Kesempwaliki Kisakis En Mour
“Ntahn Krais pahn kamwakelehda kapehditail kan sang tiahk en kaudok soh-katepe kan, pwe kitail en kak papah Koht ieias.”—IPRU 9:14.
1. Dahme kasalehda me kitail kin kesempwaliki mour?
MA PEIDEK kohwong uhk duwen ia uwen ahmw kesempwaliki ahmw mour, dahme ke pahn sapengki? Kitail kin inenen kesempwaliki atail mour oh pil mour en meteikan. Kasalepen met iei atail kin kohla oh tuhwong toahkte ni atail soumwahu de pil kin kaukaule oh kohla rehn toahkte kan pwe kitail en kak ahneki roson mwahu. Oh pil, pali moron en me mahlahr akan oh paliwar soumwahu pil sohte men mehla; irail men mour.
2, 3. (a) Lepin Padahk 23:22 kin kasalehda soangen pwukoah dah kan? (b) Ia duwen Koht kin pid pwukoa kan me ntingihdi nan Lepin Padahk 23:22?
2 Uwen ahmw kesempwaliki ahmw mour pidada ahmw kin ehuiong mehteikan. Karasepe ehu, Mahsen en Koht kaweidiki: “Rong ahmw pahpa, pwe ma sohte ih ke sohte pahn mie. Ni ahnsoun ahmw nohno pahn likeilapalahr, ke pahn kasapalkalahnganohng.” (Lepin Padahk 23:22) En “rong” sohte wehwehkihte en rong lokaia kan; lepin padahk wet wehwehki en rong oh kapwaiada. (Eksodus 15:26; Deuderonomi 7:12; 13:18; 15:5; Sosua 22:2; Melkahka 81:13) Ia kahrepen Mahsen en Koht padahkiong uhk en rong ahmw pahpa oh nohno? Kaidehn ihte pwe ahmw pahpa oh nohno mah sang uhk de pil wehwehki soahng tohto. Kahrepeo iei pwehki ira me “kaipwihiukedi.” Ekei kawehwe teikan kin kawehwe ire wet duwehte met: “Rong Semomw pwe ih me kihong uhk mour.” Ma ke kesempwaliki ahmw mour, ke pahn pehm me ke pweipwand ohng me kihong uhk mour.
3 Ni mehlel, ma ke wia emen Kristian mehlel, ke pahn pohnese me Siohwa me ketikihong uhk ahmw mour. Pwehki Siohwa, ke “ahneki mour,” ke kak “mwekid,” ke ahneki pepehm oh ke ese me ke “mie” oh kak medemedewe de wia ahmw mehn akadei ong ahnsou kohkohdo, me pil iangahki mour soutuk. (Wiewia 17:28; Melkahka 36:9; Eklesiasdes 3:11) Pahrekiong Lepin Padahk 23:22, e pwung en “rong” Koht oh peikiong Ih oh ahneki ineng en men wehwehki oh kapwaiada kupwuren Koht ah kaidehn pein atail madamadau duwen mour.
Kasalehda Ahmw Wauneki Mour
4. Nin tapio, iaduwen kesempwalpen mour ah wiahla ire kesempwal ehu?
4 Sangete nin tepio, Siohwa kasalehda ni sansal me e sohte mweidohng aramas en pein wiahki nsenarail mour. Ni ah direkihla peirin, Kain kemehla rie pwutako, Eipel. Ke leme Kain ahneki pwung en wiahda soangen pilipil wet me pid mour? Koht sohte leme Kain ahneki soangen pwung wet. E kadeikadahr oh kaloke Kain ki dipe: “Dahme ke wiahkihda suwed mwuledek wet: Ntahn riomwo liklikwerih ie sang nanpwel.” Ntahn Eipel nanpwel wehwehkiong ah mour, me loplahr ni ah pwulopwulte, oh ah ntaho liklikwerih Koht en ikih.—Ipru 12:24.
5. (a) Soahng dah me Koht irehdi ni mwein Noha, oh ihs me met dokedoke? (b) Iaduwen kehkehlik wet a wia kahk kesempwal ehu?
