Pohnese Sises me Lapalapasang Moses

“Kaun-o amwail Koht pahn poaronedohng kumwail soukohp emen duwehte eh ketin poaroneiehdo, soukohp menet pahn kohsang nanpwungamwail. Kumwail uhdahn pahn kin rong [ih].”​—WIEWIA 3:22.

1. Ia duwen Sises Krais ketin kamwakid aramas kan nan poadopoad?

SOUNPAR riekid samwalahro, ipwidi en kisin pwutak men kahrehda silepen sihpw kei en rong karis en tohnleng ngedehrie kapikapinga Koht. (Luk 2:8-14) Sounpar 30 mwurin eh ipwidi, seri menet laudlahr oh tepiada doadoahk en kalohk me reirei ki sounpar siluh elep te, ahpw e wekidala poadopoad en aramas. Soupoad ndand men me adaneki Phillip Schaff kin koasoiahki mwahnakapw menet: “Mendahki mwahnakapw menet sohte ntingihdi mehkot, ahpw dahme e wia oh koasoia kin kamwakid aramas tohto en wiahda pwuhk kan, kapahrek de padahk kan, mahlen kan, oh pil koul en kaping kan. Met kin kasalehda me e uhdahn siksang aramas ndand kan koaros nan poadopoad.” Ei, mwahnakapw menet iei Sises Krais.

2. Dahme wahnpoaron Sohn koasoiahki Sises oh Sapwellime doadoahk en kalohk?

² Wahnpoaron Sohn ntingihdi duwen sapwellimen Sises doadoahk en kalohk oh kaimwisekihla ire pwukat: “Oh pil mie soahng tohto me Sises pil ketin wiahda. Ahpw ma se pahn ntingihedi duwen mehkan koaros, I lemeleme me sampah wet sohte kak deukada pwuhk kan me pahn ntingdi.” (Sohn 21:25) Sohn ese me e sohte kak ntingihdi soahng koaros me Sises mahsanih oh ketin wia erein sounpar siluh elep me e kalokalohk sampah. Mendahki Sohn ntingihdi ekeite wiewia kesempwal kan, ahpw dahme e ntingihdi uhdahn katapan ong kitail.

3. Ia duwen kitail kak kalaudehla atail wehwehki sapwellimen Sises pwukoa me pid kupwuren Koht?

³ Likin pwuhken Rongamwahu pahieu kesempwal pwukat, pwuhk teikan nan Paipel pil kin oaritikiada mouren Sises ni ahl ehu me kin kakehlaka atail pwoson. Karasepe, Paipel kasalehda duwen ekei ohl lelepek kan me momour mwohn Sises. Met kin sewese kitail en wehwehkihla laud duwen sapwellimen Sises pwukoa me pid kupwuren Koht. Kitail pahn tehkpene ekei irail.

Ohl Lelepek kan en Mahs me Wia Kasalepen Krais

4, 5. Ihs me wia kasalepen Sises, oh ia duwen?

⁴ Sohn oh sounnting silimen en Rongamwahu teikan kin kasalehda me dahme Moses, Depit oh Solomon kin wia kin kasalehda dahme Sises pahn ketin wia nin duwen Sapwellimen Koht me Keidi Men oh Nanmwarki pilipilda men. Ni ahl dah kan me irail ohl lelepek pwukat kin wia met? Dahme kitail kak sukuhlki sang met?

⁵ Paipel padahkihong kitail me Moses wia emen soukohp, sounkadokepene, oh sounkomour. Pil duwehte Sises. Depit wia emen soun silepen sihpw oh nanmwarki men me kalowehdi imwintihti kan en wehin Israel. Sises pil ketin wia soun silepe men me kin kahluwa sapwellimen Koht aramas akan oh wia nanmwarki men me pahn kalowehdi sapwellime imwintihti kan. (Esek. 34:23) Erein e kin lelepek, Solomon wie kaun erpit men oh pahn eh kaunda, wehin Israel kin ahneki popohl. (1 Nan. 4:25, 29) Sises pil sapwellimaniki erpit laud oh pil kahdaneki “Nanmwarkien Popohl.” (Ais. 9:6) Eri e sansal me sapwellimen Sises pwukoa kin duwehte en ohl lelepek pwukat, ahpw dahme e ketin wia laudsang dahme irail wia me pid kupwuren Koht. Keieu, kitail pahn kapahrekihpene Sises oh Moses oh kilang ia duwen met pahn sewese kalaudehla atail kesempwalki sapwellimen Sises pwukoa me pid kupwuren Koht.

