Kolokolete Madamadau Toupahrek Ong Duwen Doadoahngki Sakau en Wai
“Wain iei sounkapailok men, sakau en kasahliel kin kahrehda lokaiahn suwei, oh me kin ahneki salongalahn ketemen pwehki sakau en wai me nohn pweipwei.”—LEPIN PADAHK 20:1, NW.
1. Iaduwen sounmelkahkaho ah kawehwehda ah perenki ekei kisakis akan sang rehn Siohwa?
“SOANGEN kisakis mwahu oh kisakis unsek koaros kin kohsang powe, pwe e kin kohdihdohsang rehn Semen marain en lahng kan,” iei me wahnpoaron Seims ntingihdi. (Seims 1:17, NW) Sounmelkahkao ni kapehde ah kapingki sapwellimen Koht kisakis ngeder akan, e kouliki: “Komw kin ketin kawosadahng kou dihpw, oh ong aramas wahntuhke oh werentuhke, pwe aramas en kin kakairada wahnsahpw, oh kapwarehda wain mehn kaparanda nan kapehde, lehn olip mehn kansenamwahuwihda, oh pilawa mehn kakehlahda paliwere.” (Melkahka 104:14, 15) Wain oh sakau en wai teikan, re duwehte wahn tuhkehn mwenge oh iasai kan, pilawa, oh leh, soahng pwukat koaros kin wia kisakis kapai kei sang rehn Koht. Iaduwen kitail en doadoahngkin irail?
2. Soangen peidek dah kan me kitail pahn tehkpene me pid doadoahngki sakau en wai?
2 Kisakis kaperen ieu kin mwahu ma aramas me ale doadoahngki ni ahl me pwung. Karasepe, sukehn loahngalap “me mwahu,” ahpw “kang sukehn loangalap daulihala sohte mwahu.” (Lepin Padahk 24:13; 25:27) Nim “ekis wain” ele sohte suwed, ahpw doadoahngki sapwung sakau en wai wia mehkot me uhdahn suwed laud. (1 Timoty 5:23) Pwuhk Sarawi kin kaweidih kitail me “wain iei soun kapailok emen, sakau en kasahliel kin kahrehda lokaiahn suwei, oh me kin ahneki salonglahn ketemen pwehki sakau en wai me nohn pweipwei.” (Lepin Padahk 20:1, NW) Ia wehwehn “salongalahn ketemen pwehki sakau en wai”?a Ia uwen me kitail pahn nda me e dauliala? Iaduwen emen kak toupahrek nan irair wet?
“Salongalahn Ketemen Pwehki Sakau en Wai”—Iaduwen?
3, 4. (a) Dahme kasalehda me nim lao sakaula kin uhwong Pwuhk Sarawi? (b) Ia ekei kilelepen sakaula douluhl?
3 Nan Israel en kawao, mwahnakapw men me kin kapehden mwenge oh soun kamamsakau men pahn kin kosdi oh kamakamala. (Deuderonomi 21:18-21) Wahnpoaron Pohl kaweidki Kristian akan mahsanih: “Ahpw I koasoia duwen irail kan me kin wia riamwail Kristian ahpw kin nenek, kin noahrok, kin pwongih dikedik en eni kan, kin karaunlikamw, kin kamamsakau de kin loallap suwed. Kumwail dehr pil kin patehng irail oh iang mwenge rehrail.” E sansal mwahu me Pwuhk Sarawi kin keinapwih nim sakau en wai lao sakaula douluhl.—1 Korint 5:11; 6:9, 10.
4 Pwuhk Sarawi kawehwehda kilel akan me pahn kasalehda me aramas emen sakaula douluhl ni ah mahsanih: “Dehr mweidohng wain en kasongsonge iuk, mehnda ma e weitahta oh ke kak kilang mwomwen mesomw nan kepo, oh me lingan ni omw pahn kamwekid kepo. Pwe manda ke pahn duwehte mehmen me sineik kehpenehr. Mesomwen pahn kilangada soahng kapwuriamwei kei, oh ke sohte pahn kak kihda lamalam mwahu de omw lokaia kan sohte pahn pwung.” (Lepin Padahk 23:31-33) Nim sakau en wai dauliala kin duwehte keikeidi en sineik pwoisin, kin kahrehda soumwahu, salongalahn madamadau, oh pil kakete sohla kehn wasa. Aramas sakaula men kak kilangada “soahng kapwuriamwei kei” pwe e pahn mwomwen auramen. Oh sohte irepen en kak koasoia mehkan me sohte konehng en koasoia oh kak koasoakoasoaia mehkan me e kin kakete ekieki nan kapehde.