5 Mwurin Nohliko, walimente me luwehdi pwen tepida ahr mour. Nan kehkehlik ehu ong aramas, Koht kasalehda duwen ia uwen ah kesempwalki mour oh nta. E kasalehda me aramas kak tungoale uduk en mahn akan, ahpw e kalikdihsang irail met: “Kumwail kak tungoale soahng me memour koaros oh pil tuhke koaros. I kihong kumwail koaros pwe kumwail en wiahki amwail mehn tungoal. Ihte me kumwail sohte pahn tungoale, uduk me mie nta.” (Senesis 9:3, 4) Ekei mehn Suhs akan kawehwe me met wehwehki me aramas en dehr tungoale uduk de ntahn mahn me memourte. Ahpw mwuri, e sansaldahr me dahme Koht keinepwihsang aramas iei en dehr tungoale nta pwen mour. Oh pil, sapwellimen Koht kosonned ong Noha wia kahk kesempwal ieu en kasalehda sapwellime koasoandi ong nta—koasoandi ehu me pahn ehuiong aramas mour soutuk.
6. Ki Noha, iaduwen Koht kasalehda ah madamadau me pid kesempwalpen mour?
6 Koht pil mahsanih: “Mehmen me pahn kihsang amwail mour, I pahn kalokehki mehla, oh I pahn kauwehla mahn emen me pahn kemeikumwailla. Mehmen me pahn kemehla aramas, e pahn kamakamala rehn aramas; pwe aramas wiawihda rasehng Koht.” (Senesis 9:5, 6) Ke kak kilang sang mahsen wet ong aramas koaros me Koht wiahki ntahn aramas mour. Sounkapikipikdao ketikihong aramas mour, oh sohte me mweimwei en kihsang mour, me nta kin wehwehkiong. Ma emen duwehte Kain, me kemehla aramas, Sounkapikipikdao pahn ketikihsang mour en me kamaramaso.
7. Dahme kahrehda kitail en kesempwalki kehkehlik en Koht ong Noha me pid nta?
7 Nan sapwellime kehkehlik, Koht padahkiong aramas en dehr doadoahngki nta ni ahl sapwung. Mie pak ke kin medemedewe ia kahrepe Koht ketikihda kosonned wet? Oh pil, ia kupwuren Koht me pid nta? Pasapengpen met pid ehu padahk kesempwal nan Pwuhk Sarawi. E wia padahk en Kristian me keieu kesempwal, ahpw sarawi tohto pilada ren soikala padahk wet. Mehnia padahk met, oh iaduwen ahmw mour, pilipil, oh wiewia kan pid duwen met?
Nta—Iaduwen en Doadoahk Ni Ahl Pwung?
8. Nan Kosonnedo, dahme Siohwa irehdi me pid duwen doadoahngki nta?
8 Siohwa kasalehda oaretik kan me pid mour oh nta ahnsou me e ketikihong mehn Israel kan Kosonned en Moses ko. Ni e wia met, e wia kahk ehu ong pweidahn kupwure. Mwein ke wehwehki me nan Kosonnedo, mie anahnepen wia meirong ong Koht, me duwehte meirong en wahn krein, leh, oh wain. (Lipai 2:1-4; 23:13; Nempe 15:1-5) Pil mie meirong en mahn akan. Koht mahsanih: “Mour en mehkoaros me momour kin mihmi ni nta, ihme Kauno [“Siohwa,” NW] ketin koasoanehkihdi pwe nta koaros en kin wudekiong pohn pei sarawio pwehn kin kihsang dipen aramas akan. Nta, me iei mour, iei me kin kihsang dihp. Ihme kahrehda, Kauno ketin mahsanihong mehn Israel kan pwe irail de mehn liki kan me kin kousoan rehrail, ‘re dehpa tungoale uduk me nta mihmihte ie.’ ” Siohwa pil kapataiong me ma soun pwek mahn men de soumwet men kemehla mahn mehn mwenge, e anahne en kakerehdiong ntahn mahno nanpwel oh kihong pwehl powe. Sampah wia utupen aluweluwen Koht, oh ni aramas emen kakerehdiong nta nan pwehl, e kin kasalehda a pohnese me mour kapwurpwurlahng Koht.—Lipai 17:11-13; Aiseia 66:1.
