk en kalohk oh padahk. Aramas teikan sohte kin ahneki soahngen irair akan oh mwein met kin wia mehn kerempwa ehu en kalaudehla arail ahnsoun kalohk kan. Karasepe ieu, ekei Kristian akan kin wiahla ladu kan, oh meteikan kin soumwahu, mahla, de ahneki pwukoa en peneinei kan. Oh ni mehlel, ekei pwais kan nan mwomwohdiso sohte pahn kohwong tohnmwomwohdiso kan koaros. Lih me keidi kan oh ekei ohl mekeidi kan sohte kin padahk nan mwomwohdiso. (1 Korint 14:34; 1 Timoty 3:1; Seims 3:1) Ahpw sohte lipilipil soangen irair dah kei pein irail kin ahneki, irail koaros sapwellimen Krais tohnpadahk mekeidi kan​—ohl oh lih​—kin ale pwukoa ehu en wia pisnes, oh doadoahngki mwahu arail ahnsou kan nan doadoahk en Kristian. Tohnpadahk kan en Krais nan rahnpwukat kin pil wia doadoahk wet.

Ahnsoun Mehn Kasohng Tepidahr

15, 16. (a) Iahd ahnsou mwahu en wia kainen mwohni ko rehrail? (b) Pwukoa kapw dah kei en ‘wia pisnes’ me kin kohwong irail me lelepek kan?

¹⁵ Karasaraso pousehla koasoia: “Kedekedeo, mwurin ahnsou reirei, en ladu ko ar kaun ahpw pwurodo oh wia kainen en mwohni ko rehrail.” (Madiu 25:19) Nan pahr 1914​—ahnsou reirei ehu mwurin pahr 33 C.E.​—Krais Sises tepida kakaun nanleng. Sounpar silu elep mwuri, nan pahr 1918, e ketido ni sapwellimen Koht tehnpas ni pali ngehn oh kapwaiada kokohp en Piter: “E leledohr ahnsoun kadeik, oh e pahn tepida sang rehn sapwellimen Koht tehnpaso.” (1 Piter 4:17; Malakai 3:1) Met iei ahnsou en wia kainen en mwohni ko rehrail.

¹⁶ Dahme ladu kan, rien Sises me keidi kan wia ong sapwellimen Nanmwarki “talent kan”? Sang nan pahr 33 C.E. kohkohdo, patehng sounpar kan mwohn 1914, tohto me kin doadoahk laud en sapwellimen Sises “pisnes.” (Madiu 25:16) Pil nan erein keieun mahwen me wiawi nin sampah pwon, irail kin kasalehda arail ineng laud en papah Soumaso. Eri, e konehng en kihong me lelepek kan arail pwukoa kapw kan en ‘wia pisnes.’ Pwehki ahnsoun imwin koasoandi wet lelehr. Rongamwahu anahne en lohkiseli wasa koaros nin sampah. “Ahnsoun mwahu en dolung leledohr.” (Kaudiahl 14:6, 7, 14-​16) Anahne rapahki kaimwiseklahn towe kan en pwihn me kin rasehng wihd oh pil kihpene irail pwihn en “pokon kalaimwun” en sihpw teikan.​—Kaudiahl 7:9; Madiu 13:24-​30.

17. Iaduwen Kristian me keidi lelepek kan ‘kin iang nsenamwahuki pai en arail soumwas’?

¹⁷ Ahnsoun dolung kin wia ahnsoun kaperen ieu. (Melkahka 126:6) E konehng en nda me nan pahr 1919, Sises likikihong rie me keidi lelepek kan pwukoa laud kan e me ketin kalaudehla, ni e mahsanih: “Keieu mwahu, papah lelepek oh mehlel men kowe! Pwehki omw loalopwoat ni koadoahkpen mehkot me tikitik, I pahn kihong uhk mehkot laud pwe ke en kin apwahpwalih. Keido pwe ke en iang nsenamwahuki ei pai.” (Madiu 25:21, 23) Oh pil, kitail sohte kak uhdahn wehwehki duwen uwen laud peren me Soumaso ahnekier ni ahnsou me e wiahla Nanmwarki en Wehin Koht. (Melkahka 45:1, 2, 6, 7) Ahpw pwihn en ladu lelepeko kin iang ahneki peren wet ni ahr kin wiliandi Nanmwarkio oh kalaudehla eh doadoahk nin sampah wet. (2 Korint 5:20) Mahsen en kokohp en pwuhken Aiseia 61:10 kin kasansalehda duwen ahr peren: “I pahn kalinganahda Siohwa. Ai mour pahn ngisingiski ai Koht. Pwe ih me ketin kalinganahkilahr ei ling en komour.”

