Kolokol Madamadau en Paipel ong Roson Mwahu

“Ke uhdahn pahn poakohng Kaun-o, amwail Koht, nan . . . omw lamalam koaros unsek, oh omw kehl unsek.”—MARK 12:30.

1. Ia kupwuren Koht ong aramas nin tepio?

KUPWUREN Siohwa Koht ong aramas nin tepio sohte kin iangahki soumwahu oh mehla. Koht ketin pwilikihdi Adam oh Ihp nan mwetuwel en Ihden, de paradais kaperen pwe iei “en kin apwahpwalih oh sinsile,” kaidehn ihte sounpar 70 de 80 ahpw kohkohlahte. (Sen. 2:8, 15; Mel. 90:10) Ma tepin pwopwoudo kasalehda ara limpoak ong Siohwa oh uhpa sapwellime pwung en kaunda, eri, ira sohte pahn lelohng soumwahu, luwetala oh mehla.

2, 3. (a) Dahme kin wiawi ni ahnsou me emen kin mahla? (b) Ihs me pwukoahki mehla me kohsang Adam? Ia duwen met pahn kamwahula?

² Eklesiasdes irelaud 12 koasoia duwen “rahn akan oh sounpar kansensuwed kan” me iangahki mahla pwehki soh unsek en aramas. (Wadek Eklesiasdes 12:1-7.) E pahn “moangepwetala.” Neh kan me “kehlail ahnsou wet pahn luwetala.” Mese “pahn ediedla sohla nohn kak kilang wasa.” Ngih kan pahn malaulaula oh e “sohla pahn kak rukoa kisin mwenge.”

³ Irair pwukat sohte wia kisehn sapwellimen Koht kupwur ong aramas sangete nin tepio. Patehng met, mehla me aramas sohsohki sang rehn Adam iei ehu kisehn “doadoahk en Tepilo” me sapwellimen Koht Ohl pahn ketin kauwehkihla sapwellime Wehin Mesaia. Wahnpoaron Sohn ntingihdi: “Sapwellimen Koht Iehroso ketido pwehki kahrepe wet: pwe en kauwehla doadoahk en Tepilo.”—1 Sohn 3:8.

Konehng en Toupahrek ni Madamadau

4. Dahme kahrehda e konehng sapwellimen Siohwa ladu kan en ahneki madamadau toupahrek duwen arail roson mwahu? Dahme re pil kin pohnese?

⁴ Rahn pwukat, ekei sapwellimen Siohwa ladu kan kin lelohng kahpwal en soumwahu oh mahla me kin lelohng aramas koaros me sohsohki dihp. En ahneki madamadau toupahrek ong atail roson en paliwar nan soangen irair wet iei me mwahu oh konehng. E seu mwahu kitail en papah Siohwa ‘ki atail kehl unsek’? (Mark 12:30) Ni atail kin nantihong en ahneki roson mwahu, kitail anahne ahneki madamadau pwung oh pohnese me kitail sohte kak wia mehkot en kauhdi mahla oh kihsang soumwahu koaros.

5. Mehn kasukuhl dahieu me kitail kak ale sang sapwellimen Koht ladu lelepek kan me kin kalapw soumwahu?

⁵ Tohto sapwellimen Siohwa ladu lelepek kan kin dadaur pahn kahpwal en soumwahu. Epaprodaitus iei emen. (Pil. 2:25-27) Timoty iei iengen wahnpoaron Pohl me kin lelepek, oh e kin kalapw soumwahuki kapehde ihme kahrehda Pohl kangoangehki en “ale ekis wain.” (1 Tim. 5:23) Pein Pohl ahneki ‘kisin tek kamedek kis me kohieng ni paliwere.’ Mwein e soumwahuki mese de ekei soumwahu tohrohr me sohte wini kak kamwahwihala ahnsowo. (2 Kor. 12:7; Kal. 4:15; 6:11) Me pid ‘kisin tek kamedek kis me kohieng ni paliwere,’ Pohl kapakapki met ni ngidingid ong Siohwa. (Wadek 2 Korint 12:8-10.) Koht sohte ketikihsang Pohl ‘kisin tek kamedek kis me kohieng ni paliwere.’ Ahpw Koht ketin kakehlahda ih pwe en kak dadaur. Sapwellimen Koht manaman sansalda ni en Pohl luwet. Mie mehkot kitail kak sukuhliki sang ire wet?