9. Ni ahl dahieu me nta pahn doadoahk nan Kosonnedo, oh ia kahrepen met?
9 Kosonnedo sohte wia tiahk en kaudok ehu me sohte kesempwal ong kitail. Ke wehwehki ia kahrepen mehn Israel kan sohte mweimwei en tungoale nta? Koht mahsanih: “Ihme kahrehda Kauno ketin mahsanihong mehn Israel kan: ‘Re dehpa tungoale uduk me nta mihmihte ie.’ ” Pwekihda? “Pein ngehi wudekihdiong nta pohn pei sarawio pwehn kihsang dipamwail.” Met soh kasalehda ni sansal ia kahrepen Koht mahsanih ong Noha me aramas en dehr tungoale nta? Sounkapikpikdao pilada en kesempwalki nta, ni ah doadoahngki nta irair kesempwal ehu me kamourla me tohto. Nta me pwainla dihp. Ihme kahrehda pahn Kosonnedo, ihte ahnsou me Koht mweidada nta en doadoahk iei pohn pei sarawi pwehn tomwki dipen mehn Israel kan, me pekpekih Siohwa en mahkong irail.
10. Dahme kahrehda ntahn mahn sohte kak uhdahn kihsang dihp, ahpw soangen mehn kataman dah me meirong kan kin katamanki?
10 Soangen wiewiahn doadoahngki nta ong tomw sohte weksang tiahk en Kristian. Me pid duwen koasoandi wet, Kristian wahnpoaron Pohl ntingihdi: “Eri, duwen me sansal nan Kosonnedo, kereniong mehkoaros kin mwakelekelkihla nta; oh sohte lapwepen dihp kin mie ma nta sohte kin keredi.” (Ipru 9:22) Pohl kasalehda ni sansal me meirong en mehn Israel ko sohte kihsang diparail de wia ren unsekla. E ntingihdi: “Meirong ko kin katamankihong aramas akan diparail kan nan pahr koaros. Pwe ntahn kouwol oh kuht sohte mwahn pahn kak kamwakelehsang dipen aramas akan.” (Ipru 10:1-4) Ahpw mendahki met, soangen meirong pwukat anahn. E kin katamankihong mehn Israel kan me irail aramas dipan oh re anahne mehkot me laudsang, pwehn kak ale mahkpen diparail kan. Ahpw, ma ntahn mahn akan sohte kak pwainla dipen aramas, mie ehu soangen nta me kak pwainla dipen aramas akan?
Sapwellimen Sounkapikada Pasapeng
11. Dahme kahrehda kitail esehki me meirong en ntahn mahn akan kin mwete mehkot tohrohr?
11 Ni mehlel, Kosonnedo dokedoke mehkot me inenen kesempwal ong pweidahn kupwuren Koht. Pohl peideki: “Eri, dahme kahrehda Kosonnedo wiawihkihda?” E sapeng: “E kapatpatohng inowo pwe en kasalehda dahkot sapwung oh en mihmi lao lel kadaudok en Eipraamo me inowo wiawihongehr eh pahn pwarodo. Koht ketikihong tohnleng kan Kosonnedo pwe re en patohwando, ahpw aramas emen [Moses] me wia wiliepe ong aramas akan.” (Kalesia 3:19) Pil duwehte met, Pohl ntingihdi: “Kosonned en mehn Suhs ako sohte wia mehn kasansal unsek oh poatopoat ehu en dahme uhdahn mehlel; e wia kamwomwada soh dehde ehu en kamwahu kan me pahn kohdo.”—Ipru 10:1.
12. Me pid nta, iaduwen kitail kak kilang pweidahn kupwuren Koht?
12 Ni oaralap, tamanda me ni mwehin Noha Koht koasoanehdi me aramas kak kang uduk en mahn pwehn mour, ahpw re sohte kak kang nta. Mwuri, Koht mahsanih me “mour en mehkoaros me momour mihmi ni nta.” Ei, ong Koht nta wehwehkihong mour oh e mahsanih: “Pein ngehi wudekihong nta pohn pei sarawi pwehn wia tomwpen amwail mour.” Ahpw, kamwahu ehu pahn kohdo me pahn kasansalehda kupwuren Koht. Kosonnedo wia kamwomwada soh dehde ehu duwen mwahu kan me pahn kohdo. Soahng kamwahu dah kan?