5. Ni ahl dah me nim sakau laud kin wia kaupe ieu?
5 Ahpw, iaduwen ma aramas emen nim sakau en wai ahpw kanahieng pwe e sohte pahn nim lao aramas kak kasawihada me e sakaula? Ekei aramas kin sohte nohn sansal me re sakaula mendahte ma re nimala wehieu. Ahpw, ma kitail medemedewe me soangen wiewia wet sohte keperpe, met kin wehwehki me kitail kin pitipitih pein kitail. (Seremaia 17:9) Ekis ekis e pahn doudoulahte mwowe oh aramaso sohla kakasang sakau en wai oh ih eri wiahla “lidun wain.” (Taitus 2:3) Soun nting pwuhk emen me ede Caroline Knapp koasoia iaduwen aramas emen kak wiahla soangen aramas me mehn wai kin kahdaneki “alcoholic”: “Met kin wia irair ieu me kin wawai ekis ekis lalaudla, kaineng oh rir.” Mihla pahn ineng en sakau en wai wia lidip en kamalahieu!
6. Dahme kahrehda aramas emen en uhdahn pere sang ih nim sakau en wai dauliala oh pil duwehte mwenge?
6 Tehk mahsen en kaweid en Sises me mahsanih: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet; pwe Rahno kakete leledohng kumwail ni ahnsou mwadang. E pahn kohdo, rasehng nsar ehu ong aramas koaros pohn sampah.” (Luk 21:34, 35) Nim sakau en wai sohte anahne en lel ni irair en sakaula pwe aramas emen en men memeir oh dangahngahla—ni paliwar oh pil pali ngehn. Ia pahn mwomwe ma aramaso mihmi nan irairo a rahnen Siohwa eri leledo?
Imwila Dah kan me kak Wiawi Sang ni Doadoahngki Sapwung Sakau en Wai
7. Dahme kahrehda doadoahngki sakau en wai ni ahl sapwung sohte pwungkiong kaweid en 2 Korint 7:1?
7 Sohte ihte nim sakau en wai kin kak kahrehong emen en lelohng soangen keper tohto—ni paliwar oh pil pali ngehn. Nanpwungen soumwahu kan me kin kohsang nim sakau en wai iei cirrhosis de mengpenehn ehn aramas, hepatitis en sakaun wai, oh ohlahn selin pepehm akan. Wie kangkang sakaukihier ahnsou reirei kak pil wiahda kanser, soumwahu en suke, oh soangen soumwahu en mohngiong kei oh soumwahu en nan mpwei en mwenge. Doadoahngki sakau en wai ni ahl sapwung me dehde mwahu me e sohte pwungiong iren Pwuhk Sarawi me kaweidki: “Eri kitail kamwakeleikitailsang mehkoaros me kin kasaminehla paliwar oh pali ngehn, oh kitail song en sarawihla unsek, ni atail pahn kin momour nan atail lemmwiki kupwur en Koht.”—2 Korint 7:1.
8. Nin duwen Lepin Padahk 23:20, 21, dahme doadoahngki sakau en wai ni sapwung kak imwikihla?
8 Doadoahngki sakau en wai ni ahl sapwung kak pil wehwehki kesehla mwahl mwohni, pil lekideksang nan doadoahk. Nanmwarki Solomon en Israel kawao, kaweidki aramas: “Dehr patehng aramas me kin kamam sakau, de medkihla kisin mwenge.” Dahme kahrehda? E kawehwehda: “Me kin kamam sakau oh kapehd en mwenge kan pahn semwehmwehla. Ma ihte me kin wia: mwenge oh memeir, ke pahn mwadang kihoula.”—Lepin Padahk 23:20, 21.
