Mahsen en Siohwa Kin Ieias

Ire Kesempwal akan Sang nan Pwuhken Kaudiahl​—II

DAHME mi mwohn irail akan me kin kaudok ong Siohwa Koht oh irail kan me sohte kin? Dahme pahn wiawihong Sehdan oh ienge ngehn saut akan? Dahme aramas peik kan pahn paiekihda erein Pahr Kid en Kaundahn Krais? Pasapengpen peidek pwukat oh peidek kesempwal teikan kin sansalda nan Kaudiahl 13:1–22:21.a Ire laud pwukat kin audaudki kaudiahl 9 sang me 16 ko me wahnpoaron Sohn alehdi sounpar 60 samwa mwurin Sises ketin pwoula.

Sohn ntingihdi: “Meid pai aramas me kin lohki audepen pwuhk wet, oh irail koaros me kin iang rong mahsen kan en kokohp wet oh kin kapwaiada!” (Kaud. 1:3; 22:7) En wadek oh kapwaiada dahme kitail sukuhlki sang pwuhk en Kaudiahl kak kamwakid atail mohngiong, kakehlaka atail pwoson Koht oh sapwellime Ohl Sises Krais, oh kihong kitail koapworopwor kaselel ehu ong ahnsou kohkohdo.

WUDEKLAHN DAHL ISUH KAN EN SAPWELLIMEN KOHT ENGIENG

(Kaud. 13:1–16:21)

Kaudiahl 11:18 mahsanih: “Me rotorot [“wehi,” NW] akan inenen lingeringer kowahlap, pwe ahnsoun omwi engieng eh leledohr, e lelehr ahnsoun . . . kauwehla irail kan me kin kauwehla sampah!” Pwehn kasalehda dahme kahrehda sapwellimen Koht engieng leledohr, kawaluhn kaudiahlo kin kasalehda wiewia kan en “mahn kamasepwehk men me . . . kode me eisek oh moange me isuh.”​—Kaud. 13:1.

Nan keduwau en kaudiahlo, Sohn kilangada “Sihmpwulo me ketiket pohn dohlen Saion; oh aramas lopw pahnen pahkid me iang ket wasao, . . . re kamaiaudahsangehr rehn aramas teikan.” (Kaud. 14:1, 4) Mwurin mwo, tohnleng kan pakairkihda pakair kei. Nan kaudiahl en mwurio, Sohn kilangada “tohnleng isimen me kolokol ni pehrail kan ikimwurilahn kalokolok isuh.” E sansal me Siohwa ketin mahsanihong tohnleng kan en wudekidi “dahl isuh kan en engieng en Koht” ong wasa kei nan en Sehdan sampah wet. Dahl ko kin audaudki sapwellimen Koht mahsen en kadeik kan me e pahn ketin wia. (Kaud. 15:1; 16:1) Kaudiahl riau pwukat oaritikiada kadeik teikan me Wehio pahn wia ni ahnsou me keisuhwen pepeuk sowi oh kesiluhwen kahpwalo pahn wiawi.​—Kaud. 11:14, 15.

Pasapengpen Peidek kan me Pid Duwen Iren Paipel kan:

13:8​—Dahkot “pwuhken mour en Sihmpwulo”? Met kin wia pwuhken karasaras ehu me audaudki eden irail kan koaros me pahn iang Sises Krais kaunda sapwellime Wehi nanleng. E pil audaudki eden irail me keidi kan me mihmihte pohn sampah me ahneki koapworopwor en mour nanleng.

13:11-13​—Ia duwen mahn kamasepwehk me kode riau kin duwehte drakono oh kin kamwerehdi sang nanleng kisiniei? Pwehki mahn me kode riau me iei Kaundahn Anglo Amerika kin lokaia duwehte drakono, met kin kasalehda me e kin kamasepwehki, idingki, oh doadoahngki elen lemei pwe aramas akan en pwungki eh kaunda. E kin kamwerehdi kisiniei sang nanleng ni e mwomwehda emen soukohp oh kose me e kalowehdier manaman suwed akan en nan mahwen Keieu oh Keriau en sampah oh pil powehdier kaundahn Communist, de koasoandi ehu me aramas koaros duwehpene oh irail me pahn koasoanehdi dahme pahn wiawi.

16:17​—Dahkot “nan wehwe” me keisuhwen dahlo wudekidi powe? “Nan wehwe” wet kin wehwehki en Sehdan irair en madamadau, “me kin kamwakamwakid oh kakaun irail kan me kin uhwong Koht.” Koasoandi suwed wet en Sehdan kin esingengki ahng poisin me kohsang nan wehwe wet.​—Ep. 2:2.