13. Dahme kahrehda pwoulahn Sises inenen kesempwal?
13 Me kesempwalo dokedoke pwoulahn Sises Krais. Ke wehwehkiher me Sises lelohng lokolok oh kamakamala. E mehla duwehte emen loallap suwed. Pohl ntingihdi: “Pwe ni ahnsou me kitail luwet, Krais ketin pwoukihla aramas suwed kan ni ahnsou me Koht ketin kileledi. . . . Ahpw Koht ketin kasalehiong kitail ia uwen laud en sapwellime limpoak ong kitail: pwe ni ahnsou me kitail mihmi nan dihp, Krais ketin pwoukinkitailla. (Rom 5;6, 8)Ni ah pwoukinkitailla, Krais ketikihdahr tomwpen dipatail kan. Tomw wet wia ire me keieu kesempwal nan en Kristian padahk. (Madiu 20:28; Sohn 3:16; 1 Korint 15:3; 1 Timoty 2:6) Iaduwen met pid nta oh mour, oh iaduwen ahmw mour pidada ire wet?
14, 15. (a) Iaduwen ekei kawehwe kan en Episos 1:7 kin kawehwe duwen pwoulahn Sises? (b) Ire mehlel dahieu en Episos 1:7 me sohte nohn sansal?
14 Ekei sarawi kan kin kasalehda kesempwalpen pwoulahn Sises, ni towe kan kin nda soahng kan me duwehte “Sises matkinieihla.” Ekei kawehwehn Pwuhk Sarawi kan kin kawehwe Episos 1:7 duwehte met: “Pwehki ih oh sapwellime pwoula me kitail maioukihda dipatail irihrsangehr.” (The American Bible, by Frank Scheil Ballentine, 1902) “Ki pwoulahn Krais kitail saledeklahr oh kitail alehier mahkpen dipatail.” (Today’s English Version, 1966) “Pwehki Krais oh sapwellime meirong me kitail saledekihla, saledek wet wehwehki mahkpen dipatail.” (The New Testament, by William Barclay, 1969) “Pwehki pwoulahn Krais me miehier mahkpen dipatail oh kitail saledeklahr.” (The Translator’s New Testament, 1973) Ke kak kilang sang kawehwe pwukat duwen kesempwalpen pwoulahn Sises. ‘Ahpw,’ ekei mwein pahn nda me pwoulahn ‘Sises’ inenen kesempwal. Eri, dahme sohte itar nan ire pwukat?’
15 Ni mehlel, ma ihte iren kawehwe me mie, mwein ke sohte pahn tehk ehu ire kesempwal oh met pahn kahrehda ahmw wehwehki iren Pwuhk Sarawi en tikitik. Kawehwe pwukat sohte kasalehda lepin lokaiahn Krihk me kileledi nan Episos 1:7 me wehwehkiong “nta.” Ihme kahrehda kawehwehn Pwuhk Sarawi tohto, me duwehte New World Translation, kawehwehdi ire wet en pahrekiong dahme uhdahn kileledi: “Pwehki ntahn menet me kitail saledekihlahr, ei, miehier mahkpen dipatail kan, pwehki sapwellime limpoak kadek.”
16. Dahme lepin lokaia “ntahn menet” pahn kahrehong kitail en medemedewe?
16 Kawehwe wet “pwehki ntahn menet” kin ahneki wehwe kesempwal ong kitail oh kitail anahne medemedewe ire kan me pid nta. Mie me anahn laudsang ihte mehlahn emen aramas, de pil mehlahn Sises me wia aramas unsek men. E kapwaiada dahme Kosonnedo kin mwete, eri keieu ni Rahnen Tomw. Ni rahn kesempwal wet, mie mahn pilipilda kei me Kosonnedo kosonehdi pwehn meirongla. Mwuri, samworo lapalapo pahn ale ekis ntahn mahn ako oh wahlongala nan pere Keieu Sarawi en Tehnpas Sarawio oh patowandohng Koht duwehte me re patpato mwohn silangin Koht.—Eksodus 25:22; Lipai 16:2-19.