9. Dahme e loalokongki ong aramas emen en liksang douluhl nim sakau en wai me e pahn tangahki weren nansapw?
9 Pwuhk me adaneki The Encyclopedia of Alcoholism koasoia ehu irair keper ni ah nda: “Roporop kasalehdahr me sakau en wai kin ekis ekis kauwehsang aramas emen ah koahiek en tangahki weren nansapw, ah mwekidki ahnsou pahrek en mwekid en paliwar, kak en tetehk wasa, kilang mwahu mehkan oh tenek en pilipil pwung.” Imwilahn kapatapene tangahki weren nansapw oh sakau en wai kin wiahda kahpwal laud kan. Nan wehin United States kelepw, aramas nen kei kin mehla oh aramas lopw kei kin soahn nan ehu ehu pahr pwehki arail litepw en sakau en wai ahpw tangahki sidohsa. Irail me kin kehn lel apwal pwukat iei me pwulopwul kan, me kin kalap saikinte mie arail koahiek en tengetengen weren nansapw oh pil doadoahngki sakau en wai. Iaduwen aramas emen kak sakau ih tangahki weren nansapw ahpw kose me e kesempwaliki kisakis en mour me kohdohsang rehn Siohwa Koht? (Melkahka 36:9) Ma aramas emen kin kesempwaliki mour, e keieu mwahu en dehr nim douluhl sakai en wai ni ah pahn tangahki weren nansapw.
10. Iaduwen sakau en wai ah doadoahk ong ahn aramas madamadau, oh dahme kahrehda e keperki?
10 Sohte nim sakau ni itait kin kauwehla aramas akan kaidehnte ni paliwar ahpw pil pali ngehn. Pwuhk Sarawi mahsanih, “Wain kapw oh mering iei me kin kasalongehla poahsoan en madamadau mwahu.” (Oseia 4:11, NW) Sakau en wai kin kak kapwandehla wasa kan nan mwahliel me kin katanga madamadau oh pepehm akan. U. S. National Institute ong Drug Abuse wiahda ehu pwuhk koasoia, “Ni emen ah kin nim sakau en wai e kin kohsang nan mwasahl akan oh kolahng nan nta oh mwadangete leldahwohng nan mwahliel en aramas. Eri nim sakau en wai kin kapwandehla mwekid en wasa kan me nan mwahliel me kin katanga madamadau oh pepehm en aramas. Aramas eri kin tikitikla arail kanengamah oh ahnehkihda pepehm me re ahneki saledek laud.” Nan soangen irair duwehte met, atail ketemen kakete salongala oh kamengeiong kitail nan soangen songosong tohto.—Lepin Padahk 20:1.
11, 12. Soangen suwed dah me doadoahngki sakau en wai daulihala kak wiahiong atail pali ngehn?
11 Oh pil, Pwuhk Sarawi kaweidiki: “Eri, mehkoaros me kumwail kin wia, sohte lipilipil, de mehkot me kumwail kin tungoale de nim, kumwail wia ong ni kalinganpen Koht.” (1 Korint 10:31) Iaduwen—mie pak me nim sakau laud kin wahdohng Koht lingan? Kristian emen pahn kanahieng en dehr ahdsuwedki nim sakau en wai daulihala. Soahng wet pahn kauwehla mwaren Siohwa.
12 Iaduwen ma ahn Kristian emen a kamamsakau kahrehiong ienge tohn kaudok emen en dipekelekelki, mwein ele aramas menet tohnpadahk kapw men? (Rom 14:21) Sises mahsanih, “Mehmen me pahn kahrehiong en emen me tikitik pwukat me pwoson ie eh pahn dipada, e pahn mwahuwong ma lapalahn peitehl ehu pahn pirapiriong nin tepinwere e ahpw kekihrlahng nan kepin madau.” (Madiu 18:6) Nim sakau daulihala kak pil imwikihla aramas emen en kohsang ah pwukoa tohrohr akan nan mwomwohdiso. (1 Timoty 3:1-3, 8) Oh pil, kitail dehr manokehla kahpwal akan me doadoahngki sapwung sakau en wai kin kahrehong kahpwal nan peneinei.