Dehr Nohn Pwunodki Epwelpen Roson en Paliwar

6, 7. Dahme kahrehda kitail en dehr nohn pwunodki atail roson mwahu?

⁶ Sounkadehdehn Siohwa kan kin ale soangsoangen sawas kan ong roson mwahu. Makasihn en Awake! kin kalapw audaudki ire kan me pid duwen roson en paliwar. Se sohte kin nda me ehu sawas mwahu sang sawas teikan, ahpw se kalahnganki sawas en irail semen kan en palien roson mwahu. Ei, kitail wehwehki me kitail saikinte kak ale roson en paliwar me unsek. Ihme kahrehda e wia elen loalokong en dehr nohn pwunodki epwelpen roson en paliwar. Atail wiewia pahn weksang en irail kan me ‘sohte arail koapworopwor.’ Irail lemeleme me ihte mour en met, kahrehda irail kin doadoahngki soangen wiepen sawas koaros pwehn kamwahwihala arail soumwahu. (Ep. 2:2, 12) Kitail koasoanehdi teng en dehr kesehla sapwellimen Siohwa kupwur pwehn doarehla atail mour en ahnsou wet. Pwehki kitail kamehlele me ma kitail pahn lelepek ong Koht, kitail “pahn kak lelohng ni mouro me uhdahn mour mehlel” me iei mour soutuk nan koasoandi kapw.—1 Tim. 6:12, 19; 2 Pit. 3:13.

⁷ Mie pil ehu kahrepen kitail en dehr nohn pwunodki roson en paliwar. Nohk pwunodki atail roson en paliwar pahn kahrehong kitail en kak ahnekihla lamalam en roporop. Pohl kin kalekehki keper wet ong mehn Pilipai kan ni eh kangoange irail en ‘pohnese ineng . . . en meteikan, kaidehn arail kante.’ (Pil. 2:4) E konehng kitail en kin apwalih pein kitail, ahpw en nsenohki mehlel riatail kan oh pil aramas akan me kitail kin wahlahng ‘rongamwahu en Wehio’ pahn sewese kitail en dehr nohn pwunodki atail roson mwahu.—Mad. 24:14.

8. Dahme atail pahn nohn pwunodki atail roson mwahu pahn kak kahrehong kitail en wia?

⁸ Ma Kristian emen nohn pwunodki eh roson mwahu e pahn kak kahrehong en pohnsouwehla mehkan me pid Wehio. Pwunodki laud atail roson kak kahrehong kitail en idingohng meteikan atail madamadau ong mehnia sawas en roson mwahu me keieu mwahu. Me pid duwen met, tehk mouren mahsen en Pohl: “Kumwail en kak pilada dahme keieu kesempwal. Eri, kumwail ahpw pahn saledeksang soangen samin oh sapwung koaros ni Rahnen Krais.”—Pil. 1:10, NW.

Dahme Keieu Kesempwal?

