Peidek Eisek me Pid Wia Nsenen Pwopwoud Pasapengla

1 Ia duwe, dihp me Adam oh Ihp wiahda nan mwetuwel en Ihden kin kohsang ara wiahda nsenen pwopwoud?

▪ Pasapeng: Aramas tohto kin medewe me wahntuhke me keinapwdi nan mwetuwel en Ihden iei wia nsenen pwopwoud. Ahpw met kaidehn ihme Paipel padahngki.

Nna medewehla: Mwohn Ihp eh kapikipikda, Koht ketin kehkehlikihong Adam en dehr kang “wahntuhkehn kehsehki aramas dahme mwahu oh dahme suwed.” (Senesis 2:15-18) Pwehki Adam eh wie kelekelehpw, ihme kahrehda kehkehlik wet sohte kin pid wia nsenen pwopwoud. Patehng met, Koht ketikihong Adam oh Ihp kaweid sansal ira en ‘kaparaparala pwe kadaudokara kan pahn kousoanla wasa koaros nin sampah.’ (Senesis 1:28) Ia duwe, Koht limpoak men pahn ketin kaweid tepin pwopwoudo en naineki seri, me kin pid wia nsenen pwopwoud, oh “kousoanla wasa koaros nin sampah,” ahpw ketin kalokehkin ira mehla pwehki ira kapwaiada sapwellime kaweid?—1 Sohn 4:8.

Pil patehng met, en Ihp pwoudo sohte mihmi reh ahnsou me e kang wahntuhke me keinapwdio. Ahpw ni Adam eh mi reh, liho ahpw kihong en iang kang.—Senesis 3:6.

Siohwa sohte ketin lipwoare Adam oh Ihp ni ara wia nsenen pwopwoud oh nainekihda seri kan. (Senesis 4:1, 2) E sansal me wahntuhke me Adam oh Ihp kangadao sohte wehwehki ara wia nsenen pwopwoud, ahpw iei uhdahn wahntuhke ehu.

2 Paipel kin keinepwihsang aramas nsenamwahu en tuhpenehn pwopwoud?

▪ Pasapeng: Tepin pwuhk nan Paipel kasalehda me Koht ketin wiahda “ohl oh lih” oh inenen “kupwurperenkihda” wiepen nin lime kan. (Senesis 1:27, 31) Mwuhr, Koht ketin kamwakid emen sounnting en Paipel en kihda kaweid pwukat ong ohl pwopwoud kan: “Ke en pereperenki omw pwoud oh rapahki omw peren rehn serepein me ke pwoudiki . . . Eh kaselel en kansenamwahwihiuk.” (Lepin Padahk 5:18, 19) Ia duwe, iren Paipel pwukat kin keinepwihsang aramas nsenamwahu en tuhpenehn pwopwoud?

Ire mehlel kan kasalehda me patehng en naineki seri, Koht pil ketin kapikada dipwisou en kaparapar ni ahl ehu me pwopwoud ehu pahn kak kasalehda ara limpoak oh pepehm ong emenemen pwe ira koaros en perenki. Ehupene wet kak kaitarala en pwopwoud ehu me kin limpoakpene ara ineng en paliwar oh pepehm.

3 Paipel kin pwungki ma ohl emen oh lih emen kin mihpene ma ira sohte kapwopwoud?

▪ Pasapeng: Paipel kasalehda ni sansal me “Koht pahn ketin kadeikada me kin mouren . . . nenek.” (Ipru 13:4) Mie wehwe tohto ong lepin lokaiahn Krihk por·neiʹa. E kin pidada soangen wiepen nsenen pwopwoud koaros me kin wiawi likin koasoandi en pwopwoud.a Ihme kahrehda mwohn silangin Koht, e sapwung me riemen en mihpene mendahte ma ira koasoanehdi en kapwopwoud mwuhr.