Irewei sang Keper kan—Iaduwen?
13. Dahme keieu kesempwal ni atail pahn irehweisang kitail doadoahngki sakau en wai ni ahl sapwung?
13 Dahme kesempwal pwehn irehdi keper kan me kin kohsang doadoahngki sapwung sakau en wai kin pid ahn emen ah ese kasawihada wekpeseng en nim sakau ni itait oh sakaula. Ihs me kak ndahiong uhk iawasa ke pahn lel ahpw uhdi? Pwehki soahng tohto me pidada ire wet, sohte kosonned sansal me kin nda ia uwen tohtohn sakau en wai me emen kak nda me e daulihalahr. Emen emen ese pein ah itait, oh ih pein ireire. Dahme pahn sewese iuk en ese ia uwen me ke pahn nda me e daulihalahr? Mie mour en kaweid me kak kahluwa omw mehn tenek?
14. Mehn kaweid dah me pahn sewese iuk en kak koasonehdi wekpeseng en nim sakau ni itait oh nim sakau daulihala?
14 Pwuhk Sarawi mahsanih: “Samwa, katengehdiong loalomw omw loalokong oh erpit. Ke dehr mweidohng en dohsang uhk. Pwe iei ih me pahn kahrehiong uhk mour kaperen oh kansenamwahu.” (Lepin Padahk 3:21, 22) Mour en kaweid me kitail kak idawehn iei met: Uwen sakau en wai ieu me kin karotongala omw tenek oh kakonsehla omw kehl en madamadau iei e suwediong pein kowe. Ahpw, ke pahn mehleliong pein kowe ong keseupen ia uwen me ke sohte pahn daulih!
15. Soangen ahnsou dah me ehute kep en sakau pil nohn laudla?
15 Nan ekei irair akan, pil ehute pwoat kakete mihier ni irair en daulihala. Ni atail pahn tetehk keper me seri men nan kapehd en ah nohno kak lelohng ki sakau en wai, met pahn kahrehiong lih liseian emen en pilada en dehr sair sakau en wai. Oh pil, e sou pahn wia irair en kadek ieu emen en liksang nim sakau en wai mwohn mesen aramas emen me ahneki kahpwal en sakau en wai de aramas emen me sohte pwungki sakau en wai? Siohwa ketikihda kosonned ong irail oko me kin wia doadoahk en samworo nan Tehnpas Sarawio ni ah mahsanih: “Kumwail dehr nim wain oh sakau kehlail . . . ni amwail pahn pidelong ong nan Impwal en Mihding, pwe kumwail de mehla.” (Lipai 10:8, 9, NW) Kahrehda, ireweisang uhk nim sakau en wai mwohnte omw kohla ni mihding en Kristian akan, oh ahnsoun kalohk oh pil ni ahnsou me ke wia pwukoahn Kristian teikan. Oh pil, nan wehi kan me nim sakau en wai kin inapwih de kin mweimwei ongete soangen uwen sounpar en aramas ieu, Kristian akan uhdahn pahn wauneki kosonned en sahpwo.—Rom 13:1.
16. Dahme pahn sewese iuk en wia pilipil mwahu ni ahnsou me aramas emen kihong uhk sakau en wai?
16 Ma aramas kihong uhk sakau en wai, tepin peidek me ke pahn pein idek rehmw nan ahmw madamadau: ‘I pahn nim sakau mehnda ma pil ekiste?’ Ma ke pilada ken nim, ah en dehde mwahu nan omw madamadau iawasa ke pahn uhdi ie, oh ke dehr daulahsang. Ke dehr mweidong kadek en ih me kihong uhk sakau en kauwehla omw koasondi. Oh kanahieng soangen wasahn sakau me langada ken pein doandoaloa pein nimomw, me duwehte me kin wiawi ni ekei kamadipw en kapwopwoud kan. Nan wasa tohto, seri kan kosonned kin mweidohng irail en nim sakau en wai. Pahpa oh nohno ara pwukoa en kaweid neirail seri kan ong me pid nim sakau, oh pil tetehk arail wiewia kan ong me pid nim sakau en wai.—Lepin Padahk 22:6.