9. Ia ehu soahng me keieu kesempwal me kitail en dehr manokehla? Dahme kahrehda?

⁹ Ma kitail kin pilada dahme keieu kesempwal, kitail pahn iang kaukaule wia doadoahk en kakehlaka en meteikan pwoson. Met kin wiawi sang ni atail kin kalohki oh padahngki Mahsen en Koht. Doadoahk kaperen wet kin wia kamwahupatail oh irail kan me kitail kin padahki. (Lep. Pad. 17:22; 1 Tim. 4:15, 16) Ekei pak makasihn en Kahn Iroir oh Awake! kin kasalehda ia duwen ekei riatail brother oh sister me ahneki soumwahu laud. Ire pwukat kin ekei pak kasalehda ia duwen irail kin powehdi arail kahpwal en soumwahu laud kan. Re kin kak manokehla arail kahpwal kan erein ahnsou kis ni arail kin nannanti sewese meteikan en esehla Siohwa oh sapwellime inou kaselel kan.a

10. Dahme kahrehda e kesempwal atail pilipil en wiepen sawas kan ong roson mwahu?

¹⁰ Ni Kristian emen me koahiek en wiahda pilipil kin lelohng kahpwal en roson mwahu, e pwukoahki “pein wa eh wisik” ni eh pahn pilada sawas kan ong eh roson mwahu. (Kal. 6:5) Ahpw kitail en tamataman me atail pilipil kan kesempwal rehn Siohwa. Duwehte atail kin wauneki mouren kaweid me pid “liksang . . . nta,” atail kesempwaliki Mahsen en Koht pahn kamwakid kitail en pil liksang soangen sawas en roson mwahu kan me kak kauwehla mouren iren Paipel kan de atail nanpwungmwahu rehn Siohwa. (Wiewia 15:20) Ekei wiepen sawas kan kin mwomwen duwehte wiepen wunahni. Siohwa kalahdeki irail mehn Israel me kin wia wiewiahn “akmanaman” de tiahk en wunahni kan. E ketin mahsanih: “Sohte katepen amwail kin wiahiong ie meirong; I pwohsuwedki amwail kin isik warpwohmwahu. I solahr kak kupwuramwahwih amwail Sarawien Maram Pwul kan, rahnen Sapad kan, wiewiahn akmanaman kan oh amwail pokon sarawi kan, pwe re saminkilahr dipamwail kan. I kin kalahdeki amwail wiewia suwed kan, oh pil kamadipw kan.” (Ais. 1:13, NW) Ni mehlel ahnsoun soumwahu kaidehn ih ahnsoun wia mehkot me pahn kerempwahla atail kapakap oh kauwehla atail nanpwungmwahu rehn Koht.—Koul Ked. 3:44.

“Madamadau Pwung” Kesempwal

11, 12.  Ia duwen “madamadau pwung” kin pid atail pahn pilada sawas kan ong roson mwahu?

¹¹ Ni atail kin soumwahu, kitail sohte kin kasik Siohwa en ketin kamwahwihkitailla ki ehu manaman, ahpw kitail kak kapakapki erpit ni atail pahn pilada sawas akan. Kitail anahne rapahki kaweid nan atail pilipil kan sang ni kaweid en Paipel oh atail en ahneki madamadau pwung. Ma irairo mehkot me inenen kesempwal, e pahn wia elen erpit en ale kaweid tohto sang rehn semen kan ahpw kaidehn emente duwehte me Lepin Padahk 15:22 kasalehda: “Ale kaweid koaros uwen me ke kak, ke ahpw pahn pweida, pwe ma soh, ke pahn pwupwudi.” Wahnpoaron Pohl kangoange ienge me pwoson kan en “ahneki madamadau pwung, oh momourki mour pwung oh sarawi nin sampah wet.”—Taitus 2:12, NW.

¹² Tohto me ahneki soangen irair me lih soumwahu men wia ni mwehin Sises. Nan Mark 5:25, 26 kitail wadek: “Lih emen pil iang mi wasao, me kohkohwahki mehn warmwowi erein sounpar eisek riau. E ahpw reperepen mour rehn sounwini tohto oh kesehkilahr nah mwohni kan koaros, ahpw sohte katepe, pwe e susuwedlahte.” Sises poakehla liho oh kamwahwihala. (Mark 5:27-34) Pwehki sohla koapworopwor en ekei Kristian akan, met kahrehda arail wiahda pilipil en sawas kan me kin kauwehla kaudok min.

