Sises Krais Atail Peidek kan Pasapengla

“Ihs me re kin wiahkin ie?”​—LUK 9:18.

SISES keinemwe rehn sapwellime tohnpadahk ko peidek wet pwehki e mwahngih me aramas akan ahneki soangsoangen madamadau kan duwen ih. Ahpw sohte kahrepen ren kin pingkihda met. Sises sohte kin ketin ruksang aramas de ketin wia mehkot ni rir. Ahpw, e kin ketin patehng aramas akan nan arail wasahn kousoan oh pil nan kahnimw kan. E kin ketin kalohk oh padahk wasa koaros pwehki e kupwurki aramas akan en esehla padahk mehlel duwen ih.​—Luk 8:1.

Padahk mehlel duwen Sises kak dierek nan sapwellime mahsen oh wiewia kan me kileldi nan Pwuhken Rongamwahu pahieu—Madiu, Mark, Luk oh Sohn. Dahme kileldi iei poahsoanpen pasapeng kan ong atail peidek kan duwen Sises.​—Sohn 17:17.

PEIDEK: Sises uhdahn mie nan poadopoad?

PASAPENG: Ei. Soupoad akan, iangahki Josephus oh Tacitus me mour ni mwehin wahnpoaron ko koasoiahki Sises nin duwen aramas ndand men nan poadopoad. Kesempwal sang met, Pwuhken Rongamwahu ko kadehdehda ni mehlel me Sises uhdahn wia aramas men a kaidehn emen me mi nan soai pwoat. Mehn kadehdeo kin oaritikiada ahnsou kan oh wasa me soahng kan kin wiawi ie. Karasepe, sounnting en Rongamwahu Luk ntingihedi duwen kaun isimen pwehn kasalehda pahr me Sises ketin tapiada sapwellime doadoahk en kalohk, oh soupoad kan pil kadehdehda duwen ederail ko.​—Luk 3:1, 2, 23.

Mehn kadehde me Sises uhdahn mi nan poadopoad uhdahn kehlail. Ehu pwuhken poadopoad koasoia: “Pali laud en irail kan me ale sukuhl laud pahn nda me ohl emen me aramas kin esehki Sises mehn Nasaret uhdahn mour mpen sounpar 2,000 samwalahr ko.”​—Evidence for the Historical Jesus.

PEIDEK: Sises iei Koht?

PASAPENG: Soh. Sises sohte ketin wiahki me e pahrekiong Koht. Ahpw, Sises kin ketin pwurepwurehng kasalehda me e mi pahnangin Siohwa.a Karasepe, Sises patohwanohng Siohwa, “ei Koht” oh “komwihte Koht mehlel.” (Madiu 27:46; Sohn 17:3) Emen me mi pahnangin emen kin doadoahngki lepin lokaia pwukat. Tohndoadoahk men me kin wiahki eh kauno, “ei kaun” de “emen me kakaun mehkoaros” kin kasalehda ni sansal me e mi pahnangin eh kauno.

Sises pil ketin kasalehda me e tohrohr sang Koht. Ehu pak, Sises mahsanihong irail ko me kin uhwong sapwellime manaman en kaunda: “E pil ntingdier nan amwail Kosonnedo, ni en sounkadehde riemen ara koasoi eh pwungpene, ih me mehlel. Eri, I kin kadehdehda duwen pein ngehi, oh Semei me ketin kadariehdo e pil ketin kadehdehda duwen ngehi.” (Sohn 8:17, 18) Sises uhdahn tohrohr sang Siohwa. Pwe ma soh, a ia duwen aramas akan ar kak kilangwohng ira nin duwen sounkadehde riemen?

PEIDEK: Sises wiahte aramas mwahu men?

PASAPENG: Soh. E sohte ketin wiahte aramas mwahu men. Sises mwahngih me e sapwellimanki pwais kesempwal tohto en ketin kapwaiada kupwuren Koht. Iet ekei pwais pwukat:

● “Sapwellimen Koht Iehros.” (Sohn 3:18) Sises mwahngih wasa me e ketsang ie. E ketin momourier mwohn e ketin ipwidi nin sampah. E ketin kawehwehda: “I kohdihdo sang nanleng.” (Sohn 6:38) Sises iei me Koht ketin tepin kapikada, oh e ketin sawas ni ahnsou me soahng teikan koaros kapikipikda. Pwehki ihete me Koht ketin pein kapikada, e konehng Sises en kak ketin adaneki “Iehros en Koht.”​—Sohn 1:3, 14; Kolose 1:15, 16.