Mehnda ma me riemen pil limpoakpene laud, Koht kupwurkihte ira en kapwopwoud mwohn ara wia nsenen pwopwoud. Koht me ketin kapikada kitail en kak kasalehda limpoak. Sapwellimen Koht irair me keieu laud iei limpoak. Ihme kahrehda, e sapwellimaniki kahrepe mwahu en kaweidki kitail me me pwopwoud kante me pahn kak wia nsenen pwopwoud. Iren mwuhr kan pahn kawehwehda met.

4 E pwung en pwoudiki me tohto?

▪ Pasapeng: Koht ketin mweidada erein ahnsou ehu ohl emen en pwoudiki lih tohto. (Senesis 4:19; 16:1-4; 29:18–30:24) Ahpw Koht sohte ketin wiahda koasoandi wet nin tapio pwehki e ketikihong Adam eh pwoud lih tehmen.

Koht ketikihong Sises Krais manaman en pwurehng kapwurehda sapwellime koasoandi en nin tapio me ohl emen en pwoudiki lih tehmen. (Sohn 8:28) Ni Parisi kei kalelapak rehn Sises duwen pwopwoud, e mahsanih: “Sounwiepen aramas eh ketin wiahda ohl oh lih nin tapio . . . oh mahsanih, ‘Iei kahrepen me ohl pahn mweikihsang seme oh ine oh patehng eh pwoud, oh ira riemen pahn wiahla warteieu.’”—Madiu 19:4, 5.

Mwuhr, Koht ketin kamwakid emen tohnpadahk en Sises ako en ntingihedi: “E konehng ohl emen en mie eh pwoud, oh lih emen en mie eh pwoud.” (1 Korint 7:2) Paipel pil mahsanih me ohl pwopwoud men nan mwomwohdisohn Kristian me ahneki pwukoa kan pahn “pwoudiki lihtehmen.”—1 Timoty 3:2, 12.

5 E sapwung pwopwoud ehu ira en doadoahngki wini de wiepen irehdi naineki seri?

▪ Pasapeng: Sises sohte ketin padahkihong irail kan me kin idawehn ih rehn naineki seri de soh. Sapwellime tohnpadahk ko pil sohte kaweidki meteikan ma ren naineki seri de soh. Sohte wasakis nan Paipel me kasalehda ni sansal keinepwdi en doadoahngki wini de wiepe kan ong irehdi naineki seri.

Eri, pwopwoud kan kak pilada ma re pahn ahneki peneinei de soh. Ira pil kak pilada seri depe ira pahn naineki oh iahd. Mie me kin doadoahngki wini ehu me sohte kin irehdi kutohr en liho en patehng mour sang ohlo oh winio kin kemehla kutohro mwurin eh wiawihda, de kahrehda kutohro en dehr mihmi nan kapehden liho. Met pil ehu wiepen kaiohla. Ma pwopwoud ehu pilada ira en doadoahngki wiepe wet, pein ara pilipil oh ira me pahn pwukoahki.b Sohte me pahn kadeiki ira ara wia met.—Rom 14:4, 10-13.

6 E sapwung en kaiohla?

▪ Pasapeng: Mour kin kesempwal ong Koht oh e kin ketin kilangwohng seri nan kapehd en nohno nin duwen mour ehu. (Melkahka 139:16) Koht mahsanih me aramas men pahn pwukoahki ma e kauwehla seri me saikinte ipwidi. Ihme kahrehda, en kemehla seri men me saikinte ipwidi iei tiahk en kamaramas mwohn silangin Koht.—Eksodus 20:13; 21:22, 23.

Ahpw ia duwen ma kahpwal laud ehu pwarada ahnsoun neitik me kahrehda pwopwoudo pahn anahne pilada ihs me pahn mourla, nohno de serio? Ma ih duwen, pwopwoudo pahn pilada ihs rehra me pahn poadoandoarla.c

7 Paipel mweidada mweipeseng?

▪ Pasapeng: Paipel kin mweidada mweipeseng. Ahpw Sises ketikihda kahrepe ehute ong mweipeseng ni eh mahsanih: “Mehmen mweisang eh pwoud ni kahrepe ieu me kaidehn kamwahl, e ahpw pwoudikihda emen lih tohrohr, e wiadahr dipen kamwahl.”—Madiu 19:9.