18. Dahme kahrehda ekei sohte pweida nan mehn kasohng, oh met kin imwikihla dah?

¹⁸ Ahpw inenen paisuwed, pwe ekei rehrail sohte pweida nan mehn kasohng. Kitail wadek: “A me ale talent ehu ahpw pil patohdo, patohwanohng, ‘Maing, I patohwan ese me komwi ohl seumahk emen, me kin dolung wasa me komwi sohte kin padok ie, oh kin ketin nahkpene wasa me komwi sohte kin kamwarak ie. Iei me nan ei masak komwi, I patohlahte ekihla sapwellimomwi mwohni ko nanpwel. Eri, iei sapwellimomwi mwohni ko.’ ” (Madiu 25:24, 25) Met kin duwehte ekei Kristian me keidi kan me sohte wia “pisnes.” Pwe mwohn pahr 1914 irail sohte kin ngoangki padahkiong mehteikan duwen arail koapworopwor, oh re pil sohte men tepida wia doadoahk wet nan pahr 1919. Dahme Sises wia pwehki ahr kin aklapalap? E kihsang rehrail arail pwais akan. Irail ‘kesepwekeieilahng liki nan rotorot mosul; wasa e pahn sengiseng oh tehtehrek ngih kan.’​—Madiu 25:28, 30.

Mehn Kasohng kin Wiwiawi lel Met

19. Ni ahl dahieu me mehn kasohng wet kin wiwiawi lel rahnwet, oh dahme Kristian me keidi kan koaros nantiong en wia?

¹⁹ Ni mehlel, pali laud en irail me pahn wiahla sapwellimen Krais ladu mekeidi kan ni imwin ahnsou me saikinte papah Siohwa ni ahnsou me Sises tepida e keseu nan pahr 1918. Irail pil katiasang keseu wet? Soh. Pwe keseu wet tepida nan pahr 1918 oh 1919 ni ahnsou me ladu lelepek oh loalokong nin duwen pwihn ehu kin pweida nan mehn kasohng wet. Emen emen irail Kristian me keidi kan kin ale mehn kasohng lao lel irail kileldier. (Kaudiahl 7:1-3) Pwehki rien Krais me keidi kan kin pohnese duwen met, irail kin nantiong en ‘wia pisnes’ ni lelepek. Irail kin ni loalokong, nekidala pihlen lamp tohto pwe neirail lamp ko kak sereki marain ni kehlail. Irail ese me ni ahnsou me pein emen emen irail pahn mehla ni lelepek, Sises pahn ale irail en kousoanla nanleng.​—Madiu 24:13; Sohn 14:2-4; 1 Korint 15:50, 51.

20. (a) Dahme sihpw teikan nan rahnwet kin nsenohki wia? (b) Dahme irail Kristian me keidi kan esehki?

²⁰ Pokon kalaimwun en sihpw teikan kin kahlemengih riarail me keidi kan. Irail kin wehwehki me arail kin loalokongkihla kupwuren Koht kin kahrehong irail en ahneki pwukoa laud ieu. (Esekiel 3:17-​21) Eri, ki sawas en sapwellimen Siohwa Mahsen oh ngehn sarawi, irail pil kin nekidala neirail pilen lamp kan ni arail kin onop Pwuhk Sarawi oh iang towehda mihding kan. Oh irail kin kamarainih aramas teikan, ni ahr kin iang wia doadoahk en kalohk oh padahk, oh irail kin iang riarail me keidi kan ‘wia pisnes.’ Ahpw, Kristian me keidi kan kin uhdahn wehwehki me talent kan kin kohwong irail. Irail anahne wehkohng Kauno duwen iaduwen irail kin doadoahngki sapwellimen Kauno dipwisou kan nin sampah. Edetehn irail me malaulau, re sohte kak kesehla ahr pwukoa oh uhd kihong pwihn en pokon kalaimwuno. Kahrehda, pwihn en ladu lelepek oh loalokong kin pousehla tiengala mwowe apwapwalih sapwellimen Nanmwarki pisnes, oh irail kin kalahnganki sawas me towe lelepek kan en pokon kalaimwun kin kihda. Aramas pwukat kin pohnese duwen pwukoa en riarail me keidi kan oh kin perenkihda doadoahk pahnangin irail.