Ke Kak Powehdi Apwal Wet
17. Dahme kak sewese iuk en wehwehki mwahu ma mie omw kahpwal akan me pid doadoahngki sakau en wai ni ahl sapwung?
17 Doadoahngki ni sapwung wain oh sakau kehlail wia kahpwal ehu ong uhk? Ke dehpa sapwungala, ma doadoahngki ni sapwung sakau en wai tapida wia dihp rir ehu ong uhk, ahnsou keren kaupe kan pahn pwar rehmw. Kahrehda, kasawih kanahieng oh mehlel ong pein kowe. Pein idek rehmw soangen peidek en keseu me duwehte: ‘Ai nim sakau kin uk sang mahso? Kenei sakau kin kehlail sang mehn mahso? I kin kang sakau en wai pwe ien manokehla ai pwunod kan oh kahpwal akan? Mie aramas nan ai peneinei de pil kompoakepai me kin koasoia me re ekis perkidahr mwomwen ai kang sakau en wai? I kin kilang me e ekis apwallahr ien uhdi sang kang sakau en wai? I kin apwaliki en iresang sakau en wai ni sounpwong ehu de pil sounpwong kei? I kin ekihsang aramas teikan kep de pwoat depe me I kin nimala?’ Iaduwen ma pasapengpen peidek pwukat ekei kin “ei”? Ken dehr duwehte ohlo me kin ‘kilang mese nan kilahs oh mwadangete manokehla soangen aramas dah ih.’ (Seims 1:22-24) Nantihong kapwungala kahpwalo. Dahme ke kak wia?
18, 19. Iaduwen omw kak ire iuk sang nim sakau en wai daulihala?
18 Wahnpoaron Pohl kaweidki Kristian akan: “Kumwail dehr kin sakaukihla douluhl wain, pwe e pahn kaweikumwailla; a kumwail en kin direkihla ngehn sarawi.” (Episos 5:18) Koasonehdi ia uwen sakau en wai me itar me sohte daulihala ong uhk, oh koasonehdi ia uwen me konehng ah ke uhdi. Nantihong dehr daulihala, oh kolokol irair en powehdi rehmw. (Kalesia 5:22, 23) Mie ahmw werek me kin idingkin uhk en kang oh sakaula? Tetehk kanahieng. Pwuhk Sarawi mahsanih, “Ma ke pahn padahngk mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.”—Lepin Padahk 13:20.
19 Ma ke nim sakau en wai pwe ken manokehla omw apwal akan, a ke pein nantiong kamwahuwiala kahpwalo ni omw amas. Kahpwal akan kak mwahula ma ke doadoahngki kaweid sang Mahsen en Koht. (Melkahka 119:105) Ke dehr masak en rapahki sawas en Kristian elder likilik men. Ale ahnsou mwahu en doadoahngki sapwellimen Siohwa sawas kan mehn kakehlailiada omw pali ngehn. Kakehlailihala omw ehuiong Koht. Kapakap ong ih kaukaule—ahpw mehlel ong mehkan me pid omw luwet kan. Peki rehn Koht en ketin ‘kamwakelehda omw mwidihlihk kan oh omw mohngiong.’ (Melkahka 26:2, NW) Duwen atail koasoiapenehr nan artikel en mwowe, wia uwen omw kak koaros en keidwei nan elen lelepek.