17. Iaduwen Sises kapwaiada dahme Rahnen Tomw kin mwete?
17 Sises kapwaiada dahme Rahn en Tomwo kin mwete, nin duwen me Pohl kawehwehda. Keieu, e koasoia me samworo lapalap en Israel pahn kin ketilahng nan pere me Keieu Sarawio pak ehu nan sounpar ehu oh ketikihda nta me e kin meirongkihong Koht “pwehki ih oh pwehki dihp me aramas akan kin wiahda ni ahr sehse dahme re kin wiewia.” (Ipru 9:6, 7) Pahrekiong dahme Rahnen Tomw kin mwete, Sises ketila nanleng mwurin ah iasada nin duwen ngehn ehu. Nin duwen ngehn ehu, me sohlahr ahneki paliwar uduk oh nta, Sises kak “welian kitail oh ketila mwohn silangin Koht.” Dahme e ketikihong Koht? Kaidehn mehkot me kitail kak kilang de doahke ahpw mehkot me inenen kesempwal. Pohl pil mahsanih: “Krais ketidohr nin duwen Samworo Lapalap . . . , e ketilahng, sohte ketiki ntahn kuht oh ntahn koupwul, pwe pein nta me e ketikihda pwe en ketikihong kitail mour soutuk. Pwe ma ntahn kuht oh kouwol kan . . . kin usupiong aramas me saminlahr ong kaudok, oh met kin kamwakeleirailda, eri ntahn Krais soh pahn manamansang? Krais ketin meirongkihong Koht pein ih unsek ni meirong mwakelekel ehu sang rehn sapwellime ngehn soutik. Ntahn Krais pahn kamwakelehda kapehditail kan sang tiahk en kaudok soh-katepe kan, pwe kitail en kak papah Koht ieias. Ei, Sises ketikidohng Koht moure.—Ipru 9:11-14, 24, 28; 10:11-14; 1 Piter 3:18.
18. Dahme kahrehda mahsen kan en Pwuhk Sarawi me pid duwen nta inenen kesempwal ong Kristian akan rahnwet?
18 Padahk mehlel kahrehda atail kak wehwehki ire kaselel kan me Pwuhk Sarawi mahsanihki duwen nta—dahme kahrehda Koht ahneki soangen madamadau wet ong nta, iaduwen atail pahn kilangwong nta, oh dahme kahrehda kitail anahne wauneki kosonned kan me Koht wiahda me pid doadoahngki nta. Ni ahmw pahn wadek Kristian kan ni Pali Nting en Krihk, ke pahn diarada ire tohto kan me pid duwen ntahn Krais. (Kilang koakon.) Ire pwukat kasalehda ni sansal me emen emen Kristian anahne pwoson “ntahn [Sises].” (Rom 3:25) Kitail kak ale mahk oh popohl rehn Koht “ki ntahn [Sises] kakerehdi.” (Kolose 1:20) Ih pil duwe met ong irail kan me alehdi inou tohrohr pwehn iang ih kakaun nanleng. (Luk 22:20, 28-30; 1 Korint 11:25; Ipru 13:20) Met pil dokdoke irail “pokon kalaimwun” nan rahnpwukat me pahn pitsang “kahn kamakam kohwalap” oh ahneki mour soutuk nan paradais nin sampah. Met duwehte arail ‘kamwakeledahr ahr likou kan nan ntahn Simpwulo.’—Kaudiahl 7:9, 14.
19, 20. (a) Dahme kahrehda Koht pilada en irehdi doadoahngki nta, oh ia pahn duwen atail pepehm ong met? (b) Dahme kitail anahne en men ese?
19 E sansal me nta wia mehkot tohrohr de kesempwal ehu mwohn silangin Koht. Kitail pil anahne kesempwalki. Sounkapikdao, me kin nsenohkin mour, kin sapwellimaniki pwungen irehdihsang aramas en dehr doadoahngki nta. Ni ah kin nsenohki duwen atail mour, e kosonnedi en doadoahngki nta ong ehu ahl me kesempwal, ahl me pahn wahdo mour soutuk. Met pid ntahn Sises. Ia wen atail paiekihda en Siohwa Koht ah kin rapahki dahme pahn mwahu ong kitail ni ah doadoahngki nta—ntahn Sises—pwehn kamourkitailla! Oh ia uwen atail kalahnganki en Sises meirongkihla nta pwehki kitail! Ni mehlel, kitail kak wehwehki pepehm en wahnpoaron Sohn ni e koasoia: “Kaping ong Sises Krais me kin ketin loalloalekitail, oh ketin kapitkinkitailla nta sang nan dipatail kan,—oh ketin wiahkinkitailla wehin samworo ehu, pwe kitail en kin papah Seme Koht—ei, kaping oh roson ong ih erein dih koaros kohkohlahte. Amen.”—Kaudiahl 1:5, 6.