Moses Wia Kasalepen Sises

6. Ia duwen wahnpoaron Piter kawehwehda anahnepen en rong Sises?

⁶ Mwurinte Pendekos pahr 33, wahnpoaron Piter doadoahngki kokohp ehu sang Moses me pweida nan mouren Sises Krais. Piter kesikesihnen mwohn pokon en mehn Suhs kei nan tehnpas sarawio. Aramas ko “ahpw pwuriamweikihla” en Piter oh Sohn kamwahwihala ohl mwoator men, oh re tangala pwehn kilang dahme wiawi. Piter kawehwehda me wiewia kapwuriamwei wet iei sapwellimen Siohwa manaman me Sises Krais ketin doadoahngki. Eri, e doadoahngki Palien Pwuhk Sarawi ni Lokaiahn Ipru oh koasoia: “Pwe Moses mahsanih, ‘Kaun-o amwail Koht pahn poaronedohng kumwail soukohp emen duwehte eh ketin poaroneiehdo, soukohp menet pahn kohsang nanpwungamwail. Kumwail uhdahn pahn kin rong soahng koaros me e pahn kin padahkihong kumwail.’”​—Wiewia 3:11, 22, 23; wadek Deuderonomi 18:15, 18, 19.

7. Dahme kahrehda pokon me rongorong Piter kak wehwehki duwen soukohpo me lapalap sang Moses?

⁷ Ele pokono wehwehki mahsen kan en Moses me Piter kin doadoahngki. Nin duwen mehn Suhs, re kin wauneki Moses. (Deud. 34:10) Irail kin kasikasik ketidohn soukohpo me lapalap sang Moses. Soukohpo pahn kadehdehda me kaidehn ihte sounkomour men ih duwehte Moses, ahpw iei ih me “Mesaiao me Koht ketin piladahr.”​—Luk 23:35.

Soahng kan me Duwehpene Rehn Sises oh Moses

8. Soahng dah kan me duwepenehte nan mouren Moses oh Sises?

⁸ Ekei soahng kan nan mouren Sises nin sampah kin duwehte mouren Moses. Karasepe, ni ara wia kisin seri, ira koaros pitila sang kaun lemei men me men kemeirahla. (Eks. 1:22–2:10; Mad. 2:7-14) Patehng met, ira koaros ‘likwer sang nan Isip.’ Soukohp Oseia koasoia: “Ni ahnsou me Israel wia seri men, iei ahnsou me I poakohng; oh I likwerihedo sang nan Isip oh kahdaneki nei pwutak.” (Os. 11:1) Mahsen en Oseia kin dokedoke ahnsou me wehin Israel, me mi pahn kaun Moses, me Koht ketin pilada, en kahluwa irail sang Isip. (Eks. 4:22, 23; 12:29-37) E pil dokedoke ahnsou me Sosep oh Mery iangahki Sises pwurasang Isip mwurin mehlahn nanmwarki Erod.​—Mad. 2:15, 19-23.

9. (a) Soangen manaman dah kan me Moses oh Sises wiahda? (b) Ia pil ekei soahng kan me duwehpene rehn Sises oh Moses? (Kilang koakon “Ahl Teikan me Sises Duwehte Moses,” nan pali 26.)

⁹ Moses oh Sises koaros wiahda manaman kan me kasalehda me Siohwa kin ketin utungada ira. Mehlel, Moses iei keieun aramas me wiahda manaman kan. (Eks. 4:1-9) Karasepe, Moses wiahda manaman kan me pidada pihl ni eh kahrehiong pillap en Nail oh pihl koaros en Isip en wiahla nta. E pil pwalangpeseng Sehd Weitahta oh kakuswei pihl sang nan paip nan sapwtehno. (Eks. 7:19-21; 14:21; 17:5-7) Sises pil ketin wiahda manaman me pidada pihl. Tepin manaman me e ketin wiahda iei ahnsou me e ketin kawekila pihl ong wain ni kamadipw en kapwopwoudo. (Sohn 2:1-11) Mwuhr, e ketin kameleileidi kisinieng ehu me kohda nan Lehn Kalili. Oh ehu ahnsou, e pil ketiket kohla pohn leho. (Mad. 8:23-27; 14:23-25) Ke kak kilang ekei soahng kan me duwehpene rehn Moses oh Sises, me lapalap sang Moses, nan koakon pali 26.

