Ia Kahrepen Mourki Kaweid kan en Paipel?
IA DUWE, kaweid en Paipel me pid wia nsenen pwopwoud kin nohk kakos oh pil solahr doadoahk ahnsou wet? Soh. Dahme Paipel mahsanih me pid wia nsenen pwopwoud kak sewese oh perekitail sang soahng pwukat:
▪ Soumwahu suwed kan
▪ Liseian en kiripw
▪ Ohlahn nanpwungen pwopwoud kan
▪ Ohlahn kadeikpen loalatail
▪ Pepehm me aramas kin mwamwahliki oh mwadongkin uhk
Sounkapikpatail, Siohwa Koht, kin ketin kupwurki kitail en perenki oh pil paiekihda sapwellime kisakis kan.a Koht me kin ketin “padahkihiuk pwe en wia kamwahu ehu ong uhk.” (Aiseia 48:17) Aramas men me kin mourki kaweid en Paipel me pid wia nsenen pwopwoud kin paiekihda mepwukat:
▪ Sapwellimen Koht kupwuramwahu
▪ Meleilei en madamadau
▪ Ehupenehn peneinei kin kehlail
▪ Adamwahu
▪ Mie wauwi
Ahpw ia duwen ma ahnsou wet ke sohte kin mourki kaweid kan en Paipel me pid tiahk mwahu? Ke kak wekidala omw mour? Koht pahn ketin kadeik uhk pwehki omw mour en mahs?
Medewehla met: Ekei tohn mwomwohdiso en Kristian kan mahso kin wia mouren nenek, kamwahl, oh ohl mwahuki ohl oh lih mwahuki lih. Ahpw re pilada ren wekidala arail mour oh re paiekihda mehlel ar wia met. (1 Korint 6:9-11) Rahnwet, aramas tohto nan sampah pwon pil kin wiahda soangen wekidekla pwukat. Re saledek sangehr soangen mour suwed pwukat oh paiekihda ar wekidala ar mour pwehn pahrekiong kaweid kan en Paipel. Karasepe, kitail en tehk duwen mour en Sarah me kitail koasoiahpene nin tapio.
“I Mwadangete Nsenamwahula”
Sarah diarada me eh mour saledek mahso sohte kin wadohng ih nsenamwahu me e rapahki. E koasoia: “I pehm me kadeikpen loalei ohlahr. I namenekla oh kin pwunodki I de liseianda de alehdi soumwahu suwed. I kin kamehlelehte me mie Koht, oh I ese me ei mour kansensuwedihala ih. I kin pehm me I mour samin oh ekis ekis e kin kauweiehla.”
Mwuhr, Sarah diarada kehl en wekidala eh mour. E rapahki sawas sang rehn eh pahpa oh nohno me wia Sounkadehdehn Siohwa kei. E pil peki sawas sang rehn Kristian elder koahiek kan nan ehu mwomwohdiso me e karanih. Sarah koasoia: “I pwuriamweikihla limpoak oh kadek en ei pahpa oh nohno oh pil elder kan sang nan mwomwohdiso. I mwadangete nsenamwahula.”
Ahnsou wet Sarah kin apwahpwalih nah seri riemen. E koasoia: “I kin ndaiong nei seri kan duwen pilipil kan me I wiadahr mahs. I mwahuki ira en wehwehki dahme kin wiawihong ie ahnsou me I sohte kin doadoahngki sapwellimen Koht kaweid kan. Ei mehn akadei iei en sewese ira en kalahnganki kamwahu kan ong paliwar, pepehm oh madamadau me ira kak paiekihda sang ni ara pahn idawehn sapwellimen Koht kaweid kan me pid wia nsenen pwopwoud. I kamehlele me Koht kin ketikihong kitail kaweid kan ong tiahk mwahu pwehki e sohte kupwurki emen kitail en medekla.”
Ke pil kak paiekihda omw idawehn sapwellimen Koht kaweid limpoak kan. Paipel inoukihdi met: “Kosonned en KAUN-O me pwung; oh irail kan me kin peikiong kin pereperen. Sapwellime mahsen kan me uhdahn pwung oh kin kamarainihada lamalam en aramas. . . . I kin ale ketingpen ei kin peikiong sapwellimomwi mahsen kan.”—Melkahka 19:8, 11.b
[Nting tikitik kan me mi pah]
a Siohwa iei mwaren Koht me mi nan Paipel.
b Pwehn kalaudehla omw esehla kaweid mwahu oh konehng kan sang nan Paipel, ke kak tuhwong Sounkadehdehn Siohwa kan nan omw wasahn kousoan. De ke kak ntinglahng adres me mi pali 4 de kilang Web site wet www.watchtower.org.
[Kilel nan pali 8]
Irail kan me sohte peikiong kaweid en Paipel kan kin kalapw kahrehdo medek
[Kilel nan pali 9]
Irail kan me kin mourki kaweid kan en Paipel kin ahneki nsenmwakelekel oh pil nanpwungmwahu nan arail peneinei