● “Nein-Aramas.” (Madiu 8:20) Pak tohto Sises ketin wiahki pein ih “Nein-Aramas,” ni eh ketin doadoahngki mwar wet me pwarada pak 80 nan pwuhken Rongamwahu ko. Mwar wet kasalehda me ih uhdahn aramas men a kaidehn Koht me wia aramasala. Ia duwen sapwellimen Koht Iehroso eh ketin ipwidi nin duwen aramas men? Siohwa ketin doadoahngki sapwellime manaman en ketin kasaualahng mouren sapwellime Ohlo nan kapehden lih en Suhs meipwon men Mery, oh kahrehda eh liseianda. Met kahrehda Sises ketin ipwidi wia aramas unsek oh soh dipe men.​—Madiu 1:18; Luk 1:35; Sohn 8:46.

● “Sounpadahk.” (Sohn 13:13) Sises ketin kasalehda ni sansal me sapwellime pwais me Koht ketikihong iei en “kawekawehweseli” oh “kapakapahrengki Rongamwahu en Wehin Koht.” (Madiu 4:23; Luk 4:43) E ketin kawehwehda ni sansal oh mengei en wehwehki dahkot Wehin Koht oh ia duwen Wehio eh pahn kapwaiada kupwuren Siohwa.​—Madiu 6:9, 10.

● “Mahseno.” (Sohn 1:1) Sises ketin papah nin duwen sapwellimen Koht Sounkair men. Siohwa ketin doadoahngki ih en kahrehiong aramas akan en rong sapwellime kaweid kan. Siohwa ketin doadoahngki Sises pwehn ketin kairehki tohnsampah sapwellime Mahsen.​—Sohn 7:16, 17.

PEIDEK: Sises iei Mesaiao me inoupe mie?

PASAPENG: Ei. Kokohp en Paipel kasalehda ketidohn Mesaiao de Krais, me wehwehki “me Keidi Men.” Me Inouda Menet pahn wia pwais kesempwal ehu en kapwaiada kupwuren Siohwa. Ehu pak, lih en Sameria men patohwanohng Sises: “I ese me Mesaia, me nanmwarki Krais, pahn ketido.” Sises eri mahsanihong ni sansal: “Iei ngehi ih, me koasoakoasoi ong uhk.”​—Sohn 4:25, 26.

Mie mehn kadehde me Sises iei uhdahn Mesaiao? Mie mehn kadehde kehlail siluh me kak kadehdehda ihs Sises, duwehte lipwen sendin pehn emen eh kak kadehdehda ihs ih. Ia duwe, Sises pahrekiong mehn kadehde pwukat? Song tehk ire pwukat:

● Peneinei me e ketsang ie: Paipel kohpada me Mesaiao pahn ketsang peneinei en Depit me wia kadaudoken Eipraam. (Senesis 22:18; Melkahka 132:11, 12) Sises ketin wia kadaudok en ira koaros.​—Madiu 1:1-16; Luk 3:23-38.

● Kokohp kan me pweidahr. Palien Pwuhk Sarawi ni Lokaiahn Ipru audaudki kokohp tohto duwen sapwellimen Mesaiao mour nin sampah, iangahki oaritikpen sapwellime ipwidi oh pwoula. Sises ketin kapwaiada kokohp pwukat koaros. Ekei kokohp ko padahkihong kitail: E ketin ipwidi nan Pedleem (Maika 5:2; Luk 2:4-11), e ketin wisikdohsang Isip (Oseia 11:1; Madiu 2:15), oh e ketin kamakamala oh sohte tih pwoat reh timpeseng (Melkahka 34:20; Sohn 19:33, 36). Sohte wiepe ehu me Sises kak pein ketin koasoanehdi sapwellime mour en pahrekiong ire mehlel ko me anahn pwehn kapwaiada kokohp koaros me pid Mesaiao.b

● Koht pein ketin kadehdehda. Ni ahnsou me Sises ketin ipwidi, Koht ketin poaronehdo tohnleng kei ren padahkihong sounsilepen sihpw kei me Mesaiao ketin ipwidier. (Luk 2:10-14) Pak kei, pein Koht ketin mahsendihdo sang nanleng oh ketin kasalehda me e ketin kupwurperenki Sises erein sapwellime doadoahk nin sampah. (Madiu 3:16, 17; 17:1-5) Siohwa ketin kahrehda Sises en ketin wiahda manaman kehlail kan pwehn kadehdehda me Sises iei Mesaiao.​—Wiewia 10:38.