21. Mehnia kaweid kin kohwong Kristian akan koaros sangete mwohn pahr 1919 lao lel atail ahnsou?

²¹ Eri, mendahki karasaras riau pwukat kin kamarainih kitail duwen wiewia kan me wiawi ni mpen pahr 1919, mouren kaweid akan kin mwahu ong Kristian mehlel akan koaros nan imwin rahn akan. Kaweid me Sises kihda ni imwin karasaras en lih meipwon ehk kin keieu pidada irail Kristian me keidi kan mwohn pahr 1919, ahpw e pil kin pid ong Kristian akan koaros. Eri, kitail koaros en kapwaiada sapwellimen Sises mahsen: “Kumwail eri mwasamwasahn pwe kumwail sehse rahno de awao.”​—Madiu 25:13.

[Nting tikitik me mi pah]

Ke Kak Kawehwe?

• Iahd me Sises kasawihada sapwellime tohnpadahk kan, oh dahme e dierekda?

• Dahme kahrehda ekei Kristian me keidi kan ahnekier madamadau en “ladu suwedo”?

• Iaduwen kitail kak kasalehda me kitail loalokong ni pali ngehn?

• Ni atail kin kalehmengih rien Sises me keidi lelepek kan, iaduwen kitail kak kaukaule ‘wia pisnes’?

[Kaokon nan pali 24]

Iahd Me Sises Ketido?

Nan pwuhken Madiu irelaud 24 oh 25, e kawehwehda me Sises pahn “ketido” ni wehwe tohto. Ni e pahn “ketido,” paliware sohte anahne kohdohng sampah. Ahpw, e kin “ketido” ni ah kin sohpeiong aramas akan de sapwellime tohnkaudok akan, pali laud en ahnsou ong kadeik. Kahrehda nan pahr 1914 e “ketido” ni e kin tepida wiahla Nanmwarki. (Madiu 16:28; 17:1; Wiewia 1:11) Nan pahr 1918 e “ketido” nin duwen meninkeder en inowo oh tepida kadeikada aramas akan me dene irail kin papah Siohwa. (Malakai 3:1-3; 1 Piter 4:17) Nan Armakedon, e pahn “ketido” pwen kadeikada irail imwintihti kan en Siohwa.​—Kaudiahl 19:11-​16.

Lepin lokaia wet, ketido (de, pwurodo) kin ntingihdi pak tohto nan pwuhken Madiu 24:29-​44 oh 25:31-​46 oh e kin pid ong “kahn kamakam kowalap.” (Kaudiahl 7:14) Ahpw, lepin lokaia wet ketido me ntingihdi pak tohto nan pwuhken Madiu 24:45 lel 25:30 kin pid ahnsou me e ketin kadeikada sapwellime tohnpadahk kan me kin nda re kin idawehnla ih sang nan pahr 1918 lel ni ahnsouwet. E pil sohte pwung en nda, me soahng pwukat koaros pahn wiawi ni ahnsou me Sises pahn “ketido” nan kamakam kohwalap, iei me kapaiada pwihn en ladu lelepeko, oh kadeik en lih meipwon loalopwon kan, oh kadeik en ladu suwedo me ekihla talent en ah Kaun. Ma met pahn wiawi, e kin wehwehki me tohto irail me kin iang pwihn en me keidi kan pahn salelepek ni ahnsowo, oh aramas teikan anahne wiliandi irail. Ahpw, pwuhken Kaudiahl 7:3 kin kawehwehda me sapwellimen Krais ladu me keidi kan koaros pahn kileldier ni ahnsowo.

[Kilel nan pali 22]

Pwihn en “ladu suwedo” sohte ale kapai kan nan pahr 1919

[Kilel nan pali 23]

Lih meipwon loalokong kan me onopadaher awihawih ahnsou me ohl kamwohdo pahn pwurodo

[Kilel nan pali 25]

Ladu lelepek ko kin iang wia “pisnes”

[Kilel nan pali 25]

Ladu pohnkahke men sohte wia pisnes

[Kilel nan pali 26]

Pwihn en irail me keidi kan oh pwihn en “pokon kalaimwun” kin kaukaule kamarainih mehteikan