Pohnese Krais nin Duwen Soukohp Men

10. Ia pwukoahn soukohp mehlel men? Dahme kahrehda Moses wia soangen soukohpo?

¹⁰ Pali laud en aramas kin leme me soukohp men kin kohpada dahme pahn wiawi ahnsou kohkohdo. Ahpw met wia ehu kisehn pwukoa en soukohp men. Soukohp mehlel men kin wia sounkair men en Siohwa, me kin pakairki “soangen manaman kapwuriamwei kan me Koht ketin wiadahr.” (Wiewia 2:11, 16, 17) Eh kokohp kan kak pidada en pakairki dahme pahn wiawi ahnsou kohkohdo, kasalehda soahng kan me pid kupwuren Siohwa, de pakairki sapwellimen Koht kadeik kan. Moses wia soangen soukohpo. E kohpada ehuehu Kalokolok Eisek me wiawi nan Isip. E padahkihong mehn Israel kan kosonned kan en inou en Kosonnedo nin nahna Sainai, oh pil kupwuren Koht. Ahpw kedekedeo, soukohp me lapalap sang Moses pahn ketido.

11. Ia duwen Sises ketin kapwaiada pwukoahn soukohp me lapalap sang Moses?

¹¹ Mwohnte Sises ipwidi, Sekaraia kohpada kupwuren Koht me pid nah pwutak, Sohn. (Luk 1:76) Pwutak menet wiahla Sohn Sounpapidais, me pakairkihda duwen ketidohn soukohp menet me lapalap sang Moses, iei Sises Krais. (Sohn 1:23-36) Nin duwen soukohp men, Sises ketin kohpada soahng tohto. Karasepe, e ketin kohpada duwen sapwellime pwoula, ia duwen met pahn wiawi, ia wasa oh ihs me pahn kemehla ih. (Mad. 20:17-19) Sises pil ketin kohpada kamwomwalahn Serusalem oh tehnpas sarawio, oh irail me kin rongorong ih inenen pwuriamweikihla met. (Mark 13:1, 2) Sapwellime kokohp kan pil leledo nan atail ahnsou.​—Mad. 24:3-41.

12. (a) Ia duwen Sises ketikihdi poahsoanpen doadoahk en kalohk nan sampah pwon? (b) Ia duwen kitail en idawehn mehn kahlemeng ngoang en Sises rahnwet?

¹² Patehng eh pwukoahn soukohp, Sises pil ketin wia emen sounkalohk oh sounpadahk. E kin ketin kalohki rongamwahu en Wehin Koht, oh sohte emen me kin padahk ni eimah duwehte ih. (Luk 4:16-21, 43) E ketin wia sounpadahk keieu lapalap. Ekei me kin rong ih kin koasoia: “Sohte mehmen me kin padahk duwehte ohlo!” (Sohn 7:46) Sises kin ketin ngoangki kalohki rongamwahwo, oh e ketin kamwakid sapwellime tohnpadahk kan en pil ahneki soangen ngoangohte ong Wehio. Ih eri ketikihdi poahsoanpen doadoahk en kalohk oh padahk nan sampah pwon me pil wiawihte nan atail ahnsou. (Mad. 28:18-20; Wiewia 5:42) Sounpar me neklahro, sapwellimen Sises tohnpadahk mpen me isirar kin doadoahngkihla awa lik lime sapw (1,500,000,000) ong kalohki rongamwahu en Wehio oh kin padahki irail kan me perenki rong padahk mehlel kan en Paipel. Ke kin iang doadoahk kesempwal wet ni uwen me ke kak?

13. Dahme pahn sewese kitail en “pepehd”?

¹³ Eri, Siohwa ketin kapwaiada kokohpo me e pahn ketin poaronehdo soukohp emen me duwehte Moses. Ia duwen omw wehwehki met kin kamwakid uhk? Met sou kin kihong uhk koapworopwor me kokohp kan me pid ahnsou kohkohdo pahn pweida? Ei, en doudouloale mehn kahlemeng en Sises, me lapalapasang Moses, pahn sewese kitail en “pepehd oh onohnop” ong dahme Koht pahn ketin wia ahnsou keren.​—1 Des. 5:2, 6.