20 Atail Koht me erpit oh Sounkomour kin medemedewe duwen doadoahk en kamour wet sangte mahs. Eri, mwein kitail kak idek, ‘Iaduwen met pahn kamwekid atail pilipil oh wiewia kan?’ Artikel en mwurin met pahn pid duwen peidek wet.
Iaduwen Ke Pahn Sapeng?
• Dahme kitail sukuhliki sang ire kan me pid Eipel oh Noha duwen kupwuren Koht ong nta?
• Nan Kosonnedo, soahng dah me Koht irehdi me pid duwen doadoahngki nta, oh pwekida?
• Iaduwen Sises kapwaiada dahme Rahnen Tomw kin mwete?
• Iaduwen ntahn Sises kak kamourkitailla?
[Kaokon nan Pali 12]
NTAHN IHS ME KIN WAHDO KAMOUR?
“Eri, kumwail mwasamwasahn pein kumwail oh pil sihpw akan koaros me ngehn sarawi ketikihong kumwail en apwahpwalih. Kumwail en wia silepen mwomwohdisohn Koht me e ketin sapwellimankilahr pwehki ntahn sapwellime Iehros.”—Wiewia 20:28.
“Pwehki eh pwoulahr, kitail pwunglahr rehn Koht ki sapwellimen Sises nta, met pahn pil doareikitailla sang ni engieng en Koht?”—Rom 5:9.
“A ma kitail kin weweid nan marain, duwehte ih me ketiket nan marain, eri, kitail kin miniminpene, oh ntahn Sapwellime Iehros Sises kin kamwakeleikitailsang nan dipatail akan koaros.”—1 Sohn 1:7.
“Eri ih duwen kupwuren Koht, pwe sapwellimeo en sapwellimanki uhdahn roson unsek en Seme. Oh Koht pil ketin kupwukupwure en ketin kasapahldohng audepen lahng oh sampah ong pein ih sang rehn sapwellimeo. Eri, sang ni pwoulahn sapwellimeo nin tuhkehn lokoloko popohl en Koht pwarodohngkitailehr, oh ih duwen eh pil ketin kasapahldohngehr reh mehkoaros nin sampah oh pil nanleng.”—Kolose 1:19, 20.
“Eri, riei ko, . . . pwehki ntahn Sises, kitail saledeklahr douluhl pwe kitail en iang pedolong nan wasa sarawihe.”—Ipru 10:19.
“Pwe kumwail ese soahng dah me kumwail kamaiaukihda sang nan soangen mour soh-katepe me kumwail sohsohki sang rehn samamwail ko; kaidehn kepwe sohr, duwehte silper de kohl; pwe meirong pweilapalap ehu, iei nta kesempwal en Krais, me iei sihmpwul mwakelekel oh sohte samin.”—1 Piter 1:18, 19.
“Kumwail kousoan nin sampah wet ni eh sohte amwail koapworopwor oh pil sohte iang ahneki Koht. Eri, met, pwehki amwail miniminiongehr Krais Sises, ntahn Krais kakaranih kumwaildohr, kumwail kan me kin dohsang mahso.”—Episos 2:12, 13.
“Komwi me warohng ketikihda pwuhken, oh lapwahsang mehn kateng kan. Pwehki omwi pwoulahr, oh pwehki ntahmwi, me komw ketin kasapahlkidohng aramas akan rehn Koht, sang kadaudok koaros, oh lokaia koaros, wehi koaros, oh sahpw koaros.”—Kaudiahl 5:9.
“Pwe ih me kin karakaraune riatail kan mwohn silangin Koht ni rahn ni pwong, pisikendihsangehr nanleng . . . Riatail ko kalowedier sang ni ntahn Sihmpwulo, oh sang ni me mehlelo me re kadehdehier; iei me re sohte kesempwalki ar mour lelohng mehla.”—Kaudiahl 12:10, 11.
[Kilel nan Pali 10]
Ki Kosonnedo, Koht kasalehda ni sansal me nta wia mehkot kesempwal ieu ong mahkpen dihp kan
[Kilel nan Pali 11]
Ki ntahn Sises, mour tohto poadondoarlahier