20. Soangen mehn sawas dah me ke kak doadoahngki pwehn sewese iuk pere sang uhk ken nim sakau en wai nohn daulihala?
20 Iaduwen ma kahpwal en nim daulihala ke kin wiewia mendahte ma ke kin nantihong ahpw sohte kak? Eri, idawehn sapwellimen Sises kaweido: “Eri, ma apali pehmwen kahrehiong uhk nan dihp, lupukasang; pwe e mwahu ong uhk pehpali pedolong nan mour soutuk sang peh pokon lekdeklahng nan Gehenna.” (Mark 9:43, NW) Pasapeng iei: Ke dehr nim mehnda ma pil ekis. Ihme lih emen me kitail pahn kahdaneki Irene koasonehdi en wia. E koasoia, “Mwurin mpen sounpar riau elep ai sohla nim sakau en wai, I tepida medemedewe ma ehute kep pahn mwahu, I men kilangete ma I pahn kakohng. Ahpw ahnsowo me ahnekihda pepehm wet, I mwadangete kapakap ong Siohwa. I koasoanehdi teng nan loaleiet me I sohte pahn pwurehng ale sakau en wai lao lel nan ehu koasondi kapw en sampah pahn lelodo—de mwein pil ahnsowo soh.” Sohte tohnmetei laud ieu en liksang douluhl sakau en wai pwe ien kak iang mour nan sapwellimen Koht koasoandi pwung nan sampah kapw.—2 Piter 3:13.
“Tang ni Soangen Ahl Ehu Pwe Ken Kalohwehdi”
21, 22. Soangen kahpwal dah me kak irei kitail sang kitail en lel kesso nan weir en mour wet, oh iaduwen atail pahn kak pere pwe kitail dehpa sohte lel kesso?
21 Wahnpoaron Pohl karasahiong mour en Kristian duwehte weiren tang ehu ni ah mahsanih: “Kumwail ese mwahu duwen uhpenehn sounweiren tang kan—sounweiren tang kan koaros kin iang tang, ahpw mehtehmen rehrail me kin ale kisakis. Eri, ih pil duwen kumwail, kumwail tang idipek, pwe kumwail en iang ale kisakis. Sounmwadong koaros kin ale kaiahn mwahu nan ar mwadong kan, pwe re en kin alehdi elin kapwat ehu, ahpw e kin mwadang sohrala; a kitail kin ngidingid alehdi mwar ehu me pahn poatopoat. Ihme I sohte kin tang, pweiengki; oh ihme I kin pei, rasehng sounpaker men me sohte kin pakepakere mwahl nan wehwe. I kin kaloke paliwereiet oh irehdi pein ngehi, pwe I perki I dehr lekdekla mwurin ei kapahrengkihongehr meteikan Rongamwahwo.”—1 Korint 9:24-27.
22 Kisakis pahn kohwongete irail oko me pahn kanokehla weiren tango. Nan weiren tang en mour, doadoahngki sakau en wai ni ahl sapwung kak ireiukasang ken pweida. Kitail en doadoahngki kanengamah. Pwe tangatang ni koapworopwor anahne kitail en dehr iang doadoahngki “wain daulihala.” (1 Piter 4:3) Weksang met, kitail anahne doadoahngki kanengamah ni soahng koaros. Ong me pid sakau en wai, e wia elen loalokong kitail en “kesehla mouren soh pwoson Koht oh ineng suwed en sampah, oh ese kaunda nsenarail, oh momourki mour pwung oh sarawi nin sampah wet.”—Taitus 2:12.
[Footnote]
a Nan artikel wet “sakau en wai” kin doadoahk ong pihru, wain oh soahng teikan me alcohol en sakau en wai mih loale.
Ke Tamataman?
• Dahme kak kasalehda doadoahngki sakau en wai ni sapwung?
• Soang suwed dah me kin kohsang aramas ah doadoahngki sapwung sakau en wai?
• Iaduwen omw pahn kak pere iuk sang keper kan en doadoahngki sakau en wai ni ahl sapwung?
• Iaduwen aramas emen pahn kak powehdi kahpwal en doadoahngki sakau en wai ni ahl sapwung?
[Kawehwehpen kilel kan nan ehu ehu pali 9]
Wain “wiahiong mohngiong en aramas emen peren”
[Kawehwehpen kilel kan nan ehu ehu pali 10]
Kitail uhdahn pahn ese iawasahn uhdi oh wie kolokol
[Kawehwehpen kilel kan nan ehu ehu pali 11]
Medewedahr mwowe iahd me ke pahn uhdi
[Kawehwehpen kilel kan nan ehu ehu pali 12]
Kapakap ong Siohwa kaukaule ki omw luwet akan
[Kawehwehpen kilel kan nan ehu ehu pali 13]
Pahpa oh nohno ahneki pwukoa en kaweid neirail seri kan ong me pid duwen doadoahngki sakau en wai