Koht ketin kalahdeki mweipeseng en pwopwoud me sohte poahsoankihda kahrepe pwung. E pahn ketin kadeikada irail kan me mweisang ar pwoud ni kahrepe ehu me sohte pwung, ahpw mehlel ma kahrepeo iei en pwoudikihda emen tohrohr.—Malakai 2:13-16; Mark 10:9.

8 Koht Kin Ketin Pwungki Ohl Mwahuki Ohl oh Lih Mwahuki Lih?

▪ Pasapeng: Paipel kin kalekeikitailsang tiahk en nenek, me iangahki ohl mwahuki ohl oh lih mwahuki lih. (Rom 1:26, 27; Kalesia 5:19-21) Ni sansal oh inen, Paipel kin kasalehda duwen Koht eh ketin kupwursuwedki soangen mour wet. Ahpw, kitail pil ese “uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”—Sohn 3:16.

Kristian mehlel kan kin kadek ong aramas koaros mehnda ma re sohte kin pwungki tiahk en ohl mwahuki ohl oh lih mwahuki lih. (Madiu 7:12) Koht kupwurki kitail en “wauneki aramas koaros.” Ihme kahrehda, Kristian mehlel kan sohte kin lipilipilki soangen aramas pwukat.

9 E sapwung en doadoahngki telephone, cellphone (sexting), de Internet (cybersex) pwe en rong koasoi de kilang kilel kan me pid wia nsenen pwopwoud?

▪ Pasapeng: Mie me kin doadoahngki telephone pwehn koasoia oh rongorong koasoipen wia nsenen pwopwoud ni ahl me sohte konehng. “Sexting” kin pidada doadoahngki cellphone oh kadaralahng meteikan kilel de lepin lokaia kan me kin kainangihada irail en men wia nsenen pwopwoud. Cybersex kin pid meh riemen ara koasoakoasoia duwen wia nsenen pwopwoud nan Internet.

Paipel sohte kin koasoia duwen doadoahngki soangen dipwisou pwukat. Ahpw e mahsanih: “E sohte konehng mahsenpen mehkot me pidada nenek de soangen samin teikan de noahrok, en kin wiawi nanpwungamwail. E pil sohte konehng kumwail en kin lokaia suwed, kamwan suwed, de lokaia sohte konehng.” (Episos 5:3, 4) Soahng pwukat me duwehte doadoahngki telephone pwehn koasoia duwen wia nsenen pwopwoud, “sexting,” oh cybersex kin kangoange madamadau sapwung me pid nsenen pwopwoud oh kin kangoange aramas akan ren men wia soahng pwukat rehn emen tohrohr likin arail pwoud. Mepwukat sohte kin sewese aramas akan ren powehdi pein arail ineng en wendi rehn emen ahpw e kin kalaudehla arail men kaitarala pein arail ineng.

10 Dahme Paipel padahngki duwen mwadongki pein ahn emen dipwisou en kaparapar?

▪ Pasapeng: Paipel sohte koasoia duwen mwadongki dipwisou en kaparapar. Wiewia wet kin pidada emen eh men kainangihada oh pein kaitarala eh ineng. Ahpw, Mahsen en Koht kin kehkehlikihong Kristian akan: “Kumwail uhdahn pahn kemehla ineng kan en sampah me kin wie doadoahk loalamwail, eri, iet akan; kamwahl, sarsuwed, ineng suwed.”​—Kolose 3:5.

Mwadongki dipwisou en kaparapar kin kalaudehla ahn emen eh madamadau sapwung oh pein eh ineng en roporop me pid wia nsenen pwopwoud. Paipel kin kamehlelehiong kitail me Koht kak ketikihong “manaman lapalap” irail kan me mehleliong arail men uhdihsang wiewia wet.​—2 Korint 4:7.

[Nting tikitik kan me mi pah]