13, 14. (a) Ia duwen Sehdan kak doadoahngki atail pilipil en sawas en roson mwahu pwehn kauwehla atail loalopwoat? (b) Dahme kahrehda kitail en dehr karanih soahng koaros me pid wunahni?

¹³ Sehdan pahn doadoahngki soangen wiepe koaros pwehn kahrehiong kitail en sohpeiweisang kaudok mehlel. Duwehte eh kin doadoahngki tiahk en nenek oh noahrok dipwisou pwehn kahrehiong ekei en pwupwudi, e kin song en kauwehla loalopwoat en meteikan ki wiepen sawas kan me kakete pidada wunahni. Kitail kin kapakap ong Siohwa en pere kitail sang ‘me suwedo’ oh “soahng suwed koaros.” Eri kitail en dehr mweidkitailla pahn manaman en Sehdan sang ni atail pahn karanih soahng kan me pid wunahni.—Mad. 6:13; Taitus 2:14.

¹⁴ Siohwa keinepwihsang mehn Israel kan wiewiahn kosetipw oh wunahni. (Deud. 18:10-12) Pohl ntingihdi me “wunahni” pil iang “wiewia kan nin duwen ahnepen aramas.” (Kal. 5:19, 20) Patehng met, “sounwunahni kan” sohte pahn iang kisehn sapwellimen Siohwa koasoandi kapw. (Kaud. 21:8) Sansal me Siohwa kin ketin kalahdeki soahng koaros me pid wunahni.

“Kumwail Kasalehda Toupahrek”

15, 16. (a) Dahme kahrehda kitail anahne erpit ni atail kin pilada sawas en roson mwahu? (b) Kaweid erpit dah me governing body kihda ni mwehin tepin Kristian?

¹⁵ Sang ni dahme kitail koasoiahier, ma mie atail peikasal duwen mehkot me pid wiepen sawas kan, e pahn wia elen loalokong en soikala. Mehlel me pwehki kitail sohte kak kawehwe ia duwen elen sawas ehu kin kadoadoahk, met sohte wehwehki me e kin pid wunahni. En doadoahngki kaweid en Paipel me pid sawas en roson mwahu, kitail kin anahne ahneki erpit me kohsang Mahsen en Koht iangahki koahiek en madamadau. Kitail kin diar kehkehlik wet nan Lepin Padahk irelaud 3: “Likih KAUN-O ni mohngiongomw unsek. Dehr koapworopworki mehkan me ke pein lemeleme me ke ese. Tamanda KAUN-O ni omw wiewia kan koaros, oh e pahn ketin kasalehiong uhk ahl me pwung. Samwa, katengehdiong loalomw omw loalokong oh erpit. . . . Pwe iei ih me pahn kahrehiong uhk mour kaperen oh kansenamwahu.”—Lep. Pad. 3:5, 6, 21, 22.

¹⁶ Ni atail kin nannantihong en ahneki roson mwahu, kitail anahne en kanahieng kitail en dehr katihasang sapwellimen Koht kupwuramwahu ni atail kin song en kamwahwihala soumwahu de kauhdi mahla. Me pid roson mwahu oh pil duwehte ire teikan, kitail anahne “kasalehda toupahrek ong aramas koaros” sang ni atail pahn momourki kaweid en Paipel kan. (Pil. 4:5, NW) Nan kisinlikou kesempwal ehu sang governing body ni mwehin tepin Kristian ako, kaweidih Kristian akan en liksang pwongih dikedik en eni, nta oh nenek. Kisinlikouo kasalehda inou ehu: “Kumwail pahn pweida ma kumwail pahn kapwaiada soahng pwukat.” (Wiewia 15:28, 29) Ni ahl dah?