Kesempwalki Krais nin Duwen Sounkadokepene Men

14. Ia duwen Moses kin kadokepene nanpwungen wehin Israel oh Koht?

¹⁴ Sises ketin wia sounkadokepene men duwehte Moses. Duwehte piris ehu kin kadokepene wasa de pali riau, ih duwen pwukoa me sounkadokepene men kin wia. Moses kin kadokepene inou en Kosonnedo nanpwungen Siohwa oh wehin Israel. Ma kadaudok en Seikop peikiong kosonned en Koht, re pahn wiahte sapwellimen Koht aramas pilipil kei, de sapwellime mwomwohdiso. (Eks. 19:3-8) Inou wet kin wie kadoadoahk sangete pahr 1513 mwohn Krais lao lel pahr 33.

15. Ia duwen Sises kin ketin wia sounkadokepene me siksang Moses?

¹⁵ Nan pahr 33, Siohwa ketin wiahda inou mwahu ehu ong Israel kapw, me iei “Israel en Koht,” me wiawihkihda Kristian keidi kan me kohsang mwomwohdiso kan en sampah pwon. (Kal. 6:16, NW) Mendahki inou me Moses kadokepene kin pidada kosonned kan me Koht ketin ntingihdi ni takai riapali ko, inou me Sises ketin kadokepene kin siksang met. Koht ketin ntingihediong kosonned pwukat nan mohngiong en aramas. (Wadek 1 Timoty 2:5; Ipru 8:10.) Ihme kahrehda, “Israel en Koht” kin wia sapwellimen Koht aramas pilipil kei, de “aramas akan [“wehi,” NW] me pahn kapwarehda wahn” Wehio me Sises pahn ketin kaunda. (Mad. 21:43) Tohn wehi wet iei irail towe kan en inou kapwo. Ahpw, kaidehn irailte me paiekihda met. Aramas ngedehrie, pil irail me melahr kan, pahn ale kapai soutuk pwehki inou lap wet.

Wauneki Krais nin Duwen Sounkomour

16. (a) Ia duwen Siohwa ketin doadoahngki Moses pwehn doarehla mehn Israel? (b) Nin duwen Eksodus 14:13, ihs me wia Utupen komour?

¹⁶ Mwohnte ni pwong me re pahn pedoisang Isip, ekei kadaudok en mehn Israel kan mi nan keper laud. Sapwellimen Koht tohnleng men pahn kereniong keidwei nan sapwen Isip pwehn kemehla mesenih ohl koaros. Siohwa mahsanihong Moses me mesenih ohl koaros en mehn Israel kan pahn mourla ma re ale ntahn sihmpwul en Pahsohpa oh iriski uhr en wenihmw kan oh nan temwen imwarail kan. (Eks. 12:1-13, 21-23) Oh ih met me wiawi. Mwuhr, wehio pwon pil mihla nan keper laud. Irail tengala nanpwungen Sehd Weitahta oh karis en sounpei en Isip me pwakipwakih irail. Siohwa pil pwurehng ketin kapitala irail ni eh ketin doadoahngki Moses en pwalangpeseng sehdo.​—Eks. 14:13, 21.

17, 18. Ia duwen Sises wia sounkomour me lapalapasang Moses?

¹⁷ Mendahki wiewiahn komourla pwukat inenen kapwuriamwei, komourala me Siohwa ketin wiahda ni eh doadoahngki Sises kin laudsang dahme Moses wiahda. Pwehki Sises, irail me peik kan pahn pitsang wie lidu en dihp. (Rom 5:12, 18) Ih komour wet me ‘kihong kitail mour soutuk.’ (Ipru 9:11, 12) Wehwehn mwaren Sises iei “Siohwa Iei Sounkomour.” Nin duwen Sounkomour, de Soundoar men, Sises ketin kapitkitailsang dipatail kan en mahs oh pil ritingada ahl ehu ong kitail en perenki ahnsou kohkohdo. Sang ni eh ketin kapitala irail sang lidu en dihp, Sises ketin komourala sapwellime kan sang engieng en Koht oh kahrehiong irail en ahneki nanpwungmwahu rehn Siohwa.​—Mad. 1:21.