Mehn Kasukuhl kan ong Kitail:

13:1-4, 18. “Mahn kamasepwehko” kin wia kilelepen koperment en aramas akan me kohda “sang nan madau,” me wehwehki tohnsampah me liseliping. (Ais. 17:12, 13; Dan. 7:2-8, 17) Mahn menet, me Sehdan wiahda oh kihong ih manaman, ahneki nempe wet 666, me kasalehda uwen soh unsek en mahno. Atail wehwehkihla wehwepen mahn menet kin sewese kitail en dehr idawehn de kaudokiong ih duwehte me tohnsampah kin wia.​—Sohn 12:31; 15:19.

13:16, 17. Mendahki kahpwal akan me kitail ele lelohng nan atail mour en ehuehu rahn, duwehte “pwainda mehkot de netikihla mehkot,” kitail en dehr mweidohng pein kitail en mihla pahn kaundahn mahn menet. En mweidohng ‘kilel ehu [en mahno] ni pehtail palimaun de nin temwetail kan’ kin wehwehki me kitail mweidohng mahno en kaunda atail wiewia de madamadau kan.

14:6, 7. Pakair en tounlengo padahkihong kitail me kitail anahne en kalohki rongamwahu en Wehin Koht ni karuwaru. Kitail anahne sewese neitail tohnsukuhl en Paipel kan en kakairada arail lemmwiki Koht oh kihong kaping ong Siohwa.

14:14-20. Ni ahnsoun “dolung wahnsahpw nin sampah,” me kin wehwehki rikrikpenehn irail kan me pahn komourla, nekier, e pahn wia ahnsou me tounlengo pahn kesehdiong “mwetin wain en sampah” nan “wasahn tiak wain, me wehwehki sapwellimen Koht engieng kowahlap.” Mwetin waino, me iei en Sehdan koperment suwed me kaunda tohnsampah iangahki ‘wah’ suwed kan, pahn kasohrala soutuk. Kitail en koasoanehdi teng en dehr iangala mwetin wain wet.

16:13-16. “Ngehn suwed kan me kin wiahda kilel kapwuriamwei kei” kin wehwehki koasoi likamw me kohsang ngehn saut akan pwehn kahrehiong nanmwarki kan en sampah en dehr wekidala arail madamadau pwehki wudekilahn dahl isuh en sapwellimen Koht engieng, ahpw irail en uhwong Siohwa.​—Mad. 24:42, 44.

16:21. Ni kaimwseklahn koasoandi suwed wet eh kerendohr, pakairpen sapwellimen Siohwa rahnen kadeik ong en Sehdan koasoandi kin pidada mahsen kehlail en sapwellimen Koht kadeik kan, me rasehng takai aihs. Mendahki met, pali laud en aramas pahn lahlahwe Koht.

NANMWARKI ME KANA KAUNDAHR

(Kaud. 17:1–22:21)

“Papilon Lapalap,” me iei minimin en kaudok likamw koaros kin wia ehu kisehn koasoandi kasaut en ahn Sehdan sampah. Kasansal kaeisek ehu kin kasalehda me iei ih “lihen netiki paliwere ndand” me “mwomwohd pohn dakepe, iei mahn weitahta kamasepwehk men.” “Kode eisek” en mahn kamasepwehko me lih menet dake pahn kamwomwala liho douluhl. (Kaud. 17:1, 3, 5, 16) Pwehki lihen netiki paliwere menet kin karasahiong “kahnimw lapalap,” kairekdi en kaudiahl kan mwuhr kin pakairkihda duwen eh pahn pwupwudi oh mahsen karuwaru kohwongehr sapwellimen Koht aramas akan en “tangasang.” Me tohto kin mwahieiki pwupwudi en kahnimw lapalap wet. Ahpw peren laud wiawi nanleng pwehki “ahnsoun kapwopwoud en Sihmpwulo, oh sapwellime lih kamwohd onopadahr.” (Kaud. 18:4, 9, 10, 15-19; 19:7) Nan kaeisek siluh en kasansal ko, soundake “oahs pwetepwet” mwesel kohla pwehn mahweniong wehi kan en sampah. E pahn ketin kasorehla sampah suwed wet en Sehdan.​—Kaud. 19:11-16.

Eri ia duwen “serpent en kawao, me iei Tepil de Sehdan”? Iahd me e pahn “lekdeklahng nan lehn kisiniei”? Iei met ehu ire me pahn pwarada nan kasansal kaeisek pahieu. (Kaud. 20:2, 10) Kasansal riau me kaimwisekla kasansal kan koaros me Sohn alehdi kin kasalehda ia pahn duwen mour erein Pahr Kido. Ni imwiseklahn “audepen pwuhk wet” de kaudiahl kan, Sohn eri kilangada ‘pillap en pilen komouro, pwilipwilwei nanwerengen ahl en kahnimwo’ oh luhk kaselel ehu kohwong irail koaros “me men nimpildahr.”​—Kaud. 1:1; 22:1, 2, 17.