Epwelpen Roson Mwahu ni Toupahrek, Pwe Roson Unsek Kohkohdo

17. Ia duwen atail ahneki roson mwahu sang ni atail kin kapwaiada mouren kaweid en Paipel?

¹⁷ Emenemen en pein idek reh, ‘I kin pohnese kamwahu kan me kohsang ni ei kapwaiada mouren kaweid kan en Paipel me pid nta oh nenek?’ Pil medewe duwen kamwahu kan me kitail alehier pwehki atail nantihong en kamwakeleikitailsang mehkoaros me kin kasaminehla paliwar oh madamadau. (2 Kor. 7:1) Sang ni atail kin peikiong koasoandi en Paipel kan me pid mwakelekel, kitail kin pere kitail sang soumwahu kan. Kitail kin pweida pwehki kitail kesehla sika oh wini suwed me kin kauwehla paliwaratail oh atail nanpwungmwahu rehn Koht. Pil medewe kamwahu ong atail roson me kohsang atail kin toupahrek ni atail kin mwenge oh nim. (Wadek Lepin Padahk 23:20, 21; Taitus 2:2, 3.) Kommoal oh eksersais kak sewese atail roson en paliwar, ahpw atail kin kapwaiada kaweid en Paipel kin sewese laud atail roson mwahu oh atail nanpwungmwahu rehn Siohwa.

18. (a) Dahme kitail pahn keieu kesempwaliki? (b) Mehnia kokohp me pid duwen roson mwahu me kitail kak kasikasik?

¹⁸ Me keieu kesempwal iei en apwalih oh kakehla atail nanpwungmwahu rehn Samatail nanleng, utupen atail “mour ahnsou wet, oh pil ahnsou kohkohdo” nan sapwellime sampah kapw me e inoukidahr. (1 Tim. 4:8; Mel. 36:9) Nan sapwellimen Koht sampah kapw, kitail pahn ahneki nanpwungmwahu rehn Siohwa oh pil roson mwahu pwehki lapwepen dipatail kan ki meirong tomw en Sises. Sihmpwul en Koht iei Sises Krais pahn kahluwa kitail ong “pilen komour,” oh Koht pahn ketin limwihasang pilen masatail koaros. (Kaud. 7:14-17; 22:1, 2) Kitail pil pahn kilang pweidahn kokohp kaselel wet: “Sohte emen me . . . pahn kaulimkihla eh soumwahu.”—Ais. 33:24.

19. Ni atail kin apwahpwalih atail roson mwahu, dahme kitail kak kamehlele?

¹⁹ Kitail kamehlele me komourpatail kerendohr, oh kitail kasikasik rahno me Siohwa pahn ketin wekidala irair en soumwahu oh mehla me aramas ahneki. Ahpw nan ahnsou wet kitail kin kamehlele me Samatail limpoak pahn ketin sewese kitail en kak dadaur pahn apwal en medek oh weirek pwehki e ‘kin ketin apwahpwalih kitail.’ (1 Pit. 5:7) Eri kitail en apwalih atail roson mwahu ni atail pahn idawehn kaweid sansal kan me mih nan sapwellimen Koht Mahsen!

[Nting tikitik me mi pah]

Kousapahl

• Ihs me pwukoahki soumwahu oh ihs me pahn kamaiau kitail sang kahpwal me kohsang dihp?

• Mendahki e konehng kitail en kin nsenohki atail roson mwahu, dahme kitail en kanaiehng?

• Dahme kahrehda atail pilada elen sawas akan kesempwal ong Siohwa?

• Me pid duwen atail roson mwahu, ia duwen atail kak paiekihda atail peikiong mouren kaweid en Paipel kan?

[Kawehwehpen kilel kan nan ehu ehu pali 23]

Tohnsampah sohte kapikipikda pwe ren soumwahu oh mahla

[Kawehwehpen kilel kan nan ehu ehu pali 25]

Mendahki kahpwal kan, sapwellimen Siohwa aramas akan kin peren nan arail kalohk