¹⁸ Ni en Sises ketin kapitala aramas akan sang dihp, met pil pidada ahnsou ehu me e pahn pil kasaledekihala irail sang soumwahu oh mehla. Pwehn wehwehki met, kitail tehk dahme wiawi ahnsou me Sises ketila nan imwen ohl me adaneki Sairus. Nah serepeino me sounpar 12 mehla. Sises ketin kamehlelehiong Sairus: “Komw dehr perki mehkot. Komw pwosonte, e ahpw pahn mourda.” (Luk 8:41, 42, 49, 50) Dahme e mahsanih uhdahn pweida ni eh kaiasada serepeino sang mehla. Ke kak medewehla peren me eh pahpa oh nohno ahneki? Ma ei, eri ke pahn wehwehki uwen peren me ke kak ahneki ahnsou me “irail koaros me mihmi nan sousou kan pahn rong kapitie [en Sises], oh re pahn pedoisang nan arail sousou kan.” (Sohn 5:28, 29) Sises iei uhdahn atail Sounkomour oh Soundoar!​—Wadek Wiewia 5:31; Taitus 1:4; Kaud. 7:10.

19, 20. (a) Ia duwen atail kin doudouloale sapwellimen Sises pwukoa me lapalapasang en Moses kin kamwakid kitail? (b) Dahme iren onop en mwuhr pahn koasoia?

¹⁹ En ese me kitail kak sewese aramas kan en paiekihda sang dahme Sises ketin wia pwehn komourala kitail, kin kamwakid kitail en iang wia doadoahk en kalohk oh kasukuhl. (Ais. 61:1-3) Patehng met, ni atail kin doudouloale sapwellimen Sises pwukoa me lapalapasang en Moses, e kin kalaudehla atail likih me e pahn ketin doarehla sapwellime kan ni ahnsou me e pahn ketido pwehn kadeikada me suwed kan.​—Mad. 25:31-34, 41, 46; Kaud. 7:9, 14.

²⁰ Ei, Sises lapalapasang Moses. E ketin wia soahng kapwuriamwei tohto me Moses sohte wia. Sapwellimen Sises mahsen en kokohp oh sapwellime wiewia kan nin duwen sounkadokepene men kin pidada tohnsampah pwon. Nin duwen Sounkomour men, Sises ketikihda komour me poatopoat ong aramas ahpw kaidehn ong ahnsoukiste. Ahpw, kitail kak sukuhlki laud duwen Sises sang ohl lelepek en mahs pwukat. Iren onop en mwuhr pahn koasoia ia duwen Sises lapalapasang Depit oh Solomon.

Ke Kak Kawehwehda?

Ia duwen Sises ketin lapalapasang Moses nin duwen

• Soukohp men?

• Sounkadokepene men?

• Sounkomour men?

[Kawehwehpen kilel kan nan ehu ehu pali 26]

Ahl Teikan me Sises Duwehte Moses

◻ Ira koaros pwilikihdi ara pwukoa laud pwehn papah Siohwa oh sapwellime aramas kan.​—2 Kor. 8:9; Pil. 2:5-8; Ipru 11:24-26.

◻ Ira koaros wia me keidi kei de ‘mesaia.’​—Mark 14:61, 62; Sohn 4:25, 26; Ipru 11:26.

◻ Ira koaros kadehdehda duwen Siohwa ong meteikan, met wehwehki me ira wia wiliepe.​—Eks. 3:13-16; Sohn 5:43; 17:4, 6, 26.

◻ Ira koaros kasalehda aktikitik.​—Nemp. 12:3; Mad. 11:28-30.

◻ Moses kamwenge me tohto; Sises iei me pilawahn komour me kamwenge de komourala me tohto.​—Eks. 16:12; Sohn 6:48-51.

◻ Ira koaros wia sounkopwung oh kihda kosonned.​—Eks. 18:13; Mal. 4:4; Sohn 5:22, 23; 15:10.

◻ Ira koaros ale pwukoa en kaunda sapwellimen Koht aramas.​—Nemp. 12:7; Ipru 3:2-6.

◻ Ira koaros wia sounkadehde lelepek kei en Siohwa.​—Ipru 11:24-29; 12:1; Kaud. 1:5.

◻ Mwurin ara mehla, Koht ketin koasoanehdi paliwar en Moses oh Sises en dehr dierek.​—Deud. 34:5, 6; Luk 24:1-3; Wiewia 2:31; 1 Kor. 15:50; Sud 9.