PEIDEK: Dahme kahrehda Sises ketin anahne lokolok oh pwoukihla?

PASAPENG: Pwehki Sises sohte dipe, e sohte konehng en lelohng lokolok kan. E sohte pil konehng en ketin poasdahng ni tuhkehn kalokoloko oh langalang lao e pwoula ni mwohmw kanamenek duwehte me re kin wiahiong aramas suwed men. Sises mwahngih me e pahn lelohng lokolok pwukat oh ketin mweidala pein ih en lelohng mepwukat.​—Madiu 20:17-19; 1 Piter 2:21-23.

Kokohp kan en Mesaia kasalehda me Mesaiao anahne lelohng lokolok oh pwoula pwehn pwainla dipen meteikan. (Aiseia 53:5; Daniel 9:24, 26) Pein Sises mahsanih me e ketido “pwe en tounmeteikihla moure, pwe me ngeder en maiauda.” (Madiu 20:28) Irail kan me kin pwoson pweinen meirong en sapwellime pwoula kin ahneki koapworopwor en pitsang dihp oh mehla oh ahneki mour soutuk nan Paradais nin sampah.c​—Sohn 3:16; 1 Sohn 4:9, 10.

PEIDEK: Kitail kak uhdahn kamehlele me Sises ketin iasada sang mehla?

PASAPENG: Ei. Sises ketin uhdahn kasik me e pahn ketin iasada sang mehla. (Madiu 16:21) Ahpw e kesempwal kitail en ese me Sises oh sounnting en Paipel kan sohte pak ehu koasoia me Sises pein iasada sang mehla. Re sohte douluhl kamehlele soangen madamadau wet. Pwe Paipel mahsanih: “Koht ketin kaiasadahr sang mehla, oh ketin kasaledekihalahr sang medek en mehla.” (Wiewia 2:24) Ma kitail pwungki me mie Koht oh ih me Sounkapikpen mehkoaros, eri kitail uhdahn pahn kamehlele me e kak ketin kaiasada sapwellime Ohlo sang mehla.​—Ipru 3:4.

Mie mehn kadehde kehlail me Sises ketin iasada? Menlau tehk ire pwukat:

● Dahme sounkadehde kan koasoia. Mpen sounpar 22 mwurin Sises eh ketin pwoula, wahnpoaron Pohl ntingihedi me mie aramas daulih 500 me pein kilangki meserail Sises mwurin eh ketin iasada. Pali laud en irail momourte ni ahnsou me Pohl intingihedi duwen met. (1 Korint 15:6) Ma Sounkadehde emen de riemente, aramas kak kelikemwe, ahpw ihs me pahn kelikemwe aramas 500 me pein kilangki meserail Sises?

● Sounkadehde likilik kan. Sapwellimen Sises tohnpadahk ko me ahneki pwais tohrohr en ese dahme uhdahn wiawi kin eimah kalohki me Sises ketin iasadahr. (Wiewia 2:29-32; 3:13-15) Ni mehlel, re wiahki sapwellime kaiasada ire kesempwal ong pwoson en Kristian. (1 Korint 15:12-19) Tohnpadahk pwukat kin mendahkihla ma re mehla sang arail kesehla arail pwoson Sises. (Wiewia 7:51-60; 12:1, 2) Ia omw madamadau duwen emen me men mehkihla mehkot me e ese me likamw?

Kitail koasoiapenehr pasapengpen peidek kesempwal weneu duwen Sises sang nan Paipel. Pasapeng pwukat kin padahkihong kitail ni sansal ihs Sises. Ahpw ia duwe, pasapeng pwukat uhdahn kesempwal? E kin kesempwal ong uhk dahme ke pilada ken kamehlele duwen Sises?

[Nting tikitik kan me mi pah]