Pasapengpen Peidek kan me Pid Duwen Iren Paipel kan:

17:16; 18:9, 10​—Dahme kahrehda “nanmwarkien sampah kan” kin mwahiei ki dahme pein irail kamwomwalahr? Kahrepen arail mwahiei kin kasalehda arail roporop. Mwurin kamwomwalahn Papilon Lapalap; nanmwarkien sampah kan eri wehwehkihda ia uwen eh kin wia katep laud ong irail. E kin doadoahngki eh manaman pwehn mwomwen kamwahwihala arail wiewia mwersuwed kan. E pil kin sewese irail en kihpene me pwulopwul kan pwehn iang kohla mahwen. Laudsang met, e keieu pwukoahki kahrehiong aramas akan en uhpah soangen koasoandi pwukat.

19:12​—Dahme kahrehda sohte emen likin Sises me mwahngih wehwehn mwareo? Mwar wet kin mwomwen dokedoke pwais de pwukoa kan, duwehte me kileldi nan Aiseia 9:6, me Sises ketin pwaisanki erein rahnen Kauno. Sohte emen ese duwen mwar wet ahpw ihete, oh pwais kaselel pwukat kin tohrohr sang pwukoa teikan oh ih kelehpw me kak mwahngih wehwehn en sapwellimaniki pwukoa ileile wet. Ahpw, Sises ketin mweidohng irail me wia kisehn lih kamwohdo en iang pwukoahki pwais kaselel pwukat, oh e ‘pahn ntingihediong pohrail pein mware kapwo.’​—Kaud. 3:12.

19:14​—Ihs me pahn iang Sises mahwen nan Armakedon? Me pahn iang “karis en sounpei en nanleng kan” oh idawehn Sises nan sapwellimen Koht mahwen iei irail tohnleng kan oh pil irail me keidi kan me kalowehdier sampah oh aleier katingparail nanleng.​—Mad. 25:31, 32; Kaud. 2:26, 27.

20:11-15​—Eden ihs irail akan me ntingdi nan “pwuhken me momour kan”? Ih pwuhk wet me audaudki eden koaros me warohng paieki mour soutik, me iei Kristian keidi kan, pokon kalaimwun, oh sapwellimen Koht ladu lelepek ‘me mwahu kan me pahn iasada sang mehla.’ (Wiewia 24:15; Kaud. 2:10; 7:9) Eden irail ‘me suwed akan me iasada sang mehla’ pahn ntingdi nan “pwuhken me momour kan” ihte ma arail wiewia kan pahn pahrekiong kaweid kan en “mehkan me ntinting nan pwuhk ko” me pahn papahkpeseng erein Pahr Kido. Ahpw mehn nting wet pahn kak irihrla. Eden irail me keidi kan pahn mihmi kohkohlahte pwehki irail kadehdehier me irail kin lelepek lao lel mehla. (Kaud. 3:5) Ahpw eden irail akan me paiekihda mour nin sampah pahn mihmi kohkohlahte ma irail pahn pitsang kaimwiseklahn kasongosong me pahn wiawi imwin pahr kido.​—Kaud. 20:7, 8.

Mehn Kasukuhl kan ong Kitail:

17:3, 5, 7, 16. “Erpit me kin sang powe” kin sewese kitail en wehwehki ‘wehwe rir en liho, oh mahn kamasepwehk me e dakeo.’ (Seims 3:17) Nin tepio, mahn kamasepwehk wet iei League of Nations ahpw mwuhr e wiahla United Nations. Wehwe rir wet anahne en kamwakid kitail en ngoangki kalohki rongamwahu en Wehin Koht oh pakairki sapwellimen Siohwa rahnen kadeik.

21:1-6. Kitail kak uhdahn kamehlele me kokohp kan duwen kapai pwukat pahn kaundahn Wehio pahn uhdahn pweida. Pwekida? Pwehki ire kan kasalehdahr: “E imwiseklahr!”

22:1, 17. “Pillap en pilen komouro” kin wehwehki sapwellimen Siohwa koasoandi kan en kamaiauda aramas peik kan sang dihp oh mehla. Ahnsou pwukat kitail kin ekis paieki pihl wet. Kitail en kalahnganki luhk wet en kohdo oh “ale pilen komour nin duwen kisakis ehu” oh en nantihong ehukihong meteikan.

[Nting tikitik me mi pah]

[Kawehwehpen kilel kan nan ehu ehu pali 9]

Ia uwen kaselel en kapai kan me aramas peik akan pahn paiekihda pahn kaundahn Wehio!